Ov, Chisu Chitongijok cha Nzamb Piur pa Maar Ma Kuleushan?

SAKATANG wey, ukatishina anch tumana kuwap, kalikishinap kusadil kuwamp kwa maar ma kuleushan.a Pakwez, wamwinkisha muntu “nviny ya kusangarish michim ya antu, many ma kuwapish mpal yau, ni mabot ma kukasikesh michim yau.” (Kuseng 104:15) Pa chisu chimwing, Yesu Kristu wayisangeresha antu ku musambu wa uruw pakarumunay mem mikal “maar mawamp nakash.”—Yohan 2:3-10.

Chidi chovikena kutong anch Sakatang wij nawamp mutapu maar ma kuleushan makwet usu pa mujimbu ni manangu metu. Kusutil ku Bibil, Tatukwetu wa mwiur ‘utulejin mulong wa kutukwash,’ ni utulikishin nakash kupandikesh kuna maar. (Isay 48:17) Tal kubabesh kwinoku kwakin:

“Kangal wakwachikany ku maar, mulong makukushikijany ku kujiy.” (Efes 5:18, Mukand wa Nzamb) “In kukwachik maar, . . . kakutwishap kuswan mu want wa Nzamb.” (1 Korint 6:9-11, MN) Dizu dia Nzamb dilikishin “kukwachik maruvu, ni kwipep, ni yom yikwau yiyimp mudi yiney.”—Galatia 5:19-21, MN.

Tushinshikinany amboku umwing wa ubaj wa kuna maar ma kuleushan pakad kupep pa chopu.

Ubaj wa Kupandikesh Kuna Maar

Ap anch maar ma kuleushan makutwish kukwash ku mujimbu, makwet kand yom yiyipishina yitongijok ni kusal kwa mujimbu. Kuna maar mavud kukutwish kulet milong yiney yilondwilaku:

Kupandikesh kuna maar kuyipishin yitongijok ya mwin kuna, ni ‘kakutwishap kutong nawamp.’ (Jinswir 23:33) Allen, kanway wisambidinau mu mutu mu mulong wasutina, urumburil anch: “Kwikal kanway kudap ching kusu mayej ma mujimbu bwat; madi kand mayej ma yitongijok ni yaku ya muntu. Ukutwishap kutongin pa uyimp wa chinech pantaliken ni antu akwau.”

Kupandikesh kuna maar ma kuleushan kukutwish kand kushadish want ipau. Bibil ubabeshin anch: “Maar ma nviny ma mulal ni ma muzavu makat kushesh yitongijok.” (Ozey 4:11, MN) Mutapu ik? Mwishin mwa usu wa kudimban wa maar ma kuleushan, yitongijok ni maku tukata kulik yikutwish kusambish kumeken yitiyikina—ap anch twayisotangap. Rusot retu ra kusal ching yom yitentamina rikutwish kuziy. Maar ma kuleushan makutwish kuyipish yaku yetu yiwamp, ni kushikij ku kujiy kwa muspiritu.

Chilakej, Yohan, watenda ni mukajend kupwa wabudika nich ujim wamusha waya mu bar. wadinga wanamu kal maar pakemp mulong wa kwitudish pamushejinay mband umwing. Kupwa pa pandikeshay kand kuna, Yohan waya nend ni wasala masandj. Kupwa, Yohan wova rineng nakash mulong wasala chom chakad ndiy kuchingejin kusal anch yitongijok yend kiyadingap yiyipishinau nich maar ma kuleushan.

Kuna maar ma kuleushan mavud kukutwish kushikij ku mazu ni kuyisal yiyimp. Bibil wipwil anch, “Anany akweta ushon? Anany akweta matend, anany akweta kwinan? Akata kushakam shakamee ni kuna maar ma nviny.” (Jinswir 23:29, 30, MN) Ukanway ukutwish kukwikadish “mudi muntu ulela mukach mwa karung, ap muntu ulela pa ris ra mutond ulemp wa diswin dia kwendish waat.” (Jinswir 23:34, MN) Muntu udia kanway ukez kulank ‘ching nich kuswan, pakad kwijik mutapu ik yom yiney yamushikena.’—Jinswir 23:35.

Kuna maar mavud nakash kukutwish kushesh ukash wa mujimbu. “Kwisudiel kwau [maar ma kuleushan] makat kusuman mudi nnak, makusuman mudi isilantat.” (Jinswir 23:32, MN) Siyans wa umwingang wakasikeshina manangu ma jinswir jinej jikur. Maar ma kuleushan mavud makweting ulemb wa kujipan ni makutwish kulet ma kanser kushalijan, mayej ma kunan kwa muchim utok, kuvund kwa muchim utok, kusheshik kwa karidish, kuburen kwa sukad mu mash, an avadikina pakad manangu, kunan kwa muchim—ni yibudikin yikwau yiyimp. Ap kuna kwa chisu chimwing ap kupandakesh kuna kukutwish kwandjik mu koma ap mu rufu. Pakwez yibudikin yiyimp ya kupandikesh kuna, kayilenap mu ma buku ma umwingang.

Ubaj ujim nakash. Ap anch muntu kakatap kukwachik maar, kuna pakad kupep pa chopu kuletining ubaj wa muspiritu. Bibil ulondin nawamp anch: “Riyind kudi en in kubutuk pamanch pafe kuya ni kuna yom yakukwachik, chad ukat kukerany kand uchuku wawonsu kuna djat ni piukuzedilanya.” Mulong wak? Isay urumburil yibudikin ya muspiritu yidiokila ku kuna pakad kupep pa chopu anch: “Pakwez kiwijanyap yom yikat kusalay [Yehova] ap kumubangaku, bwat.”—Isay 5:11, 12, MN.

Dizu dia Nzamb ditubabeshin anch “kangal wikal pakach pa in kuna maar.” (Jinswir 23:20, MN) Ayibabeshin amband amapal anch kafanyidinap kwikal “aswik a maar.” (Titus 2:3, MN) Mulong wak? Yisu yivu pakad kwijik—antu asambishining pakemp pakemp kuna maar ma kuleushan pakad kujing. Kupwa, kanway ukutwish “kulond anch, ‘ov, nikulank pa chisu ik? Nikuya kusot kand kakwau!’” (Jinswir 23:35, MN) Atunway asutishining yisu yiyimp pakatau kujingunin mutapu chikata kuyikasiken kulank nich usu, akat kunang kand pamanch chakwel ikala nich usu washadishau mu kunawol uchuku.

Bibil utubabeshin anch antu ipanina mu “kukwachik ku maar, . . . mu yisak ya kuna maar, . . . Nzamb . . . ukez kayirumburish aom ni afu wakad kulab.” (1 Pita 4:3, 5 MN) Piur pa chisu chikash chitushicha, Yesu wabebesha anch: “Babalany, kangal michim yen yachinchik mulong wa kwifund kudia, ap kukwachik maar, ap mulong wa yakamish ya mwom wa ngand yiney, chamwamu, dichuku dinidia dikez kakukashimwishay mudi mupit.”—Luka 21:34, 35, MN.

Pakwez, kanway ufanyidin kusal nchik chakwel ipuka kwikal ‘mwin kukwachik nich maar maleushena’?

[Dizu didia kwishin kwa paj]

[Yipich yidia pa paj 4]

Kupandikesh kuna maar ma kuleushan kukutwish kulet milong yivud