4 Diosh Kwidjidjek Kwey
“A, ey wa karitiy kakemp, mulong ik watadikinanga?”—Mateu 14:31.
OV, CHISU CHITAK? Ap in kwilej a Yesu, adinga ni kwidjidjek pa yisu yimwing. (Mateu 14:30; Luka 24:36-39; Yohan 20:24, 25) Chakin, Bibil wisambidin piur pa kuburen ritiy mudi “yitil yikutupwakesha kutuziyish.” (Hebereu 12:1) Kambuy Paul wafunda anch: “Kadiap antu awonsu akweta ritiy.” (2 Tesalonik 3:2) Talany anch chiyikasikedin antu akwau kumekesh ritiy. Oku, akwau niyawiy avud kasadilap usu wa kukudish ritiy rau. Nzamb ukat kuyukish usu wa antu asadila mwamu.
OV, MUTAPU IK TUKUTWISHA KUCHIPANDAKAN CHITAK CHINECH? Jingunin yom yikata kukushikij ku kwidjidjek. Chilakej, mwin kwilej Toma widjidjeka pa kutesh anch Yesu amuvumbwil, ap anch in kwilej akwau amuleja anch amumana. Toma wadinga usotin uman. Kwikala chibudikin ik? Yesu amwinend wamwinkisha uman wadinga uswiridinay chakwel ikala nich ritiy rikash.—Yohan 20:24-29.
Yehova Nzamb utwinkishin kusutil ku Bibil yakul yituswiridina chakwel tulika kwidjidjek. Chilakej, antu avud ashadisha kal ritiy rau mudi Nzamb mulong akat ayinau ap kusutil kudi antu akwau kumufish nich mulong wa jinjit jimenau, chisum, ni mar mayikwatina antu avud. Chad lel, yom ik yilondila Bibil pa mulong winou?
Nzamb kayikedilap kusutil ku maguvernema ma antu. Yesu wisambina piur pa muntu wa muspiritu wakad kumekan ukweta dijin dia Satan mudi “nyikel wa mangand.” (Yohan 14:30) Satan wamuleja Yesu anch ukumwinkish ulabu wa mant mawonsu madia pa mangand anch wamusadil chisal chimwing kusu cha kumwifukwil, ni wamwela anch: “Nikupan kwam usu winou wawonsu kudi ey ni uyaj wau; mulong aupana kal kudi am, ni kudi wawonsu unikatila nikumwink kwam.” Yesu katadikap anch Satan kakwetap ulabu winou. Pakwez, Ndiy walonda anch: “Achifundil anch, Ukamwifukwilang Mwant [Yehova, NW] Nzamb wey, ukamusadilang ndiy kusu.” (Luka 4:5-8) Chifanyidin kumufish nich Satan ni maguvernema ma antu mulong wa mar madia mu mangand, kadiap Nzamb.—Kuburik 12:9, 12.
Yehova Nzamb ukudiosh misul yawonsu ya mar piswimpap kamu. Ndiy watenchikin kal Want, ap anch guvernema pa mulong winou, ukutakelay Mwanend, Kristu Yesu, mulong wa kuyikel antu. (Mateu 6:9, 10; 1 Korint 15:20-28) Mu kuwanyin kwa uprofet udia mu Bibil, rusangu ruwamp ra Want winou arilejen katat mu mangand mawonsu. (Mateu 24:14) Want winou ukuyinongish antu awonsu akata kuupompat piswimp ap kamu ni ukupwish misul ya mar ma antu.—Daniel 2:44; Mateu 25:31-33, 46; Kuburik 21:3, 4.
DIFUT IK DIDIAKU? Antu akata kwidjidjek adi mudi mambek madjimbwilau oku ni oku “ku rinkind wa malejan mawonsu, mazu makad makin makatau [kuyidimb] nich” antu. (Efes 4:14; 2 Pita 2:1) Pakwez, antu atanina yakul yisangareshina ku yipul yau akutwish ‘alam ba-a, iman mu rity.’—1 Korint 16:13.
Atuman a Yehova, akata kupalangesh jurnal winou, akusot kukukwash chakwel utana yakul ku yipul yey piur pa kwidjidjek kwey piur pa ritiy rey. Akwitin chakwel winunga nau ni chakwel ushinshikina amwiney malejan mau. Anch wasal mwamu, chakin kamu ukukasikesh ritiy rey mudi Nzamb.
Anch usotil jinsangu jikwau jivud, tal shapitre wa 8, ulondila anch: “Want wa Nzamb Chom Ik?,” ni shapitre wa 11, ulondila anch: “Mulong wak Ulikidinay Nzamb Mar?,” mu buku Chom Ik Chakin Kamu Chifundishinay Bibil?a
[Mazu madia kwishin kwa paj]
a Wapalangeshau Atuman a Yehova.
[Chipich chidia pa paj wa 9]
Antu atanina yakul yisangareshina ku yipul yau akwet mufulandal ukash wa ritiy rau