Mutapu Ukutwisha Yidi ya Dijuku Kusadil Pamwing —Mulong wa Kwisakin Yikumangan
1 Majuku ma Ukristu mafanyidin kulondul chijil cha kukumangan pamwing ku yikumangan. (Heb. 10:24, 25) Nich kusadil pamwing kuwamp, muntu ni muntu ukutwish kwirijek mulong wa kwikal ku kukumangan ni kupan yakul. Mikadil ya majuku yishalijadin, pakwez kudaku yom yikutwishay kusal ikundj mwin Kristu, mband mwin kwitiy, ap nvaj ulidina aan amwinend, chakwel kurijek uumwing wa dijuku mu milong ya muspiritu, kwikalap nchik kuvul kwa aan adia ku chikumbu ap mivu yau.—Jnsw. 1:8.
2 Itekinany Chisu cha Kwirijek: Yidi ya dijuku yisadidiling pamwing chakwel muntu ni muntu irijeka mutapu ufanyidina mulong wa yikumangan. Avud ashinshikidining pamwing malejan ma rubing ni rubing ma dilejan dia Tour de Garde. Amwing arijekining Dilejan dia Buku ap kulondul program wa rubing wa kutang Baibel mu dijuku. Rutong ridi ra kuvurik manans majim makwisambinau ku chikumangen kurutu kwa kukumangan. Mwi njil yiney, muntu ni muntu ukwisakin nakash yiteshinay ni kwikal tayad mulong wa kwakul anch kwamekan chisu.—1 Tim. 4:15.
3 Tonginany Kwakul: Muntu ni muntu mu dijuku ufanyidin kwikal ni rutong ra kulejan ruchingej rend kurutu kwa akwau kusutin kwakul ku yikumangan. (Heb. 10:23) Ov mu dijuku mudi muntu uswiridina ukwash ap dikasikesh mulong wa kwakul? Ukwash ik uswiridinay muntu ni muntu mu kurijek yikunku ya kusutish ku Shikol ya Mudimu ya Uteokras? Amband akatining anch amfumwau ayimekeshina kusanger kwau anch ayinkish yiyul piur pa chilikej cha kusadil ap mutapu ufanyidina wa kusutish chikunku. Anvaj kafanyidinap kutong anch afanyidin kuyirijekin aanau yikunku ya kusutish. Kusal mwamu, kukutwish kuchirish kwinyim ukaliweny wa aan. Pakwez anvaj akutwish kuyikwash aanau ni kuyitesh pachirikidinau nich dizu dizambukina yikunku yikusutishau.—Efe. 6:4.
4 Irijekany Mulong wa Kukumangan: Aan akutwish kuyifundish kudiosh kamu pa wanikanch wau kudjal ni kwikal tayad mulong wa kuya pa chisu kanang ku yikumangan. Yidi ya dijuku yifanyidin kusadil pamwing mu kusal midimu ya chikumbu chakwel kakutwishap kucheleu.—Tal yiyul mu buku Bonheur familial, paj 112, ni Les jeunes s’interrogent, paj 316-17.
5 Anvaj ni aan akutwish kutongin mazu ma Yoshua, walonda anch: “Am ni chikumbu cham, tukumusadil Yehova.” Chad lel, jijamanany kusadil pamwing nakash mulong wa kwisakin yikumangan.—Yos. 24:15, NW.