Mwin Kulam Yom Ubabela Ni Chisak Chend Chitakedila
“Nany lel ushishamena ni mwin kulam yom ubabela, ukez katekau piur pa chikumbu kudi nsalejend, ni kupan yakudia kudi akwau pa chisu chau?” —LUKA 12:42.
1, 2. Chipul ik cha usey chipulay Yesu pa chisu chalejanay chijingidij chikweta yikunku yivud chilejena machuku ma kwinsudiel?
PALEJANAY chijingidij chikweta yikunku yivud chilejena machuku ma kwinsudiel, Yesu wipula chipul chinech: “Kashalapol ushishamena ni kubabal, watekau kal pa mutu pa a mu chikumbu, ukuyinkish yakudia pa chisu chau, ndiy nany?” Yesu wadandamena nich kulond anch kashalapol winou akez kumufut mulong wa kushinshaman kwend ku kumutek pa mutu pa yom yawonsu ya Nsalejend.—Mat. 24:45-47.
2 Yesu wadinga wipula kal chipul mudi chinech ni padinga pasutil kal angond avud. (Tang Luka 12:42-44.) Ndiy wamutazuka kashalapol anch “mwin kulam yom” ni wisambina kand piur pa “a mu chikumbu” mudi “akwau.” Mwin kulam yom udi kashalapol ap mwin kutakel yom utekinau piur pa atushalapol akwau. Mwaning, komb mwin kulam yom udi kwend niyend kashalapol. Kashalapol winou, ap anch mwin kulam yom udi nany, ni mutapu ik ukatay kupan “yakudia pa chisu chau”? Chidi cha usey kudi etwawonsu kwijik dirijek dikatau kusadil mulong wa kupan yakudia ya muspiritu.
3. (a) In kurumburil a in Kristendom apakishining kurumburil mutapu ik mazu ma Yesu piur pa “kashalapol”? (b) Nany “mwin kulam yom,” ap anch “kashalapol,” ni anany adia “a mu chikumbu,” ap anch “akwau”?
3 In kurumburil yom a Kristendom chisu ni chisu akat kurumburilang mazu minam ma Yesu mudi anch misambidin piur pa antu akweta mwaz wa yisend ya piur mukach mwa antu alondila anch adi in Kristu. Pakwez Yesu, “mwant” wisambidinau mu chishimu chinech, kalondap anch kukez kwikal atushalapol avud apalangena mu yikumbu yivud ya winzamb ya in Kristendom. Pakwez, ndiy walonda patok anch kukez kwikal ching “mwin kulam yom,” ap anch “kashalapol” umwing kusu, ukezay kutek piur pa yom yend yawonsu. Mudi mulondininga jurnal winou, mwin kulam yom ufanyidin kwikal “chisak chikemp” cha in kwilej azizidilau many awonsu, ap anch chisak chawonsu. Kulondulijan nich yilondilau mu Rusangu Ruwamp ra Luka, Yesu wadinga wisambidin antu inay. (Luka 12:32) “A mu chikumbu,” ap anch “akwau,” adi antu awiy amwing pakwez isambidin kusu mudimu wa muntu ni muntu. Chipul cha usey chidi chinech, Ov, muntu umwing ni umwing chid cha chisak cha kashalapol chikwet chisend cha kupan yakudia ya muspiritu ya pa chisu chau? Chakul chimeken patok anch twashinshikin nawamp yilondila Mifund.
Kashalapol wa Pasak wa Yehova
4. Yehova waujimbula mutapu ik muchid wa Isarel, ni chom ik cha usey chitufanyidina kwijik piur pa muchid winou?
4 Yehova walonda piur pa antwend, muchid wa pasak wa in Isarel, mudi kashalapol. Yehova ulondil anch: “En, in Isarel, udiany atuman am, nakutonda wikal kashalapol wam.” (Isay 43:10) Antu awonsu adinga mu muchid adinga chisak cha kashalapol. Pakwez, chidi cha usey kwijik anch ching in kupesh pamwing nau in Levi akad kwikal in kupesh kusu awiy adinga nich chisend cha kulejan mu muchid.—2 Jins. 35:3; Mal. 2:7.
5. Kukwatijan ni Yesu, kukarumuk ik kujim kwadinga kufanyidina kusadik?
5 Ov, kashalapol wadinga wisambidinay Yesu, udi muchid wa Isarel? Chakapuk chaya mwa. Twij mwamu mulong wa mazu manam malonday Yesu piur pa in Yuda adinga mu machuku mend anch: “Want wa Nzamb akez kaudiosh kudi en, akez kaupan kudi muchid ukata kusong mabuj mau.” (Mat. 21:43) Choviken patok, anch kwadinga kufanyidin kwikal kukarumuk kwa yom. Yehova wadinga usotil kusadil muchid ukwau usu. Chikalap nchik mwamu, pa mulong wa malejan ma muspiritu, mudimu wa kashalapol mu chishimu cha Yesu kiwadingap chilik chimwing ni wa “kashalapol” wa Nzamb mu Isarel wa pasak.
Kwikalaku kwa Kashalapol Ushishamena
6. Muchid ik usu weza kwikalaku pa Pentakost mu muvu wa 33 C.C., ni anany ikal yid yau?
6 Muchid usu, “Isarel a Nzamb,” amusadil kudi in Isarel a muspiritu. (Gal. 6:16; Rome 2:28, 29; 9:6) Wasambisha kwikalaku pa chisu cheza mwiku utumbila wa Nzamb pa Pentakost mu muvu wa 33 C.C. Kudiosh kamu pinipa, in Kristu awonsu azizidilau many ikala yid ya muchid ukusambisha katat kusadil mudi chisak cha kashalapol watondau kudi Nsalejetu, Yesu Kristu. Chid ni chid cha muchid winou achinkisha mudimu wa kulejan rusangu ruwamp ni ra kwikadish in kwilej. (Mat. 28:19, 20) Ov, chid ni chid chadinga chifanyidin kukwatikan nich kupan yakudia ya muspiritu ya pa chisu chau? El tushinshikinany mutapu wakwila Mifund chipul chinech.
7. Pa kusambish, atwimbuy adinga nich mudimu ik wa kusambish, ni mutapu ik wezau kuutanduril?
7 Pa chisu chatonday Yesu atwimbuy end 12, mudimu wau wa kusambish wadinga wa kuyitum kuya ni kulejan rusangu ruwamp kudi antu akwau. (Tang Marko 3:13-15.) Mudimu winou wadinga ukwatijadin nich kurumburil kwin kwa dizu apostolos dia mu Grek, didiokila ku chisal chirumburikina anch “katum.” Pakwez, mudi chisu chaya kurutu ni chikumangen cha Ukristu chadinga sot chisambisha kamu, mudimu wa kambuy wikala wa ‘ndond ya mudimu.’—Mid. 1:20-26.
8, 9. (a) Mudimu ik wa kusambish wadingau nich atwimbuy 12? (b) Anany akwau inkishau yisend yijim, yitiyijau kudi chisak chitakedila?
8 Chom ik chadingau ni kubangin bil atwimbuy 12? Chakul tukutwish twachimen mu yishiken yasadika kupwa kwa Pentakost. Palanka ntad piur pa kuyangen adi-a-afu yakudia, atwimbuy 12 ayikumangeja in kwilej alond anch: “Kichifanyidinip kudi etu kulik kulejan dizu dia Nzamb mulong wa kurijek yakudia.” (Tang Midimu 6:1-6.) Chad atwimbuy ayitonda akadivar aswila muspiritu chakwel atala “mujikit winou” chakwel anch atwimbuy ipana nakash “mu kusadil kwa dizu.” Ditenchik dined dialeta chiyukish cha Yehova ni “Dizu dia Nzamb diakula, ni in kwilej avulijana mu Yerusalem nakash.” (Mid. 6:7) Chawiy mudimu ujim wa kupan yakudia ya muspiritu washala wa atwimbuy.—Mid. 2:42.
9 Mu kusut kwa chisu, antu akwau ayinkisha yisend yijim. Mwishin mwa usu wa mwiku utumbila, ayituma Paul ni Barnaba, mudi amishoner ku chikumangen cha Antiok. Niyawiy ijikana mudi atwimbuy, ap anch kadingap ni kuyichindin kumwing ni a 12. (Mid. 13:1-3; 14:14; Gal. 1:19) Chisak chitakedila chadinga ku Yerusalem chitiyija kutondiu kwau. (Gal. 2:7-10) Kupwa kwa kachisu kakemp, Paul wadinga ni cha kusal pa mulong wa kupan yakudia ya muspiritu. Wafunda mukand wend wapepilau wa kusambish.
10. Mu mivu chitot ya kusambish, ov, in Kristu awonsu azizidilau many adinga ni kurijek yakudia ya muspiritu? Rumburil.
10 Ov, in Kristu awonsu azizidilau many adinga atulam imanyidina mudimu wa kulejan ni wa kurijek yakudia ya muspiritu? Bwat kwau. Kambuy Paul utulejin ach: “Awonsu adia apostol? Awonsu adi aprofet? Awonsu adi alej? Awonsu adi in midimu ya yilay?” (1 Kor. 12:29) Ap anch in Kristu awonsu avadikina muspiritu ipana mu mudimu wa kulejan, ching kusu antu akemp—amakundj chinan—awiy asadilau chakwel afunda mikand 27 ya Mifund ya Ugrek ya Ukristu.
Kashalapol Ushinshamena wa Katat
11. Kashalapol amuteka piur pa “yom” ik?
11 Mazu ma Yesu mafundau mu Mateu 24:45 malejen patok anch kukwikal kand chisak cha kashalapol ushishamena ni kubabal pa divu pa chirung cha kwisudiel. Kuburik 12:17 wisambidin piur pa antu atazukinau anch, ‘antu amwing a mwi Mbut ya mband ashadilaku.’ Mudi chisak, ashadilaku inay ayiteka kal piur pa yom yawonsu ya Kristu yidia panap pansh. “Yom” yimwinkishinau mwin kulam yom ubabela chakwel ayilama yidi yisakin ya Nsalejetu yidia pansh, mu yom yiney mudi antu akeza kushakam pansh mwishin mwa Want ni yikumbu yawonsu yisadidilau mulong wa kulejan rusangu ruwamp.
12, 13. Mutapu ik wijikiningay mwin Kristu anch amutazukin mwiur?
12 Ov, mutapu ik wijikiningay mwin Kristu anch ukwet ruchingej ra kuya mwiur ni udi umwing wa in Isarel a muspiritu ashadilaku? Chakul chidi mu mazu malonday kambuy Paul, payilejay antu adinga ni ruchingej rimwing mudi rendendiy ra kuya mwiur anch: “Awonsu atakelau kal kudi [spiritu] wa Nzamb awiy ikal kal an a Nzamb. Mulong en kiwatambwilanyip kand muchim wa uswik wakunovishany wom; pakwez watambwilany muchim wa kwikal mudi an, kwawiy kutukata kudidil anch: Aba Tatuku! [spiritu] amwinend ndiy kaman wa michim yetu anch tudi an a Nzamb, ni anch tudi an chawiy tudi answan, answan a Nzamb, answan nend Kristu; pakwez ching anch twaman nend mar, chawiy akez katumbish kand nend.”—Rome 8:14-17.
13 Mu kulond kuswapela, antu inay adi azizidilau spiritu utumbila kudiay Nzamb ni ‘ayitazuka,’ ap anch “ayiladikija” mwiur. (Heb. 3:1) Nzamb ndiy umutazukina muntu ni muntu. Awiy niyau, itiyijining kapamp kamwing pakad kwiyipul ap kwidjidjek ap kwov wom wa kwitiyij kuvadik mudi an a Nzamb. (Tang 1 Yohan 2:20, 21.) Chawiy lel, kadiap ayinau akata kwitondin ruchingej riner, pakwez Yehova ndiy ukata kuyitond, ap anch mwiku utumbila, ukat kuyishirikin.—2 Kor. 1:21, 22; 1 Pita 1:3, 4.
Chitongijok Chiwamp
14. Azizidilau many amening nchik kuyitazuk kwau?
14 Antu azizidilau many imening nchik ayinau pachingedinau difut diau dia mwiur? Awiy ij, ap anch atambula kal diladikij diamushena nakash, didi kwau kusu—diladikij. Afanyidin kushal ashinshamena djat ni ku rufu chakwel lel atambula difut dined. Akwil nich kwikepish mazu manam malonday Paul anch: “Akadivar, kand kal nichind amwinam mudi chinakwitila kal, pakwez chom chimwing nisadila, nikat kuvuramenang yom yidia panyim ni kuril ku yom yidia kurutu. Nikat kulamat ku uruu wa mwiur wantazukinau kudi Nzamb mu Kristu Yesu.” (Filip. 3:13, 14) Azizidilau many ashadilaku afanyidin kusal usu wau chakwel ‘kwend nawamp kukwatijan nich kutazuk kwayitazukau, nich kwikepish kwawonsu ni kwitudish,’ ni kusal mwamu nich “wom ni kwakam.”—Efes 4:1, 2; Filip. 2:12; 1 Tes. 2:12.
15. In Kristu ayimening nchik antu akata kudia yijingidij ku Chivurikish, ni mutapu ik wimeningau antu azizidilau many ayinau?
15 Ku mutambu ukwau, in Kristu akwau afanyidin kumuman nchik muntu ulondila anch amuzizidil many ni wasambish kudia yijingidij ku Chivurikish? Kwikil cha kumurumburish nich. Mulong winou umutadil muntu amwinend ni Yehova. (Rome 14:12) Pakwez, in Kristu azizidilau kal many kadingap antu a pakampwil. Awiy kitiyijiningap anch kwikal kwau azizidilau many kuyinkishin ronganyin rijim kuyipandakanamu awonsu adia mu “chisak chipandiken kujimb” ikadila kal nich ronganyin. (Kubur. 7:9) Kitiyijiningap anch awiy akwet mwiku utumbila uvud kuyipandakanamu ambay nau adia a “amikoku akwau.” (Yoh. 10:16) Kakatap kusot kuyisadil yom mu mutapu wa pakampwil; ni kalondilingap anch kudia kwau yijingidij kuyitekining piur pa amakurump atondau kal adia mu chikumangen.
16-18. (a) Ov, azizidilau many awonsu akwatiken nich mudimu wa kulejan uyakin usu? Let chilakej. (b) Ov, mulong wak Chisak Chitakedila chiswiridinap kumwipul muntu ni muntu ulondila anch amuzizidil many?
16 Ov, in azizidilau many awonsu apalangena pa divu adi awonsu chisak chikwatikena nakash mulong wa kujingunish uyakin usu wa muspiritu? Bwat kwau. Ap anch chisak cha kashalapol chawiy chikweta chisend cha kupan yakudia ya muspiritu kudi in mu chikumbu, kadiap awonsu muntu ni muntu udia mu chisak cha kashalapol ukweta yisend yimwing ap kusal mudimu umwing-umwing. (Tang 1 Korint 12:14-18.) Mudi mutwamana kwisambishil, mu mivu chitot ya kusambish, awonsu adinga ni kusal mudimu wa usey wa kulejan. Pakwez ching akemp kusu awiy asadilau mulong wa kufund mikand yidia mu Bibil ni kutakel chikumangen cha Ukristu.
17 Chilakej: Pa yisu yimwing Mifund yilondil anch “chikumbu cha Nzamb” chadinga ni kukwat mipak mulong wa kupwish milong kanang. (Mat. 18:17) Chakin kamu, ap anch, adinga ching kusu amakurump awiy adinga ni chisend chinech mulong adinga ni kusadil mudi antimesh a chikumangen. Amakurump kakatap kuyipul yid yawonsu ya chikumangen chakwel ijika chitongijok cha umwing ni umwing kurutu kwa kukwat mupak. Kulondulijan nich uteokras, awiy akat kusal mudimu wayinkishau; asadiling mwamu mulong wa kuwap kwa chikumangen chawonsu.
18 Chawiy chimwing, ilel uvud ukemp wa amakundj azizidilau many akwet chisend cha kwikal antimesh a chisak cha kashalapol. Awiy asadila Chisak Chitakedila cha Atuman a Yehova. Amakundj inay azizidilau many ma muspiritu imanyidin mudimu wa Want ni program wa yakudia ya muspiritu. Mudi muchadinga mu mivu chitot ya kusambish, Chisak Chitakedila chikatap kumwipul chid ni chid cha mu chisak cha kashalapol kurutu kwa kukwat mipak. (Tang Midimu 16:4, 5.) Pakwez, Atuman awonsu azizidilau many akwatiken nakash mu mudimu wa usey wa kwangul usadikina katat. Mudi chisak, “kashalapol ushishamena ni kubabal” udi chisak chimwing, pakwez mudi muntu ni muntu panrend, akwet yisend ya mudimu kushalijan.—1 Kor. 12:19-26.
19, 20. Chitongijok ik chiwamp chikweta chisak chipandakena kujimb piur pa “kashalapol ushishamena ni kubabal” ni piur pa Chisak chend Chitakedila?
19 Yom yiney yisambidinau kal kwiur oku yikwet usu ik padi chisak chipandakena kujimb chiyila kamu ni kwiwejinaku, chikweta ruchingej ra kushakam chikupu pa divu? Chidiau chikunku cha yom ya Mwant, akwet musangar wa kusal mu kwovijan pamwing nich yitenchik yikwatina Chisak Chitakedila, chidia ntimesh wa “kashalapol ushishamena ni kubabal.” Yid ya chisak chipandakena kujimb yikat kusanger yakudia ya muspiritu yiletinau kusutil ku umutakel wa Chisak Chitakedila. Pakwez pa chisu chawiy chimwing, oku nich kumulimish kashalapol mudi chisak, yid ya chisak chipandakena kujimb adimukin nakash palemp nich kumutumbish nakash muntu wilondila anch udi chidi cha kashalapol. Kwikil mwin Kristu wakin wazizilau mwiku utumbila wa Nzamb ukusota anch amutumbisha mwamu.—Mid. 10:25, 26; 14:14, 15.
20 Twikala “a mu chikumbu,” tudi yid ya azizidilau many ashadilaku, ap anch tudi yid ya chisak chipandakena kujimb, el tukwatany mupak wa kusal ni kwovijan nakash ni mwin kulam yom ubabela pamwing ni Chisak chend Chitakedila. El umwing ni umwing wetu ‘alama’ ni twimekesha ayinetu ajijamena ni kushik kwisudiel.—Mat. 24:13, 42.
[Chipich chidia pa paj wa 28]
Ilel, Chisak Chitakedila chidi ntimesh wa chisak cha kashalapol ushishamena ni kubabal. Mu mivu chitot ya kusambish kwadinga ditenchik mudi dined
[Picture on page 29]
Ov, Uvurikin?
• Nany “kashalapol ushishamena ni kubabal,” ni anany adia a mu chikumbu?
• Mutapu ik wijikiningay muntu anch amutazukin kuya mwiur?
• Nany ukweta chisend cha kurijek yakudia yisu ya muspiritu?
• Mutapu ik ufanyidinay muntu uzizidilau many kwiman amwinend?