Ez, “Winlondula am”

“Anch muntu wel anch anlondul panyim pam, ilika bil amwinend, asendang [mutond wend wa mar, NW] pichuku pichuku, ni kwinlondul am.”—LUKA 9:23.

1, 2. (a) Kutazuk ik kuwamp kwatazukanay Yesu? (b) Mutapu ik witiyijina ku kutazuk kwa Yesu?

PISWIMP ni kupwish mudimu wend, Yesu wadinga ulejen mu Pere, ngand yadinga ushad wa Yordan, ku mutambu wa kwindum ni kwingangel kwa Yudea. Nsand umwing wamushejina wamwipul anch, yom yifanyidinay kusal chakwel eza atambul mwom wa chikupu. Kupwa, Yesu, wajingunina anch nsand wading ulamin Chijil cha Moses, chawiy wamutazuka. Wamwela anch, yang ulandisha “yiukweta, uyipana kudi atuzwendj, ukatana rupit mwiur; weza winlondula am.” (Marko 10:21) Tong bil—diladikij dia kumulondul Yesu, Mwan kapokal wa Nzamb Udia Piur pa pansh pawonsu!

² Nsand winou walika diladikij diend, pakwez akwau aditiyija. Kwisambishil, Yesu wamwela Filip anch: “Nlondula am.” (Yoh. 1:43) Filip witiyija ni kupwa wikala kambuy. Yesu wamutazuka kand Mateu chilik chimwing, niyend kand witiyija. (Mat. 9:9; 10:2-4) Chakin kamu, Yesu wayitazuk chilik antu akatina kutentam palonday anch: “Anch muntu wel anch anlondul panyim pam, ilika bil amwinend, asendang [mutond wend wa mar, NW] pichuku pichuku, ni kwinlondul am.” (Luka 9:23) Chawiy lel, muntu win mwawonsu ukutwish wikal mwin kwilej wa Yesu anch kamu wakat. Ov, mwamu usotila kwikal? Antu avud adia pakach petu itiyijin kamu nawamp ku kuyitazuk kuyitazukinau kudi Yesu, ni mu mudimu wa chingand, tukat niyetu kuyitazuk antu akwau.

3. Mulong wak tukwiyepa kupwepuk ku kumulondul Yesu?

³ Cha ushon, antu amwing asangera uyakin wa Bibil kadandamedinap kwilejau. Pakwez, awiy achirika kwi nyim ni ashikena ku ‘kupwepuk’ alik kumulondul Yesu. (Heb. 2:1) Ov, mutapu ik tukwiyepa kuwil mu mupit winou? Chikwikal cha usey anch twiyipul ayinetu anch: ‘Ov, mulong wak natonda bil kumulondul Yesu? Chirumburikin ik kumulondul ndiy?’ Kulam yakul ya yipul yiney yaad mu manangu metu kukutukwash kukasikesh mipak yetu ya kushal mwi njil yiwamp yitwatonda. Yikutukwash kand tuyikwasha akwetu niyawiy amulondula Yesu.

Mulong wak Kumulondul Yesu?

4, 5. Ov, mulong wak Yesu ndiy uwanyidin kutakel?

⁴ Muprofet Yeremiy walonda anch: “[ Yehova, NW], nij anch kwikil muntu umwing ukutwisha kurijek yom yikumanay kurutu. Kwikil muntu ukutwisha kutakel mwom wend amwinend.” (Yer. 10:23) Rusangu ra muntu rimekeshin uyakin wa mazu ma Yeremiy. Chimeken patok anch, antu akayitil kakutwishap kwitakel ap kwiyikel ayinau. Twitiyijin kal kututazuk chakwel tumulondula Yesu mulong twileja ndiy udi uwanyidin kwikal Nyikel wetu mu mutapu wakadiay muntu kutwish kwikal. Tushinshikinany ngikadil yimwing ya Yesu.

⁵ Cha kusambish, Yehova amwinend wamutonda Yesu ikal Mesia Ntakel. Ov, nany wija nawamp kumupandakanamu Sakatang wetu muntu ukutonday chakwel ikal Ntakel wetu? Cha kaad, Yesu ukwet ngikadil yitukutwisha kusanger ni kwimburij. (Tang Isay 11:2, 3.) Ndiy udi chilik chiwanyidina. (1 Pita 2:21) Cha kasatu, Yesu uyibangidin nakash antu amulondwila, mudi mwalonday chisu chaladikay mupim wend mulong wau. (Tang Yohan 10:14, 15.) Ni wimekeshin amwinend kwikal kafung mwin kutubangin mututwadilay ku mwom wa musangar katat ni kututwal kwi ntumb ya chikupu yidia kurutu. (Yoh 10:10, 11; Kubur. 7:16, 17) Mulong wa mayingish minam ni makwau, twakwata mupak wa managu pitwatonda kumulondul ndiy. Ov, mudi kand ik mu kulondul?

6. Yom ik yikwau yiswirikena mu kumulondul Yesu?

⁶ Kwikal in kwilej a Kristu kurumburikin yom yivud kupandakanamu kusu kulond anch tudi in Kristu. Ilel unou piswimp antu mabiliyon maad afil mu kan anch adi in Kristu, pakwez yisalijok yau yiyimekeshin anch adi ‘in kusal yiyimp’. (Tang Mateu 7:21-23.) Anch antu amekesh anch asangaredin kuyitazuk kwau chakwel amulondula Yesu, tukat kuyirumburil anch in Kristu akin akat kulondwish mwom wau wawonsu pa malejan mend ni pa chilik chend—ni asadiling mwamu dichuku diawonsu mu mwom wau. Chakwel tutesha kurumburik kwa yom yiney, tushinshikinany yom yimwing yitwija piur pa Yesu.

Imburijany Chilik cha Yesu cha Manangu

7, 8. (a) Manangu chom ik, ni mulong wak Yesu wamadinga nich nakash? (b) Ov, mutapu ik wamekeshay Yesu manangu, ni mutapu ik tukumwimburija?

⁷ Yesu wamekesha ngikadil yivud ya usey nakash, pakwez tukwisambin ching pa yinying: manangu mend, kwikepish kwend, mushiku wend, ni rukat rend. Tushinshikinany cha kusambish manangu mend—ukaliweny wend wa kusadil ronganyin ni chovu mu mwom wend. Kambuy Paul wafunda anch: “Mwi ndiy [ Yesu] mwawiy mujingamina mapit mawonsu ma manangu ni ronganyin.” (Kol. 2:3, MM) Kwisu kwatanay Yesu manangu minam? Yesu amwinend walonda anch: “Ching mudi mwalejay Tatuku, yawiy yom yinikata kulond.” (Yoh. 8:28) Manangu mend madiokala kudiay Yehova, chawiy lel komb tukutwishap kushimok mulong wa dirumburish dia manangu dia Yesu.

⁸ Chilakej, Yesu wasadila manangu mawamp pa kutond mutapu ukwikala mwom wend. Wakwata mupak wa kulam mwom wend upipela, wakungamena pa chom chimwing: kusal rusot ra Nzamb. Wasadila nich manangu chisu chend ni usu wend mulong wa kuwanish yisakin ya Want. Tukutwish kulondul chilakej cha Yesu anch twasal usu wa kulam “dis . . . didi zwang,” ni kulik kwiyandjik mu yom yakad usey yikutwisha kushesh usu wetu ni kudimukin kwetu. (Mat. 6:22) In Kristu avud aswapeshin mashakamin mau chakwel ipana nakash mu mudimu wa chingand. Amwing atwishin kusal mudimu wa uchibol. Anch udi umwing wa antu mudi inay, tukujikitishin nakash. Kusambel “bil kusurib want” kuletin musangar ujim ni mazang.—Mat. 6:33

Ikepishany Mudi Yesu

9, 10. Ov, mutapu ik wamekeshay Yesu kwikepish kwend?

⁹ Ngikadil ya kaad ya untu wa Yesu tusotila kushinshikin kudi kwikepish kwend. Chisu chiyinkishiningau antu akad kuwanyin ulabu, akat kukudish chovil cha kwikwatang ayinau nich usey nakash. Pakwez, chadinga kushalijan mudi ik ku mutambu wa Yesu! Chikalap nchik mwaz wend ujim nakash mu rutong ra Yehova, Yesu kadingap ni kwitutul ap pakemp. Niyetu atukasikeshin tumwimburij pa mulong winou. Kambuy Paul wafunda anch: “Ikalany ni chiyul chimwing chadinga kand mu Yesu Kristu; ndiy wading mu chilik cha Nzamb, pakwez kichindilap kwikal wilikena nend Nzamb mudi chom cha kubwitan, pakwez wilika amwinend, watambula chifu cha kashalapol, wikala mudi antu.” (Filip. 2:5-7) Chom chinech chirumburikin ik?  

¹⁰ Yesu wasangera dilau diend ditapilay dia ntumb ya kushakam ni Tatukwend mwiur, pakwez ndiy “wilika amwinend.” Mwom wend awandjika mwivumu mwa mujik Muyuda, chakwel upamina mwinimwa angond chidivu djat ni pakuvadikay mudi mwan wakad usu mu dijuku dia nsong a mabay kazwendj. Ku chikumbu cha Yosef, Yesu wasambisha kutampul nzau, mudi mwan mukemp, ni wikala nsangarum. Kasalap chitil. Pakwez, mu winsand wend wawonsu wayiziyila anvaj end adinga akayitil. (Luka 2:51, 52) Kwikepish kwamushena mud ik!

11. Ov, mu mutapu ik tukutwisha kwimburij kwikepish kwa Yesu?

¹¹ Tukutwish kwimburij kwikepish kwa Yesu anch twitiyij nich kwisotil kusal mudimu umekena yisu yimwing mudi wakad usey. Chilakej, tushinshikinany mudimu wa kulejan rusangu ruwamp. Mudimu winou ukutwish kumekan mudi wakad usey, pakampwil pa chisu chilikiningau antu kuusanger, ap kutuswingish, ap kutukis. Pakwez, anch twadandamen kusal mudimu wa kulejan, tukuyikwash antu akwau chakwel akula ku kutazuk kwa kumulondul Yesu. Mwamu tukuyikwash kupandish mwom. (Tang 2 Timote 4:1-5.) Chilakej chikwau chid cha kusal mudimu wa kurijek Chot chetu cha Want. Mudimu ukutwish wikal mudi kudjibul yishoshot, kukomb, ni kukorop mu tupalikany ni mu misalany—midimu ya kwikepish! Chikwau kand, twij anch kulamang nawamp Chot chetu cha Want—ndond ya difukukwil dia kin—chid kamu chikunku cha mudimu wetu utumbila. Mu kuwanishang nich kwisotil midimu yimekena mud yakad usey, tukat kumekesh kwikepish ni kulondul kamu mu jinzau ja Kristu.

Ikalany nich Mushiku Mudi wa Yesu

12, 13. (a) Mutapu ik wamekeshay Yesu mushiku, ni chom ik chamubachika? (b) Yom ik yikutwisha kutubachik chakwel twikal nich mushiku mu mudimu?

¹² El katat tushinshikinany mushiku wa Yesu mu mudimu. Yesu wasala yom yivud chisu chadingay panap pansh. Kwinsambishin kwa mwom wend, wakata kusal mudimu pamwing ni tatukwend wa kumulil Yosef mudi nsong a mabay. Pa chirung cha mudimu wend, Yesu wasala yishimokish, ni wokan kand ayej ni kuvumbul afu. Pakwez mudimu wend wa kusambish wadinga wa kulejan rusangu ruwamp ni kuyifundish antu amuteshanga. (Mat. 4:23) Chitudia in kwilej end, wawiy mudimu umwing tukweta wa kusal. Mutapu ik tukutwisha kulondul chilik chend? Chom chimwing, chitukutwisha kukudish chid kusalang mudi mwasalay Yesu.

¹³ Chiyipandakenamu yiney yawonsu, rukat ra Nzamb rawiy ramubachika Yesu chakwel alejana ni afundisha. Pakwez Yesu wakata uyakin wafundishangay. Kudiay ndiy, uyakin walejanay wadinga mapit ma usey ukash, ni wadinga nich mushiku wa kuulejan kudi antu akwau. Niyetu mudi ‘alej, ap aruu’ tukusal chawiy chimwing. Tutonginany bil piur pa uyakin umwing ukweta usey nakash watwilejanya mu Dizu dia Nzamb! Twij uyakin piur pa ukaleng wa mangand mawonsu ni mutapu ukezau kuupwish. Tuteshin kamu nawamp yifundishina Mifund piur pa mwikadil wa afu ni piur pa mayukish makuletau mu mangand masu ma Nzamb. Anch twilejin uyakin winou katat kamu ak ap anch pasut kal mivu, kiukatap kusik bwat. Wikalap ukur ap usu, uyakin winou udi mapit ma usey ukash. (Tang Mateu 13:52.) Kusutil ku kulejan nich kuzangurok kwa muchim tukumekesh kamu rukat retu kudi akwetu mudi mutufundishinay Yehova.

14. Mutapu ik tukutwisha kwimburij mutapu wakulejan wa Yesu?

¹⁴ Talany kand, mutapu walejanay Yesu. Wayipwitina chisu ni chisu in kumutesh pa Mifund. Wadinga chisu chivud ni kulond anch: ‘Achifundil kal anch,’ pasotinay kwisambin dinans dia usey. (Mat. 4:4; 21:13) Mu mazu mend mafundau, wajimbulanga kapamp kamwing ap kujimbul kamu chikunku cha mikand ya Mifund ya in Hebereu. Mudi Yesu, komb niyetu tusadilang Bibil chisu chitudia mu mudimu wetu ni kurumburilang kamu mifund nawamp pichifanyidina. Mukusalang mwamu, tukuyikwash kamu akweta michim yitentamina chakwel imenap ayinau anch komb tukat kamu kuyilej Bibil, yidiap yitongijok yetu ayinetu. Yikat kutusangaresh mudi ik anch muntu witiyij kutang Bibil ni kwisambin usey udiamu ni wijik anch did Dizu dia Nzamb! Ni anch antu mudi inay itiyij kutazuk kwa kumulondul Yesu, musangar wetu ukat kamu kuvul nakash.

Kumulondul Yesu Kurumburikin Kuyikat Antu Akwetu

15. Ngikadil ik yadinga yipandakena kuwap ya Yesu, ni mutapu ik yikwikala nich usu padi etu?

¹⁵ Ngikadil ya nsudiel ya mwom wa Yesu yitukwisambina yisangareshina nakash muchim kupandakanamu yawonsu—rukat rend mulong wa antu. Kambuy Paul wafunda anch: “Rukat ra Kristu rikat kutusadish etu.” (2 Kor. 5:14) Pitukata kutongijokin pa rukat ra Yesu rayikatay nich antu awonsu, ni mutapu utukatinay muntu ni muntu panrend, michim yetu yikat kuzangurok, ni tukat kwiyov ashindidilau kulondul chilakej chend.

16, 17. Mu jinjil ik jasadilay Yesu rukat rend piur pa antu akwau?

¹⁶ Mutapu ik wamekeshay Yesu anch uyikatin antu akwau? Kwisotil kwend amwinend kuladik kupand kwend mulong wa mangand wadinga uman ukash wa rukat rend. (Yoh. 15:13) Pakwez, chisu chasalay mudimu wend, Yesu wamekesha rukat mu jinjil jikwau kand. Mudi chilakej, ndiy wayovila riy antu adinga amena mar. Chisu chamumanay Mariy ni adinga pamwing nend akat kudil mulong wa kufa kwa Lazar, Yesu wova ushon nakash mulong wamana runeng rau. Ap anch wadinga piswimp ni kumuvumbul Lazar, Yesu wova runeng “wadil.”—Yoh. 11:32-35.

¹⁷ Chisu chasambishay Yesu mudimu wend, kabangkat umwing waseja kudiay Yesu ni wamulej anch: “Anch wakat ukutwish kwintokish.” Ov, mutapu ik wakulay Yesu? Rusangu rilondil anch: “Wamwovila riy.” Kupwa, wasala chom chamushena. “Yesu wamwovila riy, wonan chikas chend dji wamupukon, wamwel anch: ‘Nikatil. Ikal utokishilau.’ Kukashimuk ubangat wamudiokal kamu swa, amutokisha to-o.” Mu Chijil cha Moses, atubangkat ading ijondil, ni Yesu wadinga nich usu wa kumwok ikundj winou pakad kumukwat ku mujimbu ap pakemp. Chikwau kand, Yesu pamokay kabangkat, wamutwishisha atesha anch amupukwin kudi muntu mukwau, pamwingap kapamp ka kusambish mu kusut kwa mivu. Chisal cha ranaken mudi ik!—Marko 1:40-42

18. Mutapu ik tukumekesha “muchim chimwing”?

¹⁸ Chitudia in kwilej a Kristu, atwitin tumekeshang rukat retu mu kumekesh “muchim umwing.” (1 Pita 3:8) Chidingap chiswapela kwov yovil mbay netu mukaritiy umena mar ap runeng nakash—pakampwil anch yom yeney kand kal yitushikenangap. Chikwau kand, Yesu wading wij chidia mayej ap anch amwinend kadingap nikuyel. Niyetu mutapu ik tukukudisha ranaken mudi riner? Kusutil ku kwishimpish kuyitesh antu amena mar atulejin yom yikwetau ku michim yau. Tukutwish kand kwiyipul ayinetu anch, ‘anch yam nidia mu mwikadil mudi winou, ov, mutapu ik nikwiyova?’ Anch twakudish kutesh yitongijok ya akwetu, tukutwish kamu kusal nawamp mu ‘kuyikasikesh ayikwop, ni kuyikwash aziyila.’ (1 Tes. 5:14) Mwamu tukutwish kamu kumulondul Yesu.

19. Chilik cha Yesu chikwet usu padi etu mu jinjil ik?

¹⁹ Musangar mudi ik wa kwilej yom mudi yiney tutanina mu mazu ni mu yisal ya Yesu Kristu! Mu chilik tukwileja piur pend, chawiy kand tukuswiridina twikala mudi ndiy—ni mu chilik kand tuswiridina kuyikwash akwetu niyau ileja piur pend. Pakwez, ku yawonsu yitusotila kusal, el tutanany musangar wa kumulondul Mwant Mesia—kusambish kamu katat ni chikupu ni chikupu!

Ov, Ukutwish Kurumburil?

• Mutapu ik tukutwisha kumekesh manangu, mudi mwasalay Yesu?

• Mu mutapu ik tukutwisha kumekesh kwikepish?

• Mutapu ik tukukudisha mushiku mulong wa mudimu?

• Mu mutapu ik tukutwisha kumwimburij Yesu mu kuyikat antu akwau?

[Kamushet/Chipich chidia pa paj wa 11]

Buku Ukutwisha Kutukwash Tumwimburija Kristu

Ku program wa chitentam cha distrik cha muvu wa 2007, kwabudikina buku wa mapaj 192, ukweta mutu wa mulong ulondila anch: “ Viens, suis-moi ”. Buku winou amutenchika mulong wa kuyikwash in Kristu chakwel amutala Yesu, pakampwil pa ngikadil yend ni pa yisal yend. Kupwa kwa mashapitre maad ma kusambish, chikunku chakusambish chisambidin ngikadil yijim ya Yesu—kwikepish kwend, kutakaman kwend, manangu mend, kuziyil kwend, ni kujijaman kwend.

Kulondul yikunku yisambidina midimu yasalay Yesu mudi mulej ni katwambil wa rusangu ruwamp ni mitapu yikwau yasadilay mulong wa kumekesh rukat rend rijim. Jinsangu jidia mu buku winou, ajitenchika mulong wa kumukwash mwin Kristu amwimburija Yesu.

Tuchingejin anch buku winou ukez katubachik etu awonsu chakwel twishinshikina ni twiyipula anch: ‘Ov, nikat chakin kamu kumulondul Yesu? Mutapu ik nikutwisha kumulondul chipandakena?’ Ukuyikwash kand “antu in awonsu adinga mu mwikadil ufanyidina kutambul mwom wa chikupu” ikala in kwilej a Kristu.—Mid. 13:48, NW.

[Chipich chidia pa paj wa 11]

“ VIENS,SUIS-MOI ”