Likany ‘Yom Yamwamu’
“Ukata kulondul [yom yamwamu, ‘ Les Saintes Écritures — Traduction du monde nouveau ’ ], kakwetip manangu.”—JINSW. 12:11.
1. Yisu yimwing ya yom ya usey, ni njil ik yiwamp ya kuyisadil?
MUDI in Kristu, etu awonsu tukweting yom ya usey ya mulad umwing ap ukwau. Mu yom yiney mukutwish mwikal chilik kanang cha ukash wa mwom, usu, nkeu ja chivadik, ap mapit ma ku mujimbu. Mulong tumukatin Yehova, tusangeridin kuyisadil yom yiney mu mudimu wend ni chawiy twitiyijin ku dikasikesh dined diapepilau: “Mulimisha [Yehova] nich yom yey [ya usey].”—Jinsw. 3:9.
2. Dibabesh ik diletinay Bibil piur pa yom yamwamu, ni mutapu ik usadila dibabesh mu mutapu urumburikina?
2 Ku mutambu ukwau, Bibil wisambidin kand piur pa yom yamwamu ni ubabeshin pantaliken nich kushesh mapit metu mulong wa kuyisot. Pa mulong winou, tushinshikinany mazu ma Jinswir 12:11: “Mwin kudim yir ukez kwikal ni yakudia. Ukata kulondul [yom yamwamu], kakwetip manangu.” Chikasikeningap kuman mutapu usadila jinswir jinej. Anch muntu wasutish chisu chend ni usu wend mu kusal mulong wa dijuku diend, ukutwish washiken kutek dijuku diend mu diking. (1 Tim. 5:8) Pakwez, anch washesh mapit mend mu kulondul yom yamwamu, ukumekesh anch “kakwetip manangu,” uburendin kuman kuwamp kwa yom ni yibachikin yiwamp. Chakin kamu, muntu winou ukez kaman mar.
3. Chiyul cha Bibil piur pa yom yamwamu chisadil nchik ku difukwil dietu?
3 Chad chikwikal nchik, anch twasadil chiyul cha jinswir mu difukwil dietu? Tukutwish kuman anch mwin Kristu umusadidila Yehova nich mushiku nich kushinshaman ukwet diking diakin. Ukutwish kuchingejin chiyukish cha Nzamb cha katat ni kwikal nich ruchingej ra kurutu rakad kunyikek. (Mat. 6:33; 1 Tim. 4:10) Pakwez, mwin Kristu uzuwodilau nich yom yamwamu ukutek urund wend ni Yehova ni ruchingej rend ra mwom wa chikupu mu ubaj. Ov, mutapu ik tukutwisha kwiyep chom chinech? Tufanyidin kujingunin yom ya mu mwom yidia ‘yamwamu’ ni kukwat mupak wa kuyilik.—Tang Titus 2:11, 12.
4. Mu kulond kwa machuku mawonsu, yom ik yidia yamwamu?
4 Yom ik lel yidia yamwamu? Mu kulond kwa machuku mawonsu, yikutwish kwikal chom chin chawonsu chikutuzuwola ku kumusadil Yehova nich muchim wawonsu. Chilakej, yikutwish kwikal, mitapu kushalijan ya kwipuwangesh. Chakin kamu, kwipuwangesh kukwet ndond yau. Pakwez pitusutishina chisu chivud mu yom ya “kwisangaresh” pa ndond ya kusal mijikit yambatena nich difukwil dietu, kwipuwangesh kwikal kal chom cha chamwamu, ni kukutwish kwashesh mwom wetu wa muspiritu. (Mul. 2:24; 4:6) Chakwel kwiyep chom chinech, mwin Kristu ufanyidin kukudish kwisikan, kushinshikin nawamp nakash mutapu usutishinay chisu chikwetay. (Tang Kolosay 4:5.) Chawiy lel kudi, yom yamwamu yidia yiyimp nakash kupandakanamu kwipuwangesh. Mu yom yiney mudi anzamb a makasu.
Yilikany Anzamb Amwamu
5. Chisu chivud Bibil usadidiling nchik dizu “chamwamu”?
5 Chidi cha usey anch mu maverse mavud ma Bibil mudia dizu “chamwamu,” adisadidil pantaliken nau anzamb a makasu. Chilakej, Yehova wayileja in Isarel anch: “Kangal wez wisadilany akish [a chamwamu, NW ]. Kangal wez wimikany chirumbidij cha kusong ap dinguj, ap kangal wimikany mwi ngand yen diyal dia kusong mulong wa kudizengamin kurutu kwad.” (In Levi 26:1) Mwant David wafunda anch: “Mulong [ Yehova] ndiy mujim, kushiman kujim kwikala kudi ndiy, ndiy ukwatishen wom piur pa akish awonsu [a chamwamu, NW]. Mulong anzamb au antu awonsu adi kwau akish, pakwez [ Yehova] watanga maur.”—1 Jins. 16:25, 26.
6. Ov, mulong wak anzamb a makasu adi a chamwamu?
6 Mudi mwachilejanay David, atwombilamu kudi uman ulejena kujimb kwa Yehova. (Kus. 139:14; 148:1-10) Kwadinga kwitapil dilau mudi ik kudi in Isarel kusuk manswik ni Yehova! Adinga ayisup mudi ik kumuchin ni aya kuyifukwil akish akusong ni manguj matumbila! Mu yisu ya mar, anzamb au a makasu ikala a chamwamu, akad usu wa kwipandish ayinau ni in kuyifukwil kumwing.—Ank. 10:14, 15, NW; Is. 46:5-7.
7, 8. Ov, mutapu ik “dipit” dikutwisha kwikal mudi nzamb?
7 Mu jingand jivud ilel, antu achidi ni katat kuyifukwil akish akusong, ni anzamb inay adi akad ukwash ni katat mudi mwadingau pasak. (1 Yoh. 5:21) Pakwez, Bibil urumburil piur pa yom yamwamu yikwau yakad kwikal anzamb akish. Shinshikin mudi chilakej, mazu manam ma Yesu: “Kwikil muntu ukutwisha kusadil ant aad; mulong ukumukisip umwing, wamukat mukwau; ap ukupwichikin kudi umwing ni kumudiul mukwau. En kiukutwishanyip kumusadil Nzamb ni kusadil dipit pamwing.”—Mat. 6:24.
8 Ov, mutapu ik dikutwisha kwikal “dipit” mudi nzamb? Chiwamp, mudi chilakej, tongin bil pa diyal didia mu chir mu Isarel wa pasak. Diyal dined akutwish adisadil mulong wa kutung nich rubumbu ra chikumbu. Oku kand, anch aditeka mudi “dinguj” ditumbila ap mudi “diyal dia kusong,” dikal kal diyal dia kuyipwakesh antu a Yehova. (In Levi 26:1) Chawiy chimwing, nfalang ni jawiy jikwet ndond yau. Tujiswiridin mulong wa mwom, ni tukutwish kujisadil mu mudimu wa Yehova. (Mul. 7:12; Luka 16:9) Pakwez anch twakimb bil nfalang ni mudimu wetu wa Ukristu twautek pa ndond ya kaad, chakin kamu, nfalang jikwikal nzamb wetu. (Tang 1 Timote 6:9, 10.) Mu mangand manam, musotilau antu nakash kwikal bil ni mapit, tufanyidin kushinshikin anch chitongijok chisiken pa mulong winou.—1 Tim. 6:17-19.
9, 10. (a) Mwin Kristu umening nchik malejan? (b) Wisu uyimp wa malejan ma piur?
9 Chilakej chikwau cha chom cha usey chikutwisha kwikal chamwamu chidi kwilej ku mujimbu. Tusotil anch anetu ileja nawamp chakwel eza ikala ni mwom uwamp. Cha usey nakash, mwin Kristu wilejina nawamp utwishining kutang nawamp Bibil ni kumutesh, kutongijok pa milong ni kukwat mipak ya manangu, ni ulejening uyakin wa Bibil zwang ni mu mutapu wa kwitiyikish. Kutambul malejan mawamp kwitining chisu, pakwez kudi kusutish chisu kufanyidina.
10 Chad chikwikal nchik piur pa malejan ma piur, milejiningau ku makolej ap ku iniversite? Akumening mudi kwa usey nakash chakwel kutwish. Chikwau, antu alondula malejan ashikena ku kwizwish mu mitu yau malejan mayimp ma mangand. Malejan minam masutishin mivu ya usey ya usand yadinga yifanyidinau kusadil nawamp mu mudimu wa Yehova. (Mul. 12:1) Mu jingand jivud mudiau antu avud ileja malejan minam, avud kamwitiyijiningap Nzamb. Pa ndond pa kuchingejin diking dia yitenchik ya piur ya malejan ma mangand minam, mwin Kristu ukungamedin padiay Yehova.—Jinsw. 3:5.
Kangal Walikany Maku ma ku Mujimbu Mikala Nzamb
11, 12. Ov, mulong wak walonday Paul anch kudi amwing: “Mavumu mau mawiy nzamb wau”?
11 Mu mukand wend wayifundinay in Filipoi, kambuy Paul wisambina chom chikwau chikutwisha kwikal nzamb. Wisambina antu amwing adinga ambay in kwifukwil ni walonda anch: ‘Avud inakulejanya kal en, katat nikat kukulejany ni mansoj ku mes, anch awiy adi akankuny a [mutond wa mar wa, NW] Kristu. Kwisudiel kwau kudi kujiy, mavumu mau mawiy nzamb wau, manangu mau madi mu yom ya mangand.’ (Filip. 3:18, 19) Ov, mutapu ik ukutwisha kwikal ditont, ap anch divumu, nzamb?
12 Chimeken anch antu inay adinga ijay Paul, maku ma kwipan mu maku ma mujimb mikala mapandakana nakash kusut kumusadil Yehova pamwing nenday Paul. Amwing ipana kamu mu kudia ni kuna chipandakena mu chilik cha kwikal in kupumb kudia ni kuna mar. (Jinsw. 23:20, 21; isikej nich Kuvurik Yijil 21:18-21.) Akwau pamwingap atonda mitapu kushalijan yadingaku mu mangand mu chitot cha mivu cha kusambish ni chawiy ikala nich kampuw mu kumusadil Yehova. Kangal twalikany maku ma mwom ujimbwilau anch mwom uwamp matuchirisha kwinyim mu mudimu utumusadidila Yehova ni muchim umwing.—Kol. 3:23, 24.
13. (a) Ris chom ik, ni Paul warurumburila nchik? (b) Mutapu ik tukutwisha kwiyep ris?
13 Paul wisambina kand difukwil dia makasu mu mutapu windjing. Wafunda anch: ‘Chawiy jipany yid yen yidia ya mangand: kusotan, kwijond, ris, maku ma yiyimp, ni kwinan, yawiy yidia ya akish.’ (Kol. 3:5) Ris ridi maku makash mulong wa chom chitwakadia kwial nich. Rikutwish kwikal mulong wa yom ya ku mujimbu. Makutwish mikal maku mayimp ma masandj. (Kub. 20:17) Ov, chidiap cha manangu kutongin anch maku minam madi mudi akish, kumwifukwil nzamb wa makasu? Yesu warumburila mutapu ukash mulong wa kumekesh usey ujim wa kuyikel maku minam chikalap nchik.—Tang Marko 9:47; 1 Yoh. 2:16.
Babelany Mazu ma Chamwamu
14, 15. (a) “Yom [ik] yamwamu” yayipwakesha antu avud pa dichuku dia Yeremiy? (b) Ov, mulong wak mazu ma Moses madinga ma usey?
14 Mu yom ya chamwamu mudi kand mazu. Chilakej, Yehova wamwela Yeremiy anch: ‘Aruu inay akat kubwak yom ya makasu mu dijin diam. Am kinayitumap, ap kinayilejap dizu ap kusu dimwing. Yishimushimu yarumburilau kiyadiokalap kudi am. Yom yilejenau yidi yom yamwamu yidiokil ku yitongijok yau.’ (Yer. 14:14) Aruu inay a makasu afa mukan anch alondidin mu dijin dia Yehova, komb adinga ni kulejan yitongijok yau, manangu mau ayinau. Chawiy, mazu mau madinga “yom yamwamu.” Madinga kwau ma chamwamu ni mikala ubaj wakin muspiritu. Mu muvu wa 607 K.C.C., antu avud atesha mazu minam ma chamwamu afa cha rinkanku mu mukas mwa amasalay in Babilon.
15 Chinyim nau, Moses wayileja in Isarel anch: “Tekany michim yen ku mazu minam mawonsu ma uman wam minakutekinanya ilel unou pakach pen . . . Kangal wakamapipejany, mulong mawiy madia mwom wen, ku mazu minam kwawiy kuukeza kushakaminany machuku mavud mwi ngand yiukeza kuswanany anch wez waukany Yordan.” (Kuvur. 32:46, 47) Inge, mazu malonday Moses amapepila kudiay Nzamb. Chawiy, madinga ma usey, chakin kamu, mulong wa ukash wa muchid. Antu amatesha ikala ni mwom ulemp ni apita. El twipukany mazu ma chamwamu ni tulamat ku mazu ma usey ma uyakin.
16. Mutapu ik tumena yilondilau in siyans yipwitijadina nich Dizu dia Nzamb?
16 Ov, tuteshining yom yamwamu yilondinau ilel? Inge. Chilakej, in siyans amwing alondil anch dilejan dia dikarumun ni yom yivumbwila siyans mu malejan makwau yimekeshin anch kwikil kwau kand maswir ma kumwitiyij Nzamb, anch chitwishikin kuyirumburil yom yawonsu mudi muyasadika. Ov, mazu minam ma kwitutul matukwatin? Bwat kwau! Manangu ma muntu mashalijadin kulemp nich manangu ma Nzamb. (1 Kor. 2:6, 7) Pakwez, twij anch, ang malejan ma muntu mapwitijan ni yom yajinguninay Nzamb, chiding ching malejan ma muntu madinga ma makasu. (Tang Rome 3:4.) Chikalap nchik kuya kurutu kwa siyans mu malejan mamwing, yilondilay Bibil piur pa manangu ma muntu yidi yakin: “Chiyul cha mangand minam chidi usup ku mes kwa Nzamb.” Kwisikej nich manangu makadi musul ma Nzamb, manangu ma muntu madi usup.—1 Kor. 3:18-20.
17. Mutapu ik tufanyidina kuyiman yilondinau anyikel a Kristendom ni in kupumbwok?
17 Chilakej chikwau cha mazu ma chamwamu chidi cha anyikel a relijon wa Kristendom. Inay afil mukan anch alondidin mu dijin dia Nzamb, pakwez yom yivud yilondilingau yengamidinap pa Bibil, ni yilondilau yidi yakad usey. In kupumbwok niyawiy alondil mazu ma chamwamu, afil mukan anch akwet manangu mavud kumupandakanamu “kashalapol ushinshamena ni kubabal.” (Mat. 24:45-47) Pakwez, in kupumbwok alondiling piur pa manangu mau ayinau, ni mazu mau madi ma chamwamu, madi diyal dia kuyipwakesh antu awonsu amateshina. (Luka 17:1, 2) Ov, mutapu ik tukutwisha kuyiyep chakwel kangal atundimba?
Mutapu wa Kulik Mazu ma Chamwamu
18. Mu jinjil ik tukutwisha kusadil chiyul chidia mu 1 Yohan 4:1?
18 Kambuy Yohan ipal waleta chiyul chiwamp pa mulong winou. (Tang 1 Yohan 4:1.) Kukwatijan nich chiyul cha Yohan, tukat kuyikasikeshang chisu chawonsu antu tutanininga mu mudimu wa kulejan apakish kwisikej yiyilejinau nich yilondina Bibil. Chawiy tusadilinga niyetu. Anch twatesh chom ap chisu chilondila uyimp piur pa uyakin ap chilondila makasu piur pa chikumangen, piur pa amakurump, ap piur pa akadivar netu, kitukatap kuyitiyij kapamp kamwing. Pakwez, tukwiyipul anch: “Ov, muntu winou upalangeshina rusangu riner usadil kukwatijan nich yilondilay Bibil? Ov, jinsangu jinej ap anch jingany jinej jitwadil kurutu rutong ra Yehova? Ov, jiletin chisambu mu chikumangen?” Chom chin chawonsu chipipeshina ukadivar pa ndond pa kuukasikesh chidi cha chamwamu.—2 Kor. 13:10, 11.
19. Mutapu ik ukatau kushinshikin amakurump anch mazu mau kimadiap ma chamwamu?
19 Piur pa mazu ma chamwamu, amakurump niyawiy akwilej dilejan dijim. Anch ayitazuk chakwel ayulana, afanyidin kulam mu michim yau mipak yau ni kakatap kutongin kupan chiyul chengamidina pa manangu mau ayinau. Afanyidin kushindamen ching pa yom yilondilay Bibil. Chiyul cha usey chidi mu mazu malonday kambuy Paul: “Kangal wapandakeshany pa yom yifundilau mu Mukand wa Nzamb.” (1 Kor. 4:6, Manswik Masu) Amakurump kakatap kulond yom kupandakanamu yifundilau mu Bibil. Mu kusadil kujim, kakatap kulet chiyul kupandakanamu chengamidina pa Bibil chifundilau mu mikand ya chisak cha kashalapol ushinshamena ni kubabal.
20. Mu jinjil ik mutukwashina twiyepa yom yamwamu?
20 Yom yamwamu—yikala “anzamb,” mazu, ap chom chikwau—yidi ya ubaj. Mulong wa diyingishin dined, tukat kumwit Yehova ukwash wa kuyijingunin chiyidia, ni tusotiling umutakel wend piur pa mutapu wa kuyiyep. Anch twasal mwamu, tukulond mudi mwalonday nfund a kuseng anch: “Ndioshap mes mam ku yom yamwamu, chakwel mwom wam wikala wa kwendil mwi njil yey.” (Kus. 119:37) Mu mutu wambakedinap ou, tukwisambin kand usey wa kwitiyij umutakel wa Yehova.
Ov, Ukurumburil?
• Mu kulond kwa machuku mawonsu, yisu ‘yom yamwamu’ yitufanyidina kwiyep?
• Mutapu ik tukutwisha kwiyep kusal nfalang jikala mudi nzamb?
• Mwi njil ik mukutwisha kwikal maku ma mujimbu mudi difukwil dia akish?
• Mutapu ik tukutwisha kwiyep mazu ma chamwamu?
[Chipich chidia pa paj wa 3]
In Isarel ayikasikesha ‘adima ngand yau,’ kangal asota yom yamwamu
[Chipich chidia pa paj wa 5]
Kangal twalikany maku ma yom ya ku mujimbu matuchirisha kwinyim mu mudimu utumusadidila Yehova
[Chipich chidia pa paj wa 6]
Mazu ma amakurump makutwish mikal ma usey nakash