“Tulondulany Yom Yikuletisha Chisambu”

NJIL yisu ya kuband nawamp yimekening anch yidi yikash, yikutwishap yayip. Pakwez, mu kusut kwa chisu, yikusambish kubarik mintash ni yikwikal nich mabuku. Chawiy yikwit kuyirijek mulong wa kulam diking ni kuyilam nawamp.

Chawiy chimwing, urund wetu ni antu akwau pa yisu yimwing ukutwish wikal mu kanrumbangesh ni ukusambish kubarik mwintash. Kambuy Paul witiyija anch in Kristu adinga ku Rome adinga nich yitongijok kushalijan. Chawiy wayiyula ambay nend in Kristu anch: “Lik tulondulany yom yikuletisha chisambu, yom ya kuwapishijan muntu ni mukwau.” (Rome 14:13, 19) Ov, mulong wak chidi cha usey anch “tulondulany yom yikuletisha chisambu”? Ov, mutapu ik tukutwisha kulondul chisambu nich kukapuk ni mu mutapu uwamp?

Mulong wak Tufanyidina Kulondul Chisambu?

Pakad kuyirijek, mintash yikemp-yikemp yidia pa divu dia kuband nawamp yikutwish yabarik yikal mabuku makuletisha ubaj. Chawiy chimwing, kulikang tumilong tukemp-tukemp twakad kupwish kukutwish kwikal nich ubaj. Kambuy Yohan wafunda anch: “Anch muntu walond anch, am nimukatil Nzamb, umukisil mwanamakwend, ndiy udi mukamakasu; mulong ndiy wakad kumukat mwanamakwend umenayiku ni mes, kakutwiship kumukat Nzamb wakad kuman ku mes.” (1 Yoh. 4:20) Kupwitijan kwa chiuntu kwakad kupwishang kukutwish chakin kamu kwamushikij mwin Kristu ku kumukis mukadivar nend.

Yesu Kristu walonda anch, Yehova kakutwishap witiyij difukwil dietu anch kitudiap mu chisambu ni akwetu. Yesu wayileja in kwilej end anch: “Anch ey ukat kupan yakupesh yey ku chitamb, chad wavurikin anch mwanamakwey ukwet dizu kudi ey, shang bil yakupesh yey kurutu kwa chitamb, yang mwi ngil yey ukasambish kuchakul nend mwanamakwey, chad ey wez upana lel mulambu wey.” (Mat. 5:23, 24) Mwaning, rutong retu ra kusambish ra kulondul chisambu ridi mulong tusotil tumusangaresha Yehova Nzamb.a

Mulong umwing walanka mu chikumangen cha Filipoi ukasikeshidin diyingishin dikwau ditulejina mulong wak tufanyidina kulondul chisambu. Kwadinga mulong umwing wakad kwijikan pakach pa anambaz aad in Kristu, Ewodia ni Sintik, chakin kamu mulong winou warumbangesha chisambu mu chikumangen chawonsu cha kabuj. (Filip. 4:2, 3) Tumilong twa untu twa kulik kwovijan tukutwish twijikan swa mu chikumangen.

Yesu walonda anch: “Ayuk kwau in chisambu.” (Mat. 5:9) Kulondul chisambu kuletining musangar ujim. Chikwau, chisambu chiletining ukash uwamp wa mujimbu, mulong “mwom wa mujimbu kudi kushakam zong kwa muchim.” (Jinsw. 14:30) Ku mutambu ukwau, kulam rukuny kukutwish kwatuyedish ku mujimbu.

Ap anch in Kristu avud itiyijining anch kulondul chisambu kudi kwa usey ujim, ukutwish watongin pa mutapu wa kupwish kulik kwovijan kwa untu. El tushinshikinany yijidik yidia mu Mifund yikutwisha kutukwash.

Kwisambin Nawamp Kuletining Chisambu

Mintash yikemp-yikemp yidia pa divu diabandau kal chitwishikining kuyijimangesh anch washingulany pa ndond piyidia. Ov, chituswapedil kulikishin ni kubwik kurumbok kukemp-kukemp kwa akadivar netu? Chawiy chimwing, mutapu winou wa kusal ukutwish wikal wa ukwash nakash piur pa kulik kwovijan kwa untu, mulong kambuy Pita wafunda anch: “Rukat rikat kubwik miril ya tuyimp.”—1 Pita 4:8.

Pakwez, pa kusut kwa yisu, mulong ukutwish wikal ujim nakash mu chilik chakwel anch kitutwishinap kuuvuramen. Tushinshikinany yom yayishikena in Isarel kachisu kakemp kupwa kamu kwa kwandam mwi Ngand ya Kushilamu. Kurutu “in Ruben, ni in Gad, ni chikunku cha muchid wa in Manase” aukina ushad wa Wit wa Yordan ni awiy atunga “chintamb . . . chijim nakash.” Michid yikwau ya in Isarel yitiyija anch chintamb adinga ni kuchisadil mulong wa difukwil dia akish ni kiyatwishap kwau kuudiwul mulong winou. Chawiy irijeka chakwel akayasa njit.—Yos. 22:9-12.

In Isarel amwing atonga anch uman wa chitil uwanyidin ni anch ayikashimwish nich njit, antu akemp akufa ku mutambu wau. Pakwez, pa ndond pa kuya kuyas njit swa-swa, michid yadinga kurand kwa Yordan yayituma antu akisambina pa mulong winou ni anamakwau. Awiy ayipula anch: “Ov, kurumbuk ik wasadilanya kurutu kwa Nzamb wa in Isarel mulong wakukarumukany, wamulikany [Yehova, NW]?” Chakin kamu, kwadingap kurumbuk ap kukemp ku mutambu wa michid yatunga chintamb. Ov, mutapu ik welau kusal pantaliken nich kuyifund kwinoku? Ov, ela kuyipep masal antu ayifunda ap anch kulik kuyakul? Michid yafundau yakula nich kwitudish, yalonda patok anch chakin kamu yisal yau yadinga yibachikinau nich impu yau ya kumusadil Yehova. Chakul chau chachidija urund wau ni Nzamb ni chapandisha mwom. Kwisambin patok kwovikesha nawamp mulong ni kwaleta chisambu.—Yos. 22:13-34.

Kurutu kwa kukwat mupak ukash, nich manangu, in Isarel akwau isambina pa mulong wadingau nich ni muchid wa in Ruben, in Gad ni chikunku cha muchid wa in Manase. Dizu dia Nzamb dilondil anch: “Kangal wikal mwin kwov ujim swa, mulong ujim ukat kwikal mu muchim mwa chisup.” (Mul. 7:9) Mutapu udia mu Mifund wa kupwish milong yikash yikwatina ku untu udi wa kwisamb patok ni mu kwitudish. Ov, chakin kamu tukutwish twachingejin chiyukish cha Yehova anch tukwet rukut ni anch tukangeny kwisambin pamwing ni muntu waturumbukidina?

Ku mutambu ukwau, chikwikal nchik anch mbay netu mwin Kristu watulondul mulong utongin anch twamusadil chom chiyimp, ni pamwingap anch utufundin cha makasu? Bibil ulondil anch: “Kwakul kwa kalimish kukat kudiosh ujim.” (Jinsw. 15:1) Michid ya in Isarel yamana anch ayisarumun kal, yarumburila nich kwitudish, ni patok mutapu yadinga yovila, chawiy chiyatwisha kupwish yovil yadingau nich pantaliken nau anamakwau. Chikalap ap yetu tudia a kusambish kuya tukisamba ni mukadivar netu ap anch chikala ndiy wezina chakwel twisambina pa mulong kanang, tufanyidin kamu twiyipula ayinetu anch: ‘Ov, mazu ik, kujimb kwa dizu kwa mutapu ik, ni mwikadil wa chifu ik ukutwisha kamu kuletish chisambu?’

Sadil Rudim Nich Manangu

Yehova wij anch tuswiridining kulond patok yitukwatina ku muchim. Pakwez, anch twakangany kupwish mulong wa kulik kwovijan kwa untu, tukutwish twashiken kumulejau muntu windjing. Kulam rukuny kukutwish kwatushikij swa ku runyinyit. Piur pa mutapu uwamp wa kusadil rudim, Jinswir 11:11 ulondil anch: “Ku chiyul chatambula in kutentam, musumb akat kuushimek, pakwez ukat kusheshik nich kan ka antu ayimp.” Chawiy chimwing, kulond kwakad kutong piur pa mbay netu mwin Kristu kukutwish kwarumbangesh chisambu cha chikumangen chifanikeshinau nich musumb.

Pakwez, kulondul chisambu, kurumburikinap kulik kulond kachom ap kakemp piur pa akadivar netu ni anambaz etu. Kambuy Paul wayiyula ambay nend akaritiy anch: “Kangal mu tun twen mwabudik mazu mayimp.” Pakwez ndiy wawejinaku kand anch: “Pakwez londany ching kusu mazu mawamp makutwisha kukasikesh antu. . . . Ikalany antu adimukina, in kwanakenijan muntu ni mukwau.” (Efes 4:29-32) Anch mukadivar wovila kuyip mulong wa kulond kwey ap mulong wa mwikadil wey wakushejin, ov, chikwikalap chiwamp kwit dilikishin ni kusal chisambu anch kandikal akulondinap chom chiyimp kudi antu akwau? Chawiy lel, anch wijiken anch ukat kuyilondinang ambay ney in Kristu yom yiwamp kukusal anch chikala chiswapela ku mutambu wetu kuchirish chisambu anch kwalank milong ya kulik kwovijan kwa untu.—Luka 6:31.

Tumusadilany Nzamb “Chikij ku Chikij”

Chivadikin chetu chakad kuwanyin chiding cha kwiyep antu aturumbukinang, ni chawiy tukutwish twiyauril. Pakwez, chidiap cha manangu kusal mwamu. (Jinsw. 18:1) Chitudia antu adia mu uumwing, tutazukin pa dijin dia Yehova, tukwatin mupak wa “kumusadil ndiy chikij ku chikij.”—Sof. 3:9, NW.

Kulond kuyimp ap mwikadil uyimp wa antu akwau kiufanyidinap ap dimwing kuziyish mushiku wetu mulong wa difukwil dishitwila. Machuku kamu kurutu kwa difut dia Yesu diswinkan milambu yadingau ni kulambul mu tempel ni kachisu kakemp kupwa kwa Yesu kuyifish nich in kufund, ndiy wamumana mwad-a-mufu kazwendj utekin “yom yend yawonsu yiswirikedilay kwend” mu chipau chadinga ku tempel. Ov, Yesu wamulikisha? Pakwez, ndiy wamulondila yom yiwamp mulong wa kukwash kwend chikumangen cha Yehova cha pa chisu chinicha. (Luka 21:1-4) Yisal yakad kutentam ya antu akwau kiyamwinkishap want ipend pantaliken nich chisend chend cha kukwash difukwil dia Yehova.

Ap anch tukutwish twiyov anch mukadivar ap nambaz mwin Kristu warumbukin, ap anch wasal chisal chakad kutentam, ov, tukusal nchik? Ov, tukuchilikin chom chinech chiyimp chitukangesha kusal mudimu wetu utukata kumusadil Yehova nich muchim wetu wawonsu? Ap anch nich kukapuk tukusal usu wa kupwish kuburen kwovijan kwawonsu kwa untu chakwel tulama chisambu cha usey chidia nlel mu chikumangen cha Nzamb?

Mifund yituyudil anch: “Anch chikasikenip nchik kudi en, ikalany ni chisambu nau antu awonsu.” (Rome 12:18) El tukwatany mupak wa kusalang mwamu chakwel tushala mu diking mwi njil yiyila ku mwom.

[Mazu madia kwishin kwa paj]

[Chipich chidia pa paj wa 17]

Ewodia ni Sintik aswiridina kulondul chisambu

[Chipich chidia pa paj wa 18]

Ov, mazu ik, kujimb kwa dizu kwa mutapu ik, ni mwikadil ik wa chifu ukutwisha kamu kuletish chisambu?