Dijin Dia Nzamb Nany?

Anch ukimbin kumwijik muntu kanang, chom cha kusambish ukusala chiding cha kumwipul anch: “Dijin diey nany?” Anch wamwipul Nzamb chipul chinech, mutapu ik ukukwakulay?

“Yam Yehova. Diawiy dijin diam.”​—Isay 42:8, NWT.

Ov, kawiy kapamp ka kusambish kutesh dijin dined? Pamwing ap kawiy kapamp key ka kusambish, mulong in kukarumun Bibil avud kakatap kusadin dijin dia Nzamb yisu yivud, ap kadisadidiningap kwau. Akat kuswinkesh dijin dined nich chijiken mudi “NSALEJETU.” Pakwez dijin dia Nzamb didi tupamp 7000 mu mazu ma kusambish masadinau mulong wa kufund Bibil. Mu Hebereu dijin dined dikwet mamuny manying, YHWH ap JHVH, pakwez pasutin kal mivu yivud dijin dined adikarumuna mu uruund anch “Yehova.”

Dijin dia Nzamb didi tupamp tuvud mu mifund ya Hebereu ni mu ma Bibil mavud

MULONG WAK CHIDI CHA USEY KWIJIK DIJIN DIA NZAMB

Dijin dined didi dia usey kudi Nzamb amwinend. Kwikil muntu ap umwing wamupila Nzamb dijin dined, ndiy amwinend wipila. Yehova walonda anch: “Dined didi dijin diam dia chikupu, chad pa dijin dined, pawiy pakez kanvurikinau ku a majuku mawonsu.” (Kubudik 3:15) Mu Bibil, dijin dia Nzamb adijimbwil tupamp tuvud nakash kusutamu yijiken mudi, Mwin Dikand Diawonsu, Tatuku, Nsalejetu, ap Nzamb, ni adijimbwil kand nakash kusutamu majin ma antu akwau mudi Aburaham, Moses, David, ap Yesu. Chikwau kand, Yehova ukatin anch antu awonsu ijika dijin diend. Bibil ulondin anch: “Chifanyidin antu awonsu ijika anch Yehova diawiy dijin diey, yey umwing kusu Udia Piur pa divu diawonsu.”​—Kuseng 83:18, NWT.

Dijin dined didi dia usey kudiay Yesu. Mu malembil mijikena matazukiningau anch Malembil ma Tatukwetu udia Mwiur ap Malembil ma Nsalejetu, Yesu wayifundisha in kwilejend kumulembil Nzamb anch: “Dijin diey aditumbish.” (Mateu 6:9) Yesu amwinend wamulembila Nzamb anch: “Tatuku, tumbish dijin diey.” (Yohan 12:28, TMK) Yesu wading wij anch kutumbish dijin dia Nzamb chawiy chading chom cha kusambish mu mwom wend, ni mulong wa diyingishin dined, diawiy diamubachika chakwel alembila anch: “Am nadijikish kal dijin diey kudi awiy, nikez kadijikish kand.”​—Yohan 17:26, TMK.

Dijin dined didi dia usey kudi antu amwija Nzamb. Pasak, antu a Nzamb ading ij nawamp anch diking ni dipandish diau diading dimedin pa kwijik dijin dia Nzamb. “Dijin dia [Yehova] didi dipat dikash, ni mwin kutentam ukat kuchinyinamu ni kushakam wakad kwakam.” (Jinswir 18:10) “Muntu mwawonsu ukeza [kutazuk dijin dia Yehova] mulong wa kumukwash ukez kapand.” (Jowel 3:5) Bibil umekeshin patok anch dijin dia Nzamb diawiy dikuyimekesha patok antu amusadidina Nzamb ni akad kumusadin. “Antu a michid yawonsu akat kuziyil ni kwifukwil [anzamb] au ayinau. Pakwez etu tukez kamuziyil ni kumwifukwil [Yehova] Nzamb wetu chikupu ni chikupu.”​—Mike 4:5; Midimu 15:14.

CHIRUMBURIKINA DIJIN DINED

Dijin dined dimekeshin patok chidiay Nzamb. In kukimbijol avud ashikena kulond anch dijin Yehova dirumburikin anch “Ukat Kwikadish.” Yehova Nzamb wamekesha patok kurumburik kwa dijin diend pamulejay Moses anch: ‘Am Nikez Kwikal Chinitondina Kwikal.’ (Kubudik 3:14) Dijin dia Nzamb dirumburikinap kwau ching kusu anch udi Sakatang wa yom yawonsu. Pakwez, dijin diend dimekeshin kand anch Nzamb ukwet ukaliweny wa kusal amwinend anch yitang yend yikala chom chawonsu chikatinay mulong wa kuwanyish rusot rend. Yijiken yikwetay Nzamb yimekeshin ndond ya piur yikwetay, ulabu wend ap usu wend, pakwez ching dijin diend, Yehova diawiy dimekeshina patok kamu chidiay ni chikutwishay kwikal.

Dijin dined dimekeshin patok anch Nzamb ukat kutubangin. Kurumburik kwa dijin dia Nzamb kumekeshin kand rukat rikatay Nzamb kumekeshin yitang yend, kuwejinaku ni etu. Chikwau kand, pijikishinay Nzamb dijin diend, chinech chimekeshin anch ndiy ukatin anch etu tumwijika. Chawiy, Nzamb wakwata amwinend mupak wa kutulej dijin diend kurutu etu twikalaku. Chakin kamu, Yehova kakatinap tutong anch udi spiritu udia kulemp niyetwetu ni anch chikasiken kumusejin piswimp, pakwez ukatin tumumana kamu mudi Muntu wakin utukutwisha kusejin piswimp.​—Kuseng 73:28.

Kusadin dijin dia Nzamb kumekeshin patok anch tukatin kumwijik. Chilakej, anch ukatin anch muntu kanang ikal murund ney, ukukat akutazukang pa dijin diey. Mutapu ik ukwiyova anch muntu winou udandamedin kulik kukutazuk pa dijin diey? Ukutwish kwiyipul anch chakin kamu muntu winou ukatin kwikal murund ney wa piswimp. Chawiy chimwing ni Nzamb. Yehova wayileja antu dijin diend ni utukasikeshin chakwel tudisadin dijin dined. Anch twadisadin, tukumekesh kudi Yehova anch tukimbin ikala murund netu wa piswimp. Chidi mulong ndiy wij kamu nawamp antu akata ‘kutongin pa dijin diend’!​—Malakiy 3:16.

Kwilej dijin dia Nzamb rawiy rizau ra kusambish ra kumwijik. Pakwez tufanyidinap kwimen pinap. Tufanyidin kwijik yom yikwau piur pa Muntu ukweta dijin dined. Tufanyidin kand kwijik mikadil yikwetingay.