Yipul ya in Kutang
Anch mwan wavadik wafila kal mwivum, ov ukez kusanguk?
Kudi antu akad kal kuval mwan wafila kal mwivumu, chikutwish chayikasiken kutongin yovil yovilingau antu afisha kal mutapu winou. Anvaj amwing akat kunenganan nakash anch afish mutapu winou. Maku umwing wafisha an atan kurutu avala. Mu kusut kwa chisu, wayuka nakash pa kuyipamish an aad akash. Pakwez wadinga ni kuvurik an afishay. Piswimp ni rufu rend, wadinga wij mivu yinch yelau kwikal nich anend anch kafap. Ov, in Kristu inay akwet mayingishin ma kuchingejin disanguk chakwel eza ayimana an au afishau?
Chakul chiswakela ku chipul chinech chidi anch: twijap. Bibil kisambidinap patok pa mulong wa kusanguk kwa an afila mwivumu ap madikaj madiokala. Ap mwamu, mu Dizu dia Nzamb mudi malejan mawamp matadila pa mulong winou makutwisha mu chilik kanang kutwongoj.
El twisambinany yipul yaad yikwatina ku mulong winou. Cha kusambish, mu kuman kwa Yehova, ov, chisu ik chisambishininga mwom wa muntu—pa kwimish bil anch pa kuvadik? Cha kaad, mutapu ik umeningay Yehova mwan wakad kuvadik—mudi muntu panrend bil anch mudi muruzu wa maselil madia mwivumu mwa mband? Malejan madia mu Bibil makwil mu mutapu uwamp pa yipul yiney yaad.
Chijil cha Moses chilejen patok anch mwom kiukatap kusambishil pa kuvadik, pakwez usambishining kurutu nakash kwa chisu chinech. Mutapu ik? Chijil chadinga chilondil anch chifanyidin kumujip muntu ukujipa mwan uchidia mash. Tuvurikany chijil chinech: “Ukez kupan mwom ku mwom.”a (Kub. 21:22, 23) Chawiy lel, mwan wakad kal kuvadik udia mwivumu udi mwom ni udi mupim ukweta mwom. Kwov kurumburik kwa uyakin winou kuyikwashin mamiliyon ma in Kristu chakwel alikang kudiosh madikaj, akumening anch kudi kusal chitil ku mes ma Nzamb.
Chakin, mwan wakad kal kuvadik udi mwom, pakwez, Yehova uukwatining mwom winou nich usey ik? Chijil chijimbwilau kwiur oku chadinga chilondil anch chifanyidin kumujip muntu wamujipina mwan. Komb choviken patok anch, mwom wa mwan wakad kal kuvadik udi wa usey nakash ku mes ma Nzamb. Chikwau, maverse mavud madia mu Mifund malejen anch Yehova uyimening an akad kal kuvadik mudi antu panrau. Chilakej, Mwant David amupepila ni walonda piur pa Yehova anch: “Wantungila mwivum mwa makwam. . . . Mes mey masambishil kal kuman yom yam piwakad kal kuwanyish mujimbu wam, machuku mam amafundil kal mu mukand wey pimadinga makadiaku kal.”—Kuseng 139:13-16; Yob 31:14, 15.
Yehova umening kand mwan wakad kal kuvadik ukwet ngikadil kushalijan ukutwish wez wasal yom yivud ku machuku ma kurutu. Pa chisu chadingay Rebeka, mband wa Isak, ni madikaj ma ampamb, Yehova walonda mazu ma uprofet piur pa an aad adinga ni kurish mwivumu mwend, mulong wa kulejan anch ndiy wadinga wamana kal ngikadil yau yikeza kwikal nich yibudikin yijim.—Disambishil 25:22, 23; Rome 9:10-13.
Rusangu ra Yohan Mubabatish ridi risangareshina. Rusangu Ruwamp rilondil anch: “Elisabet chateshay kulangwish kwa Mariy, mwan wikarumon mwivumu mwend; ni Elisabet amwizwisha nich [spiritu utumbila].” (Luka 1:41) Palejanay chinship chinech, dokiter Luka wasadila dizu dia Grek dikutwishau adisadil mulong mwan uchidia mash ap mwan wavadika kal. Wasadila kand dizu dined pisambinay piur pa Yesu padingay ulel mu chidil.—Luka 2:12, 16; 18:15.
Chawiy lel, ov, Bibil utwinkishin diyingish dietwetu dia kutwish kutek kushalijan pakach pa mwan udia mwivumu ni wavadikina kal? Bwat, kwikil. Chom chinech chikwatijadin nawamp nich yom yijinguninau in siyans. Chilakej, in kukimbijol atanin kal anch mwan uchidia mwivumu ukutwish watesh ni kwakul ku yibachikin ya pol. Chawiy lel, chidiap cha kushimok anch maku uchingedina kuval ukat kukudish urund wa piswimp nakash ni mwan upamina mwivumu mwend.
Chad anch mwan wavadik, chisu cha kuvadik chikutwish chikal chishalijadina. Tushinshikinany chilakej chinech: Maku umwing wavala mwan wakad kuwanyish angond, wafa mu machuku makemp. Maku mukwau wawanyisha angond a kuval, pakwez mwan wafa kachisu kakemp kurutu avadika. Ov, maku wa kusambish uyukin nich ruchingej anch mwanend ukez kusanguk mulong anch mwan wavadika wakad kuwanyish angond, oku maku wa kaad kakwetap ruchingej riner?
Kulond mu wiswimp, Bibil ulejen patok anch mwom usambishining pa chisu cha kwimish ni anch Yehova umumen mwan wakad kal kuvadik mudi muntu panrend ukweta usey. Kukwatijan nich uyakin winou wa Mifund, antu akutwish atong anch kudi kupwitijan pa kulond anch kwikil ruchingej ra kusanguk piur pa mwan ukufa kurutu kwa kuvadik. Chakin kamu, akutwish atongin anch kulond mwamu kudi kutaliken yilondila Mifund piur pa kudiosh madikaj, yengamidina pa uyakin winou.
Pasak, jurnal unou walangwisha yipul yiney ya usey yamekana anch yalangwisha kwidjidjek pa kutwishik kwa kusanguk kwa an afa kurutu kwa kuvadik. Chilakej, ov, Nzamb ukutwish wamuchirish mwan wafa padingay uchidi mash mwivumu mwa mband mu Paradis? Pakwez, malejan mavud ni kutongijokin nich kulembil kwachishikija Chisak Chitakedina chishikena ku kulond anch milong yiney yikwachikinap ku ruchingej ra disanguk. Yesu walonda anch: “Yom yawonsu yipipel [kudi] Nzamb.” (Marko 10:27) Yom yamanay Yesu amwinend yimekeshin uyakin wa mazu minam; mwom wend aushemunina kuudiosh mwiur ni kuwandjik mwivumu mwa changadim kajik—chakin chinech chidi chom chikasikena kusadik ku mes kwa antu.
Ov, yom yiney yawonsu yilejen anch Bibil ulejen anch an afa kurutu kwa kuvadik akez kusanguk? Tufanyidin tukasikeshina anch, Bibil kisambidinap kachom ni kachom pa chakul cha chipul chinech, chakwel lel antu kakwetap diyingishin dia kukatul pa mulong winou. Mulong winou ukutwish walangwish kand yipul yikwau kushalijan. Chakin kamu, chidi chiwamp kulik kutongin yom ya kutongin kwau. Pakwez chitwija chidi anch: Mulong winou umutadil Yehova Nzamb, mulong ndiy udi mwin rukat rudimukina. (Kuseng 86:15) Pakad kwidjidjek, maswir ma muchim wend madi ma kuyisangul antu afa kal. (Yob 14:14, 15) Tutwish twikal nich ruchingej anch ndiy usadiling ching yom yitentamina kudiay ndiy. Ndiy ukez kwokan misong yivud yitukwatina mu mwom unou wa mu ditenchik dined diyimp dia yom mudi mukezay kumusadil Mwan chakwel ashesha “mudimu wa Satan.”—1 Yohan 3:8.
[Mazu madia kwishin kwa paj]
a Verse winou chisu chivud akat kumukarumun mu mutapu ulejena anch ching kusu mulong wa rufu ra maku chawiy lel chifanyidinau kumujip wajipena. Pakwez, mufund wa kusambish wa Hebereu ulejen anch chijil chisambidin piur pa kumujip ap maku ap mwan wakad kal kuvadik.
[Chipich chidia pa paj wa 23]
Yehova ukez kwokan mulong wa misong yawonsu yisansena