Ukat Kusanger Yom Yisadinay Yehova Mulong Wa Kukukol?

“Kuyuk kwikala kudi Mwant, Nzamb wa Isarel, mulong ndiy wayital kal antwend ni kuyikol.”—LUKA 1:68.

1, 2. Mutapu ik tukutwisha kufanikesh mwikadil wetu wa katat, ni yipul ik tukwisambina?

TONGIN anch ulel mu ulal mu rupital. Udi mu kapalikany mudia antu ayedila mayej mudi meyey, mayej majipena nakash pakwez kwikil mon wa kukwok nich. Piukutesha anch dokiter usadil usu ukash chakwel atana mon wa kwokan nich, ukwikal ni ruchingej. Chisu ni chisu ukusot kutesh jinsangu anch washiken kal pisu. Dichuku dimwing, watesh anch atan kal mon! Dokiter wavumbwila mon wipanin nakash chakwel mon winou wikalaku. Ukovu nchik? Chakin, muchim wey ukwizul too kalimish ni kumujikitish ikundj winou watanina mon mulong weyey ni mulong wa kuyipandish antu avud ku rufu.

² Mwikadil winou ukutwish wamekan mudi kulond kwa kupandakesh, pakwez ulejen patok uman wakin uturishina nich etwawonsu. Muntu ni muntu udia mukach mwetu udi mu mwikadil ukash kupandakanamu win twisambina kal ou. Tuswiridin nakash mutapu wa kupand. (Tang Rome 7:24.) Yehova wipana nakash, mulong wa kutukol. Mwanend niyend wipana nakash. El tushinshikinany katat yipul yijim yinying. Mulong wak tuswiridina kutukol? Chom ik chasalay Yesu mulong wa kutukol? Chamwita Yehova asala ik? Ni mutapu ik tukutwisha kumekesh anch tusangaredin kutukol kudiay Nzamb?

Mulong wak Tuswiridina Kutukol?

3. Mutapu ik tukutwisha kwilikej chitil ni chipupu?

³ Kukwatijan nich mutapu ulondilau wa katat, chimwing cha yipupu ya mayej cha mu rusangu ra muntu chadinga musongu wa mashik ma mu Espagne wasambisha mu muvu 1918, ni wajipa makum ma miliyon ma antu. Kudi mayej makwau majipena nakash mu jinjil jikwau. Ap anch makutwish mayikwat antu akemp, makutwish mayikwat ni kuyijip yitot ya antu.a Pakwez, tukutwish twalond nchik anch twilikej chitil ni chipupu mudi chinech? Vurikany mazu madia mu Rome 5:12 malondila anch: “Chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.” Chitil chamusamburikina muntu win mwawonsu, chawiy antu awonsu asadiling yitil. (Tang Rome 3:23.) Rufu radiokala ku chom ik? Paul wafunda anch chitil chayiletina “antu awonsu” rufu.

4. Yisu yitongijok ya Yehova piur pa kulep kwa mwom wetu, ni chitongijok chend chishalijadin nchik ni cha antu avud nlel?

⁴ Antu amwing amening anch chitil ni rufu yidi kwau chilik chimwing. Iyakamishining ching pa rufu ra rinkanku, ni akat kuvuramen ‘chitangil’ chetu chiletina rufu chikata kuyiziyish antu mu kusut kwa mivu. Chikat kuyiswapel kuvuramen yom yashilayimu Sakatang. Mivu ya mwom wetu yikadil kal yikemp nakash kupandakanamu mwatonginay kwisambishil. Chakin, kwikil muntu wasadilap kal ap “dichuku dimwing” ku mes kwa Yehova. (2 Pita 3:8) Chawiy chilondila Dizu dia Nzamb anch mwom wetu udi wiswimp nakash mudi wa masuku ap kusu mudi mwiku. (Kus. 39:5; 1 Pita 1:24) Tufanyidin tuchilama chom chinech mu michim yetu. Mulong wak? Mulong anch twaman ukash wa “mayej” matukwatina, tukutwish twasanger nakash usey wa “mon”—kukolik kwetu.

5. Chitil chikwet chibudikin ik padi umwing ni umwing wetu?

⁵ Chakwel anch tutesha nawamp kuswej kukash kwa chitil ni yibudikin yach, tufanyidin tusala usu wa kutesh chichikata kutusal. Chom chinech chikutwish chikal chikash kwisambishil mulong tuburedin chom kanang mulong wa chitil chakad etu kal kwikal nich. Kwisambishil Adam ni Eve adinga ni mwom uwanyidina. Chadingau awanyidina mu manangu ni ku mujimbu, ela kutwish kuyikel yitongijok yau, yovil yau ni yisal yau. Ni adinga nich want ipau wa kupam mudi atushalapol a Yehova Nzamb, ni kukudish ngikadil yamushena yadingau nich. Pakwez, adjibwila kwa chipan chinech. Patondau kusal chitil ni kumutaliken Yehova, ishadishina ayinau ni anau mulad wa mwom wayitenchikinau kudiay Yehova. (Dis. 3:16-19) Pa chisu chawiy chimwing, akwachika, niyetu kumwing “mayej” mayimp nakash mitwisambinang. Yehova wayifisha nich pinipa kamu. Pakwez, watwinkisha etu ruchingej ra kutukol.—Kus. 103:10.

Chom Chasalay Yesu Mulong wa Kukolik Kwetu

6, 7. (a) Mutapu ik wamekeshay Yehova anch kukolik kwetu kwitin chom chikash? (b) Chom ik tukutwisha kwilejin kusutil ku milambu yapanay Abel ni kudiau ashankur adingaku kurutu kwa Chijil?

⁶ Yehova wadinga wij anch chikumwit chom chikash mulong wa kuyikol an a Adam ni Eve. Twilejin mu uprofet udia mu Disambishil 3:15 chom chadinga chifanyidina kusal mulong wa kutukol. Yehova wadinga ufanyidin kulet “mbut,” mupandish, ukeza pa dichuku dimwing kumushesh Satan, ukumupuchol ni kakez kwikalap kand. Pakwez, mupandish winou ukez niyend kumanaku mar, akez kumusum ku kapolantundu mu mutapu wa chifanikesh. Chom chinech chadinga chifanyidin kulet kuswan ni ulim, pakwez chirumburikin ik? Mulong wak Yehova wela Kumutond Muntu wadinga ufanyidina kujijamen?

⁷ Chakwel kuyikol antu mu chitil, mupandish wadinga ufanyidin kulet cha kuchakwish nich, mutapu wa kusal anch antu ovujana kand ni Nzamb nich kupwish yibudikin yawonsu ya chitil. Chom chinech chikwit chom ik? Kwadinga yijingidij yadinga yimekeshina anch kwitin mulambu wa kupan. Pa chisu chalambulay Abel muntu wa kusambish wadinga ushinshamena, milambu ya annam kudiay Yehova, amwitiyija kudi Nzamb. Kupwa, ashankur inay adinga ni kumwov Nzamb wom mudi Nowa, Abraham, Yakob ni Yob niyawiy alambula milambu ya chilik chimwing ni yamusangaresha Nzamb. (Dis. 4:4; 8:20, 21; 22:13; 31:54; Yob 1:5) Pa kusut kwa yitot ya mivu, Chijil cha Moses chakasikeshina nakash mulong winou wa milambu.

8. Chom ik chadingay ni kusal mwin kupesh wa pa mutu pa muvu pa Dichuku dia Kuchakwish?

⁸ Pa milambu ya usey ujim yadinga yitinau mu Chijil yidi yin yadingau ni kulambul pa muvu pa Dichuku dia Kuchakwish. Pa dichuku dined, mwin kupesh wa pa mutu wadinga ni kusal yisal kanang yadinga ya yijingidij. Wadinga ni kumulambul Yehova milambu ya kuchakwish nich yitil—ya kusambish yadinga mulong wa chisak cha in kupesh, ni kupwa mulong wa tubil tukwau twakad kwikal twa in kupesh. Mwin kupesh wa pa mutu wandama mwi Ndond Yipandikena Kutumb mu dizang ap mu tempel, mwadingay ni kwandam ching dichuku dimwing pa muvu. Mwawiy mwadingay ni kwichil mash ma annam adingau ni kulambul kurutu kwa mushet wa manswik. Piur pa mushet winou utumbila, padinga ni kumekan didj dia chimunyik, mulong wa kumekesh kwikalaku kwa Yehova Nzamb.—Kub. 25:22; Lev. 16:1-30.

9. (a) Pa Dichuku dia Kuchakwish, mwin kupesh wa pa mutu wadinga umufanikeshin nany, ni milambu yadingay ni kulambul yafanikesha chom ik? (b) Kwandam kwa mwin kupesh wa pa mutu mwi Ndond Yipandakena Kutumb kwadinga kufanikeshin chom ik?

⁹ Kambuy Paul amupepila chakwel ajingunisha kurumburik kwa yisal yiney ya chijingidij. Ndiy wamekesha anch mwin kupesh wa pa mutu wadinga umufanikeshin Mesia, Yesu Kristu, oku milambu yadingau ni kulambul yafanikesha rufu ra kwilambul kwa Kristu. (Heb. 9:11-14) Mulambu winou uwanyidina ukez kusal kwikala kuchakwish pakach pa yisak yaad ya antu—chisak cha in kupesh 144000 azizidilau many, akadivar nend Kristu ni “amikoku akwau.” (Yoh. 10:16) Padingay ni kwandam mwin kupesh wa pa mutu mwi Ndond Yipandakena Kutumb, ndiy wadinga ufanikeshin mutapu ukezay Yesu kwandam mwiur mulong wa kumekesh kurutu kwa Yehova Nzamb usey wa mulambu wa difut.—Heb. 9:24, 25.

10. Uprofet udia mu Bibil walejana anch chom ik chikezay kuman Mesia?

¹⁰ Chakin, kwadinga kwitin chom cha usey ujim mulong wa kuyikol an a Adam ni Eve. Mesia wadinga ufanyidin kulambul mwom wend! Aprofet afunda Mifund ya Hebereu isambina uyakin winou mu mutapu usangareshina. Chilakej, muprofet Daniel walonda patok anch: “Uzizidilau Many, ndiy Mwin kutakel” akez “kumujip,” chakwel ‘eza ayilikishina yitil.’ (Dan. 9:24-26) Isay wabwaka anch Mesia akez kumulik, akez kumumesh mar ni akez kumujip, ap anch kumupamp murumbu ni ukez kusend yitil ya antu akad kuwanyin.—Isay 53:4, 5, 7.

11. Mu jinjil ik jamekeshay Mwan a Yehova anch usotil ipana amwinend mulong wa kutukol?

¹¹ Kurutu eza panap pansh, Mwan kapokal wa Nzamb wadinga wij chom chifanyidinay kusal mulong wa kukolik kwetu. Ndiy wadinga ufanyidin kuman mar makash ni kupwa kumujip. Pa chisu chamulejau uyakin winou kudiay Tatukwend, ov, ndiy wachirika panyim ap watombuka? Pakwez, ndiy waziyila ku malejan ma Tatukwend. (Isay 50:4-6) Chawiy chimwing, padingay panap pansh, Yesu wasala nich kuziyil rusot ra Tatukwend. Mulong wak? Ndiy wakula mu mazu manam: “Nimukatil Tatuku.” Waleta kand chakul chikwau mu mazu manam anch: “Kwikil muntu ukweta rukat rujim rupandaken riner, ra kuladik kupand kwend mulong wa arund nend.” (Yoh. 14:31; 15:13) Chawiy lel, kukolik kwetu kwengamidin, nakash nakash, pa rukat ra Mwan a Yehova. Ap anch chamwita apana mwom wend wa chiuntu uwanyidina, ndiy wasangara nakash kusal mwamu mulong wa kutukol.

Kukolik Kwetu Kwamwita Yehova Chom Chijim

12. Mulambu wa difut wadinga chijingidij cha rusot ra nany, ni mulong wak wautenchika?

¹² Kadiap Yesu Watenchika mulambu wa difut. Pakwez, ditenchik dined dia kutukol diadinga chom cha chijim mu rusot ra Yehova. Kambuy Paul walonda anch, chintamb chadinga mu tempel, padingau ni kulambwil milambu, chadinga chifanikeshin rusot ra Yehova. (Heb. 10:10) Chawiy komb, kukolik kutukodilau kusutil ku mulambu wa Kristu chidi chom chidiokila bil kudiay Yehova. (Luka 1:68) Chidi chijingidij cha rusot rend riwanyidina ni cha rukat rend rijim mulong wa antu.—Tang Yohan 3:16.

13, 14. Chilakej cha Abraham chitukwashin mutapu ik chakwel tutesha yom yasalay Yehova mulong wetwetu?

¹³ Chamwita Yehova asala chom mulong wa kumekesh rukat rend mwinjil yiney? Chitukasikedin etu kuchitongin. Pakwez, kudi rusangu rimwing ridia mu Bibil rikutwisha kutukwash tuutesha nawamp mulong winou. Yehova wamwita Abraham, ikundj mwin kushinshaman chakwel asala chom chimwing chadinga chikash nakash ku mutambu wend—amupesha mwanend Isak mudi chakupesh. Ijikany anch, Abraham wadinga tatuku mwin rukat. Yehova wamwela piur pa Isak anch: “Mwaney ikundj kapokal ukatila.” (Dis. 22:2) Pakwez, Abraham wamana anch kusal rusot ra Yehova kwadinga kwa usey nakash kupandakanamu rukat rend mulong wa Isak. Abraham witiyija ni waziyila. Pakwez, Yehova kamulikap Abraham asala chom chamwitay kusal. Nzamb wamutuma mwangel chakwel amulikisha Abraham kurutu kwa kumupesh mwanend. Abraham wadinga wakwata kal mupak wa kumuziyil Nzamb wend mu choziu chinech chikash chawiy chiyovay anch ruchingej rend rimwing kusu ra kumuman kand nsand wikal mwom kakwau radinga ching kusutil kusu ku disanguk. Pakwez wadinga umwitiyijin chakin kamu Nzamb anch ndiy ukeza kumusangul. Chakin, Paul walonda anch Abraham wamutambula kand Isak kusutil ku disanguk mu “chijingidij.”—Heb. 11:19.

¹⁴ Ukutwish watongin kuswan kwovay Abraham pa chisu chadingay ni kwirijek mulong wa kumupesh mwanend? Mu kulond kukwau, chom chovay Abraham chitukwashin tutesha chom chovay Yehova pamupeshay muntu watazukay anch: “Mwanam ukatishena.” (Mat. 3:17) Pakwez, vurikany anch kuswan kwovay Yehova kwadinga kukash nakash. Ndiy ni Mwanend asangera kwikal pamwing mu mamiliyon ma mivu, pamwing ap asala tutikit twa mivu. Mwan wasala nich musangar pamwing ni Tatukwend mudi “mwant wa mudimu” ni mudi Katum wend, ‘Dizu.’ (Jinsw. 8:22, 30, 31; Yoh. 1:1) Yehova wajijamedina chom ik pa chisu chamumeshau mar, chamuzengolau ni pamujipau Mwanend mudi muntu mwin kusal yom yiyimp mu chilik chimwing chitwakada kutwish kutesh. Kukolik kwetu kwamwita Yehova chom cha usey ujim! Mutapu ik kand tukutwisha kumekesh anch tukumen kukolik kwinoku nich usey?

Mutapu ik Ukumekesha Anch Usangaredin Kukolik?

15. Mutapu ik wawanyishay Yesu mudimu ujim wa kuchakwish, ni watwishisha chom ik?

¹⁵ Yesu wawanyisha mudimu ujim wa kuchakwish pa chisu chavumbakay ni kuya mwiur. Pachirikay kudiay Tatukwend mukatish, Wamwinkisha usey wa mulambu wend. Kwikala yiyukish yijim. Kulikish kwin kamu kwawonsu kwatwishika, cha kusambish mulong wa yitil ya akadivar azizidilau many enday Kristu, kupwa ni mulong wa yitil “ya mangand mawonsu.” Mulong wa mulambu winou, antu awonsu akarumukina chakin kamu nlel kudiokal ku yitil yau ni kwikal in kwilej akin a Kristu akutwish ikal nich mwikadil udia zwang ku mes kwa Yehova Nzamb. (1 Yoh. 2:2) Mutapu ik usadila ku mutambu wey?

16. Mutapu ik tukutwisha kulet chilakej chilejena mutapu utufanyidina kusanger kukolik kwasalay Yehova anch kutwishika mulong wetwetu?

¹⁶ El tuchirikinany kand chilakej chidia kwisambishil. Tulonda anch dokiter wavumbwila mon wa kwokan nich musongu winou weza kudiau ayej adia piswimp ney mulong wa kuyiletin mon winou ni kulond anch: Muyej win mwawonsu ukwitiyija anch amwoka ni walimish yijidik yimujidikinau piur pa yakudia ukulank. Chikwikal nchik anch akwen ayej avud alik kwau kulondul yiyul ya dokiter, anch chikuyikasiken nakash kuna mon winou ni kulam yijidik yikuyijidikau piur pa yakudia? Ov, niyey ukusal mudi awiy, ap anch ey witiyijin kwey anch mon winou udi uwamp? Chakin kamu, bwat! Chakin ukumekesh kujikitish mulong wa mon winou ni ukulondul nawamp yijidik ya dokiter ni ukutwish pamwingap wayilej akwen mupak wey. Mu kurumburik kujim, umwing ni umwing wetu ufanyidin kumulej Yehova chilik chitusangaredina kukolik kwasalay anch kutwishika kusutil ku mulambu wa difut wa Mwanend.—Tang Rome 6:17, 18.

17. Mu jinjil ik ukutwisha kumekeshin kusanger kwey mulong wa yom yasalay Yehova mulong wa kukukol?

¹⁷ Anch twasanger yom yasalay Yehova ni Mwanend mulong wa kutukol kudiokal ku chitil ni ku rufu, tukez kukumekesh kamu. (1 Yoh. 5:3) Tukura nich tutaku chivadik chetu cha kusot kusal yitil. Tukusotap kuwil nich kwisotil mu yisal ya yitil ni kwikal nich mwom wa mwend kwimpat mwend mu mem. Kwikal nich mwom wa mutapu winou kurumburikin anch tusangaredinap usey wa difut ap pakemp. Pakwez, tukumekesh musangar wetu anch twasal usu wa kushal ishitwila ku mes kwa Nzamb. (2 Pita 3:14) Tukukumekeshin kusutil ku kuyilej akwetu ruchingej retu ra kukolik, chakwel anch niyau ikala nich mwikadil wishitwila ku mes kwa Yehova ni achingejina machuku ma kurutu ma chikupu. (1 Tim. 4:16) Chakin, Yehova ni Mwanend afanyidin kamu chisu ni usu ap ukemp utukutwisha kusadil mulong wa kuyishiman! (Marko 12:28-30) Tongin bil! Tukutwish twachingejin chisu chikezau kutwok ku chitil rawonsu. Tukez kwikal nich mwom watonginay Nzamb anch twikala nich, uwanyidina, wa chikupu—yawonsu yiney mulong wa yom yasalay Yehova mulong wa kutukol!—Rome 8:21.

Mutapu ik Ukwakula?

• Mulong wak uswirikedina nakash kukolik?

• Chisal cha Yesu cha kwipan amwinend chikwet usu ik padi ey?

• Wiyovil nchik piur pa chipan cha difut dia Yehova?

• Akukasikeshin usala chom ik mulong wa yitenchik yasalay Yehova mulong wa kukukol?

[Mazu madia kwishin kwa paj]

[Chipich chidia pa paj wa 30]

Pa Dichuku dia Kuchakwish, mwin kupesh wa pa muntu wa Isarel wikala chifanikesh cha Mesia

[Chipich chidia pa paj wa 31]

Kusot kwa Abraham kumupan mwanend kutulejin etu yom yivud piur pa mulambu ujim wapanay Yehova