Tanany Musangar Mu Kusal Mudimu Wa Kwikadish In Kwilej
“Chawiy en yangany kwen ku michid yawonsu uyikadishany in kwilej.”—MAT. 28:19.
1-3. (a) Mutapu ik wiyovilingau antu amwing pakatau kutakel malejan ma Bibil? (b) Yipul ik tukushinshikina?
NAMBAZ umwing usadilinga pamwing nich chirund cha rudim ra Hindu chidia mu États-Unis wafunda anch: “Nikat kwilej ni dijuku dimwing diadokala mu Pakistan pasut kal mbing 11.” Wadandamena nich kulond anch: “Chidiap kwau cha usey nikulejanany anch twikala arund. Nadila chisu natonga anch dijuku dined dikuchirik mu Pakistan kurutu oku. Nadila kichadingap kusu mulong wa runeng rinova mulong wa kushadish arund inay pakwez kand chadinga mulong wa musangar unadinga nich wa kuyilej piur pa Yehova.”
2 Ov, niyey wiyovap kal mudi nambaz winou, ni kwov musangar udiokila ku kwilej Bibil ni muntu kanang? Yesu ni in kwilej end a mu mivu chitot ya kusambish atana musangar ujim mu kusal mudimu wa kwikadish in kwilej. Chisu chachirikau in kwilej a Yesu afumbay 70 nich rusangu ra musangar, Yesu amwinend ‘wasangera mu spiritu utumbila.’ (Luka 10:17-21) Chawiy chimwing, antu avud atanin musangar ujim mu kuyikadish in kwilej. Chawiy, mu muvu wa 2007, in kulejan akash, atakela nich musangar piswimp malejan ma Bibil mamiliyon musamban ni chikunku pa ngond ni ngond!
3 Pakwez, in kulejan amwing, kandikal ovap musangar wa kutakel dilejan dia Bibil. Akwau niyawiy katwishap kutakel dilejan ap dimwing mu mivu yasutila ey. Yikokujol ik tukutwisha kurish nich pitukakedila dilejan dia Bibil? Mutapu ik tukutwisha kuyipandakan yikokujol yiney? Ni difut ik tukutambula chisu tusadila yom yawonsu chakwel tuziyil kwi mbil ya Yesu yalonday anch: “Chawiy en yangany kwen ku michid yawonsu uyikadishany in kwilej”?—Mat. 28:19.
Yikokujol Yikutwisha Yatupwish Musangar
4, 5. (a) Ov, mutapu ik witiyijinau antu avud mu yikunku yimwing ya ngand? (b) Yikokujol ik yirishinau nich in kulejan amwing mu jindond jimwing?
4 Mu yikunku yimwing ya mangand, antu akat kwitiyij nich musangar mikand yetu ni asangaredin nakash kwilej netu Bibil. Ambay aad atijadina adiokala ku Australie asalaku kachisu kakemp mu Zambie afunda anch: “Jinsangu jinej jidi jakin. Zambie yidi ngand yimwing yisongina mu kulejen. Uman wa mu mikombil awitiyijanga! Antu ezanga kudi etu, amwing ipulanga yipul piur pa ma nimero kushalijan ma magazet.” Muvu umwing wasutina piswimpap, akadivar ni anambaz a mu Zambie atakela malejan ma Bibil 200000 ni kusut—chawiy chilejena anch mwin kulejan umwing ni umwing watakela dilejan dia Bibil dimwing ap ni kusut.
5 Pakwez, ku jindond jikwau, chikat kuyikasiken in kulejan kupan ap mukand umwing ni kutakel malejan ma Bibil chisu ni chisu. Mulong wak? Chisu chivud, antu kadingap kwolikwau chisu chiyilingau in kulejan ku yikumbu yau, pakwez antu adinga kwolikwau kakatap kwau kusanger milong ya relijon. Pamwingap apamina mu majuku ma antu akad kwikal mu relijon ap kand alikining kwau mulong wa rubabek rimekena ra relijon wa makasu. Antu avud ayishesha kal muspiritu—ayandjika kal mu mididim ni akat kuyipumbul kudiau atufung amakasu. (Mat. 9:36) Choviken kamu anch, antu mudi inay akutwish iyakamish nakash pa minsamb ya Bibil.
6. Yikangesh ik yimwing yirishinau nich antu amwing?
6 In kulejan amwing ashinshamena arishin nich chikokujol kanang chikutwisha kuyisheshin musangar wau. Ap anch pa chisu chimwing adinga nich mushiku wa kusal mudimu wa kuyikadish in kwilej, pakwez akat mulong wa mayej ni yikangesh ya ku mujimbu mulong wa upal. Tushinshikinany kand, yikangesh yikwau yitukutwisha kwisarumwin ayinetu. Chilakej, ov, wiyovil anch ukutwishap kutakel dilejan dia Bibil? Ukutwish wiyovu mudi mwiyovay Moses pamutumau kudi Yehova chakwel aya akamuleja Faraon. Moses walonda anch: “Nsalejam, nlikishinaku amboku! Am kinidiap mwin kulond swa, ap pasak, ap katat chiulondila kudi am kashalapol wey.” (Kub. 4:10) Wom wa kukangany kusal chom uyiling pamwing nich yovil ya kuburen kuwanyish yitinau. Tukutwish twiyakamish anch muntu kakutwishap wikal mwin kwilej mulong anch kitudiap mulej muwamp. Anch twakimb anch twiyepa mulong winou, tukutwish twaburen kuyuk kwetu kwa kutakel dilejan dia Bibil. Mutapu ik tukutwisha kura nich yikokujol yiney?
Tenchik Muchim Wey
7. Chom ik chamubachika Yesu chakwel asala mudimu wend?
7 Ruzau ra kusambish rid ra kutenchik muchim wetu. Yesu walonda anch: “Kan [ka muntu] kakat kulond kuvul kwa yom yidia mu muchim.” (Luka 6:45) Kubangin kuwap kwa antu akwau kwamubachika Yesu asala mudimu ni muchim umwing. Chilakej, chisu chamanay mwikadil wa uzweny wa muspiritu wa ambay nend Ayuda, “wayovil riy.” Wayileja in kwilej end anch: ‘Yakwangul yidi yivud . . . Chawiy ulembilany Mwant wa yir chakwel ayituma in kwangul mu yir.’—Mat. 9:36-38.
8. (a) Ov, pa yom ik yitufanyidina kutongin kamu nawamp? (b) Yom ik tukwilejina ku yom yalonday mwin kwilej Bibil umwing?
8 Pitusadila mudimu wa kuyikadish in kwilej, tukusal nawamp anch twatongin chipandakena padi ayinetu mutapu twataninamu mulong muntu kanang witekin chisu cha kwilej netu Bibil. Yitongina kand antu tukutwisha kutan mu mudimu wa chingand ni mutapu ukutwishau kutaninamu pakuteshau uruu tuyilejina. Mband umwing wamufundina biro wa mutiy wa mwi ngand mushichay anch: “Nisotil nikulejan anch niyikatining nakash Atuman ezininga kwilej ku chikumbu cham. Nij anch pa yisu yimwing akutwish ov ushon mulong nadinga ni kuyipul yipul yivud ni adinga ni kushakam nam chisu chilemp. Pakwez adinga ni kushimpish mulong wamam ni adinga nich mushiku wa kwilej yom yilejangau. Nimujikitishin Yehova ni Yesu mulong wa antu inay eza kwinkwash mu mwom wam.”
9. Yesu wasina pa chom ik, ni mutapu ik tukutwisha kumwimburij?
9 Inge, antu awonsu kitiyijap yasalay Yesu mulong wa kusot kuyikwash. (Mat. 23:37) Amwing amulondula mu chisu chikemp pakwez alika malejan mend ni “kendap kand nend.” (Yoh. 6:66) Pakwez, Yesu kalikangap kulik kumutesh kwa antu amwing iyova anch uruu wend kiukwetap usey. Ap anch mbut jakunay kijasongap mabuj, pakwez Yesu wakungamena pa uwamp wasalangay. Wamana anch mbut jaswil kal mulong wa kujangul ni yamuletina musangar ujim mulong wa kuyikwash ku kwangul kwinoku. (Tang Yohan 4:35, 36.) Pandond pakushinshikin kusu pa divu diakad kusongish mabuj, ov, tukutwishap niyetu twasin pa kwangul kukutwisha kwikal mu teritwar wetu? El tushinshikinany mutapu tukutwisha kulam mwikadil uwamp.
Kun Nich Rutong ra Kwangul
10, 11. Chom ik ukutwisha kusal chakwel ulama musangar wey?
10 Ndim ukat kukunang mbut nich rutong ra kujangul. Chawiy chimwing, niyetu tuswiridin tulejan nich rutong ra kusambish malejan ma Bibil. Ov, utonginap nchik, anch wipan mu mudimu wa chingand chad watan kwey antu akemp kuyikumbu ap waman anch yikukasikedin kuyichirikin? Chom chinech chikutwish chalet kuziy. Ov, ukutwish kwey chad kulik kusal mudimu wa ku chikumbu ni ku chikumbu? Bwat! Mwamu mukatau kuyishiken antu avud nich kusadil mutapu winou wa pakampwil wa kulejan nich.
11 Pakwez, anch walam musangar wey, ov, ukutwish wasadil kand mitapu yikwau ya kulejan nich, pamwingap kusadil milad yikwau ya kuyilej antu? Chilakej, ov, wapakishinap kal kuyilej antu mu mikombil ap ku jindond jau ja midimu? Ukutwish ap wambamb nau ku telefon ap watambul manimero ma matelefon ma antu waleja uruu wa Want chakwel anch usambishang kuyitazuk? Mu kudandamen kwey ni kusal kulondulijan nich mudia mudimu, ukutwish kutan musangar wa kuyitan antu akwitiyija nawamp uruu wa Want.
Kurish Nich Kulik Kutesh
12. Chom ik tukutwisha kusal anch avud mu teritwar wetu kasotinap kutesh?
12 Ov, chikwikal nchik anch antu avud adia mu teritwar wen kasotiningap kutesh milong ya relijon? Ov, ukutwish wakarumun mulad wey wa kusambish nich mambamb chakwel uyisangaresha? Kambuy Paul wayifundina ambay akaritiy a ku Korint anch: “Kudi Ayuda nikala mudi Muyuda . . . Kudi awiy akad yijil nikal mudi wakad yijil—pakwez kinidiap wakad yijil kudi Nzamb.” Mulong wak wasalay Paul mwamu? Ndiy walonda anch: “Nikala yom yawonsu kudi antu awonsu, chakwel ku inang awonsu nez nipandishiku amwing.” (1 Kor. 9:20-22) Ov, niyetu tukutwish kutan mitu ya milong yikutwisha kuyisangaresh antu mu teritwar wetu? Antu avud akad kwikal mu marelijon aswirikedin kutenchik mikadil mulong wa kuwapish urund mu majuku mau. Akutwish kand kuswiriken kukimb rutong mu mwom yau. Ov, tukutwish twayilej antu inay uruu wa Want mu mutapu ukutwisha wayisangaresh?
13, 14. Mutapu ik tukutwisha kuwejinaku musangar ututanininga mu mudimu wa kuyikadish in kwilej?
13 In kulejan avud awejidinaku musangar wau nakash mu mudimu wa kuyikadish in kwilej, ap kamu ni mu materitwar mudiau antu akad kusot kutesh. Mutapu ik? Kusutil ku kwilej rudim ra wingendj. Ambay amwing adinga awanisha kal mivu 60 ni kusut ajingunina anch tunan twa ansand a shikol in Chine ni majuku mau adinga ashich mu teritwar wa chikumangen chau. Ngatan ulondil anch: “Mulong wa chinech, atukasikesha twileja rudim ra in Chine. Ap anch kusal mwamu kwatwita chisu dichuku diawonsu mulong wa kwilej rudim, twashikena ku kwikal nich malejan ma Bibil mavud nau in Chine ading ashicha mu teritwar wetu.”
14 Ap anch ukutwishap kwilej rudim ra wingendj, ukutwish wasadin nawamp ka buku kalondila anch: Une bonne nouvelle pour des gens de toutes nations chisu ukuyitana antu alondina rudim rikwau. Ukutwish kand watambul mikand yidia mu rudim ra antu ukata kutanijan nau. Chakin, chitin chisu ni usu chakwel kwisamb ni antu alondina rudim rikwau ni akwetinga yishankur yikwau. Pakwez vurik mbil yidia mu dizu dia Nzamb yilondila anch: “Ukukuna pajim ukez kapodil kand pajim.”—2 Kor. 9:6.
Chikumangen Chawonsu Chikwatiken
15, 16. (a) Ov, mulong wak mudimu wa kuyikadish in kwilej wengamidin pa usu wa chikumangen chawonsu? (b) Chisend ik chikwetau amapal?
15 Pakwez, mudimu wa kuyikadish in kwilej wengamidinap pa usu wa muntu umwing bwat. Pakwez udi mulong wa chikumangen chawonsu. Mutapu ik? Yesu walonda anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yoh. 13:35) Chakin kamu, chisu chikatau kwez in kwilej Bibil ku yikumangan, akat kushimok nakash mulong wa rukat retu ra chirungul. Mwin kwilej Bibil umwing wafunda anch: “Nikat kusanger nakash kukumangan ku yikumangan. Mulong kwinikwa ayakining antu!” Yesu walonda anch antu akwikala in kwilej end akuyipompat kudi anamakwau. (Tang Mateu 10:35-37.) Pakwez, ndiy washilamu anch, akez kutan “akadivar nau anambaz ni a maku ni an” avud a muspiritu.—Marko 10:30.
16 Akadivar ni anambaz netu amapal akwet chisend cha pakampwil cha kuyikwashang in kwilej Bibil aya kurutu. Mu mutapu ik? Ap anch amapal amwing katwishinap kutakel dilejan dia Bibil ayinau, yirumburil yau yitungina yikatau kupan ku yikumangan ya chikumangen yikat kutung ritiy ra antu akata kuyitesh. Rusangu ra mwom wau “mwinjil ya kutentam” riwejidinaku kuwap kwa chikumangen ni riyipwitin antu akweta michim yiwamp eza ku dirijek dia Nzamb.—Jinsw. 16:31.
Kuupandakan Wom Wetu
17. Yom ik tukutwisha kusal chakwel tupandakana yovil ya kuburen kufanyin?
17 Ov, chikwikal nchik anch wiyovil anch ufanyidinap? Vurik anch Yehova wamukwasha Moses mukumwinkishang spiritu utumbila ni mwin kusal nend pamwing, mwanamakwend Aron. (Kub. 4:10-17) Yesu washilamu anch spiritu wa Nzamb ukukwash mudimu wetu wa kulejan. (Mid. 1:8) Chikwau kand, Yesu wayituma in kusal mudimu aad aad. (Luka 10:1) Chawiy lel, anch utwishinap kutakel dilejan dia Bibil, mulembila Nzamb chakwel akwinkisha spiritu ni manangu ni sal pamwing ni mwin kulejan mukwau ukutwisha kukukasikesh ni ukweta ronganyin ukutwish pamwingap wakukwash. Chikat kukasikesh ritiy kuvurik anch Yehova watonda kuyisadil antu achamwamu—“yom ya mangand yiziyila”—chakwel asala mudimu winou upandakena kujimb.—1 Kor. 1:26-29.
18. Mutapu ik tukutwisha kupandakan wom wa kukangany?
18 Mutapu ik tukutwisha kupandakan wom wakukangany? Chidi chiwamp kuvurik anch kuyikadish in kwilej chidiap mudi kwisuk yakudia mulong kutwishik kway kwengamidin ching kusu pa usu wa muntu umwing—mwin kwisuk. Pakwez, kumwikadish mwin kwilej kwitin kusal yom yisatu yiney pamwing. Yehova ndiy usadilinga chikunku chijim, kumukakin muntu nendendiy. (Yoh. 6:44) Komb, etu ni akwetu mu chikumangen tufanyidin kusadin nawamp mutapu wetu wakulejan chakwel tuyikwasha in kwilej aya kurutu. (Tang 2 Timote 2:15.) Ni mwin kwilej uswiridin kusadin yilejinay. (Mat. 7:24-27) Anch muntu wimik kwilej Bibil, tukutwish kamu twaziy. Tuchingejin anch antu ilejina Bibil atonda kutond kuwamp, pakwez muntu ni muntu “ukez kilondil amwinend kudi Nzamb.”—Rome 14:12.
Difut ik Didiaku?
19-21. (a) Kutaninamu ik tukutambula anch tukat kutakel malejan ma Bibil? (b) Mutapu ik uyimenayap Yehova antu awonsu asadilinga mudimu wa kulejan?
19 Kutakel malejan ma Bibil kukat kutukwash tushindamena pa kukimb cha kusambish Want wa Nzamb. Kukat kand kukasikeshin uyakin wa Dizu dia Nzamb mu manangu metu ni mu michim yetu. Mutapu ik? Chibol umwing utazukiningau anch Barak urumburil mwamu: “Kutakel malejan ma Bibil ku kukushikij amwing ku kwilej nakash Dizu dia Nzamb. Namana anch nifanyidin bil nikasikesha ritiy ram kurutu kwa kumulej muntu mukwau.”
20 Anch utakedilap dilejan dia Bibil, ov, chirumburikin anch mudimu wey ukwetapu usey ku mes ma Nzamb? Bwat! Yehova ukat kubaz chipandakena usu tusadilinga mulong wa kumutumbish. Antu awonsu asadila mudimu wa kulejan adi “in mudimu nend Nzamb.” Pakwez, kutakelang dilejan dia Bibil kuletining kamu musangar nakash patukata kuman mutapu upamishiningay Nzamb rubut ritwakuna. (1 Kor. 3:6, 9) Chibol umwing utazukinau anch Amy ulondil anch: “Anch wamuman mwin kwilej Bibil chiyilay kurutu, ukwov kamu chovil chipandikena nakash cha kumujikitish Yehova mulong wa kukusadil chakwel umwinkisha muntu winiwa chipan chiwamp—cha kumwijik Yehova ni cha kutambul mwom wa chikupu.”
21 Kusalang kwetu usu ukash chakwel tusambisha kutakel malejan ma Bibil ku kutukwash tudandamena kwasin pa kumusadil Nzamb katat ni kukez kukasikesh ruchingej retu ra kwandam mu mangand masu. Nich ukwash wa Yehova, tukutwish niyetu twayikwash antu atuteshininga chakwel eza apanda. (Tang 1 Timote 4:16.) Ukez kwikal musul wa musangar mudi ik!
Ov, Uvurikin?
• Yikokujol ik yikutwisha kuyikangesh antu amwing kutakel malejan ma Bibil?
• Yom ik tufanyidina kusal anch antu avud adia mu teritwar wetu kasotinap kwau kutesh?
• Difut ik tukutambula mulong wa kutakel dilejan dia Bibil