Mwifukwilany Yehova Pamwing mu Dijuku

¹ Pafundau Bibil, yid ya dijuku yasalanga yom yivud pamwing. Yasala pamwing midimu ya pichuku-pichuku ni chipandakenamu amwifukwilang Yehova mu Dijuku. (Lev. 10:12-14; Kuv. 31:12) Nlel unou, mu jindond jivud, yid ya dijuku yisadiningap yom yivud pamwing. Pakwez, in Kristu ij usey wa kwipan mu mijikit ya kulejan pamwing mu dijuku, pakampwil pa chisu cha kumwifukwil. Chikat kumusangaresh mudi ik Musul wa dijuku pamenay majuku mamwifukwidil mu uumwing!

² Lejany Pamwing mu Dijuku: Kusal pamwing mudimu wa kulejan rusangu ruwamp kukasikeshining uumwing wa dijuku. Mu chidia cha usey nakash kulejan pamwing mu dijuku, kupwa kwa kuya pamwing ni antu akwau mu kulejan, mukurump ufanyidin kand kulejan pamwing ni mukajend ni anend. (1 Tim. 3:4, 5) Ap anch atulam in kwendangan akwet yom yivud ya kusal, ni yawiy akweting program wa kusal pamwing ni akajau mu mudimu wa kulejan.

³ Anvaj alejeninga pamwing ni anau atwishining kuyikwash ikal in kulejan ayila kurutu. An kakezap kuman ching kusu musangar ni mazang ma anvajau mu mudimu wa kulejan, pakwez akez kuman kand mutapu anvajau ukatau kumekesh rukat rau kudi Yehova ni kudi antu akwau. (Kuv. 6:5-7) Chifanyidinap kuvuramen usey wa kulejan kwa anvaj pamwing ni anau anch an asambish kupam mu chikumbu. Ambay amwing a uruw akweta an akweta mivu pakach pa 15 ni kushik ku 21 adandamena kuya nau mu mudimu wa kulejan pakad kujing. Tatuku walonda anch: “Tukat kuyilej chom kanang chisu chawonsu. Ni tukwet ruchingej anch chidi chom chisangareshina, ni chikasikeshina.”

⁴ Itenchikany Pamwing: Majuku mamen kal anch chidi cha ukwash kwirijek pamwing mulong wa mudimu wa kulejan. An akatining kusutirik minsamb pamwing ni yid ya dijuku kwikal mudi mwin kulejan ap mudi mwin chikumbu. Amwing asadining minit yikemp kwisudiel kwa dilejan dia dijuku mulong wa kusutirik minsamb.

⁵ Musangar wetu ukat kupandakan pitukata kwipan mu mijikit ya usey ni yisangareshina pamwing ni antu tukatina. Chidi chisangareshina mudi ik anch yid ya dijuku yasambish kusal pamwing mu mudimu wa chingand, pakatau kuya ku chikumbu ni chikumbu, kuyichirikin antu ni kutakel malejan ma Bibil! Anch ukat kumwifukwil Yehova pamwing ni dijuku diey, ukutwish kulond nich musangar anch: “Am ni chikumbu cham tukumusadil [Yehova].”—Yos. 24:15.