Ichidija Amwiney Pantaliken nau Aspiritu Ayimp

JAMES wakudila kulemp pa ditung dia Malaita, pa matung ma Salomon. Kudiosh mu wanikanch wend, amuleja kuyilimish aspiritu. Ndiy ulondil anch: “Kandikal niyitap aspiritu chakwel amusala muntu yom yiyimp, pakwez nadinga kandikal nitongap anch chitwishikin kwikal nich mwom wa musangar pakad kusadil rarafono [yisal ya angak mulong wa kwit ukwash wa aspiritu] mulong wa kwichidij kulemp nich yom yiyimp.”

Mudi muchidia ku mutambu wa antu avud mu yikunku kushalijan ya mangand, antu ashichinga pa matung ma Salomon itiyijin anch aspiritu akutwish amukwash muntu ap kumusal yom yiyimp. Chakin kamu, in Malaita avud ayikatining aspiritu inay ayikwashina, pakad wom.

Ritiyij ra midimu ya aspiritu rimeken mu mitapu kushalijan. Chilakej, padingay James uchidi mwanikanch, amband adinga mu ul wau adinga ni kuchin ni anau mu yikumbu ang atesh dizu dia kajil utazukinau anch korokoro (wa mu dijuku dimwing ni katoy). Mulong wak? Mulong awiy itiyijining anch kudil kwa kajil winou kurumburikin anch kudi chom chiyimp chisotina kumushiken muntu.

Antu amwing ashicha mu ul atekining diyal ditok dia pakampwil pa yis ya yikumbu yau. Mwamu mwadingay ni kusal James, nich kwitiyij anch diyal dined dikumuchidij palemp ni uyimp ukutwishau kulet aspiritu. Ni padingay James ku mudimu, wadinga ni kunonol tuyom twawonsu tupalokina ku yakudia yend ukuyitek mu chibut chend chakwel eza ayidjibula kwinyim. Wadinga wakamin anch pamwingap ikundj umwing ukweta usu wa yip ukutwish wayinon chakwel ayisadila mulong wa kumwas mayej.  

Ap anch yisal yiney yijikena yikutwisha yikal yakin ku mutambu wey, pamwingap mudi James ukutwish wov maswir ma kusot kulondul yishankur chakwel ichidija palemp ni aspiritu ayimp. Ukutwish witiyij anch kulondul yishankur yiney kudi kwa usey mulong wa ukash wa mujimbu.

Anch ulimishin Bibil, pakad kwidjidjek usotin wijika yilondilay mudi chakul pa yipul yiney: (1) Aspiritu ayimp akutwish akusal uyimp ik? (2) Ov, chakin kamu kulondul yishankur yimwing kukusadil wikala mwishin mwa usu wa ayilembil? (3) Mutapu ik ukutwisha kutan mutapu uwamp wa kwichidij palemp nau aspiritu ayimp ni kwikal ni musangar?

Mutapu Usadilingau Aspiritu Ayimp Uyimp

Bibil ulondil patok anch aspiritu ayimp kadiap aspiritu a antu afa kal. Dizu dia Nzamb dilondil anch: “Antu aom ij anch, kwisudiel tukez kafa, pakwez antu afu kijap chom.” (Mulej 9:5) Chakin kamu, aspiritu ayimp, adi angel inunga pamwing ni Satan mulong wa kusot kuyidimb antu.—Kuburik 12:9.

Mifund yilondil patok anch tuswiridin diking pantaliken nau aspiritu ayimp. Kambuy Paul wayifundina in Kristu a ku Efes anch: “Kurish kwetu kikudip kwa mbij ni mash, pakwez kudi kwa kurish . . . ni mizwizwimb yiyimp ya mu jindond ja mwiur.” Kambuy Pita wamulejana nyikel wa aspiritu ayimp awonsu, Satan Djabul, mudi ‘ntambu wonina, wend uzomb ni kusot uwapidialay kudia.’—Efes 6:12; 1 Pita 5:8.

Uyimp wa kusambish usadidilay Satan udi kuyidimb antu, wayidimb ap kuyipak chakwel asala yisal yimwing yikutwisha kumwovish Nzamb kuyip. Bibil ulondin anch Satan “ukat kwikarumun mudi mwangel wa kutok.” (2 Korint 11:14) Ukat kuyambangesh kwikal mudi spiritu wa kuchidijan, pakwez chakin kamu, yitongijok yend yidi yiyimp. Satan ukat kubwik mes ma michim ya antu pantaliken nich uyakin piur pendend ni pa uyakin piur pa Nzamb. (2 Korint 4:4) Rutong rend riding rutong ik pakatay kuyidimb antu?

Satan uswiridin difukwil ni usotil anch antu, ijika ap aburena kwijik, chakwel amwifukwila. Pezay pa divu Mwan win kamu wa Nzamb, Satan wasota anch asa manungun ‘pansh chakwel amwifukwila.’ Yesu walonda anch: “Diokal kwa Satan; mulong achifunda kal: Ukamwifukwil Mwant Nzamb wey, ukamusadilang ndiy kusu.” (Mateu 4:9, 10) Yesu walika kusal chom ap chimwing chikutwisha kumekesh kumwifukwil Satan ni kumuziyil.

Yehova udi mwin dikand diawonsu kuyipandakanamu aspiritu awonsu ni kakutwishap walik anch antu amuziyidila ayishesha chikupu. (Kuseng 83:18; Rome 16:20) Pakwez anch tusotil tumusangaresha Yehova Nzamb mudi mwasalay Yesu, tufanyidin kwipuk chisal ap chisu cha kumuziyil Satan ap ayilembil end. Pa chinech, tuswiridin kuyijik yishankur yin yikatau kusal mulong wa kuyifukwil aspiritu ayimp. Mutapu ik ukutwisha kusal mwamu?

Kujingunin Yishankur Yikisinay Nzamb

Yehova Nzamb wayibabesha antwend a pakur, in Isarel, pantaliken nich kwimburij yishankur yimwing ya michid ya antu adinga ayombilamu. Ndiy walonda anch: “Kangal ez atan mu en muntu umwing ukat[a] . . . kupong, ap mwin kudimban kwipuril, ap mwin kupandol, ap mwin kubauk.” Piur pa antu akata kusadil yishankur yiney, Bibil ulondil anch: “Mwawonsu ukusala yom yiney udi mwin kutakanan kudi [Yehova, NW].”—Kuvurik Yijil 18:10-12.

Chawiy lel, pa chisu cha kushinshikin yishankur yipalangena mu teritwar wen, yipula yipul yilondwilaku ey: Ov, chishankur chinech chikasikeshidin ritiyij ra kupandol? Ov, chilondil anch yom yakad mwom yikwet usu kanang? Ov, mudi chaku cha kwasan mayej ap cha kwichidij nich? Ov, chikutwish kwikal chitongijok cha kuziyil ku spiritu mukwau wakad kwikal Yehova ap ntimesh wend, Yesu?—Rome 14:11; Filipoi 2:9, 10.

Chidi cha usey anch udjibwila kulemp yishankur yikasikeshidina yaku yiney. Mulong wak? Kambuy Paul amupepila kufund anch: “Kiukutwishanyip kuna rupas ra Mwant ni kand rupas ra ayilembil.” Ndiy wababeshana anch antu asotina kumusangaresh Nzamb ni aspiritu akutwish “kumwovish Mwant mukau.” (1 Korint 10:20-22) Yehova Nzamb witin ni ufanyidin kwipan kwetu kwawonsu.—Kubudik 20:4, 5.

Tushinshikinany kand chipul chinech: Ov, chishankur chinech chikasikeshidin chitongijok chilondila anch kwikil muntu ukweta chisend cha yisal yend? Chilakej, kwimik dis ni kusal masandj kurutu kwa kwatan ap kwachik akufishin nich mu yisak yivud ya antu ni Bibil niyend ukufishin nich. (1 Korint 6:9, 10) Pakwez, mu yishankur yimwing ya in Pacifique, yisal yiney akutwish ayitiyij anch changadim umudishin kwend “kalamat,”a chawiy chilondilay anch, diamulangwishin maku ma kumanijan ni ikundj.

Pakwez, Bibil, ulejen anch tukwet chisend cha yisal yetu. (Rome 14:12; Disambishil 6:7) Chilakej, Eve, mband wa kusambish wiyova anch amudimba kudi Satan chakwel asala chisal cha kumubwambwil Nzamb, chawiy chalonday anch: “Nnak ndiy wandimbanga nich, chad niyam nadiang.” Pakwez, Yehova wamurumburisha Eve mulong wa yisal yend. (Disambishil 3:13, 16, 19) Ukuturumburish kand niyetu mulong wa mwikadil wetu.—Hebereu 4:13.

Chom ik Ufanyidina Kusal?

Anch usotil kumusangaresh Nzamb ni kushakam kukwatijan nich yijidik ya Bibil, ufanyidin kukwat mupak ukash. Antu akweta michim yitentamina adinga mu Efes mu mivu chitot ya kusambish atushila chilakej chiwamp pa mulong winou. Chakwel anch adiokala mwishin mwa usu wa aspiritu ayimp, awiy akwata mikand yawonsu yadingau nich yadinga yilejena yisal ya aspiritu “ayoshola ku mes kwa awonsu.”—Midimu 19:19.

Kurutu kwa kwosh mikand, antu inay “eza ni kwitiyin patok yom yasalijokau.” (Midimu 19:18, MM) Malejan ma Paul piur pa Kristu mayishika ku michim, chawiy ashikena ku kwosh mikand yau yadinga yisambidina milong ya aspiritu ayimp. Akarumuna kand yovil yau piur pa yishankur yau.

Chakin, chiswapelingap kulik yishankur. James, ujimbwilau kwisambishil, wawiy mulong warishay nich. Wasambisha kwilej Bibil ni Atuman a Yehova ni wasangera yom yadingay ni kwilej. Pakwez, wadandamena kusadil rarafono. Pashinshikinay yovil yend pa mulong wa yisal yiney, washikena ku kujingunin anch witiyijin yakushilamu ya Yehova mulong wa machuku ma kurutu pakwez chakwel anch ichidija ku uyimp, wadinga ni kutongin anch uswirikedin kuchingejin pa yisal yiney ya yishankur.

Chom ik chamukwasha James aswimpa yitongijok yend? Ndiy walonda anch: “Namwilembila Yehova mulong wa diking diend ni mulong wa ukwash wend ni mulong wa kumuchingejin. Pa chisu chawiy chimwing, nalika kusadil yishankur yam.” Ov, kudi chom chiyimp chamushikena? James ulondil anch: “Kwikil. Chom chimwing kusu chanshikena chidi anch nileja kumuchingejin Yehova. Namen kal mutapu ukutwishay Yehova kwikal piswimp mudi murund.” Chakin kamu, mu mivu sambwad yasutina ey, James wasadil mudi kashalapol wa chisu chawonsu, mu kuyikwash antu akwau ileja yom yilejenay Bibil.

Ov, mulong wak ulikina kulondul chilakej cha James? Shinshikin yishankur yikatinau antu adia mwi ndond muushicha, ni “kusadil manangu men” mulong wa kwijik anch yambaten nich “rusot ra Nzamb.” (Rome 12:1, 2, NW) Kupwa jijaman chakwel udiokala ku yishankur yijondila. Ang wasal mwamu, ukutwish kwikal nich ruchingej anch Yehova ‘ukez kukwak’ ni kukuchidij. (2 Korint 6:16-18) Mudi James, ukez kuman uyakin wa kushilamu kunoku kudia mu Bibil kulondila anch: “Dijin dia [Yehova, NW] didi dipat dikash, ni mwin kutentam ukat kuchinyinamu ni kushakam wakad kwakam.”—Jinswir 18:10.

[Mazu madia kwishin kwa paj]

[Chipich chidia pa paj wa 30]

“Korokoro”

[Dizu dirumburila]

Nich rukat ra Dr. Bakshi Jehangir

[Chipich chidia pa paj wa 30]

Changadim ukat kunonol yikunku ya yakudia yipalokina chakwel kangal ayisadila mulong wa kumwas nich mayej