Bibil Ukat Kuswimp Mwom

Ov, mulong wak mband washadisha ritiy rend ra relijon ukat katat kusutish chisu chend chilemp mulong wa kuyikwash antu akwau chakwel ileja piur pa Nzamb? Ov, chom ik chamushikija ikundj wadinga ukatining masengan ma chisum ikala mwin kukat chisambu? Ov, mutapu ik washikenay ikundj wadinga wipana kal mu kuna yom yikash mudi damb, maar ni mwin kusot kubulijan ni akwau mwinjil ku kukarumun mashakamin ma mwom wend? El tutanga chakwel tutesha yom yikulondau.

RUSANGU RA MUNTU

DIJIN: PENELOPE TOPLICESCU

MIVU: 40

NGAND YEND: AUSTRALIE

RUSANGU REND: WIKALA NI YITONGIJOK YIYIMP PIUR PA RELIJON

RUSANGU RAM RA PASAK: Navadikina ku Sydney, mu Australie, pakwez pinikala ni mivu yaad kusu dijuku diam diashemunika diaya mu Papouasie-Nouvelle-Guinée. Twashakama piswimp mivu yaad mu Rabaul ni kupwa mu mivu chinan twashakama mu Bougainville. Mu machuku minima, televizion kadingakwap mu Guinée, chawiy lel am ni mwancham twadinga ni kuya kusengen kwayen—mu kwisay, kusengen pa nej ni kuya kutung tuyikumbu mu masuku.

Pinikala ni mivu dikum, nasambisha kusanger milong ya relijon. Maku wadinga wa ku Katolik, chawiy chanyulay anch nisambisha kuya kutesh malejan ma Bibil madingau ni kulejay kudiay maser umwing. Chawiy nitiyija malejan ma in Katolik ni anbabatisha panadinga nichidi ni mivu dikum.

Pakwez, twachirika kand mu Australie ni pinikala ni mivu dikum ni yisatu ni kuya kurutu nasambisha kwidjidjek pa yitiyij yimwing ya relijon wam. Pa chisu chawonsu nileja shikol yijim, nileja jinsangu ja pakur, ni nadinga ni kwisamb yisu yilemp ni tatukwam pa mutapu wasambisha relijon ni chawiy twashikena ku kuman anch jinsangu jidia mu Bibil jidi kwau jingany. Chawiy nadiokala mu Katolik.

Anvajam alikijana pinadinga ni mivu 16. Maku wikala ni yikokujol yikash, ni am naya pamwing ni tataku ni mband watonday kand. Mwancham washala ni maku, niyawiy aya mwingand yindjing. Pa chisu chinicha niyova anch nidi kwam amwinam. Pasuta mivu yaad chakwel novijana kand nawamp ni makwam. Nasambisha kuna maar, kuna yom yikash mudi damb ni kuya ku misambu. Nalika shikol, nasambisha kusal mudimu ni nashesha mivu yam ya kwisambishil kwa mivu ya 20 nich kusalang ching masandj.

Pinawanyisha mivu 25, nasambisha kand kutongijokin piur pa Bibil. Nasambisha kusal mudimu windjing ni kwawiy twatanijana nenday Liene, changadim umwing ntas mwin kumulimish mukurump wend wa mudimu, ap anch ndiy wadinga mukash piur pend. Panamwipula anch mulong wak kadingap niyend kumulond nayimp mukurump wend wa mudimu, ndiy wanrumburila anch wadinga ni kwilej Bibil ni Atuman a Yehova, chawiy chadingay kusal usu wa kusadil yijidik yidia mu Bibil mu mwom wend. Liene wangita anch ukutwish kwilej Bibil niyamam. Mudi kinateshap nawamp kurumburik kwa yadinga yilondilay, natonga anch wadinga ulondil anch nikutwish nilej yom yawonsu yadinga yijay piur pa Bibil mu saa umwing kusu. Pa urel winiwa, twasutisha asaa asatu ni Liene mulong wa kwakul yipul yinadinga nich piur pa Bibil. Nashimoka nakash yakul yawonsu yangakulay wadinga ni kusadilang ching mifund ya mu Bibil.

Nivurikin anch pa uchuku winiwa patwapwisha mambamb ni Liene nabudika pol ni namujimena Nzamb mulong kasalap chakwel nitwisha kwilej uyakin wend pinadinga nichidi mwanikanch. Nading nij anch Atuman akweting mashakamin mishitwila ni nadinga ni kutong anch nachelewin kal ni nikutwishap kukarumun yaku yam. Natonga kand anch nikutwishap kuya ni kulejan ku chis ni chis mudi musadiningau Atuman. Nadandamena nich kwilej Bibil nau Atuman a Yehova, pakwez manangu mam madinga ma kutan kurumbuk mu malejan mau chakwel niyinga nich ni nilika kwisambang nau. Dichuku dimwing najingunina anch nikutwishap natan kurumbuk kwinoku.

MUTAPU WAKARUMUNAY BIBIL MWOM WAM: Mudi munadandamena ni kwilej yijidik ya Bibil, chawiy kom kam kangakamisha nakash. Chakwel anch kom kam kayinga, nalika kuna yom yikash mudi damb. Pakwez naya mwingand yindjing kusutish chisu kanang chad nawila kand mu misambu ni kuna maar nakash. Chamekana anch chisu ni chisu chinadinga ni kusot kuyaku kurutu chakwel nishakama kukwatijan nich yijidik yidia mu Bibil, nadinga ni kuchirikin kand mu yisalijok yam yikur. Nadinga ni kumulembil Yehova ni usany, pakwez nadinga ni kwiyov nayimp nakash.

Pinileja yom yasalay Mwant David ni Batisheba, ni mutapu wayisadilau nich riy kudiay Yehova, chankwasha. Chakin David wadinga ukapukin chakwel itiyija kurumbuk kwend pa chisu chamuyulau, pakad kusot kwiyingish mulong wa yisal yend. Ni witiyija nich kwikepish dipup diamupupau. (2 Samwel 12:1-13, NW) Chisu chin chawonsu nadinga ni kuwa, nadinga ni kuvurik rusangu riner ni chawiy chanswapela kumwit Yehova dilikishin. Kupwa nakwata mupak wa kulembil kurutu niwila mu choziu kupandakanamu kulembil kupwa kwa kuwa, pawiy pinap natwisha nakash.

MUTAPU NATANINAMU: Nadinga chisu chawonsu ni mwikadil uyimp. Pakwez, Efes 4:29-31 wankwasha chakwel nimana usey wa kwipuk “mazu mawonsu maridil ni ujim, ni kuswej.” Mudi munadinga ni kwilej mutapu wa kuyikel mwikadil wam, nileja kand mutapu wa kuyikel rudim ram. Chikwau kand, chiyul cha Yesu chalonday anch: “Dizu dien dikala anch Inge, inge kamu” diakwasha chakwel nikala muntu wa mipak kamu.—Mateu 5:37.

Makwam, wadinga kwisambishil ni kulik anch kangal nikal mu urund ni Atuman, weza kurutu kwinlej anch wovil musangar mulong wamam. Walonda ni kulond anch: “Nij anch wikadil kal mband umwing muwamp kichidiap mulong wa mutapu wakulilau pakwez chidi mulong wa yom yiwilejina piur pa Yehova.” Chansangaresha nakash pa kumutesh walond lel mwamu.

Katat niyovil anch mwom wam ukwet rutong ni urumburikin. Am ni nfumwam twikala alej a Bibil a chisu chawonsu mu mivu chidivu yasuta kal ey. Inge, nikat kuya ni kulejan ku chis ni chis, ni niyovil katat anch wawiy winou mudimu usangareshina nakash kupandakanamu midimu yawonsu yinasala kal.

RUSANGU RA MUNTU

DIJIN: DENIS BUSIGIN

MIVU: 30

NGAND YEND: RUSSIE

RUSANGU REND: WADINGA WAKATA KAL NAKASH KARATE

RUSANGU RAM RA PASAK: Navadikina mu musumb wa Perm’ ni napamina mu musumb wa Furmanov, musumb mwadinga antu piswimp 40000 mu mwab wa Ivanovo, mu Russie. Furmanov udi musumb umwing uwamp nakash ukweta mitond yiwamp yivud yikata kwikal ni ulombu wa nkongal ni ap usuz pa ruvul wa musaj. Mu mivu ya 1980 ni ya 1990, kujipijan mu musumb kwavulijana nakash. Dijuku diam diashakama nich kwengamin pa ukwash ukemp nakash. Nadinga nishiching ni anvaj am pamwing ni mwancham mu kapalikany ka kulal kamwing, chawiy lel mwadinga mwizwil yom too.

Pinikala ni mivu sambwad, nasambisha kwilej karate. Nakata nakash masengan; mwawiy mwadinga mwom wam wawonsu. Nadinga ni kusut chisu cham chilemp mu chikumbu cha kwiyijidishin, chawiy arund nam awonsu adinga ansangarum adinga ni kusengan. Pinikala ni mivu 15, natambula mupond wam usuz mu karate, ni kupwa kwa muvu umwing, natambula mupond ujal. Nadinga chid cha chisak cha in karate adinga ni kunyingumuk kura mu Russie, Mwimputu ni mu Aziy mulong wa kuwin. Chadinga chimeken anch kudi yom yiwamp kurutu, pakwez panikala ni mivu 17 mwom wam wawonsu wakarumuka.

Am ni arund nam amwing twasala chom chimwing chiyimp nakash ni atukwata. Ankatwila mivu yaad mu rukan. Mwom mu rukan wadinga ukash. Pakwez, chadinga pa chisu chinicha nadinga mu rukan chawiy namana Bibil kapamp ka kusambish. Natanga Disambishil, Kuseng ni Testament Musu. Nakwata mu mutu malembil ma Tatukwetu ni nadinga ni kumachirikin uchiku ni uchuku kurutu kwa kulal, mulong nadinga ni kulond anch kusal kukutwish kwankwash.

Anlikishaku mu rukan mu muvu wa 2000, pakwez kinadingap ni rutong ap umutakel mu mwom wam. Chawiy nasambisha kuna yom yikash mudi damb. Pa chisu chinech makwam wafa. Ndiy muntu nadinga nikatininga nakash, ni chakasikena nakash pa kumushadish mwamu. Pakwez, nasala usu chakwel nilika kuna yom yikash mudi damb mulong nisambisha kand kuya ku chikumbu cha kwiyijidishin. Niyam naya kushakam mu musumb wa Ivanovo. Kwinikwa nasambisha kusal mudimu mu makashing ma kulamin yakudia. Mukurump nkwash wa makashing minam wadinga Kaman wa Yehova. Wanleja uyakin umwing wa pa dishin udia mu Bibil ni watenchika yom chakwel Kaman windjing ileja nam Bibil kulondulijan nich program tukukwata.

MUTAPU WAKARUMUNAY BIBIL MWOM WAM: Pa chisu nadinga ni kwilej Bibil, nasangara nakash panileja rutong ra Nzamb ra kudikadish kand divu paradis, ni chawiy nasota niwanyisha yitinau chakwel niyam neza nikalaku ku machuku minam ma kurutu. Najingunina kapamp kamwing anch Yehova Nzamb ukwet yijidik ya piur nakash yisotilay anch antu ayisala mu mwom yau. Nasutisha chisu chilemp mu mwom wam mulong wa kutonginang ching padiam amwinam. Pakwez nileja anch Yehova usotin anch niyam niyitongidinaku antu akwau ni nikudisha ngikadil yinadinga niburedina pasak—mudi riy ni kukat chisambu.

Panasambisha kutongijokin nakash piur pa yom yawonsu yasalay Yehova mulong wamam—mudi kupan Mwanend chakwel ikala mulambu mulong wa yitil yam—kujikitish mulong wa rukat ra Nzamb kwanbachika chakwel nikarumuka mu mwom wam. Chilakej, nileja mu Kuseng 11:5 anch Yehova ukisin chisum. Chawiy nalika kutal maprogram ma televizion madinga ni kulejan yom ya chisum. Pakwez nich kura nakash, nalika kamu masengan ma chisum. Chijidik chidia mu 1 Korint 15:33 chankwasha nimana anch antu nikutonda chakwel ikala arund nam akutwish ikal nich usu ukash padi am. Kwinkas kwankasau kudi uman wa chijidik chinech. Chawiy nakwata mupak wa kulik kwikal kand mu urund ni adinga ni kusal masengan ma chisum.

MUTAPU NATANINAMU: Kwikal mu urund ni Atuman a Yehova ni kwilej Bibil kwankwasha nikala muntu wakashinsh. Chilakej, nileja mu Hebereu 13:5 usey wa kwikal nich musangar ni wa kura nich tutaku rukat ra nfalang. Kusadil chiyul chinech kwankwashin kal nipuka kudimban ni kwiy.

Nikatining chisu chawonsu urund. Pasak, nimena amwinam kusheshik kudiokilinga ku kuyov arund wom. Atuman a Yehova kadiap antu awanyidina, pakwez nileja anch alimishining yijidik ya Nzamb ni asadiling usu wau wawonsu chakwel asadila chiyul chend mu mutapu ukatau kuyisadil antu akwau. Nikadil kal ni arund amwing akin mukach mwau.

Nikat ching kusu kutong anch, mwom wam wela kwikal nchik anch kinilejap kushakam kukwatijan nich yijidik yidia mu Bibil. Nela kuchirikin kand mu rukan kakwau ap kuyisal kand antu chom chikwau chiyimp ni kuman mar. Katat, ap anch, nikwet mband unikatina nakash ni an amakundj aad, ni mudi dijuku, tukwet musangar wakin pa kuyikwash antu akwau chakwel niyau ileja uyakin wa Nzamb.

RUSANGU RA MUNTU

DIJIN: JOSÉ CARLOS PEREIRA DA SILVA

MIVU: 31

NGAND YEND: BRÉZIL

RUSANGU REND: MWIN KWICHANY YINKANY NI AKWAU MU BALIBAL

RUSANGU RAM RA PASAK: Napamina kuns kwijondila mu musumb wa São Paulo, mu Amerik. Kitwadingap ni mutapu wa kutan mem mawamp ma kuna ap kabinye kawamp. Mukal winou wadinga wijiken mulong wa chisum ni yisal yiyimp.

Napama nikal mwin chisum. Chisu chawonsu twadinga ni kubulijan mu balibal, chawiy ansulangen etu adinga ni kwingovu wom. Kudjal kwam, kwikil ni kwileng kwam, ni chifu cham yawonsu yadinga yilejen anch nidi muntu wa ubaj. Nadinga ni kuna nakash, chisu ni chisu ni nadinga ni kulengumok. Mudi ayayam, niyam nasambisha kuna yom yikash mudi damb. Chakin, umwing wa ayayam wafa mulong wa kuna kupandakesh chipim.

MUTAPU WAKARUMUNAY BIBIL MWOM WAM: Panatanijana ni Atuman a Yehova, anleja mu Bibil anch Nzamb ukez kusal divu diawonsu dikala paradis. (Luka 23:42, 43; Kuburik 21:3, 4) Nileja kand anch afu kijap chom, chawiy Nzamb kakatap kuyipupin antu ayimp mu kasu. (Mulej 9:5, 6) Chom chinech chadinga kwipimishaku kudi am. Yom yinileja piur pa Nzamb yangikisha impu yikash ya kuswimp mashakamin ma mwom wam. Pakwez kukarumuk kikwadingap kuswapela—kulik kuna yom yikash, kuna maar ni kulik kubulijan, kulik kulond kuyimp kunadinga nich.

Pakwez, mazu malonday kambuy Paul mu 1 Korint 6:9-11 mankasikesha nakash. Maverse minam malondil anch in Kristu amwing adingaku mu mivu chitot ya kusambish adinga niyawiy pasak ni yaku yiyimp mudi yinadinga nich. Pakwez maverse minam malondil kand anch: “Mwamu mwadingau amwing pakach pen; pakwez en akutokishilany kal, wishitwilany kal, wayingilany kal mu dijin dia Mwant Yesu Kristu, ni mu [spiritu] wa Nzamb wetu.” Mazu minam mangikisha ruchingej anch niyam nikutwish nasal yikarumuk yiniswirikedina mu mwom wam chakwel nimusangaresha Nzamb.

Panasambisha kukumangan ni Atuman a Yehova, nitiyija anch relijon wau udi wakin. Adinga ij mutapu nadinga mwin chisum pasak, mwin yaku ya chisum, pakwez awiy angaka ni chirungul ni nich rukat chakwel nikala murund nau.

MUTAPU NATANINAMU: Ing anch kinitiyijap kwilej Bibil ni kukarumun mashakamin mu mwom wam, ing pamwingap nafa kal. Pakwez, nikwet musangar wa kumukwash umwing wa ayayam chakwel niyend ileja Bibil ni chakwel adiokala mu usuk wa kuna yom yikash mudi damb. Ni nikat kand kuyikasikesh anamakwam akwau chakwel niyau asambisha kwilej Bibil. Nikwet musangar nakash anch natwisha kupan mwom wam mu mudimu wa Nzamb, ukata kutubangin nakash!

[Tablo wa jinsangu udia pa paj wa 23]

“Nakwata mupak wa kulembil kurutu niwila mu choziu kupandakanamu kulembil kupwa kwa kuwa, pawiy pinap natwisha nakash”