Yesu Udi Chilik Chiwanyidina cha Kulondul

OV USOTIN wikala muntu muwamp, ukweta musangar? Kambuy Pita urumburil mutapu tukutwisha kwikal mwamu. Wafunda anch: “Kristu kand wakumenanya en mar, wakushilanya chilik chakwel ulondulany mu ruzau rend.” (1 Pita 2:21) Chakin kamu, padingay nich mwom upandakena kuwap, Yesu Kristu wasala yom yivud yitukutwisha kwilej. Kusutil ku kwilej piur pa Yesu ni kushakam kulondwish mwom wendendiy, chakin kamu, tukwikal antu awamp ni akweta musangar. El tushinshikinany ngikadil yimwing yadingay nich muntu winou mujim ni tumana mutapu tukutwisha kutanyinamu mu chilakej chend.

Yesu wadinga wisikena. Ap anch Yesu walonda anch kadingap ni ndond “pakwanzwik mutu wend,” pakwez kadingap ap kalejanap kwikal ni mwom wa uzwendj wakad kwisangareshang. (Mateu 8:20) Wayangang ku misambu. (Luka 5:29) Chilay chend cha kusambish—wakarumuna mem mikal mar mawamp ku musambu wa uruw—Yiney yamekesha anch kadingap ulikina kwisangaresh mudi chisak. (Yohan 2:1-11) Pakwez, Yesu walejana patok chom chadinga nich usey kudi ndiy. Walonda anch: “Yakudia yam yid kusal rusot rendendiy wantuma am, ni kupwish mudimu wend.”—Yohan 4:34.

❑ Ov, washinshikidin kal mwom wey chakwel umana mutapu ukutwisha kwisikej jintong jey ja ku mujimbu ni ja muspiritu?

Yesu wadinga uswapel kumushejin. Bibil umulejen Yesu anch wading muntu ukweta chirungul ni mwin kuta urund swa. Ndiy kajimanangap chisu chezangau antu kudiay ndiy ni milong yau ap ni yipul yikash. Dichuku dimwing runtu reza ramwombamu, mband umwing wadinga muyej pasutil kal mivu 12 wamukwata ku disun diend, wading ni ruchingej anch ukuyerik. Ndiy kamuswejenap mulong wa chisal chend cha dizaz pakwez nich ranaken wamwel anch: “Mwan mband, ritiy rey rakwok kal kwey.” (Marko 5:25-34) An ni yawiy iyova musangar wa kwikal pamwing nend, kovap wom anch ukutwish wayidiwul. (Marko 10:13-16) Wadinga ni kwisamb ni in kwilej end patok, mudi arund. Kidjidjekangap kumushejin piswimp.—Marko 6:30-32.

❑ Ov, mutapu ik ukushejidiningau kudi antu akwau?

Wadinga mwin ranaken ni riy. Ngikadil yimwing ya usey ujim ya untu wa Yesu yadinga ukaliweny wend wa kwitek pa ndond ya akwau, chakwel ova yovil yau, ni kuyikwashang. Kambuy Yohan walonda anch chisu Yesu chamumanay Mariy wadil lel mulong wa rufu ra mwanamakwend Lazar, Yesu “wova ushon, wanenganan nakash” ni “wadila.” Antu adinga atadila amana kamu rukat rujim radingay nich Yesu mulong wa dijiku dined, kovap usany wa kurimekesh patok. Ni wamekesha riy mudi ik chisu chamusangulay murund nend!—Yohan 11:33-44, MM.

Dichuku dikwau, ikundj umwing wadinga uyedin musong wa maak—musong umwing wijondila wamusala ishakamina amwinend—wamwilembila Yesu anch: “Mwant, anch ey ukatil ukutwish kwintokish am.” Yesu wamwakula nich musangar: “Ndiy watandjek chikas chend, wamupukun, walond anch: Nikatil, ikal utokila.” (Mateu 8:2, 3) Yesu kayokangap antu mulong wa kuwanyish kusu uprofet bwat. Yesu wakata kuyikuswol mansoj mau. Chom chin chawonsu chasalangay chadinga chibachikinau nich mazu mend makad kutwish kuvuramen malonday anch: “Yiusotilany antu ing asalang kudi en, ni yen salany kand mwamu kudi awiy.”—Luka 6:31.

❑ Ov, yisal yey yimekeshin anch ukat kuyanaken akwen?

Yesu wadinga mwin kutesh ni mwin kujingunin. Ap anch ndiy karumbukap, Yesu kadingap ni kuyichingejin akwau anch ikala awanyidina ap kadingap ni kwitutul piur pau; ni kadingap ni kusal yom nich kumekesh anch kayiteshinap. Dichuku dimwing, mband umwing “wading mu ul, mwin yitil” wamekesha ritiy rend ni wasangera kusutil ku kumwowish Yesu ku yidjatil nich mansoj mend. Yesu wamulika asala mwamu, pakwez muntu wamutazuka kwolikwend washimoka nakash, ni wamurumburisha nayimp. Chajinguninay ukinakin wend, Yesu kamufishap nich mband mulong wa yitil yend. Pakwez, ndiy wamuleja anch: “Ritiy rey rakupandish kal; yang ni chisambu.” Mband winou walika chakin mashakamin ma mwom wend wa kusambish, mulong wa mutapu wamusadilau kudi Yesu nich chirungul.—Luka 7:37-50.

❑ Ov, wijiken mulong wa kujikitish kwey swa-swa ni kulik kufishan nich swa-swa?

Wading wakad kasolikany ni mwin kalimish. Pamwingap mulong wa kwovijan kwa untu wau ni pamwingap mulong wa kuvarikan kwau, chawiy Yesu wadinga umukatin pakampwil mwin kwilej wend Yohan.a Chikalap nchik mwamu, kamumekeshinap kasolikany, ap kumubangin chipandakenamu in kwilej akwau. (Yohan 13:23) Chawiy, chisu chezay Yohan nend mwanamakwend Yakob kumwit chakwel ayinkisha ndond jijim mu Want wa Nzamb, Yesu wayakula anch: “Pakwez ya kushakam ku chikas cham cha katatuku ap chikas cham cha kamaku, kichidip chamam kupan.”—Marko 10:35-40.

Yesu wadinga ni kuyilimishang antu akwau. Kiyandjikap mu milong ya kuyikis antu akwau ya mu machuku mend. Chilakej, amband adinga ni kuyisadil nich kapipej anch adi mwishin mwa amakuny. Pakwez, Yesu wayilimisha amband muchifanyidina. Chisu cha kusambish chalonday amwinend anch udi Mesia, ndiy wamuleja mwamu mband mwin Samariy wakad kwikal Muyuda, wadinga ukisinau kudi Ayuda ni mu chilik cha kulik ap kumulangwish kusu. (Yohan 4:7-26) Ni Yesu wayinkisha amband dilau dijim dia kwikal akusambish kumuman kupwa kwa disanguk diend.—Mateu 28:9, 10.

❑ Ov, ukwetingap kasolikany mu kushakam kwey ni antu a ulombu windjing wa chikit, akweta mujimbu ushalijadina ni weyey, alondila rudim rindjing, ap a muchid windjing?

Wasala midimu yend mudi mwan ni mukadivar. Chimeken kamu anch, Yosef, tatukwend a Yesu wa kumulil, wafa padingay Yesu uchidi mwanikanch. Chimeken patok anch, Yesu wamulama makwend ni anchend amakuny ni ayangadim ni wasalang mudi nsong a mabay. (Marko 6:3) Chisu chashika chirung cha nsudiel cha mwom wend, wamwinkisha mwin kwilej wend Yohan chisend cha kumulam makwend.—Yohan 19:26, 27.

❑ Ov, ukutwish niyey kumwimburij Yesu mu kusalang midimu yey ya mu dijiku mudi mwasalay?

Yesu wadinga murund wakin. Yesu wadinga upandakenamu mu kuta urund. Mu mutapu ik? Ndiy kadingap ni kuyilik arund nend anch mulong arumbukang kal, ap anch asal kurumbok kwinoku chisu ni chisu. In kwilej end kadingap ni kusal yisu yawonsu yom yadingay ni kuyichingejin anch asala. Pakwez, ndiy wimekesha amwinend anch udi murund nau mu kutadil ching kusu pa ngikadil yau yiwamp pa ndond pa kuyitonginang anch akwet yitongijok yiyimp. (Marko 9:33-35; Luka 22:24-27) Kayishindinangap yitongijok yend, pakwez wayilejanga kulond yitonginau ayinau.—Mateu 16:13-15.

Chipandakenamu yawonsu, Yesu wayikata arund nend. (Yohan 13:1) Mu chipim ik? Ndiy walonda anch: “Kwikil muntu ukweta rukat rujim rupandaken riner, ra kuladik kupand kwend mulong wa arund nend.” (Yohan 15:13) Ov, kudi muntu ukutwisha wayinkish arund nend chom chipandakenamu usey mudi mwom wend?

❑ Ov, uding chisu chawonsu murund ap anch akwen akwovish ujim ap anch akusarumun?

Wading utakamena ni kukapuk. Yesu kadingap muntu uziyina, unenganena mudi mukatau kumufwatul kudi in kufwatul amwing. Ma Evanjil mamulejen anch udi muntu ukweta dikand, ni usu. Tupamp twaad, Yesu wayopata in kulandish, ni yom yau, kudiokal mu tempel. (Marko 11:15-17; Yohan 2:14-17) Chisu cheza chisak cha antu mulong wa kumukwat “Yesu wa ku Nazaret,” nich kukapuk, ndiy wimana kamu kurutu kwau chakwel iyijikisha amwinend ni chakwel ayichidija in kwilej end, ni nich kukapuk walonda anch: “Yam ndiy, chawiy anch lel winsotilany am, yilikany kwau inang aya.” (Yohan 18:4-9) Chidiap cha kushimok anch chisu Pons Pilat chamumanay Yesu chikapukinay chikalap nchik kumukwat kwamukwatau ni yom yadinga yimusadilau, ndiy anch: “Talany muntu, ndiy ou!”—Yohan 19:4, 5.

❑ Ukwatining mipak nich kukapuk chisu umena chiufanyidina kusal?

Ngikadil yiney ni yikwau yipandikena yamwikadisha Yesu chilik chiwanyidina chetwetu kulondul. Anch twilikidin ayinetu anch mwikadil wend utakela, tukwikal antu awamp ni akweta musangar. Diawiy diyingish dined diamubachika kambuy Pita ayikasikesha in Kristu chakwel alondula mu ruzau ra Yesu. Ov, usadiling usu wa kulondul mu ruzau ra Yesu mudi muchitwishikina?  

Upandikenamu Chilik cha Kulondul

Yesu wadinga upandakenamu kwau chilik cha kumulondul. Ndiy walonda anch: “Yam njil ni uyakin ni mwom; kwikil ukwiyezila kudi Tatuku ching kudi am.” (Yohan 14:6) Kuwejin pa kulejan kwend uyakin wa Nzamb, chom chanzurila njil ya kumusejin Ndiy, Yesu wasala chom chiyitwishishina antu ashishamena kutambula mwom.—Yohan 3:16.

Payitadina diyingish dia kwez kwend pa divu, Yesu walonda anch: “Mwan a muntu kezilap ni kusadish pakwez ni kusadil, ni kupan kupand kwend kuyikingiluku avud.” (Mateu 20:28) Papanay mwom wend mudi yakupesh, Yesu washa mufulandal chakwel an a antu asanger mwom wa chikupu. Yom ik tukutwisha kusal muntu ni muntu chakwel tutaninamu mu chipan chinech? Yesu warumburula anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.”—Yohan 17:3.

Mwaning, kwak ronganyin ra Yesu, kwimburij mashakamin ma mwom wend, ni kwitiyij rufu rend ra kwipesh yawiy yitinau mulong wa kutambul mwom wa chikupu. Tukwitin witekina chisu cha kwilej musul winou wa ronganyin, Bibil, ni uswakal kusadil yilondilay, mudi mwasalay Yesu.b

Chilakej chiwamp cha mwom wa Yesu chitulejin anch tufanyidin kwikal antu a mutapu ik. Rufu rend ra kwipesh rikutwish ratukol ku yitil ni ku rufu ritwaswana. (Rome 6:23) Mwikadil wetu wela kwikal wa ushon mudi ik pakad usu wa Yesu Kristu! Kangal kulikin midimu ni yakamish ya mwom yikukangesha chisu cha kushinshikin ni kulondul chilik cha muntu mujim wa yisu yawonsu—Yesu Kristu.

[Mazu madia kwishin kwa paj]

[Kamushet/Yipich chidia pa paj wa 7]

◼ Yesu kadingap nich kasolikany ni wayilimishanga antu awonsu

◼ Wadinga murund wakin kushik ni kwinsudiel

◼ Wading ukapukina

Ov, usadiling usu wa kulondul mu ruzau ra Yesu mudi muchitwishikina?

[Chipich chidia pa paj wa 5]

Yesu wadinga wisiken . . .

uswapela kushejin . . .

wading mwin riy