En Ansand, Muvurikany Sakatang Wen Mujim Katat
“Muvurika Sakatang wey mu machuku ma usand wey.” —MUL. 12:1.
1. Ov, mutapu ik umekeshinay Yehova anch uyichingejidin ansand amwifukwidila?
YEHOVA uyimen ansand in Kristu akwet usey ukash ni atudishin mudi maum. Chakin, ndiy wasambela kulond anch pa dichuku dia “usu wa amasalay” a Mwanend, ansangarum ni ayangadim “akwizul sens ni muchim ukash” mu mudimu wa Ukristu. (Kus. 110:3, NW) Uprofet wadinga ufanyidin kuwanyin pa chisu chikezau antu awonsu kumudiburil Nzamb, akwatikan nakash nich yom yau ni kusot kwau nfalang, ni kubwambwil. Pakwez, Yehova wadinga wij anch ansand akeza kumwifukwil akez kushalijan. Ruchingej mudi ik tufanyidina kwikal nich mudiau akadivar netu ansangarum ni ayangadim!
2. Chirumburikin ik kumuvurik Yehova?
2 Tongin musangar ukutwishay kwov Nzamb payimenay ansand amuvurikina ndiy mudi Sakatang Mujim wau. (Mul. 12:1) Chakin kamu, mu kumuvurik Yehova mudi yom yivud kupandakanamu kumuvurikang kusu mu manangu. Kurumburikin kusal chisal—kusal yom yisangaredinay, kusal anch yijil ni mbil yend yitutakela pichuku-pichuku. Kurumburikin kand kumuchingejin Yehova, ni kwijik anch utumbangidin nakash. (Kus. 37:3; Is. 48:17, 18) Ov, mwamu wovila piur pa Sakatang Mujim wey?
“Mukungamena [Yehova] ni Muchim Wey Wawonsu”
3, 4. Mutapu ik wamekeshay Yesu anch umukungamedin Yehova, ni mulong wak chidi cha usey kumukungamen Yehova ilel?
3 Chilakej chipandakena kuwap cha muntu wamukungamena Nzamb chadinga, chakin kamu cha Yesu Kristu. Ndiy washakama kukwatijan nich Jinswir 3:5, 6 jilondil anch: “Mukungamena [ Yehova] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.” Kachisu kakemp kamu kupwa kwa dibabatish diend, Satan wamushejina Yesu, wapakisha kumwoz chakwel itiyija usu ni ntumb ya mangand. (Luka 4:3-13) Chakasikana kumudimb Yesu. Ndiy wadinga wij anch “kupit dipit, ni katumb, ni mwom” yakin yadinga chibudikin cha “kwitudish ni kumwov [ Yehova] wom.”—Jinsw. 22:4.
4 Mangand m’ilel amayikedil nich ris ni choy. Mu mwikadil mudi winou, tukusadil manangu anch twimburij chilakej cha Yesu. Lam kand mu manangu anch, Satan ukusal usu wend wawonsu chakwel ayidimba atushalapol a Yehova ayidiosha mu kanjil kiwongina kayila ku mwom. Satan usotil amumana muntu win mwawonsu mwi njil yijim yiyila ku disheshik. Kangal akudimba! Pakwez, kwat mupak wa kushal ushinshamena kudi Sakatang Mujim wey. Mukungamena ndiy mu yawonsu, ni lamat ba ku “mwom udia wakin,” udia chakin kamu piswimp kushik.—1 Tim. 6:19.
Ansand, Ikalany in Manangu!
5. Mutapu ik wiyovila piur pa dikez dia mangand minam?
5 Ansand amuvurikina Sakatang Mujim wau akwet manangu mapandakenamu mivu yikwetau. (Tang Kuseng 119:99, 100.) Mulong itiyijin chitongijok cha Nzamb, ij nawamp win kamu mutapu uyila ni kujiy yom yichingejinau ya mangand minam. Ap mu mwom wen wiswimp, en ansand chakin kamu umenany wakad kwidjidjek anch wom ni kwiyakamish yiwejidinaku nakash. Anch uchidiany ku shikol, wateshinanyap kal piur pa kuyip kwa rikind, chirungul chikash pa divu, kusheshik kwa matikit, ni milong yikwau yidia mudi yiney. Antu akamin nakash piur pa kuya kurutu kwa milong yiney, pakwez ching kusu Atuman a Yehova awiy ateshina chakin kamu anch yom yiney yidi yimwing ya yijingidij yilejena anch mangand ma Satan madi piswimp ni kupwa.—Kubur. 11:18.
6. Mutapu ik wayidimbau ansand amwing?
6 Cha ushon, atushalapol amwing ansand a Nzamb alika kucha ku mes ni ashadisha usu wau wa kuman kachisu kakemp kashadilaku ka mangand. (2 Pita 3:3, 4) Akwau ayidimba ni awila mu yitil yikash ni mu pornografi kusutil kudi arund ayimp. (Jinsw. 13:20) Chikwikal cha ushon mudi ik kushadish kwitiyik kudi Nzamb pa chisu chinech tudia piswimp ni nsudiel! Pakwez, ilejinany kusutil ku yom yayishikena in Isarel mu muvu wa 1473 K.C.C. padingau mwi Mpay ya Mowab, mwinzezil mwin kamu mwa Ngand ya Kushilamu. Chom ik chasadikaku?
Awa Padingau Piswimp ni Kushik
7, 8. (a) Nkeu ik yasadila Satan mwi Mpay ya Mowab? (b) Nkeu ik yisadidilay Satan ilel?
7 Kwinyim pa chisu chinicha, Satan wasota patok kamu kuyikangesh in Isarel kuswan uswan wau wayishilaumu. Pakanganay kuyishing kusutil kudi profet Balam, Satan wasadila nkeu yikwau yijingamena nakash; wapakisha kusal chakwel ashadisha kwitiyik kwau kudi Yehova. Amband in kusochik a mu Mowab awiy asadilau mulong wa kuyoz, ni pa chisu chinech Djabul wayitwisha mu chilik kanang. Antu asambisha kusal masandj ni ayangadim a mu Mowab ni kumwifukwil Bal wa Peyor! Chikalap nchik usey ukash wa uswan wau, Ngand ya Kushilamu, yadinga piswimp, in Isarel 24000 ashadisha mwom wau. Chinship chiyimp mudi ik!—Kuch. 25:1-3, 9.
8 Ilel, tudi mwinzezil ya ngand ya kushilamu yipandakenamu kuwamp—ditenchik disu dia yom. Mudi mudinga chaku chend, Satan usadidil kand masandj mulong wa kuyijondish antu a Nzamb. Yijil ya ngikadil ya mangand yafil kal ni masandj amamen kwau anch mawapin ni kumanijan kwa antu a mujimbu umwing akumen kwau mudi mulong ukutonday muntu amwinend. Nambaz umwing mwin Kristu walonda anch: “Ching kusu kwol kwetu ni ku Chot cha Want kwawiy kukatau kwilej an am anch kumanijan kwa antu akweta mujimbu umwing ni kusal masandj ni muntu wakad kwatijan nend kuyipin ku mes kwa Nzamb.”
9. Yom ik yikutwisha kushiken pa ‘usand,’ ni mutapu ik ukutwishau ansand kura nich?
9 Ansand amuvurikina Sakatang Mujim wau ij anch kumanijan kwa ikundj ni mband kudi chipan chitumbila chikwatina ku mwom ni mulong wa kuval. Chawiy lel, awiy ij anch kumanijan kwa ikundj ni mband kufanyidin kusadik ching mudi mwatenchikay Nzamb—mu ditenchik dia uruw. (Heb. 13:4) Pakwez, pa ‘usand’—chirung chidinga maku makash ma ukundj ni wimband ni makutwish kushadish manangu mawamp—chikutwish kwikal chikash kushakam wishitwila. (1 Kor. 7:36) Chom ik ufanyidina kusal anch yitongijok yiyimp yakwez mu manangu? Mulembila Yehova nakash akukwash utongijokina pa yom yiwamp. Yehova uyiteshining antu akarumukina chakin kamu kudi ndiy. (Tang Luka 11:9-13.) Mambamb matungina makutwish kand kutukwash kutek manangu pa yom yiwamp.
Tondany Jintong Jen Nich Manangu!
10. Ngikadil ik yiyimp ya manangu yitusotila kwiyep, ni chiyul ik cha manangu chitufanyidina kwiyipul?
10 Diyingish dimwing disadila anch ansand avud adia mu mangand katwishinap kwilam ni ashich kulondul nich misangar ya mujimbu didi anch kakwetap kwau “yishimu ya Nzamb”—kakwetap umutakel wa Nzamb ap kakwetap ruchingej rakin mulong wa machuku ma kurutu. (Jinsw. 29:18) Adi mudi in Isarel amudiburila Nzamb adinga pa dichuku dia Isay, ashakama kwau mulong kusu wa ‘kwisangaresh ni kuzangijal, mulong wa kudia ni kuna maar ma nviny.’ (Is. 22:13) Pa ndond pa kuyovil ris antu inay, ov, mulong wak ulikina kutongijokin bil pa ruchingej ripandakena kuwap ratekay kal Yehova kurutu mulong wa antu ashinshamena kudi ndiy? Anch udi kashalapol nsand wa Nzamb, ov, uchingedin nich impu yikash mangand masu madia kurutu? Ov, usadil usu wawonsu chakwel “kushakam ni michim yitudila ni yitentamina . . . mudi [muukata] kutalang ruchingej ra chiyukish” rakutekinau kal kurutu kudi Yehova? (Tit. 2:12, 13) Chakul chey chikez kwikal nich usu pa jintong jey ni pa yom yey ya kusambish yiwitekidina.
11. Ov, mulong wak ufanyidinau kusal usu ukash ansand in Kristu achidia ku shikol?
11 Mangand masotil anch ansand asina mausu mau pa jintong ja ku mujimbu. Chakin kamu, amwing a pakach pen achidia ku shikol afanyidin kusal usu nakash chakwel ikala nich malejan mawamp. Oku, rutong ren ra kusambish ridiap kwau kusu ra kutan mudimu uwamp pakwez kand ra kwikal asadidilau nawamp mu chikumangen ni ra kwikal katwambil wa Want usongina mabuj. Pa chinech, uswiridin kwikal utwishina kulond nawamp, kutong nawamp, ni kutongijokin kuwamp ni kuyilimish antu akwau. Chikalap nchik mwamu, ansand ilejina Bibil ni asadila usu wa kusadil yijil yidiamu mu mwom yau atambwil malejan mapandakenamu ni itekidin mufulandal uwamp mulong wa dikez diwamp ni dia chikupu.—Tang Kuseng 1:1-3.a
12. Chilakej ik chifanyidina majuku ma Ukristu kwimburij?
12 Mu Isarel, kuyilej an kudi anvaj au kwadinga kwa usey ujim. Malejan minam makwata ku mitambu yawonsu ya mwom, pakampwil pa milong ya muspiritu. (Kuvur. 6:6, 7) Chawiy, ansand in Isarel ayitesha anvaj au ni amapal akwau adinga amwovila Nzamb wom, atambula kichadingap kusu ronganyin pakwez kand manangu, njingunin, chovu, ni ukaliweny wa kutong—ngikadil yidiokilinga ching ku malejan ma Nzamb. (Jinsw. 1:2-4; 2:1-5, 11-15) Majuku ma Ukristu m’ilel mafanyidin kuta muchim pa malejan minam.
Yitesha Antu Akukatila
13. Yiyul ya mutapu ik yikatau kuyiyul ansand amwing, ni mulong wak ufanyidinau kubabal?
13 Ansand ayiyudiling kudi antu a mitapu yawonsu—pamwing ni in kuyulan pa mulong ya shikol, atongininga ching kusu kupandakan mu yom ya ku mujimbu ya mangand. Tongijokin bil amboku yiyul yiney yawonsu nich ukwash wa malembil kukwatijan nich chitokish cha Dizu dia Nzamb ni yakudia ya muspiritu yiletinay chisak cha kashalapol ushinshamena ni kubabal. Kusutil ku dilejan diey dia Bibil, wij anch ansand ni antu akad manangu awiy diloz dia Satan. Chilakej, mu chir cha Eden, Eve wadinga wakad manangu wamutesha Satan, ngendj wadinga kand kal amumekeshinap rukat. Kwela kwikal chibudikin chishalijadina mudi ik anch wamutesha Yehova, wamumekeshina rukat rend mu jinjil kushalijan!—Dis. 3:1-6.
14. Ov, mulong wak tufanyidin etu awonsu kumutesh Yehova ni anvaj akaritiy?
14 Sakatang Mujim wey ukukatin, ni ukumekeshin mu jinjil jishitwila. Ndiy ukusotidin wikal mu chisambu cha chikupu, kichidiap kwau ching katat kusu! Chawiy, nich rukat kusutil kudi nvaj mwin kukubangin, ukulejin ni kudi awonsu amwifukwidila anch: “Njil ya kuya yawiy ey. Yangany mwinimwa.” (Is. 30:21) Anch ukwet anvaj akaritiy amukatina chakin kamu Yehova, ukwet chiyukish chikwau. Yitesha nich kalimish chiyul chau pakutekidinau yom ya kusambish ni jintong ja mu mwom. (Jinsw. 1:8, 9) Oku, akusotidin wikal nich mwom, chom cha usey nakash kupandakanamu dipit ap ntumb ya mangand minam.—Mat. 16:26.
15, 16. (a) Ruchingej ik tukutwisha kwikal nich mudiay Yehova? (b) Dilejan dia usey mudi ik twilejidina ku yamanay Baruk?
15 In amuvurikina Sakatang Mujim wau aswapeshining mwom wau, ij anch Yehova kakez kuyilikap ap pakemp antu inay ap kuyisha ap pakemp. (Tang Hebereu 13:5.) Mulong ngikadil yiney yishitwila yipwitijadin nich yitongijok ya mangand, tufanyidin kubabal kangal spiritu wa mangand ikal nich usu padi etu. (Efes 2:2) Pa mulong winou, tushinshikinany chilakej cha Baruk kalerik wenday Yeremiy, wadingaku pa chisu cha machuku makash ma nsudiel ma Yerusalem maya djat ku kusheshik kwa musumb mu muvu wa 607 K.C.C.
16 Chitwishikin anch Baruk wasota ikala nich mapit mawamp mu mwom. Yehova wachimana ni nich ranaken wamubabesha Baruk alika kwikimbin amwinend “yom yiwamp.” Baruk wamekana kwikal muntu wikepishina ni wa manangu, mulong wamutesha Yehova ni wapanda ku disheshik dia Yerusalem. (Yer. 45:2-5) Ku mutambu ukwau, ambay a Baruk iruzukina “yom yiwamp” ya mapit, amubachikina Yehova pa ndond ya kaad, ashadisha yom yawonsu mu makas ma in Babilon. Ni akwau avud afa. (2 Jins. 36:15-18) Yamanay Baruk yitukwashin tumana anch urund uwamp ni Nzamb udi wa usey ujim kupandakanamu mapit ni ntumb ya mangand minam.
Tal Yilakej Yiwamp
17. Ov, mulong wak Yesu, Paul, ni Timote adi yilakej yiwamp kudi atushalapol ilel a Yehova?
17 Chakwel kutukwash twenda nawamp mwi njil yiyila ku mwom, Dizu dia Nzamb ditwinkishin yilakej yivud. Chilakej, Yesu, wadinga muntu umwing upandakenamu mu ukaliweny wadingay nich, pakwez wakungina mwom wend pa chom chikeza kuyikwash antu chikupu—“rusangu ruwamp ra want.” (Luka 4:43) Chakwel amwinkish Yehova chipandakenamu kuwap chend, kambuy Paul walika mudimu wend wa ntumb ni wasadila chisu chend ni usu wend mulong wa kulejan rusangu ruwamp. Timote, mwanend “wakin mu ritiy,” wimburija chilakej chiwamp cha Paul. (1 Tim. 1:2) Ov, Yesu, Paul, ni Timote inana piur pa mwom wikalau nich? Chakapuk chaya mwang! Chakin kamu, Paul walonda anch watala yom yela kumwinkish mangand mudi “chom chamwamu” kuyilakej nich chisend cha kumusadil Nzamb.—Filip. 3:8-11.
18. Chikarumun ik chijim chasalay mukadivar umwing nsand, ni mulong wak kinanap?
18 Ansand avud in Kristu ilel imburijin ritiy ra Yesu, Paul, ni Timote. Chilakej, mukadivar umwing nsand wadinga usadil mudimu kwadingau ni kumufut nfalang jivud wafunda anch: “Mulong nading nishich kukwatijan nich yijil ya Bibil, akandjika pa ndond ya piur ku mudimu. Chikalap nchik kwiwejin kwa nfalang, niyova anch nadinga nilondwil kwam rikind. Panaya kutal komite wa in kwendish mudimu ni nayileja maswir mam ma kusadil mudimu wa chisu chawonsu, angikisha swa nfalang jikwau, nich kutong anch nikushal. Pakwez muchim wandinga wakwatin kal mupak. Antu avud kakutwishap atesh mulong wak nadiokala ku mudimu wa nfalang jivud niya nikasala mudimu wa chisu chawonsu. Chakul cham chadinga chinech: nisotil chakin kamu kushakam nich kwipan kwam kudi Nzamb. Mulong mwom wam wasidin ching pa yom ya muspiritu, nikwet chilik cha musangar ni mazang yakad kutwish nfalang ap ntumb kwingikish.”
19. Kutond ik kwa manangu kuyikasikeshinau ansand atonda?
19 Mu mangand mawonsu, tunan twa ansand twasala kal mwamu. Komb, ansand, piutongidinanya machuku men ma kurutu, lamany dichuku dia Yehova mu manangu. (2 Pita 3:11, 12) Kangal wayovilany ris in isakidina nakash mangand. Pakwez, yiteshany antu akukatinanya chakin kamu. Kwitekin “yipau yen mwiur” kudi kwitekin kumwing kujim kwa diking kuukutwisha kusal ni kwawiy kudia nich yiyukish ya mwom wa chikupu. (Mat. 6:19, 20; tang 1 Yohan 2:15-17.) Inge, muvurikany Sakatang Mujim wen. Anch wamuvurikany, Yehova ukukuyukishany.
[Mazu madia kwishin kwa paj]
a Piur pa shikol ja piur ni yitadina mudimu, tal Chinong cha Kalam, cha Mwinkind 1, 2005, pa paj wa 27-32.
Ov, Uvurikin?
• Mutapu ik tukutwisha kumekesh anch tumukungamedin Nzamb?
• Misu malejan ma usey nakash?
• Malejan ik mitukutwisha kwilejin kudiay Baruk?
• Anany adia yilakej yiwamp, ni mulong wak?
[Chipich chidia pa paj wa 13]
Yehova uletin malejan ma usey nakash
[Chipich chidia pa paj wa 15]
Baruk wamutesha Yehova ni wapanda ku disheshik dia Yerusalem. Chom ik ukutwisha kwilejinaku?