Dizu Dia Yehova Didi Diom

Manans Majim ma Mukand wa Kuburik—Chikunku cha 1

PADINGAY mu rukan pa ditung dia Patmos, mu upal wend, kambuy Yohan wamana yishimushimu 16. Wamana mu yishimushimu yiney yom yisadilay Yehova Nzamb ni Yesu Kristu mu dichuku dia Mwant—chirung chasambisha mu muvu wa 1914 pawimikau Want wa Nzamb, ni chikuya kushik kamu ni kwisudiel kwa Winyikel wa mivu Kanan wa Kristu. Mukand wa Kuburik, wafundau kudi Yohan piswimp mu muvu wa 96 C.C., mudi jinsangu ja yishimushimu yamushena.

El tushinshikinany katat manans majim ma Kuburik 1:1–12:17, wisambidina yishimushimu sambwad ya kusambish yamanay Yohan. Yishimushimu yiney yitutadin kamu etu nakash mulong yilejen yom yisadikina mu mangand katat ni yilejen mutapu ukusalay Yehova piswimpap kamu mu machuku kurutu oku. Antu akangininga jinsangu ja yishimushimu yiney nich ritiy, chakin kamu atanin rongoj ni dikasikesh.—Heb. 4:12.

“MWAN A MUKOKU” UBURIL YIJINGIDIJ MUSAMBAN PA YIJINGIDIJ SAMBWAD

(Kubur. 1:1–7:17)

Cha kusambish, Yohan umumen Yesu Kristu utumbishinau ni kupwa watambula jinsangu jadingay ufanyidin ‘ajifunda mu mukand chakwel autuma mukand winou kudi in yikumbu ya Nzamb sambwad.’ (Kubur. 1:10, 11) Kwalondula chishimushimu cha nkwas mwi ndond yach mwiur. Mu chikas cha katatuku cha Muntu wadinga ushich pa nkwas mwadinga muvungur utekinau yijingidij sambwad. Muntu “ukutwish kuburil mukand” wadinga ching kusu “Ntambu udia ku muchid wa Yuda,” ap anch “Mwan a mukoku . . . ukwet[a] misengu sambwad ni mes sambwad.”—Kubur. 4:2; 5:1, 2, 5, 6.

Chishimushimu cha kasatu chilejen yom yasadikina padingay “Mwan a mukoku” ni kuburil yijingidij musamban yakusambish, chimwing ni chimwing. Paburilay chijingidij cha musamban, kwikala kuzal kujim kwa divu ni dichuku dijim dia ujim diashika. (Kubur. 6:1, 12, 17) Pakwez chishimushimu chalondula chalejana ‘angel anying alamina rinkind munying wa divu’ kushik ni pakuyitekinau a 144 000 yijingidij. “Chisak chipandikena kujimb” cha antu akad kutekau yijingidij achimana chiminy “kurutu kwa nkwas ni kurutu kwa Mwan a mukoku.”—Kubur. 7:1, 9.

Yipul Yipwilingau Piur pa Mifund:

Kubur. 1:4; 3:1; 4:5; 5:6—Mazu “aspiritu sambwad” malejen ik? Uvud sambwad urumburikin kuwanyin ku mes kwa Yehova. Chawiy, rusangu ratumau ku “yikumbu ya Nzamb sambwad” chakin kamu aritumanay antu in awonsu a Nzamb adia mu yikumangen 100 000 ni kusut mu mangand mawonsu. (Kubur. 1:11, 20) Chawiy spiritu utumbila akat kumupan kulondwish nich yiswiridinay kuwanish, komb mazu “aspiritu sambwad” malejen kuwanyin kamu mu mutapu wend wa kusal mu kupanang kutesh ni mu kuyiyukish antu ateshininga yilondila uprofet. Mukand wa Kuburik umeken anch wisambidin yom sambwad-sambwad. Uvud sambwad umekeshin kuwanyin, chakin kamu, mukand wisambidin mulong wa ‘kupwish’ ap anch kuwanyish, “ujindj wa Nzamb.”—Kubur. 10:7.

Kubur. 1:8, 17—Nany “A ni Z” ni “Disambishil ni Disudiel”? Dijin “A ni Z” didi dia Yehova, dilejen anch kwadingap Nzamb mwin dikand diawonsu kurutu kwend ni kakez kwikalakwap kwinyim kwend. Ndiy “disambishil ni disudiel.” (Kubur. 21:6; 22:13) Ap anch amwisambidin Yehova anch “disambishil ni disudiel” mu Kuburik 22:13, mulong kwikil mukwau kurutu kwend ap kwiyim kwend, mazu madia mu shapitre wa kusambish wa Kuburik mamekeshin anch dijin “Disambishil ni Disudiel” adisadidin padiay Yesu Kristu. Ndiy wadinga muntu wa kusambish wasangulau amwinkish mwom wa muspiritu wakad kufang ni wansudiel wasangulau kudiay Yehova amwinend.—Kol. 1:18.

Kubur. 2:7—“Paradis wa Nzamb” chom ik? Mulong mazu minam ayilejinam in Kristu azizidilau many, kom paradis ulondilau pinap udi ndond ya mwiur yifanikeshinau nich paradis—ku mes kamu kwa Nzamb amwinend. Azizidilau many ashinshamena akutambul difut dia kudia “ku mutond wa mwom.” Akez kutambul mwom wakad kufang.—1 Kor. 15:53.

Kubur. 3:7—Chisu ik chatambulay Yesu “nfungul ya David,” ni mutapu ik wayisadilay? Chisu chamubatishau mu muvu wa 29 C.C., Yesu wikala Mwant Watondau wa mu muchid wa David. Pakwez, Yesu wachingela djat mu muvu wa 33 C.C., pamuzambwilau ku chikas cha katatuku cha Nzamb mwiur chakwel atambula nfungul ya David kushik nich. Mwinimwa waswana mbil yawonsu ya Want wa David. Kudiosh kamu pinipa, Yesu ukat kusadil nfungul mulong wa kutanguril yisend ya mudimu ya Want. Mu muvu wa 1919, Yesu wamwinkisha “Kashalapol ushishamena ni kubabal,” “anfungul awonsu” a chikumbu cha David pachitekay chisak chinech cha kashalapol “piur pa yom yend yawonsu yikwetay.”—Isay 22:22; Mat. 24:45, 47.

Kubur. 3:12—Disu “dijin . . . disu” dia Yesu? Dijin dined dikwatin ku mudimu ni yisend yisu ya Yesu. (Filip. 2:9-11) Mudi kwikil muntu ap umwing wija dijin dined mu mutapu usadilay Yesu, Yesu udifundin pa akadivar nend ashinshamena adia mwi ndond ya mwiur, diyikadishin arund nend a pa muchim. (Kubur. 19:12) Uyinkishin ni awiy yisend yend.

Malejan Kudi Etu:

Kubur. 1:3. Mulong “muten [wa Nzamb wa kurumburish mangand ma Satan] washik kal piswimp,” kudi maswir makash ma kutesh rusangu ridia mu mukand wa Kuburik ni kurisadil.

Kubur. 3:17, 18. Pakwel anch twikala ampich muspiritu, tuswiridin kuland “or uchidilau mu kasu” kudiay Yesu. Charumburik anch, tufanyidin tusala usu chakwel twikala ampich mu midimu yiwamp. (1 Tim. 6:17-19) Tuswiridin kand kudjal “yidjal yitok,” yilejeninga anch tudi in kwilej a Yesu, ni kusadin ‘mwon wa mes,’ mudia yiyul yidia mu gazet wa Chinong cha Kalam, mulong wa kutambul jingunin ya muspiritu.—Kubur. 19:8.

Kubur. 7:13, 14. Amakurump 24 ayifanikeshin antu 144000, mu uyaj wau wa mwiur, musadidilau mudi ant ni in kupesh. Ayifanikesha kudi in kupesh a pakur a mu Isarel wa pakur, aurilau kudiay Mwant David mu yirund 24. Umwing wa amakurump inay umulejin Yohan anch anany asadila chisak chinech chipandikena kujimb. Komb lel, disanguk dia in Kristu azizidilau many diasambisha kurutu kwa muvu wa 1935. Mulong wak? Mulong mu muvu winiwa atushalapol azizidilau many a Nzamb adia pa divu ayijingunina nawamp chisak chipandakena kujimb.—Luka 22:28-30; Kubur. 4:4; 7:9.

KUBURIL CHIJINGIDIJ CHA SAMBWAD CHASHIKIJA KU KUBUL MPUNY SAMBWAD

(Kubur. 8:1–12:17)

Mwan a mukoku uburil chijingidij cha sambwad. Angel sambwad atambula mpuny sambwad. Angel musamban abula jimpuny jau, jadinga uruu wa dirumburish pa “chibar cha kasatu” cha antu—in Kristendom. (Kubur. 8:1, 2, 7-12; 9:15, 18) Chawiy chinech chamanay Yohan mu chishimushimu cha katan. Mudi mwadingay ni cha kusal chishimushimu chalondulaku, Yohan wadia kamukand kakemp ni wilika ntempel ni chintamb. Kupwa kwa kubul mpuny ya sambwad, kwalondula mazu majim malonda anch: “Want wa mangand wikal kal want wa Mwant wetu ni wa Kristu wend.”—Kubur. 10:10; 11:1, 15.

Chishimushimu cha sambwad chimedin pa yom yilondilau mu Kuburik 11:15, 17. Chijingidij chijim chamekana mwiur. Mband wa mwiur wavala mwan, mwan ikundj. Djabul amwopata mwiur. Wamujimena nakash mband wa mwiur, chadi waya “ni kubutul njit nau amwing a mwi mbut ya mband.”—Kubur. 12:1, 5, 9, 17.

Yipul Yipwilingau Piur pa Mifund:

Kubur. 8:1-5—Mulong wak kwikala kuninet mwiur, ni chom ik chadjibwilau pansh? Kuninet kwa chifanikesh kwadinga mwiur mulong wa “kulembil kwa antu a Nzamb” adia pansh akutesha. Yom yiney yasadika kwinsudiel kwa njit ja kusambish ja mangand. In Kristu azizidilau many kadingap afanyidina kukandam mwiur djat ni papwila Muten wa Akamichid, mudi mwadinga avud au ni kutongin anch akukandam. Amana mar mavud nakash mu yisu yasadika njit jinija. Chawiy chalembilau kamu nich mushiku chakwel ayikwasha. Mu kuyakulang malembil mau, mwangel wadjibula pansh kasu ka chinfan chakwel in Kristu azizidilau many azuta mushiku wa kusal mudimu nakash. Ap mudi mwadingau akemp, asambisha kusal kampany wa kulejan pa mangand mawonsu, mudimu winou wikadisha rusangu ra Want wa Nzamb rikala mudi kasu, chawiy rayimunyikina in Kristedom mudi nzaj. Jinsangu ja kubabesh kudia mu Bibil jovukana nakash mudi nzaj, chitokish cha uyakin wa Mifund chijikana, ni ndond ya relijon wa makasu yanyikeka ni ku mifulandal yay, mudi mukata kuzal kwa divu kunyikesh mifulandal ya yikumbu yijim-yijim.

Kubur. 8:6-12; 9:1, 13; 11:15—Chisu ik charijekau angel sambwad mulong wa kubul jimpuny jau, ni chisu ik ni mutapu ik wadjima mpuny jabulau? Mu kwirijek mulong wa kubul mpuny sambwad mwadinga kuyinkish umutakel yid ya chisak cha Yohan yidinga pa divu kusambish kamu mu muvu wa 1919 kushik ni ku muvu wa 1922. Antu inay azizidilau many akwatikana nich kutenchikiril mudimu wa chingand ni kutung kand yikumbu mwa kuchapin mikand. (Kubur. 12:13, 14) Yidjimin ya jimpuny yading yafanyikeshin mudimu wa kulejan pakad wom dirumburish dia Yehova mulong wa mangand ma Satan, wasalau antu a Nzamb pamwing ni angel. Chakin, mudimu winou wasambisha nich chitentam chasadika mu muvu wa 1922, mu musumb wa Cedar Point, mu Ohio, ni ukudjim djat ni pakwezina mar mapandakena.

Kubur. 8:13; 9:12; 11:14—Mu mutapu ik mpuny ja nsudiel jisatu jabulau jaleta “riyind”? Ap anch mpuny ja kusambish jinying jabulau jadinga jilejen Kristedom udi mu mwikadil wa rufu muspiritu, pakwez jimpuny jisatu ja nsudiel jidi riyind mulong jikulet yishiken kanang ya pakampwil. Kubul mpuny ya katan kwadinga ku kwatijadin ni kuyilikishaku antu a Nzamb adinga mu “dibuku diakad musul” mwakad mudimu mu muvu wa 1919 ni kusal kwau mudimu wakulejan pakemp pakemp, ni wikala mudi chipupu cha mar padiay Kristedom. (Kubur. 9:1) Kubul mpuny ya musamban kwadinga kukwatijadin nich chisak chijim cha in kukandam pa atubar ezina kapur mutay mu rusangu ra muntu ni kampany wa kulejan mu mangand mawonsu wasambisha mu muvu wa 1922. Chidjimin cha nsudiel chadinga chitadil kuvadik kwa Want wa Umesia.

Malejan Kudi Etu:

Kubur. 9:10, 19. Usu wa mazu madiokila mu Bibil madia mu mikand ya “kashalapol ushinshamena ni kubabal” makweta uruu mudi jimuny. (Mat. 24:45) Uruu winou udi mudi atubol akweta mikil yikata “mikil . . . mudi ya atupambamb, ni jimuny” ni mudi chisak cha atubar, akweta “mikil . . . mudi annak.” Mulong wak? Mulong mikand yiney yipanining dibabesh piur pa ‘dichuku dia kufundakesh dia Yehova.’ (Isay 61:2) Komb, twikasikeshany lel ni twikalany nich mushiku wa kuyipan.

Kubur. 9:20, 21. Antu avud itudishina ashicha mu jingand jilikina Ukristu itiyijin nawamp rusangu ritukata kulejan. Pakwez, kituchingejidinap anch tuyimana antu avud adia mu Kristedom akarumuka, awiy inay ajimbwilau anch “antu akwau ashala.” Chikalap nchik mwamu, tudandamedin kusal mudimu.

Kubur. 12:15, 16. “Divu”—yid ya mu dirijek din dia Satan, ap anyikel a mu jingand kushalijan—akat kuchidij want ipau pa mulong wa difukwil. Kusambish mu mivu ya 1940, anyikel inay ‘amuminyin wit [wa kuzengol] wamwangay nnak mujim mu kan mwend.’ Chakin kam, chisu chikatay kutond Yehova chakwel asala mwamu, ukutwish wayisadil anyikel a maguvernema chakwel asala rutong rend. Chawiy komb, Jinswir 21:1 jilondil anch: “Muchim wa mwant udi muchikas [cha Yehova] mudi mem ma mukwaku. [Yehova] ukat kuukarumon kwawonsu kukatinay.” Chom chinech chifanyidin chikasikesha ritiy retu mudiay Nzamb.