Kimbany Umutakel Wa Nzamb Mu Yom Yawonsu
“Mwamu mudia Nzamb mujim, udi Nzamb wetu chikupu ni chikupu. Ndiy mwin kututakel chikupu.”—KUS. 48:14.
1, 2. Ov, mulong wak tufanyidina kulondul umutakel wa Yehova pa ndond pa kukungamen manangu metu, ni yipul ik yidiaku?
PITUSHINSHIKIDINA yom ya chamwamu ap ya ubaj, chiswapel twidimba ayinetu. (Jinsw. 12:11) Anch tusotil chakin kamu kusal chom chakadiay mwin Kristu kufanyin kusal, chisu ni chisu muchim wetu ukutwish watubachik kuchisal. (Yer. 17:5, 9) Chawiy, mwin kufund kuseng wamekesha manangu pamulembilay Yehova anch: “A tum kutok kwey ni uyakin wey yitankela ni yitwala.” (Kus. 43:3) Wamukungamena Yehova, kichadingap mu manangu mend makemp, ni Yehova wikala musul wend wa kumutakel nawamp. Mudi mwin kufund kuseng, niyetu tukusal cha manangu kuchingejin umutakel wa Nzamb.
2 Ov, mulong wak lel, tufanyidin kukungamen umutakel wa Yehova kupandakanamu yawonsu? Chisu ik tufanyidin kuukimb? Ngikadil ik tufanyidina kukudish chakwel anch tuwisakina, ni mutapu ik ukatay Yehova kututakel ilel? Yipul yiney yijim tukuyisambin mu mutu winou.
Mulong wak Tufanyidin Kukungamen Umutakel wa Yehova?
3-5. Chidi mulong wa mayingishin ik tuchingejidina umutakel wa Yehova?
3 Yehova udi Tatukwetu wa mwiur. (1 Kor. 8:6) Ndiy utwij nawamp umwing ni umwing wetu ni ukutwish kutang nawamp michim yetu. (1 Sam. 16:7; Jinsw. 21:2) Mwant David wamuleja Nzamb anch: “Wingij kal pinishicha pansh, ni pinikutumbuk piur, ukat kwijik yitongijok yam kulemp. Inge [ Yehova], dizu diam diawonsu, ni diakad kal kushik ku rudim ram, ey wadijik kal kwey.” (Kus. 139:2, 4) Mudi mutwijay Yehova nawamp win kamu, ov, tukwidjidjek nchik anch ndiy wij chidia chiwamp mulong wetwetu? Kuwejinaku, Yehova udi mwin manangu mawonsu. Umen yom yawonsu, utadiling kulemp kuyipandakanamu antu, ni wij nsudiel ya yom kudiokal kwisambishil. (Is. 46:9-11; Rome 11:33) Ndiy “Nzamb, ndiy kusu ukweta manangu mawonsu.”—Rome 16:27.
4 Chikwau, Yehova utukatin ni chisu chawonsu utusotidin yom yiwamp. (Yoh. 3:16; 1 Yoh. 4:8) Chidiay Nzamb wa rukat, ukwet muchim wa kupan padi umwing ni umwing wetu. Mwin kwilej Yakob wafunda anch: “Yom yawonsu yiwamp ni yiwanyidina yikat kudiokal mwiur, yikat kudiokal kudi Tatuku wa kutok wakad kukarumuk.” (Yak. 1:17) Antu itiyija ayinau chakwel Nzamb ayitakela atanyidinaku nakash ku muchim wend wa kupan.
5 Kupwa, Yehova udi mwin dikand. Pa mulong winou, mwin kufund kuseng wafunda anch: “Mwawonsu ushicha mwi ndond ya kujingamin yend Ndiy Udia Piur, washakama mwishin mwa mwizuzwimb wend wa Dikand Diawonsu, ukumwel Ndiy anch: ‘Dipat diam ni kwikang kwam, Nzamb wam, mwawiy munikungamedina.’” (Kus. 91:1, 2) Anch twalondul umutakel wa Yehova, tukimbin diking dia Nzamb wakad kukangany. Ap anch atupompat, Yehova utukwashin. Kakezap kutwovish usany. (Kus. 71:4, 5; Tang Jinswir 3:19-26.) Mwaning, Yehova wij yom yiwamp yituswiridina, utusotidin yom yiwamp, ni ukwet usu wa kutusadil yom yiwamp. Chikwikal cha usup mudi ik anch twadiburil umutakel wend! Ov, chisu ik lel tuswiridina umutakel winou?
Chisu ik Tuswiridina Umutakel?
6, 7. Chisu ik tuswiridina umutakel wa Yehova?
6 Chakin kamu, tuswiridin umutakel wa Nzamb mu mwom wetu wawonsu, kudiosh mu wanikanch. Mwin kufund kuseng walonda anch: “Mwamu mudia Nzamb mujim, udi Nzamb wetu chikupu ni chikupu. Ndiy mwin kututakel chikupu.” (Kus. 48:14) Mudi mwin kufund kuseng, in Kristu akweta manangu kalikiningap kusot umutakel wa Nzamb.
7 Chakin kamu, kudi yisu yituswiridina chakin kamu ukwash. Yisu yimwing tuding mu “mar majim,” pamwing ap turishin nich kuzengol, mayej makash, ap kushadish mudimu. (Kus. 69:16, 17) Pa yisu yiney, chongojining kukarumukin kudi Yehova, ni kumuchingejin anch ukutwinkish usu wa kujijamen ni ukututakel chakwel tukwata mipak yiwamp. (Tang Kuseng 102:17.) Pakwez, tuswiridin kand ukwash wend mu yisu yikwau. Chilakej, pa chisu tuyilejina amutej netu rusangu ruwamp ra Want, tuswiridin umutakel wa Yehova anch tusotil anch mudimu wetu usonga mabuj. Ni anch tukwet mupak wa kukwat—wikala piur pa kwipuwangesh, kudjal ni kwileng, urund, mudimu, malejan, ap chom chin chisu—tukusal cha manangu ching anch twalondul umutakel wa Yehova. Chakin kamu, tuswiridin umutakel mu mikadil yawonsu ya mwom.
Ubaj wa Kulik Kukimb Umutakel wa Nzamb
8. Chisal cha Eve cha kudia dibuj diajidikau charumburika ik?
8 Vurikany anch, tufanyidin kwisotil kulondul umutakel wa Yehova. Nzamb kakutushindilap tuukimba anch kitusotilap kwetu. Muntu wa kusambish walika kusot umutakel wa Yehova wadinga Eve, ni chilakej chend chilejen mudi chidia ubaj kukwat mupak mudi winou. Tongin kand yibudikin yach. Eve wadia dibuj diayijidikau mulong wasota ‘ikal mudi Nzamb, wija kuwap ni kuyip.’ (Dis. 3:5) Pasalay mwamu, witeka amwinend pa ndond ya Nzamb, wikwatina amwinend mipak piur pa yiyimp ni yiwamp pa ndond pa kulondul umutakel wa Yehova. Chawiy lel, walika ukaleng wa mangand wa Yehova. Wasota itakela amwinend. Nfumwend Adam, walondula njil yawiy yimwing ya wintombuj.—Rome 5:12.
9. Anch twalik umutakel wa Yehova, chom ik kamu tusadila, ni mulong wak chidi cha usup kusal mwamu?
9 Ilel, anch twalik kulondul umutakel wa Yehova, niyetu chilik chimwing tulikin ukaleng wend. Tong bil, chilakej, cha muntu usotila kukudish chaku cha kutalang pornografi. Anch udi chid cha chikumangen, wij yijil ya Yehova pa mulong winou. Yitongijok yijondila kiyifanyidinap kuyijimbul ap pakemp, ni kwikil muntu ap umwing ufanyidina kusanger yom yiyimp. (Efes 5:3) Ku kulik umutakel wa Yehova, muntu winou ulikin ukaleng wa Yehova, ulikin umutu Wend. (1 Kor. 11:3) Kudi kuburen manangu, mulong, mudi mwalonday Yeremiy anch, “kwikil muntu ukutwisha kutakel mwom wend amwinend.”—Yer. 10:23.
10. Ov, mulong wak tufanyidin kumekesh ngikadil ya kusend chisend mutapu tusadidila mbil yetu ya kutond?
10 Antu amwing akutwish idjidjek piur pa mazu ma Yehova, atongin anch mulong Yehova watwinkishay mbil ya kwitondil, kakutwishap kutulond chom ap chimwing mulong wa kuyisadil. Pakwez, kangal wavuramenany anch mbil ya kwitondil yidi chisend ni chipan. Akuturumburish mulong wa yom yitulondila ni yitusadila. (Rome 14:10) Yesu walonda anch: “Miruzu ya kuyip yidia mu muchim yawiy yikubudik ku kan.” Kupwa walonda kand anch: “Yikata kubudik mu muchim yidi yitongijok yiyimp, wimpongarik, kusotan, wij, kutwambilan, dises.” (Mat. 12:34; 15:19) Chawiy lel, mazu metu ni yisal yetu yilejen yidia mu muchim wetu. Yilejen chitudia chakin kamu. Chawiy mwin Kristu ubabela usotining umutakel wa Yehova mu yom yawonsu. Mwi njil yiney, Yehova ukumuman anch utentamin “salal mu muchim” ni ‘ukusadil nawamp.’—Kus. 125:4.
11. Chom ik twilejidina ku rusangu ra in Isarel?
11 Vurik rusangu ra in Isarel. Chisu chiwasala muchidi winou kutond kuwamp, waziyila kwi mbil ya Yehova, Yehova waulama. (Yos. 24:15, 21, 31) Pakwez, chisu ni chisu, asadila mbil yau ya kutond nayimp. Pa dichuku dia Yeremiy, Yehova wayileja anch: “Awiy kanziyilap ap kwintesh, pakwez asala mudi mwading rusot ra michim yau yichinchikina. Awiy apandakesha kuyip pa ndond ya kuwap.” (Yer. 7:24-26) Cha ushon! Ov, kangal twadjibwil kwa, mulong wa chibud ap kwiyov ayinetu, umutakel wa Yehova ni twiyendish kulondulijan nich yiyul yetu ni chawiy twikala apandakeshina “kuyip pa ndond ya kuwap”!
Chitin Ik pa Kulondul Chiyul cha Nzamb?
12, 13. (a) Ngikadil ik yitushikijina ku kulondul umutakel wa Yehova? (b) Ov, mulong wak ritiy ridi ra usey?
12 Rukat retu rawiy ritubachikina tulondul umutakel wend. (1 Yoh. 5:3) Pakwez, Paul wisambina chom chikwau chituswiridina palonday anch: “Tukat kwendil ku ritiy, kitukat kumanip ni mes.” (2 Kor. 5:6, 7) Ov, mulong wak ritiy ridi ra usey? Mwaning, Yehova ututakedin ni “ukat [kutulaminang] mwi jinjil jitentamina,” pakwez jinjil jinej jitwadilingap ku mapit ni yisend mu mangand minam. (Kus. 23:3) Pa chinech, dis dietu dia ritiy diswiridin kuditashin ching kusu pa difut dia muspiritu diakad kwilikej nich didiokilinga ku kumusadil Yehova. (Tang 2 Korint 4:17, 18.) Ni ritiy ritukwashin tusangera yom yikemp yitukweta ya ku mujimbu.—1 Tim. 6:8.
13 Yesu walejana anch mu difukwil diakin mudi kwipan, kwitina kand ritiy. (Luka 9:23, 24) In kwifukwil amwing ipana nakash, ajijamena uzwendj, mar, kasolikany, ap kuyizengol nakash. (2 Kor. 11:23-27; Kubur. 3:8-10) Ching kusu ritiy rikash rawiy rayitwishisha kusal mwamu nich musangar. (Yak. 1:2, 3) Ritiy rikash ritwinkishin ruchingej rikash anch kulondul umutakel wa Yehova kupandikening kuwap chisu chawonsu. Yiding mulong wa uwamp wetu wa chikupu. Twidjidjekinap anch chikalap difut ap disu dikezau kutambul in ajijamena nich kushinshaman chidi chipandakenamu mar mawonsu ma pa chipatu.—Heb. 11:6.
14. Ov, mulong wak Hagar wafanyidina kwikepish?
14 Tushinshikinany kand, usey wa kwikepish mu kulondul umutakel wa Yehova. Chilakej cha Hagar, mwilomb wa Sara, wachimekesha. Padandamenay Sara kwikal mumb, wamupana Hagar kudiay Abraham, ni Hagar wimisha divumu dia Abraham. Kupwa, Hagar witutula piur pa nsalejend mumb. Mudi chibudikin, Sara “wasambisha kumuzengol,” ni Hagar wafusa mau wachina. Mwangel wa Yehova wasankanijana nend Hagar ni wamwela anch: “Chirik kudi nsalejey, yang ukikepish amwiney kwishin kwend.” (Dis. 16:2, 6, 8, 9) Pamwing ap Hagar wadinga usotil umutakel ukwau. Chakwel asala kwambatan nich yamwelau kudi mwangel, chadinga chimufanyidin alika chibud chend. Chikalap nchik mwamu, nich kwikepish Hagar wasala mudi mwamulejau kudi mwangel, ni mwanend, Isamayel, wavadikina mu diking mu chibeng cha tatukwend.
15. Rumburil mikadil yimwing mufanyidina kulondul umutakel wa Yehova yitina anch twikepish kusambish kamu ilel.
15 Kulondul umutakel wa Yehova kurumburikin anch niyetu tufanyidin twikepisha. Amwing afanyidin kwitiyij chitong chilondila anch mulad kanang wa kwipuwangesh ukatiningau umusangareshinap Yehova. Mwin Kristu ukutwish wamwovish ujim muntu kanang ni uswiridin kumwit dilikishin. Ap ukutwish warumbuk ni ufanyidin kwitiyin. Chad chikwikal nchik anch muntu kanang wasal chitil chijim? Uswiridin ikepisha ni ita dilikishin dia chitil kudi amakurump. Chitwishikin ap amwopata muntu. Chakwel amuchirisha kand mu chikumangen, ufanyidin nich kwikepish ita dilikishin ni akarumuka. Mu mwikadil winou ni yikwau yifanikena nich, mazu ma Jinswir 29:23 madi ma rongoj: “Kwibaz kwa muntu kukat kumushikumwish pansh, pakwez mwin kwitudish ukez katan katumb.”
Mutapu Ik Ukatay Yehova Kututakel?
16, 17. Mutapu ik tukwisakina sens Bibil mudi musul wa umutakel wa Nzamb?
16 Musul ujim wa kusambish wa umutakel wa Nzamb udi Bibil, Dizu diapepilay Nzamb. (Tang 2 Timote 3:16, 17.) Chakwel kutaninamu nakash mu Dizu dined, chidi cha manangu anch kangal tuchingela anch kwikala bil mwikadil uyimp chad lel tukimba mazu ma ukwash mu Bibil. Pakwez, tufanyidin tusala kutang Bibil kwikal chaku cha pichuku pichuku. (Kus. 1:1-3) Mwi njil yiney, tukwijik nakash mazu mapepilau. Yitongijok ya Nzamb yikwikal yitongijok yetu, ni tukwikal tayad kurish nich yikokujol yakad kuchingejin.
17 Chikwau, chidi cha usey kutongijokin pa yitutangina mu Bibil ni kulembil kwambatan nich. Anch twatongijokin pa maverse ma Bibil, tukushinshikin mutapu makutwisha kusal mu mikadil yijikena. (1 Tim. 4:15) Piturishina nich milong yikash, tukumulembil Yehova, tukumwit ukwash chakwel tutana umutakel utuswiridina. Spiritu wa Yehova ukutukwash tuvurika yijil ya ukwash yidia mu Bibil yitwatanga ap mu mikand yengamidina pa Bibil.—Tang Kuseng 25:4, 5.
18. Mwi njil ik musadidilay Yehova ukadivar wa Ukristu mulong wa kututakel?
18 Ukadivar wetu wa Ukristu udi chom chikwau cha usey cha kukimbin umutakel wa Yehova. Chisak cha usey cha ukadivar winou chidi “kashalapol ushinshamena ni kubabal” pamwing ni ntimesh wend Chisak Chitakedila, chikata kulet yakudia ya muspiritu pakad kujing mudi mikand yichapinau ni maprogram ma yikumangan ni yitentam. (Mat. 24:45-47; ilikej nich Midimu 15:6, 22-31.) Chikwau, mu ukadivar wa Ukristu mudi antu aswila, pakampwil amakurump, awanyishina yitinau mulong wa kupan ukwash wa muntu ipend ni chiyul cha Bibil. (Is. 32:1) Ansand adia mu majuku ma in Kristu akwet musul ukwau wa usey. Anvajau akaritiy adi njil yitiyijinay Nzamb yifanyidinau kuchingejin chakwel atambula umutakel.—Efes 6:1-3.
19. Yiyukish ik yitusangaredina mulong wa kudandamen kwetu kukimb umutakel wa Yehova?
19 Inge, mu jinjil jivud, Yehova utwinkishining umutakel, ni tukusal nawamp anch twawisakin. Pisambinay chisu chamekeshay Isarel kwikal ushinshamena, Mwant David walonda anch: “Angaketu achingeja mudi Ey, akuchingeja ni Yey wayikamunina. Adidila kudi Ey, ayikamunina kamu; akumangena padi Ey katanyinip usany.” (Kus. 22:3-5) Anch twalondul umutakel wa Yehova ni kumuchingejin, niyetu tukez kwovap “usany.” Tukezap kukwachik usany mu ruchingej retu. Anch ‘twamwinkish Yehova njil yetu,’ pa ndond pa kuchingejin pa manangu metu, yibudikin yikez kwikal yiyukish yivud kudiosh kamu ilel. (Kus. 37:5) Ni anch twajijaman mwi njil yiney, yiyukish yiney yikez kwikal ya chikupu. Mwant David wafunda anch: “[Yehova] ukatil kutentam, kakuyilikangip atumbila end, ukayilam chikupu . . . Mwin kutentam ukez kaswan ngand, ukez kashakamamu chikupu.”—Kus. 37:28, 29.
Ov, Ukurumburil?
• Ov, mulong wak tukat kuchingejin umutakel wa Yehova?
• Chirumburikin ik kulik umutakel wa Yehova?
• Mu mikadil ik yimwing muswiridinau in Kristu kwikepish?
• Mutapu ik ututakedilay Yehova ilel?
[Chipich chidia pa paj wa 8]
Ov, ukat kukungamen padiay Yehova mu mwom wey wawonsu?
[Chipich chidia pa paj wa 9]
Eve walika ukaleng wa mangand wa Yehova
[Chipich chidia pa paj wa 10]
Ngikadil ik yaswirikenay Hagar anch afanyidina kwitiyij umutakel wa mwangel?