Itiyijany ni Kujikitish Panany ni Muchim Wen Wawonsu
YEHOVA, Tatukwetu mukatish wa mwiur, ukat kutumbangin muntu ni muntu. Dizu dia Nzamb ditwinkishin kashinsh anch ukat kuyibangin nakash atushalapol end awonsu. (1 Pita 5:7) Njil yimwing yikatay kusadil Yehova mulong wa kumekesh kutubangin kwend yidi kusutil ku kutwinkish ukwash kushalijan mulong wa kutukwash tumusadila nich kushinshaman. (Isay 48:17) Pakampwil, pa chisu tukata kura nich milong yikata kutuletin runeng, Yehova ukatining anch tusadila ukwash utwinkishinay. Chijil cha Moses chimekeshin uyakin wa chom chinech.
Mwishin mwa dirijek dia Chijil, Yehova wayinkisha “atuzwendj” ukwash wa rukat, mudi mwan anshon, mwadiamufu, ni mweny. (In Levi 19:9, 10; Kuvurik Yijil 14:29) Ndiy wij anch atushalapol end amwing akutwish aswiriken ukwash wa ambay nau in kwitiyij. (Yakob 1:27) Chawiy lel, kwikil umwing wa atushalapol end uswiridina kwidjidjek pa kwitiyij ukwash umwinkishinau kudi antu abachikinay Yehova chakwel apana ukwash winou. Chikalap nchik mwamu, tufanyidin kwikal nich ngikadil yiwamp ya muspiritu pa chisu tutambwila ukwash.
Pa chisu chawiy chimwing, Dizu dia Nzamb dikasikeshidin anch antu a Nzamb niyau akwet mutapu wa kupan. Vurikany rusangu ra “kazwendj mwadia-mufu” wamanay Yesu ku tempel mu Yerusalem. (Luka 21:1-4) Pamwingap niyend wataninamu mu yitenchik ya rukat ra Yehova piur pa adia-afu mudi mwadinga mulondilau mu Chijil. Pakwez, ap anch wadinga kazwendj, mwadia-mufu winou wavurika, kichidiap mudi muntu utambwila, pakwez mudi muntu upanina. Ngikadil yend ya kupan yamuletina musangar mulong mudi mwalonday Yesu anch: “Chiyukish chijim kudi mwin kupan chamupandakan mwin kutambul.” (Midimu 20:35) Nich uyakin winou mu manangu, ov, mutapu ik ukutwishanya ‘kupan’ chakwel wikalany ni musangar?—Luka 6:38.
‘Nikumuchirishin Yehova Ik?’
Mwin kufund kuseng wadinga ni kutong anch: ‘Nikumuchirishin Yehova ik ku yom yawonsu yiwamp yansadilay?’ (Kuseng 116:12) Chom ik chataninayimu? Yehova wamukasikesha pachisu chadingay mu “mar mavud ni runeng.” Chawiy kand, Yehova “waukamunina mupim [wend] ku rufu.” Katat, ndiy ukat “kumuchirish” Yehova mu mutapu umwing ap ukwau. Chom ik chatwishay mwin kufund kuseng kusal? Ndiy walonda anch: “Nikamufut [Yehova] machip mam.” (Kuseng 116:3, 4, 8, 10-14) Ndiy wakwata mupak wa kulam ya kushilamu yawonsu yamushena yamukanay Yehova ni kuwanyish yom yawonsu yamwitay.
Ni yey ukutwish kusal mwamu. Mutapu ik? Mu kulondulang chisu chawonsu yijil ni mbil ya Nzamb mu mwom. Chawiy lel, ikal nich kashinsh anch difukwil diey kudiay Yehova dikwet usey ujim mu mwom wey ni anch spiritu wa Nzamb ukutakedil mu yom yawonsu usadila. (Mulej 12:13; Galatia 5:16-18) Chakin kamu, kwikil chiukutwisha kumusadil Yehova mulong wa yom yawonsu yakusadilay kal. Chikalap nchik mwamu, chikat ‘kuusangaresh muchim wa Yehova’ pa kuman anch ukat kwipan ni muchim wey wawonsu mu mudimu wend. (Jinswir 27:11) Kudi kwitapil dilau dijim mudi ik pa kumusangaresh Yehova mu mutapu winou!
Salany Mulong wa Kuwap kwa Chikumangen
Ukutwish witiyij pakad kwidjidjek anch ukat kutaninamu mu jinjil jivud mu chikumangen cha Ukristu. Yehova ukat kulet yakudia yivud ya muspiritu, kusutil ku chikumangen. Ukat kutambul uyakin ukukodila kudiokal ku kurumbuk kwa chirelijon ni ku mididim ya muspiritu. (Yohan 8:32) Ku yikumangan ya chikumangen, ku yitentam ya pakampwil ya dichuku dimwing, ya munyingumuku, ni ku yitentam ya distrik yitenchikiningay “kashalapol ushishamena ni kubabal,” ukat kutambul ronganyin rikeza kukushikij ku mwom wa chikupu mu paradis panap pansh mwakad kusansan ni mar. (Mateu 24:45-47) Ov, ukutwish wachind yiyukish yawonsu yiwatambula kal—ni yiuchingedina kutambul—kusutil ku chikumangen cha Nzamb? Ov, chom ik ukutwisha kupan ku chikumangen mulong wa yom yiney?
Kambuy Paul wafunda anch: “Mujimbu wawonsu aulimikin mwi ndiy, ausankeshil ku [manungin] mawonsu mudi mukasikeshilay chom chawonsu ipau, chakwel ukudila nawamp ni kukasikan mu rukat, mudi chikunku ni chikunku chikwashijana mu kusal mudi mudia usu wau.” (Efes 4:15, 16) Pakatau kusadil mufund winou piur pa in Kristu azizidilau many awonsu, yany yidiamu akutwish ayisadil mulong wa in kristu awonsu adiaku ilel. Mwawiy, muntu ni muntu udia mu chikumangen ukutwish wasal mulong wa kuwap ni kupam kwa chikumangen. Mu mitapu ik?
Tukutwish twasal mwamu ku kusal usu wa kwikal pa yisu yawonsu, musul wa dikasikesh ni kwitudish muspiritu kudi antu akwau. (Rome 14:19) Tukutwish kand twasal mwamu mulong wa ‘kukul kwa mujimbu’ kusutil ku kukudish dibuj dia spiritu wa Nzamb mu yawonsu yitusadila ni akwetu akaritiy. (Galatia 5:22, 23) Chikwau, tukutwish twakimb mitapu ya kuyisadil “antu awonsu nawamp, tupandikesh kuyisadil in ritiy retu nawamp.” (Galatia 6:10; Hebereu 13:16) Muntu ni muntu udia mu chikumangen—akadivar ni anambaz, ansand ni amapal—akutwish asal mulong wa ‘kukasikesh mujimbu mu rukat.’
Chikwau, tukutwish twasadil ukaliweny wetu, mausu metu ni mapit metu mulong wa kusal mudimu wa kupandish mwom usadilau mu chikumangen. Yesu walonda anch: “En wakilany chamwamu.” Ov, mutapu ik tufanyidina kwakul? Ndiy walonda kand anch: “Panany chamwamu.” (Mateu 10:8) Chawiy lel, salany nakash mu mudimu wa usey wa kulejan Want ni kuyikadish in kwilej. (Mateu 24:14; 28:19, 20) Ov, ukwet chikangesh cha kusal pa kusal mwamu? Muvurika kazwendj mwadia-mufu wisambinay Yesu. Yapanay yadinga yikemp nakash. Pakwez, Yesu walonda anch ndiy wapana yivud kuyipandakanamu antu awonsu. Wapana yawonsu yadingay nich kukwatijan ni mwikadil wend.—2 Korint 8:1-5, 12.
Tambulany ni Manangu Mawamp
Ap mwamu, ukutwish wikal nich yisu ukuswirikedina anch chikumangen chikukwasha. Kangal widjidjek kutambul ukwash ukutwishau kukwinkish mu chikumangen pa chisu chiurishina nich yikokujol ya ditenchik dined. Yehova wayiteka kal amakundj awanyishina yitinau ni akata kubangin mulong wa kwikal ‘atufung a chikumangen’—mulong wa kukukwashany pa chisu udiany mu yoziu ni mu mar. (Midimu 20:28) Amakurump ni antu akwau adia mu chikumangen akusot kukwongoj, kukukwash, ni kukuchidij pa yisu ya mar.—Galatia 6:2; 1 Tesalonik 5:14.
Pa chinech, ikal nich kashinsh anch, pa chisu utambwila ukwash kanang, ukusal mwamu nich manangu mawamp. Itiyijany nich kujikitish ukwash utambwilanya. Kwatany ukwash winou ukukwashinanyau kudi akwen akaritiy mudi chijingidij cha ranaken ra riy ra Nzamb. (1 Pita 4:10) Ov, mulong wak chom chinech chidi cha usey? Chidi mulong kitukatap kusot kuutambul mwinjil mukatau kuchingejin in mangand—pakad kujikitish.
Ikalany Isikena ni Akweta Manangu Mawamp
Mu mukand wend wayifundinay in chikumangen cha ku Filipoi, Paul wayifundina piur pa Timote anch: “Kinikwetip muntu mukwau ukweta muchim mudi ndiy wa kukutalany anch ushichany nawamp.” Pakwez, Paul wawejinaku kand anch: “Mulong [akwau] awonsu akat kwisotil yom yau ayinau, akat kusotip yom ya Yesu Kristu.” (Filipoi 2:20, 21) Nich kushinshikin kwinoku kwa Paul mu manangu, ov, mutapu ik tukutwisha ilel unou kwipuk kukwatikan nakash nich ‘kwisotil yom yetu ayinetu’?
Kitufanyidinap kwikal in kuyishindil akwetu adia mu chikumangen pituyitina ukwash wa pa chisu chau ni kutubangin chakwel atukwasha kupwish milong yetu. Ov, mulong wak? Tongin bil pa chom chinech: Pakad kwidjidjek, tukutwish twajikitish nakash anch mukadivar watwinkish ukwash wa ku mujimbu chakwel twikwasha nich anch kudi maswir makash. Ov, tukutwish twamushindil atwinkisha ukwash winou? Bwat kwau. Mwinjil yikwau, povilau akadivar netu musangar wa kutukwash, tuswiridin kwikal isikena ni akweta manangu mawamp piur pa yom yituyichingejidina kutwinkish pa chisu chikusotau. Pa chinech, chom chin chawonsu chikusalau akwetu in ritiy mulong wa kutukwash turisha nich yisu ya mar, tukuyisot asala mudi mukatinau.
Pakad kwidjidjek akadivar ni anambaz ney in Kristu akwikal tayad chisu chin chawonsu mulong wa kukukwash. Pakwez, pa chisu chimwing kakutwishap kuwanyish maswir mey mawonsu. Anch chom chinech chashiken, ikal nich kashinsh anch Yehova ukez kukukwash, mudi mwasalay mwin kufund kuseng, mu yoziu yin yawonsu yikutwisha kukutan.—Kuseng 116:1, 2; Filipoi 4:10-13.
Chawiy lel, kangal widjidjek kwitiyij yitenchik yin yawonsu yisadilay Yehova mulong weyey—pakampwil pa yisu ya runeng ni mar. (Kuseng 55:22) Ukusotidin anch usala mwamu. Pakwez, ndiy ukusotidin kand wikala mwin “kupan ni musangar.” Chawiy lel, “Muntu ni muntu asala mudi [mulondinay] mu muchim wend” mulong chawonsu ukutwisha kukwatijan nich mikadil yey mulong wa kukwash difukwil diakin. (2 Korint 9:6, 7) Mwinjil yiney, ukez kutwish kusal yom yiney yawonsu yaad—kwitiyij nich kujikitish ni kupan nich muchim wawonsu.
[Kamushet/Yipich chidia pa paj wa 32]
‘Nikumuchirishin Yehova ik ku yom yawonsu yiwamp yinsadidilay?’—Kuseng 116:12
▪ Kimbany mitapu ya “kuyisadil in ritiy retu nawamp”
▪ Ikal musul wa dikasikesh ni wa kwitudish muspiritu mulong wa antu akwau
▪ Kwatikanany nakash mu mudimu wa kuyikadish in kwilej mudi muchitwishikina