Dizu dia uprofet dia Nzamb dikushiken chakin!
1 Atuman’a Yehova akat kusanger chisu ni chisu uprofet wa Baibel. Chawiy lel twasangara kwijik anch mutu wa mulong wa chikunguril cha distrik cha muvu unou udi “Dizu dia Uprofet dia Nzamb.” Twasota kwijik yitutekidinay Yehova mud “yakudia ya pa chisu chiwanyidina.” (Mat. 24:45) Katusulishap ku muchim bwat.
2 Milong yijim ya chikunguril: Diskur nfungwil dia Diakatan, “Tuteshany Dizu dia Uprofet dia Nzamb,” disambila chitokish piur pa rusangu ra kwikarumun (kwa Yesu). (Mat. 17:1-9) Diakasikeshina anch tudi katat piswimp nakash nich chirung chipandakena kuwap mulong twashikedin kal palemp nakash mu chirung cha kwisudiel, nich ditenchik disu didia piswimp ap! Njil yijim yituswiridina mulong wa kutesh Dizu dia Nzamb yidi kuditang chisu chawonsu. Symposium (diskur dia yikunku yisatu) “Twikalany ni Musangar wa Kutang Dizu dia Nzamb” watwinkisha yiyul yifanyidina chakwel kutang kwetu kwa Baibel kwikala kwa ukwash ni kwa musangar.
3 Diampos urel twachirikina milong yilejena mulong wak tufanyidina kwitiyij chakin anch tushich mu machuku ma kwisudiel. Ov ukutwish kuvurik yawonsu yiney? Diarubing pamanch, arumburila uprofet wa Abakuk, twileja anch chirung chetu chifaniken kamu ni cha Abakuk ni milong yiney ya machuku makemp yifanyidin kushik katat kamu ak pakuyijiyishay Yehova antu ayimp ni kuyipandish antu atentamina. Ov watesha dirumburik dia dram wa chibaibel piur pa Jakob ni Esau? Tufanyidin kulondul yiyukish ya Yehova, ni kurishish spiritu wa kuburen kusanger ni kadiwij.
4 Buku musu upandakena kuwap: Twasangara nakash kutambul buku musu, Prêtons attention à la prophétie de Daniel! Chakin anch watangin kal mukand winou usangarishina nakash. Mwin kulond walejana kubudikin kwa buku winou walonda anch: “Kudioshamu kusu milong yikemp, uprofet wawonsu udia mu buku wa Daniel washikedin kal.” Ov chinech chikasikeshidinap kuswapal kwa chirung chetu?
5 Program wa chikunguril watukasikeshin nakash kwitiy anch kushilamu kwawonsu kwa Nzamb kwakad kal kushiken kukushiken chakin. Tudi akasikeshinau kudandamen kuyilej antu dizu dia uprofet dia Nzamb!