Mutapu wa kuman musangar ujim ku yikumangan
1 Yikumangan yidi ya ukwash mulong wa kuwap kwetu kwa muspiritu. Musangar utukata kuman ku yikumangan wambaten nakash nich yitukata kusal kurutu kwa yikumangan, pa chisu cha yikumangan ni kupwa kwa yikumangan. Ov mutapu ik tukutwisha kwikwash ayinetu ni kuyikwash akwau kulam musangar ujim ku yikumangan?
2 Kurutu kwa yikumangan: Kwirijek kutukwashining nakash kwikal ni musangar udiokila ku yikumangan. Anch twirijekin nawamp, tukwikal itenchikidina kulondul piswimp nakash ni kupan yakul. Chikwau kand, misamb yawonsu ya chikumangan yitwinkishinau kusutish, tufanyidin kuyirijek nawamp, nich yitongijok ya kwel anch tulejan misamb mutapu wa kashinsh kulondulijan ni yany ni kuvuvurish kusanger kwa in kutesh. Tufanyidin kurijek nawamp ni kuchirikinamu. Pitupanina ukwash wetu chakwel yikumangan yikala yitungina ni yimukwashina muntu ni muntu, kukul kwetu ayinetu kukat kumekan patok ni tukweting musangar ujim nakash.—1 Tim. 4:15, 16.
3 Pa chisu cha yikumangan: Kupan yakul ku yikumangan kukutwish kutukwash kuyisanger kand nakash. Chiwapidil kuman chikunku cha misamb ni in kutesh mud chikunku chimwing chimwinkishinau muntu ni muntu mu chikumangen. Yakul yifanyidina ku chipul chin kamu chisu chivud yikwashining nakash. Kushimun mu wiswimp jinsangu jitungina kukutwish kwikal kwa ukwash nakash ni kukasikeshina, ni tuwapidil kwisambinap milong mud yiney pichifanyidina. (Jnsw. 15:23; Midimu 15:3) Pitusutishina misamb kanang ku chikumangan, tufanyidin kulond nich chirungil ni kashinsh, ni kuchisal mu mulad umwing uvuvurishina kusanger, ukinakin, ni ukwash.
4 Kupwa kwa yikumangan: Kwambamb nau akwau mazu ma kalimish, kupanijan moy kwa urund, ni kwisambin milong yimwing yijim yisambinangau ku yikumangan yikutwish kutukwash etu awonsu. Kumekesh musangar wetu pitumena ansand, amakurump nau asu chakwilau kujimbishining rukat ra ukadivar. Pa ndond pa kuyichiril amwing aburenanga yikumangan, tufanyidin kuyilej musangar wetu udiokila ku kukumangan, mwi njil yiney tukuyikasikesh niyawiy kwez ni kukumangan.—Heb. 10:24, 25.
5 Kangal twavuramenany ditenchik dined difanyidina dia kukasikeshijan. (Rom 1:11, 12) Anch kamu twasal usu wetu wawonsu, tukutwish etu awonsu kulam musangar ku yikumangan ya Ukristu.