Majuku Ma In Kristu Malondwil Chilakej Cha Yesu!

“Kristu . . . wakushilanya chilik chakwel ulondulany mu ruzau rend.”—1 PITA 2:21.

1. (a) Mudimu ik wadingay nich Mwan a Nzamb pa chisu chatangau yom? (b) Mutapu ik wiyovilingay Yesu piur pa antu?

PATANGAY Nzamb maur ni divu, Mwan wa kuval kwend amwinend wadinga pamwing nend “mwant wa mudimu.” Mwan a Nzamb wasala kand mu kwovijan pamwing ni Tatukwend, pa chisu chamutondau kudi Yehova ni patangay annam a mitapu kushalijan, wateka mwom panap pa divu ni pa chisu Charijekay Paradis wadinga ufanyidin kwikal ndond yikushakamau yitang yatangay mu chifu chend ni yimufanikena. Mwan a Nzamb, weza kwijikan anch Yesu, wadinga uyikatining nakash antu. “Nasangera mu mangand mend mashichau antu.”—Jinsw. 8:27-31; Dis. 1:26, 27.

2. (a) Mutapu ik watenchikay Yehova mulong wa antu akad kuwanyin? (b) Pa chom ik chimwing cha mwom chitwinkishinay Bibil umutakel?

² Pasalau chitil antu aad a kusambish, mulambu wa difut mulong wa antu akayitil wikala chom cha usey mu rutong ra Yehova. Yehova watenchika mulambu wa difut ukupanay Kristu mulong wa dipandish. (Rome 5:8) Chikwau, Yehova wayinkisha Dizu diend, Bibil, umwinkishina muntu umutakel piur pa mutapu uwamp ufanyidinay kura nich kuburen kuwanyin kwaswanay. (Kus. 119:105) Mu Dizu diend, Yehova uletin umutakel chakwel uyikwasha antu ikala nich majuku madia makash ni ma musangar. Pa yitadila uruw, mukand wa Disambishil ulondil anch ikundj ufanyidin “kulamat kudi mukajend, chad awiy aad akwikal mujimbu umwing.”—Dis. 2:24.

3. (a) Chom ik chalejanay Yesu piur pa uruw? (b) Chom ik tukushinshikina mu mutu wa mulong winou?

³ Padingay ni kusal mudimu wend pa divu, Yesu wakasikeshina anch uruw ausala chakwel ushakama chikupu. Walejana yijidik ni anch ayisadil, yikutwish yayikwash yid ya dijuku kwipuk ngikadil ni mikadil yikutwisha kurumbangesh uruw wau ap kurumbangesh musangar wa dijuku diau. (Mat. 5:27-37; 7:12) Mutu wa mulong winou ukwisambin mutapu ukutwisha malejan ma Yesu ni chilakej chend padingay panap pa divu kuyikwash angatan, angachik, anvaj ni an chakwel ikala nich mwom wa musangar, ni wa mazang.

Mutapu Ukatay Ngatan Mwin Kristu Kumulimish Mukajend

4. Kufanikan ik kudia pakach pa mudimu wa Yesu ni wa angatan in Kristu?

⁴ Nzamb wamuteka ngatan kwikal mutu wa dijuku, mudi mudingay Yesu Mutu wa chikumangen. Kambuy Paul walonda anch: “Ikundj ndiy mutu wa mband, mudi chidiay Kristu mutu wa chikumbu cha Nzamb, mujimbu wend, ndiy mwinend udi Mupandish wau. Amakundj, yikatany akajen mudi Kristu chikatilay chikumbu cha Nzamb ni kwipaniku amwinend.” (Efes 5:23, 25) Chakin kamu, mutapu wadingay Yesu ni kuyisadil in kwilejend udi chilakej chiswirikedinau amakundj in Kristu pa mulong wa kuyisadil akajau. El tushinshikinany jinjil jimwing jasadilay Yesu mulong wa kusadil ulabu wamwinkishau kudi Nzamb.

5. Mutapu ik wadingay Yesu ni kusadil ulabu wend piur pa in kwilejend?

⁵ Yesu wadinga ‘witudishila ni wikepishila mu muchim.’ (Mat. 11:29) Wadinga kand ikundj ukapukina. Kadingap ni kudiul yisend yend. (Marko 6:34; Yoh. 2:14-17) Wayinkisha in kwilej end chiyul nich ranaken chisu ni chisu pachadinga chifanyidina. (Mat. 20:21-28; Marko 9:33-37; Luka 22:24-27) Pakwez, Yesu kadingap ni kuyipipesh, ap kayisalap chakwel iyova anch kayikatinap ap anch kakutwishap kusal yom yadingay ni kuyilej kusal. Pakwez, wayilimisha ni wayikasikesha in kwilejend. (Luka 10:17-21) Pakad kwidjidjek Yesu niyend amulimisha nakash kudi in kwilejend mulong wa rukat rend ni mutapu wend wa kuyisadil nich ranaken!

6. (a) Chom ik chikutwishay kwilej ngatan ku mutapu wayisadilay Yesu in kwilejend? (b) Pita uyinkishin angatan dikasikesh ik?

⁶ Chilakej cha Yesu chiyilejin angatan anch umutu wa Ukristu udiap mwaz wa kuyikel nich chisum. Pakwez, udi mwaz wa kalimish ni wa kwipan nich rukat. Kambuy Pita wayikasikesha angatan chakwel imburija rukat ra Yesu mu mutapu wau wa ‘kushakam’ ni akajau, ni ‘kuyilimish.’ (Tang 1 Pita 3:7.) Ov, mutapu ik lel, ukutwishay ngatan kusadil ulabu wend ni pa chisu chawiy chimwing kumusadil mukajend mudi muntu ufanyidina kalimish?

7. Mwinjil ik mukutwishay ngatan kumekesh anch umulimishin mukajend? Let chilakej.

⁷ Mwinjil yimwing yikutwishay ngatan kumulimish mukajend yidi kusutil ku kutesh chitongijok chend ni yovil yend kurutu kwa kukwat mipak yikutwisha kwikal nich usu pa dijuku. Pamwingap kukutwish kwikal kusot kukwat mupak wa kushemunikin kwindjing ap kuswimp mudimu ap pa milong ya pichuku pichuku, mudi kwisu kukuyau pa chisu cha konje ap kutenchik mutapu wa kusadil nfalang ja dijuku chakwel atwisha kulam mashakamin mau. Mulong dijuku ni diawiy dikukwachik, chikwikal cha manangu ni cha kalimish kudi ngatan kutesh chitonginay mukajend, kutal mutapu chikutwisha kumukwash kushiken ku mupak wa manangu, ni chikumuswapel niyend kumukwash. (Jinsw. 15:22) Angatan in Kristu ayilimishina akajau kakatap kutambul ching kusu rukat ni kalimish ka akajau pakwez, chipandakenamu usey, Yehova uyitiyijin.—Efes 5:28, 29.

Mutapu Ukumekeshay Mband Anch Umulimishin Nfumwend

8. Ov, mulong wak chifanyidinap kulondul chilakej cha Eve?

⁸ Yesu udi chilakej kudi angachik in Kristu cha kuziyil kuwanyidina ku ulabu. Kushalijan ik kwadinga piur pa mutapu wend wa kuman ulabu ni ngikadil yamekeshay ngachik wa kusambish! Eve wakanganya kuyishil angachik chilakej chiwamp cha kulondul. Wadinga ni ntakel wamutekinau kudi Nzamb ni kwawiy kwadingay ni kutambwil malejan ma Yehova. Pakwez, Eve kalimishap ulabu wa nfumwend. Chawiy chalikay kulondul umutakel wamwinkishau kudi Adam. (Dis. 2:16, 17; 3:3; 1 Kor. 11:3) Chakin, Eve amudimba, chikalap nchik mwamu wadinga ufanyidin bil kumwipul nfumwend piur pa mulong wa kutesh dizu diadinga ni kumulej anch: “Nzamb wij anch.” Pakwez, ndiy wakwata mupak wa kumutakel nfumwend.—Dis. 3:5, 6; 1 Tim. 2:14.

9. Chilakej ik cha kuziyil chashay Yesu?

⁹ Pakwez, Yesu, washa chilakej chiwamp cha kuziyil ku Mutu wend. Ngikadil yend ni mashakamin mend malejana anch ndiy “kichindilap kwikal wilikena nend Nzamb mudi chom cha kubwitan.” Pakwez, “wilika amwinend, watambula chifu cha kashalapol.” (Filip. 2:5-7) Ilel, uyikedil kal mudi Mwant, Yesu ulamin ngikadil yawiy yimwing. Uziyidil ni kwikepish kudiay Tatukwend mu yom yawonsu ni ukasikeshidin umutu Wend.—Mat. 20:23; Yoh. 5:30; 1 Kor. 15:28.

10. Mutapu ik ukutwishay ngachik kukasikesh umutu wa nfumwend?

¹⁰ Ngachik mwin Kristu ukusal nawamp anch wamwimburij Yesu kusutil ku kukasikeshin umutu wa nfumwend. (Tang 1 Pita 2:21; 3:1, 2.) Tushinshikinany mwikadil umwing mukutwishay kusal mwamu. Tulonda anch, mwanend usotil amwinkisha mbil ya kusal chom kanang chimwitina ching kutambul mbil ya anvaj. Anvaj adi kandikal isambina pa mulong winou, chikutwish chikal cha manangu ku mutambu wa maku amwipula bil anch: “Ov, wamulejang kal tatukwey?” Anch mwan kandikal amuleja, mband ufanyidin kwisambin pa mulong winou ni nfumwend kurutu kwa kukwat mupak kanang. Chikwau, mband mwin Kristu ukusot kwipuk kupwitijan ni nfumwend ap kutadik chitongijok chend kurutu kwa anau. Anch kitiyijinap yilondilay nfumwend piur pa chom kanang, chikwikal chiwamp kudi ndiy isamba ni nfumwend ku ujindj kwa ayinau.—Efes 6:4.

Yesu Udi Chilakej cha Anvaj

11. Yesu wayishila anvaj chilakej ik?

¹¹ Ap anch Yesu katanap ni kavalap an, udi chilakej chiwamp cha anvaj in Kristu. Mutapu ik? Ndiy wayileja nich rukat ni kushimpish muchim in kwilejend ku mazu ni ku chilakej. Wayileja mutapu wa kusal mudimu wayinkishay. (Luka 8:1) Mwikadil wa Yesu pantaliken nau in kwilejend wayileja mutapu ufanyidinau kwisadil umwing ni mukwau.—Tang Yohan 13:14-17.

12, 13. Chom ik chiswiridinau anvaj anch asotil kuyilil anau chakwel ikala in kumwov Nzamb wom?

¹² An akat kuyimburij anvajau, chikala mu yom yiwamp ap yiyimp. Chawiy lel, en anvaj, iyipulany anch: ‘Yom ik tuyilejina anetu piur pa chisu chitukata kusutish mu kutal televizion, mu kwipuwej, piur pa kwilej Bibil ni kusal mudimu wa kulejan? Yom ik yidia ya kusambish mu mwom wa dijuku dietu? Ov, tudi chilakej chiwamp anch twatek mwom wetu ni mipak yetu piur pa difukwil diakin?’ Chijil cha Nzamb chifanyidin kwikal mu michim ya anvaj anch asotil chakin kamu kuyilil anau mu wom wa Nzamb.—Kuv. 6:6.

¹³ Anch anvaj asal usu wa kusadil yijidik yidia mu Bibil mu milong ya pichuku pichuku, ni anau akuchiman. Mazu ma anvaj ni malejan mau makwikal nich usu. Pakwez, anch an aman anch akat kukarumok mu yilondilau ni kusal, akutwish atongin anch yijidik yidia mu Bibil kiyidiap ya usey ap ya kusadil nakash. Mudi chibudikin, an akutwish ikal nich chaku cha kuziy swa ku chipwichik cha mangand.

14, 15. Yom ik ya usey yifanyidinau anvaj kukudish mu anau, ni mwinjil ik yimwing mukutwishau kusal mwamu?

¹⁴ Anvaj in Kristu ij anch kumulil mwan kwitin yom yivud kupandakanamu kumwinkish ching yom ya ku mujimbu yiswirikedinay. Chawiy lel, chikutwish chikal usup nakash kumulej mwan kusot kulondul ching kusu jitong jikumuletina yom ya ku mujimbu. (Mul. 7:12) Yesu wayileja in kwilejend akimba bil yisakin ya muspiritu ni kuyitek pa ndond ya kusambish. (Mat. 6:33) Chawiy lel, mu kumwimburij Yesu, anvaj in Kristu afanyidin kand kusal usu wa kukudish mu anau impu ya kulondul jintong ja muspiritu.

¹⁵ Njil yimwing yikutwishau anvaj kusal mwamu yidi kusutil ku kusal usu wau chakwel anau ikal chisu ni chisu pamwing ni antu asadila mudimu wa chisu chawonsu. Tushinshikinany mutapu chikutwisha kuyikasikesh ansand chakwel ijikijana nau ayibol ap ni kalam wa munyingumuku ni mukajend. Kuyendil amishoner, in ku Bethel, ni antu asadila mudimu wa kutung pa mangand akutwisha kulond nich mazang piur pa musangar wa kumusadil Yehova. Pakad kwidjidjek, angendj inay akwet yom yamenau kal yisangareshina yikutwishau kutulej. Chilakej chau cha spiritu wa kwipan mu mudimu chikutwish kuyikwash nakash aney chakwel akwata mipak ya manangu, itekina jintong ja usey nakash, ni kuya ku shikol yifanyidina chakwel yeza yiyikwasha mu mudimu wa chisu chawonsu.

En An—Chom ik Chikukukwashanya Kulondul Chilakej cha Yesu?

16. Yesu wayilimisha mutapu ik anvajend a pa divu ni Tatukwend wa mwiur?

¹⁶ En an, niyen Yesu wakushilanya chilakej chiwamp. Yesu amulila kudiay Yosef nenday Mariy, ni wayiziyila. (Tang Luka 2:51.) Ndiy wadinga wij anch, chikalap nchik kuburen kwau kuwanyin, Nzamb ndiy wayinkisha chisend chinech cha kumulil. Pa chinech, awiy adinga afanyidin kuyilimish. (Kuv. 5:16; Mat. 15:4) Padingay ni kukul, Yesu wadinga ni kusal yom yadinga ni kumusangaresh Tatukwend wa mwiur. Charumburik anch kujijamen choziu. (Mat. 4:1-10) En ansand, pa yisu yimwing ukutwish wikalany mu choziu pa mulong wa kuyiziyil anvaj en. Ov, chom ik lel chikutwisha kukukwashany kulondul chilakej cha Yesu?

17, 18. (a) Ansand akat kura nich yipwichik ik ku shikol? (b) Kuvurik chom ik chikutwisha kuyikwash ansand kujijaman mu yoziu?

¹⁷ Chawiy chimwing, arund nen avud a ku shikol akwet kalimish kakemp piur pa yijidik yidia mu Bibil ap kakatap kuyilimish kwau. Akusot anch niyen wiyandjikany nau mu yisal yiyimp ni akutwish akuswingishany anch walikany kuyisal. Ov, arund ney a ku shikol akupidil kal majin mulong wa kulik kwey kwiyandjik nau mu yisal yimwing? Anch chidi mwamu, usadiling nchik? Wij kamu anch, ang wayilik akwovisha wom ni wayilondul mu yisal yau, ukez kuyinenganesh anvajey ni Yehova. Kwisu ku ukushikena anch wayilondul akwen a ku shikol? Pamwingap witekina kal jintong kanang, mudi kwikal chibol ap nkwash a mudimu, kusadil mu teritwar muswirikedinau in kulejan a Want, ap kusadil ku Bethel. Ov, urund wey ni akwen a ku shikol ukukukwash uwanyisha jintong jey?

¹⁸ Ov, en ansand udianya mu chikumangen cha Ukristu wikadilanyap kal mu mikadil yitekina ritiy ren mu choziu? Ov, usadilingany nchik? Tongijokinany pa chilakej chen, Yesu. Walika kuwil mu choziu ni wimana dang ku yadinga yijay anch yawiy yitentamina. Kuvurik chom chinech kukez kukukwashany ukapukany ni kuyilej akwen a ku shikol patok anch ukwinungap nau mu kusal chom chiwijany anch chidi chiyimp. Mudi Yesu, asinany pa ruchingej ra kwikal nich mwom usangareshina mu mudimu ni mu kumuziyil Yehova.—Heb. 12:2.

Chom cha Usey Mulong wa Mwom wa Musangar mu Dijuku

19. Mwikadil ik mu mwom uletininga musangar wakin?

¹⁹ Yehova Nzamb ni Yesu Kristu ayisotidin antu mashakamin mawamp. Ap mu mwikadil wetu unou wakad kuwanyin, chitwishikin kudi etu kwikal nich musangar mu chilik kanang. (Isay 48:17, 18; Mat. 5:3) Yesu walejana uyakin wa relijon weza kwikal mufulandal wa musangar wa muntu, pakwez kiyawiyap yom yawonsu kusu yayilejay in kwilejend. Yesu wayileja kand mutapu uwamp wa mashakamin. Kupandakanamu pa chinech, washa chilakej chiwamp cha mwom wisikena ni ngikadil yisikena. Etu awonsu, chikalap ndond yetu mu dijuku, tukutwish kutaninamu mu kulondul chilakej chend. Chawiy lel, angatan, angachik, anvaj, ni an kumwing, londulany chilakej cha Yesu! Kwitiyij malejan ma Yesu ni kwimburij chilakej chend chawiy chom cha usey chakwel kwikal nich mwom wa musangar ni mazang mu dijuku.

Ov, Ukwakul Nchik?

• Mutapu ik ufanyidinau angatan kusadil ulabu wau wayinkishau kudiay Nzamb?

• Ngachik ukwimburij nchik chilakej cha Yesu?

• Chom ik chikutwishau anvaj kwilejin ku mutapu wadingay Yesu ni kuyisadil in kwilejend?

• Chom ik chikutwishau ansand kwilejin ku chilakej cha Yesu?

[Chipich chidia pa paj wa 13]

Chom ik chikusalay ngatan mwin rukat kurutu kwa kukwat mupak ukwikala nich usu pa dijuku?

[Chipich chidia pa paj wa 14]

Mwikadil ik ukutwisha kumwinkish ngachik mutapu wa kukasikeshin umutu wa nfumwend?

[Chipich chidia pa paj wa 15]

An akat kwimburij yaku yiwamp ya anvajau