Mutapu Ukutwisha Kumutesh Bibil

3. Itiyij Antu Akwau Akukwasha

Chisu chayay Edward John Eyre mwin kukimbijol mu weny ulemp ni ukash mwi Mpay ya Nullarbor, in ngand amuleja Eyre mutapu wa kuvit mem mu usukuril ni mwipaku ya mitond ya akasiya. Kutesh ukwash wa antu adinga ija ngand kweza kupandish mwom wa Eyre.

MUDI mulejena chilakej chinech, chisu chivud pakwel anch utwisha kusal mudimu ukash chitining ukwash wa muntu mukwau wijaku yom kukupandakanamu. Mwamu chidinga kand anch wasambish kutang Bibil.

Yesu kadingap ni kuyichingejin in kwilejend anch ashikena ku kumutesh Bibil pakad kuyikwash kudi antu akwau. Pa dichuku dimwing, “ndiy wayiburil[a] manangu mau chakwel ijik nich mukand wa Nzamb.” (Luka 24:45) Yesu wadinga wij anch in kutang Bibil aswirikedin ukwash chakwel atesha nawamp malejan ma Mifund.

Anany Akuleta Ukwash?

Yesu wayinkisha in kwilejend akin chisend cha kupan ukwash winou. Kurutu akandama mwiur, Yesu wayinkisha mbil anch: “Yangany kudi antu a michid yawonsu, yikarumunany kwikal in kwilejam, . . . yilejany kuziyil ku yom yawonsu yinakulejanya.” (Mateu 28:19, 20) Mu mudimu wa kusambish ukwetau in Kristu mudi kulejan, urumburikina kurumburil mutapu tukutwisha kusadil yijidik yidia mu Bibil mu mwom wetu wa pichuku pichuku. In Kristu akin akat kuyikwash antu akwau chakwel niyau ashikena ku kumutesh Bibil.

Kupwa kwa kachisu kakemp kudiosh papaninay Yesu mbil yiney kudi in kwilejend, kwasadika chishiken chimwing chisangareshina nakash. Bibil wisambidin piur pa ntung umwing mwin Etiop wadinga utangina chikunku cha uprofet wa Isay. Washikena pa ndond yimwing yamukasikena kuyitesh. Kukwatijan nich rusangu ridia mu Bibil, maverse mamukasikena malondining anch: “Ndiy amutakeja kwi ndond ya kumujip[in] mudi mukoku; mudi umam wa mwan a mukoku kurutu kwa mwin kumukamb unyev wend, mwamu ndiy kaburilap mukan mwend. Mu mar mend dirumburish diend adilika, nany ukulejana dijuku diend? Mulong mwom wend audiosh kal pansh.”—Midimu 8:32, 33; Isay 53:7, 8.

Ntung winou wamwela Filip, mwin Kristu wadinga nich ronganyin rijim ni wadinga wij nawamp Mifund anch: “Nakwilembil amboku, nany ulondilau mwamu kudi muprofet? Yend amwinend bil, anch ya mukwau?” (Midimu 8:34) Mwin Etiop winou mwin muchim utok wadinga ni kuya chisu chawonsu ku Yerusalem mulong wa kwifukwil, ni chimeken anch wadinga ni kulembil chakwel atana ukwash. Chakin, ndiy wadinga ni kutang nich impu, ni ngikadil ya kwikepish. Pakwez ntung winou wadinga kandikal atesha nawamp chikunku chinech. Nich kwikepish, wamwita Filip chakwel amukwasha. Yirumburil ya Filip yamusangaresha nakash ikundj winou ni chawiy chamushikija amwinend ku kukwat mupak wa kwikal mwin Kristu.—Midimu 8:35-39.

Atuman a Yehova adandamedin ni mudimu wadingay ni kusal Filip pamwing ni in Kristu akwau a kusambish. Mu jingand 235 ni kusut, Atuman ipanin ayinau mulong wa kuyikwash antu akwau chakwel atesha chom chakin chifundishinay Bibil. Mwamu musadilingau kusutil ku kwilej rusangu kanang ra Mifund. Mutapu winou uwamp wa kwilej Bibil witining kushinshikin yom yilondilay Bibil piur pa rusangu kanang ap pa mutu wa mulong kanang.a—Tal mushet ulondila anch: “Yakul Yisangareshina ku Yipul Yipwilingau Piur pa Bibil.”

“Angakula ku Yipul Yam Yawonsu”

Steven, Valvanera ni Jo-Anne, ajimbulangau kwisambishil kwa rusangu riner, asambisha kwilej Bibil ni Atuman a Yehova. Steven ulondil anch: “Chankashimwisha nakash anch kusutil kwau ku kwilikej yijidik ap jinsangu kanang jidia mu Mifund, chisu ni chisu nashikena kamu ku kutesh uyakin udiamu. Kwadingap muntu watwisha kwinlej kusal mwamu, kurutu nisambisha kwilej Bibil. Chansangaresha nakash pa kwijik anch kuding ntad jikash jakad kupwang piur pa Bibil ni yitongijok yivud yipwitijadina.”

Valvanera witiyijin. Ni ulondil anch: “Yom yadinga yikwatijadin ni yoviken zwang. Yom yadinga yakin, kichadingap kwau mulong anch mwamu mulondilay ‘Egliz’ pakwez chadinga mulong kwadinga ni yirumburil yovikena ya chom ni chom.” Jo-Anne ulondil anch: “Pa kuman anch angakula ku yipul yam yawonsu nich kusadil Bibil kwashikija ku kwikal nich kalimish kajim—kalimish ka Nzamb—mulong ndiy wadinga njingunin ya yom ya kurutu chawiy chasalay anch afunda yakul yifanyidina ku yipul yikutwishau antu kwipul.”

Ov, umwij Kaman umwing wa Yehova? Ov, mulong wak ulikina kumwit chakwel akuleja mutapu usadilau program winou wa kwilej? Anch kiwijap Kaman wa Yehova ap umwing, twakwilembil amboku ukutwish wafundin ku umwing wa maadres madia pa paj wa 2 mu gazet winou. Nich spiritu utumbila wa Nzamb, manangu mawamp ni ukwash wa antu akwau ija nawamp kulejan Bibil, Dizu dia Nzamb dikutwish diakukasiken kuditesh. Chakin kamu ukutwish wamutesh Bibil!

[Mazu madia kwishin kwa paj]

[Kamushet/​Chipich chidia pa paj wa 8]

Yakul Yisangareshina ku Yipul Yipwilingau Piur pa Bibil

Yimwing ya mitu ya milong yikatau kushinshikin Atuman a Yehova mu program wau wa kwilej Bibil ey kamu ey:

• Risu Rutong ra Nzamb Piur pa Divu?

• Afu Adi Kwisu?

• Ov, Tudi mu “Machuku ma Kwisudiel”

• Mulong wak Ulikidinay Nzamb Mar?

• Mutapu Ukutwisha Kwikadish Mwom wa Dijuku Diey Usangareshina

[Chipich chidia pa paj wa 8]

CHOM IK Chakin Kamu CHIFUNDISHINAY BIBIL?

[Chipich chidia pa paj wa 7]

Chakwel anch umutesha Bibil . . . ufanyidin kumulembil Nzamb akwinkisha spiritu wend, mutanga ni manangu mawamp, itiyij ukwash wa antu akwau