Tumusangerany Yesu —David Mujim Ni Salomon Mujim

“Talany bil, upandaken Salomon udi pinap.”—MAT. 12:42.

1, 2. Mu kuman kwa chiuntu, ov mulong wak chadinga cha kushimok anch Samwel amuzizila David many mudi mwant?

KADINGAP mudi mwant. Pakwez, kudiay muprofet Samwel, wamekana nsand kafung wa chamwamu. Chikwau, musumb wend, Betlehem, wadingap uyila ntumb. Adinga ni kuujimbul mudi “kaul kakemp mwi ngand ya Yuda.” (Mike 5:2) Ap mwamu, nsand winou wamekana mudi wa chamwamu wa mu ka musumb kakemp, muprofet Samwel wamuzizila many chakwel eza ikala mwant wa Isarel.

² Yese kasambelap bil kumulet nsand David kudiay Samwel, chakwel amuzizila many; ni kadingap wa kaad ap wa kasatu kulet. David, kasulans wa an amakundj a Yese, kadingakwap chisu chezay Samwel ku chikumbu cha Yese chakwel amuzizila umwing wa an a muntu ushinshamena winou mudi mwant ukwambakenap wa ngand. Pakwez Yehova wamutonda David, ap anch wading umeken wa chamwamu.—1 Sam. 16:1-10, NW.

3. (a) Yom ik yipandakena usey yimeningay Yehova chisu chimushinshikidinay muntu? (b) Chisu chamuzizilau David many, chom ik chasambisha kusal mudiay ndiy?

³ Yehova wamana chom chadinga chimukasikedina Samwel kuman. Nzamb wajingunina mwikadil wa muchim wa David, ni yamusangaresha. Nzamb, kakatap kutal chifu cha muntu; pakwez chidiay muntu mu muchim. (Tang 1 Samwel 16:7, NW.) Chawiy lel, chijikay Samwel anch Yehova katondinap umwing pa an sambwad amakurump a Yese, watumana chakwel amuleta mwanikanch wadinga mu masuku kwadingau ni kudil annam. Rusangu rilondin anch: “[ Yese] watumana amuleta [David]. Wadinga ni ulombu wa chikit chisunzurikina, nsand ikundj ukweta mes mawamp ni chifu chiwamp. Kupwa Yehova walonda anch: ‘Tumbuk, umuzizila many, mulong ndiy winou!’ Chawiy Samwel wanona musengu wa many ni wamuzizila pakach pa anamakwend. Ni spiritu wa Yehova wasambisha kusal padiay David kusambishil pa dichuku dinidia.”—1 Sam. 16:12, 13, NW.

David Wadinga Mwinzwizwimb wa Kristu

4, 5. (a) Lejanany kwilikan kumwing kudia pakach pa David ni Yesu. (b) Mulong wak umutazukinau Yesu anch David Mujim?

⁴ Yesu, mudi David, wavadikina mu Betlehem, mivu 1100 kupwa kwa David kuvadik. Yesu wamekana ku mes ma antu avud, mudi kafanyidinap kwikal mwant. Charumburik anch, ndiy kadingap mulad wa mwant wadinga uchingedinau antu avud mu Isarel. Pakwez, mudi David, Yehova ndiy wamutonda. Mudi David, Yehova wamukata.a (Luka 3:22) Ni ku mutambu wa Yesu, ‘spiritu wa Yehova wasambisha kusal padiay ndiy.’

⁵ Kwilikan pakach pa antu inay aad kudandamedin. Chilakej, David amutunguna kudi muntu wend wa muyulang, Yesu niyend amutunguna kudi kambuy wend Yudas Isakariot. (Kus. 41:9; Yoh. 13:18) Awonsu aad David ni Yesu adinga nich mushiku ukash mulong wa ndond ya kumwifukwil Yehova. (Kus. 27:4; 69:9; Yoh. 2:17) Yesu wadinga kand nswan wa David. Kurutu Yesu avadika, mwangel wamuleja makwend anch: “Mwant Nzamb ukez kapan nkwas ya tatukwend David kudiay ndiy.” (Luka 1:32; Mat. 1:1) Pakwez, kushilamu kwawonsu piur pa Mesia kwafanyidina kuwanyina padiay Yesu, chawiy chimupandakenay David. Ndiy udi David mujim, Mwant Mesia wadingau ni kuchingel chisu chilemp.—Yoh. 7:42.

Mulondulany Mwant Kafung

6. Mu mutapu ik wadingay David kafung muwamp?

⁶ Yesu udi kand kafung. Yisu mikadil ya kafung muwamp? Uding muntu ushinshamena ni utakamena kukwashan, kudish, ni kulam amikoku end. (Kus. 23:2-4) Padingay uchidi nsand, David wadinga kafung, ni walamanga kamu nawamp amikoku a tatukwend. Wadinga utakamena chisu chadingau amikoku mu chak ni mwom wend wadinga mu ubaj mulong wa kusot kuyichidij kwi ntambu ni kangol.—1 Sam. 17:34, 35, NW.

7. (a) Yom ik yamurijeka David mulong wa midimu yend mudi mwant? (b) Mutapu ik wimekeshay Yesu kwikal Kafung Muwamp?

⁷ Mivu yasalay David mu masuku ni mu mikandu mulong wa kuyilamin amikoku yamurijeka mulong wa midimu yikash ya kufung muchid wa Isarel.b (Kus. 78:70, 71) Yesu niyend, wimekesha anch udi kafung muwamp. Yehova wamukasikesha ni wamutakela pakatay kufung “kachisak ka amikoku” ni “amikoku akwau.” (Luka 12:32; Yoh. 10:16) Chawiy, Yesu wimekesha anch udi Kafung Muwamp. Uyij nawamp amikoku end chawiy chikatay kuyitazuk umwing ni umwing pa dijin diend. Uyikatin nakash amikoku end chawiy padingay panap pansh wipana amwinend mulong wa kuwap kwau. (Yoh. 10:3, 11, 14, 15) Chidiay Kafung Muwamp, Yesu usadin chom chimwing chakadiay kutwish David kusal. Mulambu wend wa difut wayazurila antu njil ya kupand ku rufu. Kwikil chom chikeza kumukangesh kufung “kachisak [kend] ka amikoku” ku mwom wa chikupu mu mangand masu matentamina mwakad antu adia mudi atwingol.—Tang Yohan 10:27-29.

Tumulondulany Mwant Mwin Kurish ni Kupandakan

8. Mutapu ik tukutwisha kulond anch David wadinga mwant mwin kurish ni kupandakan?

⁸ Mudi mwant, David wadinga isalay mukash wachidija ngand ya antu a Nzamb, ni “Yehova wamupandisha David kwawonsu kwayangangay.” Mu winyikel wa David, mimbu ya ngand ayijimbisha kudiokal ku wit mujim wa ku Idjibit kuya djat ku wit mujim wa Efrat. (2 Sam. 8:1-14, NW) Nich ukwash wa Yehova, wikala nyikel mukash. Bibil ulondil anch: “Katumb ka Mwant David kapalangana mangand mawonsu, chad [ Yehova, NW] wayikwatisha michid yawonsu wom mulong wa David.”—1 Jins. 14:17.

9. Rumburil mutapu wapandakanay Yesu Mwant-Watondau?

⁹ Mudi David, Yesu niyend kadingap ni wom. Mudi Mwant-Watondau kal, wamekesha ulabu wend piur pa ayilembil awonsu, wayidiosha antu ku usu wau. (Marko 5:2, 6-13; Luka 4:36) Ap mukankuny win mujim, Satan Djabul, kakwetap usu padiay Yesu. Nich ukwash wa Yehova, Yesu wamapandakana mangand, madia mu usu wa Satan.—Yoh. 14:30; 16:33; 1 Yoh. 5:19.

10, 11. Mudimu ik usadilay Yesu mwiur mudi Mwant-Mwin Kurish?

¹⁰ Kupwa kwa mivu 60 kudiosh pafilay Yesu ni pasangukinay kuya mwiur, kambuy Yohan wamana chishimushimu mwamanay Yesu udi mu mwaz wend mudi Mwant-Mwin-Kurish mwiur. Yohan ufundil anch: “Ni yam naman, kutal kabar utok, ni wading ushichap ukwet ut wa nseu; amwinkish chibangul, ni ndiy wadiokal kuya kurish ni kuyipandikan akwau usu.” (Kubur. 6:2) Yesu ndiy wadinga ushich pa kabar utok. ‘Amwinkisha chibangul’ mu muvu wa 1914, pamwikadishau Mwant wa Want wa mwiur. Kupwa pa chisu chinech waya, “kurish ni kuyipandakan akwau usu.” Mwaning, mudi David, Yesu udi mwant mwin kurish ni kuyipandakan akwau usu. Kachisu kakemp kamu kudiosh pa chisu chamwikadishau Mwant wa Want wa Nzamb, wamurishisha ni kumupandakan Satan mwinjit ni wamudjimbula pamwing ni ayilembil end piswimp ni divu. (Kubur. 12:7-9) Kuya kwend kurish ni kuyipandakan akwau usu kukudandamena djat ni pakezay “kuyipandikan akwau usu,” pakezay kushesh ditenchik diawonsu diyimp dia Satan.—Tang Kuburik 19:11, 19-21.

¹¹ Mudi David, pakwez Yesu udi mwant mwin riy, ni ukez kuchilam “chisak chipandiken kujimb” pa chisu cha Armagedon. (Kubur. 7:9, 14) Chikwau kand, mu winyikel wa Yesu ni answan nend, antu 144000 akezau kusangulau, kukez kwikal “disanguk ni kudi ayingila ni kudi afila nich.” (Mid. 24:15) Antu akezau kusangul pa divu akez kwikal nich ruchingej ra kushakam chikupu. Dikez dia musangar mudi ik diyichingedina! El tukwatany etwawonsu mupak wa kudandamen ‘kusal yom yiwamp,’ chakwel tweza twikalaku pa chisu chikezau antu a David Mujim, atentamina, in musangar kwizul pa divu.—Kus. 37:27-29.

Malembil ma Salomon Chakwel Ikala Nich Manangu Amakula

12. Salomon walembila amwinkisha ik?

¹² Salomon mwan wenday David niyend wamufanikesha Yesu.c Pikalay Salomon mwant, Yehova weza kudiay ndiy mu chilat ni wamwela anch Ukumwinkish chom chawonsu chikwitay. Salomon wela kwit mapit mavud, usu, ap mwom ulemp. Pakwez, pakad choy ndiy wamwita Yehova anch: “Katat nginkisha manangu ni ronganyin mulong wa kuyikel runtu riner, mulong nany ukutwisha kuyikel antwey avud mudi inay?” (2 Jins. 1:7-10) Yehova wakula malembil ma Salomon.—Tang 2 Jinsangu 1:11, 12.

13. Mutapu ik wadinga manangu ma Salomon makad cha kwilikan nich, ni kwisu Kumadiokala?

¹³ Chisu chawonsu chadingay Salomon uchishinshamen kudiay Yehova, kwikil washikena pa mazu mend ma manangu. Salomon wata “jinswir tunan tusatu.” (1 Ant 4:30, 32, 34, NW) Jinswir jivud ajifunda ni ilel unou antu ajikatina ajikimbin nakash. Mwant mband wa ku Sheba waya weny wa makilometre 2400 mulong wa kuya kupak manangu ma Salomon nich “yipul yikash.” Washimoka nakash pa kutesh yalonday Salomon ni pa kuman mapit ma want wend. (1 Ant 10:1-9, NW) Bibil ulejen Musul wa manangu madingay nich Salomon palondilay anch: “Antu awonsu a pansh adinga ni kusot kumuman Salomon chakwel atesha manangu mend matekay Nzamb mu muchim wend.”—1 Ant 10:24, NW.

Tumulondulany Mwant Mwin Manangu

14. Mu jinjil ik jadingay Yesu “upandaken Salomon udi pinap”?

¹⁴ Ching muntu umwing kusu ndiy wamupandakanamu Salomon ku manangu. Muntu winou wadinga Yesu Kristu, wijimbula amwinend mudi “upandaken Salomon udi pinap.” (Mat. 12:42) Yesu walonda “mazu ma mwom wa chikupu.” (Yoh. 6:68) Chilakej, Mafundish ma pa Mukandu mawejidin yom yivud pa jinswir ja Salomon. Salomon warumburila uvud wa yom kanang yikata kumuletin musangar mwin kumwifukwil Yehova. (Jinsw. 3:13; 8:32, 33; 14:21; 16:20) Yesu wakasikeshina anch musangar wakin udiokiling ku yom yikwatina ku difukwil dia Yehova ni ku kuwanyish yakushilamu ya Nzamb. Yesu walonda anch: “Ayuk kwau atuzwendj mu michim, mulong want wa mwiur udi wa awiy.” (Mat. 5:3) Antu akata kusadil yijil yidia mu malejan ma Yesu ayipwitidin piswimp ni Yehova, “musul wa kupand.” (Kus. 36:9; Jinsw. 22:11; Mat. 5:8) Kristu ndiy “manangu ma Nzamb.” (1 Kor. 1:24, 30, MM) Mudi Mwant Mesia, Yesu Kristu ukwet “mwiku wa . . . manangu.”—Isay 11:2.

15. Ov, mutapu ik tukutwisha kutaninamu mu manangu ma Nzamb?

¹⁵ Ov, mutapu ik, tukutwisha etu mudi in kwilej a Salomon Mujim, kutaninamu mu manangu ma Nzamb? Mulong manangu ma Yehova madi mu Dizu diend, tufanyidin tusala usu ukash chakwel tuujingunina kusutil ku kwilej nakash Bibil, pakampwil mazu ma Yesu, ni kusutil ku kutongijokin pa yom tutangina. (Jinsw. 2:1-5) Chikwau kand, tufanyidin tudandamena kumwit Nzamb atwinkisha manangu. Dizu dia Nzamb ditulejin nich kashinsh anch malembil metu makin chakwel atukwasha ukez kumakul. (Yak. 1:5) Nich ukwash wa mwiku utumbila, tukutwish kujingunin manangu ma usey madia mu Dizu dia Nzamb makutwisha kutukwash chakwel turisha nich yikokujol ni chakwel tukwata mipak ya manangu. (Luka 11:13) Salomon adinga ni kumutazuk kand anch: “Mulej” ni ndiy ‘wayileja antu chisu chawonsu ronganyin.’ (Mul. 12:9, 10) Yesu, mudi Mutu wa chikumangen cha Ukristu, niyend udi mulej wa antu. (Yoh. 10:16; Kol. 1:18) Chawiy lel, tukusal nawamp anch twakumangan ku yikumangan, kukatau ‘kutulej chisu chawonsu.’

16. Kufanikan ik kudia pakach pa Salomon ni Yesu?

¹⁶ Salomon wadinga mwant mwin kusal. Ndiy watenchika program wa kutung mu teritwar mwawonsu, wimanyina mudimu wa kutung yikumbu ya want, jinjil, tubil twa mem, nkil, misumb mwa kulamin yom, mwa kulamin matemb, ni ya yisak ya amasalay. (1 Ant 9:17-19, NW) Want wawonsu wataninamu mu yom yatungay. Yesu niyend udi ntung. Utungin chikumangen chend pa “diyal.” (Mat. 16:18) Ukez kand kwimanyin mudimu wa rutung ukeza kusadika mu mangand mawonsu.—Isay 65:21, 22.

Tumulondulany Mwant wa Chisambu

17. (a) Chom ik chadinga cha pakampwil nakash mu winyikel wa Salomon? (b) Pakwez, chom ik chakanay Salomon kusal?

¹⁷ Dijin Salomon didiokil ku dishin dirumburikina anch “chisambu.” Mwant Salomon wadinga ni kuyikel mu Yerusalem, dijin dirumburikina anch: “Chibar cha Chisambu Tupamp Twaad.” Winyikel wend wa mivu 40 wadinga chisambu chipandakena nakash mu Isarel. Bibil ulondil piur pa mivu yiney anch: “Yuda ni Isarel ashakama zoong, muntu ni muntu mwishin mwa mutond wend wa nviny ni mwishin mwa mufung wend, kudiokal ku Dan djat ku Bersheba, mu machuku mawonsu ma Salomon.” (1 Ant 4:25, NW) Ap mwamu, Salomon, mu manangu mend mawonsu, katwishap kuyidiosh antwend mu uswik wa mayej, chitil, ni rufu. Pakwez, Salomon Mujim, ukez kuyikola antwend ku yom yiney yawonsu.—Tang Rome 8:19-21.

18. Mikadil ik yitukweta mu chikumangen cha Ukristu?

¹⁸ Ap ni katat unou mu chikumangen cha Ukristu, tudi mu mashakamin ma chisambu. Chakin kamu, tusangaredin paradis wa muspiritu. Tudi mu chisambu ni Nzamb ni mukwetu muntu. Tal yalonday Isay piur pa mikadil yitukweta ilel unou: “Antu akez kachil jimpak jikal jinkasu, ni mirumbu yau kwikal jimpak ja kukatul nich ya kwangul. Kwikil muchid ukeza kapuril mpak ya musamun kurish ni muchid ukwau. Kakez kilejap kand kurish njit.” (Isay 2:3, 4) Kusutil ku kusal kukwatijan nich mwiku wa Nzamb, tukez niyetu kuwejin ku kuwap kwa paradis wa muspiritu.

19, 20. Mayingishin ik mitukweta ma kusanger?

¹⁹ Pakwez, dikez kwikal dipandakena kuwap. Mudi antu in kuziyil akez kusanger chisambu mu chilik chimwing chijim mu winyikel wa Yesu, akez kuyikol “mu uswik wa yom yivudila” pakemp-pakemp djat ni pakezau kushiken pa kuwanyin kwa chiuntu. (Rome 8:21) Kupwa anch asut choziu chansudiel kwisudiel kwa Winyikel wa Mivu Kanan, “itudishila akez kaswan ngand, akez kusangar mu kuvul kwa chisambu.” (Kus. 37:11; Kubur. 20:7-10) Chakin kamu, winyikel wa Kristu Yesu ukez kupandakanamu kulemp winyikel wa Salomon mu jinjil jimwing jakad etu kutwish kutongin!

²⁰ Mudi mwadingay Isarel nich musanger mu wintakel wa Moses, wa David, ni wa Salomon, tukez niyetu kusangar chipandakena mu winyikel wa Kristu. (1 Ant 8:66, NW) Tumujikitishin nakash Yehova chipandakena pamwing ni Mwanend kapokal—Moses Mujim, David Mujim, ni Salomon Mujim!

[Mazu madia kwishin kwa paj]

Ov, Ukutwish Kurumburil?

• Mutapu ik udiay Yesu, David Mujim?

• Mutapu ik udiay Yesu, Salomon Mujim?

• Chom ik usangaredina piur pa David Mujim, udia kand Salomon Mujim?

[Chipich chidia pa paj wa 31]

Manangu mamwinkishau Salomon kudi Nzamb madinga mwinzwizwimb wa manangu ma Salomon Mujim

[Chipich chidia pa paj wa 32]

Winyikel wa Yesu ukez kupandakanamu winyikel wa Salomon ni wa David mu jinjil jimwing jakad etu kutwish kutongin!