Usey Upandakena Wa Malejan Ma Nzamb

“Chakin, nikat kuchind yom yawonsu anch yamwamu, mulong wa kumwijik Yesu Kristu Nsalejam kwapandikan yawonsu kuwap.” —FILIP. 3:8.

1, 2. Kutond ik kwatondinau kal in Kristu amwing ni mulong wak?

ROBERT wadinga mwin manangu ku shikol, kudiosh kamu ku wanikanch wend. Pikalay ni mivu chinan, umwing wa alej end waya kwolikwau ni wamuleja anch kwikil musul ku yom yikutwisha kusal. Wamuleja anch ndiy wadinga uchingejidin anch dichuku dimwing ukutwish wikal dokiter. Wapwisha shikol ya sekonder mutapu umwing uwamp nakash ni chadinga chimuswapedil kuya ku universite wa ntumb nakash udinga mwi ngand yau. Pakwez Robert watonda kuvuramen chitonginingau antu avud anch kudi kuyuk kwa kapamp kamwing mu mwom chakwel adandamena nich rutong rend ra kusal mudimu wa uchibol.

² Mudi Robert, in Kristu avud—ansand ni amapal—adinga nich mutapu wa kuya kurutu mu ditenchik dined dia yom. Amwing au atonda kulik kusadil muchifanyidina yom yiney chakwel atwisha kulondul jintong ja muspiritu. (1 Kor. 7:29-31) Chom ik chikata kuyibachik in Kristu adia mudi Robert chakwel ipana ayinau mu mudimu wa kulejan? Kuwejin pa kumukat kwau Yehova, mulong diawiy diyingishin dia kusambish, akat kusanger nakash usey upandakena wa malejan ma Nzamb. Ov, washinshikidin kal muwela kwikal mwom wey anch kiwashikenap ku kwijik ronganyin rakin? Kutongijok pa yiyukish yimwing yijim yiusangaredina mudi chibudikin cha kumulikin Yehova ndond chakwel atuleja, kukutukwash tulama kusanger kwetu rusangu ruwamp ni chakwel twikala in mushiku mu kurilejan kudia antu akwau.

Itapidil Dilau dia Kuyilej Kudi Nzamb

3. Mulong wak tufanyidina kwikal nich kashinsh anch Yehova usotil kuyilej antu akad kuwanyin?

³ Yehova usotin ayileja antu akad kuwanyin, mu kuwap kwa muchim wend. Pisambidinay piur pa in Kristu azizidilau many mu uprofet wend, Isay 54:13 ulondil anch: “Am amwinam nikez kayilej antwey, nikez kayinkish kuzangijal ni chisambu.” Mazu minam amasadidin kand mulogn wa “amikoku akwau” a Kristu. (Yoh. 10:16) Chom chinech choviken patok mulong uprofet winou uwanyidin mu machuku metu manam. Isay wamana mu chishimushimu antu adiokila ku michid yawonsu ez ku difukwil diakin. Ndiy urumburil mudi anch antu inay akat kutazukijan anch: “Ezany tukandamany pa mukandu wa [Yehova, NW] ku Chikumbu cha [Yehova, NW], ndiy kamu Nzamb wa in Isarel. Ndiy ukutulej rusot rend, chad etu tukez kendil mu jinjil jatonday ndiy.” (Isay 2:1-3) Kudi kwitapil dilau mudi ik kwikal alejinau kudiay Nzamb!

4. Yehova uyitin antu alejinay yom ik?

⁴ Mutapu ik tukutwisha kuwanyish yitinau chakwel tutambula malejan ma Nzamb? Chom cha kusambish chijim chitinau chidi anch muntu ikal mwin kwikepish ni witiyijina kumulej. David mwin kufund kuseng wafunda anch: “[Yehova, NW] udi muwamp, utentamin salal! . . . [U]kuyilej itudishila njil yend.” (Kus. 25:8, 9) Yesu niyend walonda anch: “Nakujikitish ey, A Tatuku, Mwant wa diur ni divu, piwajindjika yom yiney kudiau ababela ni in manangu, wayimekesha kudi anikanch.” (Luka 10:21) Wiyovilap mudi akukakidin piswimp ni Nzamb ukata “kumwanaken mwin kwitudish”?—1 Pita 5:5.

5. Chitwishikin mutapu ik ku mutambu wetu tushikena ku kumwijik Nzamb?

⁵ Chitudia atushalapol a Yehova, tukutwish twalond anch twatanina uyakin ku usu wetu ayinetu? Bwat. Chakin kamu, anch chikala mulong wetu ayinetu, ing kitutwishinap kushiken ku kumwijik Nzamb. Yesu walonda anch: “Pikil muntu ukutwisha kwiyezil kudi am, ching Tatuku wantuma am wamukak.” (Yoh. 6:44) Kusutil ku mudimu wa kulejan ni kusutil ku mwiku utumbila, Yehova ukat kwikakin amwinend antu adia mudi amikoku, “mapit makatishena ma in michid.” (Hag. 2:7, NW) Kiusangerap pa kwikal umwing wa antu akakinay Yehova chakwel ikal piswimp ni Mwanend?—Tang Yeremiy 9:23, 24.

Usu Ukata Kukarumun Mwom

6. Kwilej “ronganyin ra [Yehova, NW]” kukwet chibudikin ik pa antu?

⁶ Uprofet wa Isay usadidil mazu mawamp nakash ma chifanikesh, mulong wa kurumburil kukarumuk kwa untu wa antu kusadikina mu chirung chetu chinech. Antu adinga pasak in chisum ikadil kal in chisambu. (Tang Isay 11:6-9.) Antu adinga pa yisu yimwing akankuny mulong wa kushalijan kwa ulombu wa chikit, ngand, tubil ap mulong wa yaku ya ashankur au ilejin kal mutapu wa kushakam pamwing mu uumwing. Mu kulond kwa chifanikesh, awiy ‘achidil kal mpak jau ja musamun kwikal jinkasu.’ (Isay 2:4) Mulong wak ukarumukinau mu mutapu winou? Chidi mulong antu ilejin kal “ronganyin ra [Yehova, NW]” ni akat kurisadil mu mwom wau. Ap anch atushalapol a Nzamb adi akayitil, pakwez asadil ukadivar wakinakin pa mangand mawonsu. Rusangu ruwamp arisangaredin mu mangand mawonsu ni risongin dibuj diwamp diletina uman wa usey ukash wa malejan ma Nzamb.—Mat. 11:19.

7, 8. (a) Malejan ma Nzamb mayikwashin antu kuumbul yom yik yimwing yidia mudi “mpwembu jikash”? (b) Yom ik yilejena anch malejan ma Nzamb makat kumushiman Yehova?

⁷ Kambuy Paul wafanikesha mudimu wa kulejan wa atushalapol a Nzamb ni njit ja muspiritu. Ndiy wafunda anch: “Yom yetu ya kurish nich kiyidip ya mangand, pakwez yidi ya dikand dia Nzamb ya kubumon nich mpwembu jikash. Tukat kuumbol jintad, ni chom chawonsu chizambwilau chipompatijadina ni ronganyin ra Nzamb.” (2 Kor. 10:4, 5) Yom ik yimwing yidia “mpwembu jikash” kukatau kuyikol antu nich malejan ma Nzamb? Tukutwish twajimbul mudi, kulim kwa malejan ma makasu, yaku ya ashankur ni mafilozofi ma antu. (Kol. 2:8) Malejan ma Nzamb mayikwashin antu chakwel apandakana yisal yiyimp ni akudisha ngikadil ya Nzamb. (1 Kor. 6:9-11) Makat kuwapish mwom wa mu dijuku. Ni makat kuyinkish antu akad ruchingej, ruchingej ra mwom. Mawiy malejan ma mutapu winou mituswirikedina nlel.

⁸ Ngikadil yimwing yiyikwashinau antu kudiay Yehova chakwel ayikudisha yidi ukinakin, mudi mulejena yom yiney yamanau. (Heb. 13:18) Mband umwing wa mu Inde witiyija kwilej Bibil ni mu kusut kwa chisu wawanyisha yitinau chakwel ikala mwin kulejan wakad kubabatishiu. Dichuku dimwing padingay uchirikin kwolikwend kudiokal kwadinga kutunginau Chot cha Want, wamana pansh piswimp ni ndond yikata kwimanang motak usang wa or wa usey wa madolar yitot chinan. Ap anch ndiy wadinga kazwendj, wautwala usang winou ku biro wa ampurish ni wausha kwinikwa. Mukurump wa ampurish wadingaku, washimoka nakash! Pa kusut kwa chisu mukurump mukwau wa ampurish wamwipula anch: “Mulong wak watonga kuulet usang winou?” Ndiy wamwakula anch: “Malejan ma Bibil mankarumwin kal, chawiy nikadil kal katat muntu wakin.” Washimoka ni wamuleja mukurump mwin Kristu weza kumulet mband winou ku biro wa ampurish anch: “Mwingand yiney mudi antu mamiliyon 38 ni kusut. Anch watwish kuyikwash antu dikum, ikala mudi mband winou, ukusal mudimu ujim upandakena.” Anch twayitongin mamiliyon ma antu akarumukina mulong wa malejan ma Nzamb, ov, kitukwetap mayingishin mavud ma kumushiman nich Yehova?

9. Mutapu ik ukutwishau antu kukarumuk mu mwom yau?

⁹ Usu wa Dizu dia Nzamb wa kukarumun, pamwing ni ukwash uletinay Yehova kusutil ku mwiku wend utumbila, ukat kuyitwishish antu akarumuka nakash mu mwom wau. (Rome 12:2; Gal. 5:22, 23) Kolosay 3:10 ulondil anch mudjalany “muntu musu, ufanakena ku ronganyin, ukweta chifu chendendiy wamutanga.” Uruu udia mu Dizu dia Nzamb, Bibil, ukwet usu wa kujingunish chidiay muntu mu muchim wend, ni ukutwish wakarumun yitongijok ni mutapu utonginay piur pa yom. (Tang Hebereu 4:12.) Kusutil ku kwikal nich ronganyin ra Mifund ni kwambatanish mwom wend nich yijidik yitentamina ya Yehova, muntu ukutwish wikal murund wa Nzamb, ni ukwikal nich kand ruchingej ra mwom wa chikupu.

Twitenchikany Mulong wa Machuku ma Kurutu

10. (a) Mulong wak ching Yehova kusu ndiy ukutwisha kututenchik mulong wa machuku ma kurutu? (b) Yikarumuk ik yikash yikusadika pa divu diawonsu?

¹⁰ Ching Yehova kusu ndiy ukutwisha kutukwash chakwel twitenchika mulong wa machuku ma kurutu mulong ndiy wij yidia kurutu. Ndiy ulondil chikeza kwikal machuku ma kurutu ma muchid wa muntu. (Isay 46:9, 10) Uprofet udia mu Bibil ulejen anch: “Dichuku Dijim dia [Yehova, NW] didi piswimp.” (Sof. 1:14) Mazu manam madia mu Jinswir 11:4 malondila anch: “Pa dichiku dia ujim wa [Yehova, NW], dipit dikez kakwaship, pakwez kutentam kukez kadiosh rufu,” makez kwikal makin Pa mulong wa dichuku dined. Pichikeza kuwanyin chisu chikezay Yehova kurumburish mangand ma Satan, chom chikeza kwikal cha usey chidi mwikadil wetu ku mes ma Nzamb. Nfalang jikez kwikal ja chamwamu. Chakin, Ezekiel 7:19 ulondil anch: “Akez kudjibul utad wau wa or, ni wa argent mu mikombil mudi yishoshot.” Kusambel kwijik kwinoku yom yikeza kusadik kurutu kukutwish kwatukwash tusala yom ni manangu.

11. Malejan ma Nzamb matukwashining mwinjil ik chakwel twitenchika mulong wa machuku ma kurutu?

¹¹ Malejan ma Nzamb makat kututenchik mulong wa dijuku dia Yehova diezinaku mwi njil yimwing ya kutukwash twitekina bil yom ya usey. Kambuy Paul wamufundina Timote anch: “Yishinshika ampich a mangand minam chakwel awiy kangal itonga nakash piur, ap kutek ruchingej rau pa mapit mindjing, ching mwi Nzamb.” Ap anch kitukwetap nfalang, tukutwish niyetu twataninamu mu chiyul chinech chapepilay Nzamb. Chirumburikin ik? Pa ndond pa kwikumangejin mapit ma ku mujimbu, tufanyidin tusala usu wa chakwel ‘tusala nawamp’ ni twikala “ampich mu midimu yiwamp.” Kusutil ku kutek pa ndond ya kusambish mu mwom wetu milong ya muspiritu, chawiy ‘tukat kwitekin ayinetu manguj mawamp mulong wa muten ukeza kez.’ (1 Tim. 6:17-19) Kwipan kwa mutapu winou kuding uman wa manangu, mulong Yesu walonda anch: “Usey wa muntu udi kwisu anch ndiy wisak ngand ya kabuj, wajimbareshiluku kupand kwend?” (Mat. 16:26, 27) Pa kuman kwez swa-swa kwa dichuku dia Yehova, muntu ni muntu wetu udia pinap ukusal nawamp iyipula amwinend anch: ‘Kwisu nikumangejidina mapit mam? Ov, nikat kumusadil Nzamb bil anch Mapit?’—Mat. 6:19, 20, 24.

12. Mulong wak kitufanyidinap kuziy anch kudi antu amwing apipeshina mudimu wetu?

¹² Mudimu upandakenamu mu “midimu yiwamp” yisambidinau mu Dizu dia Nzamb mulong wa in Kristu udi mudimu wa kulejan Want mulong wa kupandish mwom ni kuyikadish in kwilej. (Mat. 24:14; 28:19, 20) Mudi muchadinga mu mivu chitot ya kusambish, antu amwing akutwish apipesh mudimu wetu. (Tang 1 Korint 1:18-21.) Pakwez chom chinech chikepishinap usey wa uruu wetu, ni chikepishinap mitapu yikwetay muntu ni muntu mulong wa kuwitiyij pikuchidia chisu ap. (Rome 10:13, 14) Pituyikwashina antu akwau ni malejan ma Nzamb, twitekin ayinetu mu mulong wa antu akutambula yiyukish yivud.

Ayukin Mulong wa Kwipan Kwau

13. Kwipan kwa mutapu ik kwasalay kambuy Paul mulong wa rusangu ruwamp?

¹³ Kurutu ikal mwin Kristu, kambuy Paul amufumba chakwel apandakana mu ditenchik dia yom dia Ayuda. Padingay ni mivu piswimp 13, wadiokala mu ul wau wa chivadik Tarsus ni waya ku Yerusalem chakwel akamufumba kudiay Gamaliel mulej mujim wa Chijil. (Mid. 22:3) Pa kusut kwa chisu, Paul wayipandakana akwau a mu chirung chend, ni wadandamena mwinjil yiney, chimeken anch amuteka pa ndond yijim mu relijon wa Ayuda. (Gal. 1:13, 14) Pitiyijay rusangu ruwamp ni pasambishay mudimu wa kulejan, wayilika yom yiney yawonsu. Ov, Paul winana mulong wa chom chinech chasalay? Bwat. Chakin, ndiy wafunda anch: “Nikat kuchind yom yawonsu anch yamwamu, mulong wa kumwijik Yesu Kristu Nsalejam kwapandikan yawonsu kuwap. Nasheshil kal yom yawonsu mulong wendendiy, nikat kuyichind mudi chom chamwamu.”—Filip. 3:8.

14, 15. Yiyukish ik tutanidinamu mudi “in mudimu nend Nzamb”?

¹⁴ Mudi Paul, nlel in Kristu akat kwipan mulong wa rusangu ruwamp. (Marko 10:29, 30) Kudi chom tuburedina mulong wa kwipan kwetu? Robert, wisambidinau kwisambishil, ulejen yovilingau antu avud palondinay anch: “Kinikwetap cha kwinan pa chom ap chimwing. Mudimu wa chisu chawonsu winletidin musangar ni mazang, wantwishishin ‘nimupaka Yehova chakwel nimana kuwap kwend.’ Ap anch naburena mapit ma ku mujimbu mulong wa kulondul jintong jam ja muspiritu, Yehova wadinga ni kwiyukish chisu chawonsu nich yom kupandakanamu yinalika. Chadinga mudi kinalikap chom ap chimwing. Natanyidinamu nakash!”—Kus. 34:8; Jinsw. 10:22.

¹⁵ Anch ukat kusalang mudimu wa kukun dizu ni kudilejan katat, pakad kwidjidjek niyey ukwet mitapu ya kupak chakwel umana kuwap kwa Yehova. Ov, kudi yisu yiwamana ukwash wa spiritu wend piwadinga ni kulejan rusangu ruwamp? Ov, wamanap kal mes ma antu akwau chimasangera pa chisu chaburilay Yehova michim yau chakwel atesha uruu? (Mid. 16:14) Yehova wakukwashap kal chakwel upandakana yikangesh, pamwingap ni kukwinkish mutapu wa kutwish kutanduril mudimu wey wa kulejan? Wakukwashap kal mu yisu ya mar, ni kukutwishish udandamena kumusadil piwovila anch ukwetap usu? (Filip. 4:13) Pitukata kwimen ayinetu mutapu utukwashinay Yehova pitusadila mudimu wetu, ukat kwikal muntu wakin kudi etu ni tukat kwiyov piswimp nakash nend. (Isay 41:10) Ov, chidiap chiyukish cha kwikal umwing wa “in mudimu nend Nzamb” mu mudimu ujim wa malejan ma Nzamb?—1 Kor. 3:9.

16. Mutapu ik wiyovila piur pa usu usadilinga ni kwipan kwey mu mudimu wa kulejan malejan ma Nzamb?

¹⁶ Antu avud asotining kusal chom chikutwisha kushal chikupu mu mwom wau. Twamen anch ap yom yijim yisadilau mu mangand nlel akat kuyivuramen swa. Pakwez, midimu ya katat yisadilay Yehova, yisadikin mu dijin diend yikez chakin kamu kushal mu rusangu ra chikupu mudi chikunku cha rusangu ra uteokras. Akez kuyivurikang chikupu. (Jinsw. 10:7; Heb. 6:10) Tusangerany chisend chetu cha kusal mudimu wa kulejan malejan ma Nzamb ukeza kushal mu rusangu.

Mutapu ik Ukwakula?

• Yehova uyitin antu alejinay chom ik?

• Malejan ma Nzamb mawapishining mutapu ik mwom ya antu?

• Mu jinjil ik mutuyukishidinau pitukata kuyikwash antu akwau chakwel atanyidinamu mu malejan ma Nzamb?

[Chipich chidia pa paj wa 25]

Antu alejinau kudiay Yehova asadil ukadivar wakin wa pa mangand mawonsu

[Chipich chidia pa paj wa 26]

Ov, chidiap chiyukish cha kwikal umwing wa “in mudimu nend Nzamb”?