Yom ik Yilondinay Bibil piur pa Kudiosh Madikaj?

Chakul cha Bibil

Mu Bibil mwikil kamu mbil yisambidina patok piur pa “kudiosh madikaj.” Pakwez, mud maverse mavud malejena chitongijok cha Nzamb piur pa mwom wa muntu, kuwejaku ni mwom wa mwan uchidia kal mwinvumu.

Mwom chid chipan cha Nzamb. (Disambishil 9:6; Kuseng 36:9) Nzamb umen anch mwom wawonsu ud wa usey, kuwejaku ni wa mwan wakad kal kuvadik. Chawiy anch muntu wajip kwa kwisotil mwan uchidia kal mwinvumu, muntu winou ud mwin kujipan.

Chijil chayinkishau in Isarel kud Nzamb chading chilondin anch: “Anch amakundj akat kubulijan, chad akamudjikwilaku ni mband udia ni divumu, chad ndiy wasirumun wakad kufa, mwin kumudjikul ufanyidin kufut difut diawonsu dikumulejau kudi mwin mband, chad mwin mulong ukufutin kurutu kwa ankalansambu. Pakwez anch mband wafa, ukupan mwom ku mwom.”​—Kubudik 21:22, 23.a

• Mwom wa muntu ukat kusambishang chisu ik?

• Ov, Nzamb ukumulikishin muntu wadioshina kal madikaj?

• Ov, chiyipin kudiosh madikaj anch mwom wa maku ap wa mwan ud mu ubaj?

Mwom wa muntu ukat kusambishang chisu ik?

Nzamb ukat kuman anch mwom wa muntu ukat kusambishang pakatay kamu maku kwimish. Mu Dizu diend, Bibil, Nzamb ukat kumekesh tupamp tuvud anch mwan wakad kal kuvadik ud niyend muntu panrend. Shinshikin yilakej yimwing yimekeshina anch Nzamb kakatap kutek kushalijan pakach pa mwom wa mwan uchidia kal mwinvum ni wavadikina kal.

• Mulong amupepila kud Nzamb, Mwant David wamuleja anch: “Pinading kand kal nivadik, ey wading kwey wingij.” (Kuseng 139:16) Nzamb wamumana David anch ud muntu panrend kurutu kwendendiy kuvadik.

• Chikwau kand, kurutu kwa muprofet Jeremiy kuvadik, Nzamb wading wij anch ukumwinkish chisend chimwing cha pakampwil. Nzamb wamuleja anch: “Am nakutonda ey pinading kand kal nikutanga. Nakutonda ey kwikal muruwam piwading kand kal uvadik, chakwel nikutum ku michid yawonsu.”​—Jeremiy 1:5.

• Luka, mwin kufund wa Bibil umwing wadinga kand mwingang, wasadina dizu diawiy dined dia Grek dimekeshina mwan wakad kuvadik pisambinay piur pa mwan wavadikang kal.​—Luka 1:41; 2:12, 16.

Ov, Nzamb ukumulikishin muntu wadioshina kal madikaj?

Nzamb ukutwish kuyilikishin antu adioshina kal madikaj. Anch itiy katat chitongijok cha Nzamb piur pa mwom, kafanyidinap kand kudandamen kwifish nich. “[Yehova] udi mwin riy ni ranaken . . . Mudi mudia kwingangel kulemp ni kurand, mwamu kand mwatwalay kuyip kwetu kulemp ni yeywetu.”b (Kuseng 103:8-12) Yehova ukuyilikishin antu akata kukarumuk chakin kamu mulong wa yitil yau yikur, kuwejaku nich chitil cha kudiosh madikaj.​—Kuseng 86:5.

Ov, chiyipin kudiosh madikaj anch mwom wa maku ap wa mwan ud mu ubaj?

Kukwatijan ni yilondinay Bibil piur pa mwom wa mwan uchidia kal mwinvumu, muntu kakutwishap kumuyingish nich anch wadiosh madikaj mulong wa ubaj kanang wa ukash wa mujimbu wa maku ap wa mwan.

Yom ik tukutwisha kulond anch pa chisu cha kuval kwalank mulong ukash witina kutond pakach pa kupandish mwom wa maku ap wa mwan? Mu yishiken mud yiney, ikundj ni mband awiy afanyidina kukwat mupak piur pa mwom wa nany ukupandishau.