Uruw Ni Kwikal Nvaj Mu Chisu Chinech Cha Nsudiel
“Kwashal kal chisu chiswimp.”—1 KOR. 7:29.
1. (a) Yikarumok ik ya katat yidia mu “yom yikash”? (b) Ov, mulong wak tubangidina yikarumok ya usey ya dijuku?
DIZU dia Nzamb diasambela kulond anch: “disudiel dia ngand” kukez kwikal jinjit, kuzal kwa divu, nzal, ni yipupu. (Dan. 8:17, 19; Luka 21:10, 11) Bibil wababesha kand anch chirung chinech chikash mu rusangu ra muntu chikwikal chirung cha yikarumok yikash mu chisak cha muntu. Kanvundangesh kajim mu mwom wa dijuku ka kwikal mu “yom yikash” mu chirung chinech cha “machuku ma kwisudiel” makash. (2 Tim. 3:1-4) Ov, mulong wak yikarumok yiney yitukwatin? Mulong yipalangen nakash ni yidi yikash nakash mu chilik cha kwikal ni usu ujim piur pa mutapu umenau ilel in Kristu uruw ni kwikal nvaj. Mwi njil ik?
2. Mangand mamening nchik uruw ni kuujip?
2 Mu machuku manam, kujip uruw kuswapel ni kupalangen, ni mauruw mavud mafil mu jingand kanang. Pakwez, tufanyidin kwijik mu manangu anch Yehova Nzamb ukwet chitongijok chindjing pa uruw ni kuujip kushalijan nich chitongijok cha mangand matwombilamu. Ov, chisu lel chitongijok cha Yehova?
3. Yehova ni Yesu Kristu amening uruw mutapu ik?
3 Yehova Nzamb uyichingejin antu atijadina ashala ashinshamena ku machip ma uruw wau. Payinungay ikundj ni mband a kusambish mu uruw, Yehova wayela anch: “ikundj . . . [ukulamat] kudi mukajend, chad awiy aad akwikal mujimbu umwing.” Kurutu Yesu Kristu wamachirikina mazu minam ni wawejinaku anch: “Chawiy chabombakeshay kal Nzamb wachinung, pikil muntu wachauril.” Kupwa Yesu walonda kand anch: “Ni yend ukumwata pachimulikilau wamusot kal wakusot.” (Dis. 2:24; Mat. 19:3-6, 9) Chawiy lel, Yehova ni Yesu amen uruw udi kwinung kwa chikupu kupwilinga ching anch umwing wafa. (1 Kor. 7:39) Mulong uruw udi utumbila, kuujip nikwawiy udi mulong ukash. Chakin kamu, Dizu dia Nzamb dilondil anch Yehova ukisin kujip uruw pakad diyingishil dia Bibil.a—Tang Malakiy 2:13-16; 3:6.
Ukwatany Uruw Nich Usey
4. Ov, mulong wak in Kristu ansand amwing akat kwinanang mulong anch ayata padingau achidi anikanch nakash?
4 Mangand makad kumwov Nzamb wom mu tushicha makwatiken nakash nich milong ya ukundj ni wimband. Dichuku ni dichuku, tukutwish kutanijan ni amband awamp. Tukutwishap kuvuramen usu ukutwishau kwikal nich padi etu, pakampwil padi ansand etu adia mu chikumangen. Ov, mutapu ik lel ukusalau in Kristu ansand pantaliken nich usu winou uyimp, ukutwisha kulangwish maku ma masandj ap anch ayinau kasotilap? Antu amwing apakisha kurish nich kusutil ku kwachik ap kwatan pachidiau anikanch nakash. Mwi njil yiney, achingejin anch akwiyep kwiyandjik mu masandj. Kupwa, avud atijana mwamu inana pa mupak winou wakwatau. Mulong wak? Anch maku ma kwachik makep, akat kushiken ku kujingunin anch awiy ni ambay nau akwet yom yikemp yitongidinau pamwing mu milong ya pichuku-pichuku. Komb choviken, ambay inay a uruw akwikal nich katat chikokujol chikash.
5. Chom ik chikuyikwasha ambay a uruw ashala ashinshamena ku machip ma uruw wau? (Tal kand not.)
5 Kwatijan ni muntu kanang—ikalap mbay mwin Kristu—ukutwisha kwikal ushalijadina nich yiwadia utongidina kukutwish kwez kwikal chikokujol chikash. (1 Kor. 7:28) Pakwez, chikalap nchik mwikadil wa yikokujol udiaku, in Kristu akin ij anch kujip uruw kwakad kukwatijan nich Bibil kwitiyikinap mudi mutapu wa kupwish milong mu uruw wakad chisambu. Chawiy lel, antu adandamedina kusal usu ukash mulong wa kulam uruw wau mulong asotil ashala ashinshamena ku machip ma uruw wau afanyidin kalimish ni ukwash wa rukat kudiokal ku chikumangen cha Ukristu.b
6. Mutapu ik ufanyidinau in Kristu ansand kuchingejin uruw?
6 Ov, udi nsand ni kandikal watana ap kwachik? Anch mwamu udia, mutapu ik ufanyidina kuchingejin uruw? Ukutwish kwiyep runeng rikash anch wachingelaku djat ni piukupamina kamu ku mujimbu, mu manangu, ni muspiritu wikal tayad kwatan ap kwachik kurutu usambish urund wa rukat ni mwin Kristu wa mujimbu ushalijadina ni weyey. Chakin kamu, Bibil kajimbwilap uvud wa mivu wa kwatan ap kwachik.c Pakwez, Bibil ulejen anch ukusal nawamp anch wachingelaku djat pichikusuta chisu cha mwom chidinga ni maku makash ma ukundj ni wimband. (1 Kor. 7:36) Mulong wak? Mulong yibachikin ya maku makash ma ukundj ni wimband yikutwish kukushadish manangu mawamp ni yikukushikij ku kukwat mipak yiyimp yikeza kukuyedish kurutu. Vurik, chiyul cha manangu cha Yehova piur pa uruw chidia mu Bibil chidi mulong wa ukwash ni musangar wey.—Tang Isay 48:17, 18.
Yisend ya Kwikal Nvaj
7. Chom ik chimeningau antu amwing asu atijadina, ni mutapu ik chikutwisha kwakamish uruw?
7 Ambay amwing a uruw atijana padingau achidi ansand akashimuka achingedin mwan oku awiy ayinau achidi ansand nakash. Kandikal ikala nich chisu chakwijikijan yaku yau akashimuk akat kuchingel kwez kwa mwan, ufanyidinau kubangin chisu chawonsu. Pakuvadikay nawamp mwan kabas katat kudi maku ndiy ukwikala wa kubangin nakash, chadi ngatan nsand mukau wamukwat. Chikwau, uchuku wa kuker tul wasambish kwikal musul wa kupwitijan ni runeng yikusala anch urund wa antu atijadina wikala mu chak. Ambay a uruw asu akujingunin katat anch kakwetap kand want ipau. Katat kakutwishap kand kuya ku jindond ni kusal yom yadingau ni kusal machuku ma kwinyim. Mutapu ik ufanyidinau kuman mwikadil wau usu?
8. Mutapu ik ufanyidina kuman chisend cha winvaj, ni mulong wak?
8 Mudi mufanyidina kukwat uruw nich usey ukash, kwikal nvaj nikwawiy kufanyidin kukuman mudi chisend ni kalimish kadiokila kudi Nzamb. Chikalap nchik milong yawonsu yikwikalaku mulong wa kwez kwa mwan mu mwom wa uruw wa mwin Kristu, afanyidin kusal usu wau wawonsu kuyipwish mwi njil yiwamp. Mulong Yehova wayinkisha antu ukaliweny wa kuval an, anvaj aswiridin kumuman mwan uvadikina mudi “uswan wa [ Yehova].” (Kus. 127:3) Maku ni tatuku mwin Kristu afanyidin kusal usu wau wa kuwanyish yisend yau mudi “anvaj . . . mu Mwant.”—Efes 6:1.
9. (a) Chitin ik chakwel kumulil mwam? (b) Ngatan ufanyidin kusal ik mulong wa kumukwash mukajend muspiritu?
9 Kumulil mwan kwitining mivu ni kwipan. Udi mudimu ukash witina chisu ni usu. Ngatan mwin Kristu uswiridin kutesh anch mu mivu yivud kupwa kwa kuvadik kwa mwan, mukajend ukutwish kuzuwol pa yisu ya yikumangan ni ukutwish kushal nich chisu chikemp cha kwilej Bibil ni kutongijokin. Chom chinech chikulet ulim pa ukash wend wa muspiritu. Kwikal chakin kamu nvaj kwitin anch ngatan asala yawonsu yitwishikina mulong wa kumukimbin mwan yiswiridinay. Chawiy ukutwish kusalaku yiburedinay mukajend ku yikumangan kusutil ku kwisambin piur pa manans ma program ni mukajend ku chikumbu. Ukutwish kand kukwash kumubangin mwan chakwel amushilaku mukajend chisu cha kusal mudimu wa kulejan Want.—Tang Filipoi 2:3, 4.
10, 11. (a) Mutapu ik uyilidiningau an “mu kuyikand mu malejan ma Mwant”? (b) Ov, mulong wak chifanyidin kuyijikitish anvaj avud in Kristu?
10 Kwikal nvaj chakin kamu kwitin yom yivud kupandakanamu kumudish mwan, kumudjik, kumuladik nawamp, ni kumulam nawamp ku mujimbu. Pakampwil mu chirung chinech chikash cha nsudiel, ansand aswiridin kwilej kudiosh kamu mu wanikanch wau yijil ya ngikadil yikuyitwishisha kushakam. Chifanyidin kuyilil an “mu kuyikand mu malejan ma Mwant.” (Efes 6:4) Mu “malejan” minam mudi kukun yitongijok ya Yehova mu manangu ma mwan kudiosh mu wanikanch wend kuya kamu ni mu mivu yikash ya winsand.—2 Tim. 3:14, 15.
11 Chisu Yesu chayilejay in kwilej end anch “yangany kwen ku michid yawonsu uyikadishany in kwilej,” chakin kamu walonda anch anvaj afanyidin kuyikwash an au ikal in kwilej. (Mat. 28:19, 20) Chidi chikash kusal mwamu mulong wa yipwichik ya mangand pa ansand. Chawiy lel, anvaj atwishina kuyilil an au ikal in Kristu ipanina chakin kamu afanyidin kuyijikitish nich chirungil kudi antu awonsu adia mu chikumangen. ‘Apandiken’ kal usu wa mangand nich ritiy rau ni kushinshaman kwau mudi anvaj akin.—1 Yoh. 5:4.
Ajich ap Akad An Mulong wa Rutong ra Usey Nakash
12. Mulong wak in Kristu amwing akwatining chiyul cha kushakamaku ajich mu mivu kanang?
12 Mulong “kwashal kal chisu chiswimp” ni “mulong yom ya mangand minam yikat kusut,” Dizu dia Nzamb ditukasikeshin tushinshikin usey wa ujich. (1 Kor. 7:29-31) Chawiy, in Kristu amwing atondin kushal ajich mu mwom wau ap akwatin mupak wa kushal ajich mu mivu kanang kupwa ez atan. Cha usey, kakatap kusadil want ipau wa ujich mulong wa kwisotil yisakin yau ya choy. Avud adi ajich mulong wa kumusadil Yehova “ni muchim umwing.” (Tang 1 Korint 7:32-35.) In Kristu amwing ajich asadil mudi ayibol ap mudi yid ya Bethel. Avud asotil mutapu wa kwipan nakash ku dirijek dia Yehova kusutil ku kuwanyish yitinau chakwel aya ku Shikol ya Diyiy dia Mudimu. Chakin kamu, in asala mudi atushalapol a chisu chawonsu mu mivu kanang padingau achidi ajich ni kupwa akwata mupak wa kwatan, chisu chivud iyoviling anch uruw wau wisakidin nakash malejan ma usey milejau mu mivu yiney ya winsand.
13. Ov, mulong wak in Kristu amwing atijadina alikin kuval?
13 Mu yikunku yikwau ya mangand, kwikadil kal yom yakarumukina kal mu mwom wa dijuku—ambay avud a uruw akwata mupak wa kulik kuval. Amwing asadiling mwamu mulong wa mayingishin ma kuburen kwa nfalang; akwau asadil mwamu asotil kwikal ni want ipau wa kusal mudimu wa kuyiletin nfalang jivud. Mukach mwa in Kristu, mudi kand ambay a uruw alikina kuval. Pakwez, chisu chivud awiy asadil mwamu chakwel ikala nich chisu cha kumusadil Yehova. Chom chinech chirumburikinap anch ambay inay a uruw kasangaredinap mwom wakin wa uruw. Aukatin. Pakwez, asotil kutek bil yisakin ya Want piur pa yisend yin yawonsu yikutwishau kwikal nich mu uruw. (1 Kor. 7:3-5) Ambay a uruw amwing inay amusadidil Yehova ni akadivar nau adia mu munyimuku ni mu distrik ap adia ku Bethel. Akwau asadil mudi ayibol ap mudi amishoner. Yehova kakezap kuvuramen mudimu wau ni rukat rimekeshinau mulong wa dijin diend.—Heb. 6:10.
“Milong” ya ku Mujimbu
14, 15. “Milong” ik ya ku mujimbu yimeningau anvaj in Kristu?
14 Kambuy Paul wayela in Kristu atijadina anch akwikal nich “milong” ya ku mujimbu. (1 Kor. 7:28) Mu milong yiney mudi ukash wa mujimbu wa ambay a uruw, wa an au, ap anvaj apamina kal. Mukutwish kand kwikal yikokujol ni runeng yidiokila ku kuyilil an au. Mudi mutwalonda kwisambishil kwa rusangu riner, Bibil wasambela kulond anch “machuku ma kwisudiel” makez kwikal ma “yom yikash.” Mu yom yiney yikash ya kura nich mukwikal an ayibwambwidila “anvajau.”—2 Tim. 3:1-3.
15 Kuyilil an udi mudimu ukash kudi anvaj in Kristu. Kitudiap achidijinau pantaliken nich yibudikin yiyimp ya “machuku” manam ma “yom yikash.” Chawiy, anvaj in Kristu afanyidin kwas njit pichuku-pichuku kutaliken usu uyimp ukutwisha kwikal nich “mudi mukat kusalau in mangand minam” padi an au. (Efes 2:2, 3) Chisu chivud chikasikening kuwin njit jinej! Anch mwan ikundj ap mband wa mu dijiku dia Ukristu walik kwend kumusadil Yehova, chidi, chakin kamu, “milong” kudi anvaj apakisha kumulidil mu uyakin wa Nzamb.—Jinsw. 17:25.
“Kukez Kikal Mar Mapandakena”
16. “Mar” ik mabwakay Yesu?
16 Pakwez “mar” min mawonsu makutwisha kwikal mu uruw ni kuval an akez, kumapandakanamu kudi mar makash mapandakenamu nakash. Mu uprofet wend piur pa kwikalaku kwend ni piur pa nsudiel ya ditenchik dia yom, Yesu walonda anch: “Kukez kikal mar mapandakena, mar madia mwamu kand kal mamekanangip kudiokal pa kusambish kwa mangand ni katat ou, bwat, ap kurutu kukwikalip kand mar mwamu.” (Mat. 24:3, 21) Kurutu Yesu wajingunisha kand anch chisak chipandakena kujimb chikez kupand ku “mar mapandakena.” Pakwez, ditenchik dia Satan dikez kudandamen kura djat ni pa nsudiel nau Atuman a Yehova in chisambu. Pakad kwidjidjek, chikez kwikal chisu chikash kudi etu awonsu—amakurump ni an kumwing.
17. (a) Ov, mulong wak tufanyidina kuchingejin machuku ma kurutu nich ruchingej? (b) Chom ik chikutwisha kukarumun manangu metu piur pa uruw ni winvaj?
17 Chikalap nchik mwamu, kitufanyidinap kwov wom wa chamwamu mulong wa dikez. Anvaj ashinshamena kudi Yehova akutwish kuchingejin chakwel kuyichidij pamwing ni an au. (Tang Isay 26:20, 21; Sof. 2:2, 3; 1 Kor. 7:14.) Chad ilel, kwijik kwetu anch tushich mu machuku ma yom yikash kukwet usu pa mutapu tukutwisha kutongin pa uruw ni kwikal nvaj mu chisu chinech cha nsudiel. (2 Pita 3:10-13) Mwi njil yiney, mwom wetu—twikala ajich ap atena ap angachik, akweta an ap bwat—ukez kumushiman ni kumutumbish Yehova ni chikumangen cha Ukristu.
[Mazu madia kwishin kwa paj]
a Tal Vivez en gardant à l’esprit le jour de Jéhovah mu kamutu ‘Nikisin Kujip Uruw,’ pa paj wa 125.
b Antu arila nich yikokujol ya uruw akez kwikal akasikeshinau nich kushinshikin mitu ya milong yiney yisambidina piur pa uruw yidia mu Chinong cha Kalam cha Mwinses 15, 2003 (Français), ni Réveillez-vous wa Chiwong 8, 2001.
c Tal shapitre wa 30, “Ov, Nawanyin kal pa kwatan ap Kwachik?,” udia mu buku Les jeunes s’interrogent — Réponses pratiques.
Kuchirikinamu
• Ov, mulong wak ansand in Kristu kafanyidinap kwatan ap kwachik swa-swa?
• Yik yidia mu kumulil mwan?
• Ov, mulong wak in Kristu avud adi ajich ap, anch atan, kavadilap?
• “Mar” ik makutwishau kura nich anvaj in Kristu?
[Chipich chidia pa paj wa 17]
Ov, mulong wak chidi cha manangu anch ansand in Kristu achingelaku kurutu kwa kwatan ni kwachik?
[Chipich chidia pa paj wa 18]
Ngatan ukutwish wasal yivud mulong wa kumukwash mukajend chakwel asala muchifanyidina mijikit ya muspiritu
[Chipich chidia pa paj wa 18]
Ov, mulong wak ambay amwing a uruw alikin kwau kuval an?