Ov, Nzamb Ukweting Dijin?
Yakul yituteshininga chisu chawonsu:
▪ “Dijin diend didi Nsalejetu.”
▪ “Kakwetingap dijin.”
Yom ik yalonday Yesu?
▪ “Chawiy pa chinech lembilany anch: Tatukwetu udia mwiur, Dijin diey aditumbish.” (Mateu 6:9) Yesu witiyija anch Nzamb ukweting dijin.
▪ “Am nadijikish kal dijin diey kudi awiy, nikez kadijikish kand; chakwel rukat riwankatila nich ey rukwikal mu awiy, ni yam mu awiy.” (Yohan 17:26) Yesu walejana dijin dia Nzamb.
▪ “Kiukwinmananyip ching ni piukeza kulondany anch, Wayuk kwend wezidila mu dijin dia Mwant.” (Luka 13:35; Kuseng 118:26) Yesu wasadila dijin dia Nzamb.
NZAMB amwinend utulejin dijin diend. Ndiy walonda anch: “Yam kusu Yehova, diawiy dijin diam.”a (Isay 42:8, American Standard Version) Dijin Yehova dijiken nawamp kamu mu uruund, mulong diawiy dijin dipilay Nzamb amwinend mu rudim ra Hebereu. Ukutwish wakashimuk pa kwijik anch dijin dined dia pakampwil dia mu Hebereu didiamu tupamp tunan mu maniskri makur ma Bibil. Chakin, dimeken tupamp tuvud mu Bibil kupandakanamu dijin din diawonsu dijimbwilau.
Antu amwing akwiling ku chipul, “Dijin dia Nzamb dijin ik?” nich kulond anch, “Nsalejetu.” Chakin kamu, kukutwishap kwikal jinsangu jivud kupandakanamu kwakul ku chipul chinech, “Ov, nany wapandakena ku mavot?” nich kulond anch: “Muntu wapanina dijin.” Chakul chinech chovikenap kamu, mulong “Nsalejetu” ni “muntu wapanina dijin” kimadiap majin.
Ov, mulong wak Nzamb watuleja dijin diend? Wasala mwamu chakwel tumwijika nawamp win kamu. Chilakej, chitwishikin kumutazuk muntu kanang anch Mwant wam, Mukurump, Tatuku, ap Ngak, kulondulijan nich mikadil. Majin minam malejen chom kanang piur pend. Pakwez dijin dia muntu dituvurishining yom yawonsu yitwija piur pend. Chawiy chimwing, majin ma mwaz mudi Nsalejetu, Mwin Dikand Diawonsu, Tatuku, ni Sakatang mapwitidin manangu metu pa midimu kushalijan yasalay Nzamb. Pakwez ching kusu dijin diend, Yehova, dikata kutuvurish yom yin yawonsu yitwija piur pend. Ov, mutapu ik ukutwisha kumwijik Nzamb pakad kwijik dijin diend?
Chidi chijim, kangal kwijik ching kusu dijin dined pakwez kand chifanyidin kudisadil. Ov, mulong wak? Mulong Bibil ulondil anch: “Wawonsu ukeza katuzuk pa dijin dia Mwant akez kamupandish.”—Rome 10:13; Yowel 2:32.
[Mazu madia kwishin kwa paj]
a Anch usotil jinsangu jivud piur pa kurumburik kwa dijin dia Nzamb, ni mulong wak kidimekenap mu yikarumun yimwing ya Bibil, ukutwish washinshikin paj wa 195-197 mu buku Chom Ik Chakin Kamu Chifundishinay Bibil? wapalangeshau kudi Atuman a Yehova.
[Tablo wa jinsangu udia pa paj wa 6]
Chitwishikin kumutazuk muntu kanang anch Mwant wam, Mukurump, Tatuku, ap Ngak, kulondulijan nich mikadil. Majin minam malejen chom kanang piur pend. Pakwez dijin dia muntu dituvurishining yom yawonsu yitwija piur pend.