Salany mu Kwovijan Chakwel Uyany Kurutu Muspiritu

SPIRITU wa kwovijan udi wa usey kudi antu asotila kuya kurutu mu kwikal nich dijuku dimukatina Yehova. Pa chisu Yehova chatangay ikundj ni mband akusambish, wakasikeshina usey wa kusal mu kwovijan. Eve wadinga ufanyidin kusal pamwing ni Adam mudi mwin “kumukwash.” (Dis. 2:18) Uruw ufanyidin kwikal urund, wa ikundj ni mband akwashijadina umwing ni mukwau. (Mul. 4:9-12) Chakwel kuwanyish mudimu wayinkishau anvaj ni an kudi Yehova kwitin kusal mu kwovijan.

Kwifukwil mu Dijuku

Barry ni Heidi akwet an atan. Amana anch kusadil pamwing dilejan dia Bibil mu dijuku kwayikwasha kuya kurutu. Barry ulondil anch: “Nayinkisha an yikunku yikemp-yikemp ya kusal chisu ni chisu pa chisu cha dilejan dia mu dijuku. Nadinga ni kuyit chakwel arijeka yirumburil yengamidina pa mitu ya milong yidia mu Réveillez-vous ! Twadinga ni kusal yakumenaku ya kwiyijidish mulong wa mudimu wa kulejan chakwel mwan ni mwan ikala nich mutapu wa kusal.” Heidi uwejidinaku anch: “Etu awonsu twadinga ni list padinga jintong ja muspiritu jitwadinga ni kusot kuwanyish, ni twadinga ni kujishinshikin pa chisu cha dilejan dia mu dijuku chakwel tumana mutapu ik tujiwanyishina.” Ambay inay atijadina amana kand anch kwikal nich urel kanang wakad kutalang televizion chayinkisha awonsu mu dijuku chisu cha kutang pakad kuzambul dizu.

Yikumangan ya Chikumangen

Mike ni Denise ayilila an anying. Mutapu ik watanyidinamu mu dijuku diau mu kusalang mu kwovijan? Mike ulondil anch: “Pa yisu yimwing, ap program upandakena kuwap kadingap ni kusadik, pakwez twashikena ku kuman anch kusal mu kwovijan kwadinga ni kutukwash chakwel tushika ku yikumangan kurutu kwa muten.” Denise urumburil anch: “Papamau anetu, umwing ni umwing wadinga ni chakusal. Kim, mwanau changadim, wadinga ni kuyikwash nich kwisuk ni kutek yakudia ku mes.” Mwanau ikundj Michael uvurikin anch: “Pa urel wa Diakaad twadinga nich chikumangan cha chikumangen kwolikwetu. Chawiy twadinga ni kukorop mu chikumbu, kukomb ni kutek yitwam nawamp.” Matthew, mwanau mukwau ikundj, uwejidin anch: “Tatuku wadinga ni kwez kurutu kwa chisu pa urel wa yikumangan chakwel atukwasha twikala tayad mulong wa chikumangan.” Chibudikin ik chadingaku?

Mausu Madia ma Usey

Mike ulondil anch: “Mu muvu wa 1987, Ndiy ni Denise asambisha kusal mudi ayibol. Pa chisu chinicha, anetu asatu adinga achidi ku chikumbu. Aad niyawiy ikala ayibol, ni akwau adinga ni kusal mudimu wa kutung ku Bethel. Musangar ukwau wiwejinaku mu dijuku dietu wadinga anch twatwisha kuyikwash antu kushalijan 40 djat ni kuyishikij ku kwipan ni kubabatishiu. Twadinga kand nich chisend cha kusal mudi dijuku mu midimu ya kutung, ap ni mu jingand ja wingendj.”

Chakin kamu chiding cha usey anch dijuku diawonsu diasal mu kwovijan. Ov, ukutwish wamanany jinjil jikwau mu ukutwisha kusadilany mu kwovijan umwing ni mukwau mu dijuku dien? Ukutwish wikal nich kashinsh anch kwikal nich spiritu wa kwovijan ukez kukwash dijuku kuya kurutu muspiritu.

[Chipich chidia pa paj wa 29]

Yikunku ya kwiyijidish yikat kusal anch tuya kurutu mu mudimu wa kulejan