Tek Maar ma Kuleushan Pandond Yau

TONY, wisambidinau mu mutu wa mulong wa kwinsambishil, wela kusanger mwom wa mutapu windjing—Ching kusu anch wapwisha mulong wend wa kunawol. Pakwez, mulong waman anch utwishin kuna maar mavud pakad yibudikin yiyimp, ndiy watonga anch wading utakedil mwom wend. Ov, mulong wak chitongijok chend chadinga chiyimp?

Yitongijok yend yading ayiyipishin kal nich kupandakesh kuna maar ma kuleushan. Ap anch Tony wading wija mwamu ap bwat, yid yawonsu yadinga yitakedila mwikadil wend wa mujimbu, wa manangu, ni wa yovil—wong wend—yading yisadila nayimp padingay ukwachikina maar. Anch wa wana maar mavud, wong wend wadingap nikutwish kutakel nawamp mwikadil wend. Ap anch Tony wading wija mwamu ap bwat, yid yawonsu yadinga yitakedila mwikadil wend wa mujimbu, wa manangu, ni wa yovil—wong wend—yading yisadila nayimp padingay ukwachikina maar.

Diyingish dia kaad diasala anch Tony akanganya kujingunin mwikadil wend chading rusot rend rikash ra kulam chaku chend cha kunawol. Allen, wajimbulangau mu mitu ya milong yasutina, wading pakusambish ulikin anch kakwetap chaku cha kunawol maar ma kuleushan. Ndiy walonda anch: “Nikez kuna ku ujindj kupwa nikwit dilikishin, ni kupakish kudiburil kukwachik maar kwam. Nading ni rutong rimwing—kudandamen kuna maar.” Ap anch antu akwau amana anch maar mading mayitakedil Tony nenday Allen, awosu ading ni kulond anch kwikil kwau mulong. Awonsu aad afanyidina kwikwatin mupak chakwel atakela kuna kwau. Ov. afanyidina kusal nchik?

Ikwatina Mupak!

Antu avud alika kupandikesh kuna maar ma kuleushan ikwatina mipak kukwatijan nich yalonday Yesu anch: “Anch dis diey dia katatuku diakutwal ku chitil, dibwita, udidjibul! Kushadish chid chimwing cha mujimbu chidi chom chikemp, pakwez chidi chom chiyimp kupandakan anch Nzamb waudjibul mujimbu wey wakabuj mu Dijiy dia Kasu.”—Mateu 5:29, MN.

Chakin kamu, Yesu kalejanap kwikatul yid ya kumujimbu bwat. Pakwez, watuvurisha mu chifanikesh anch tufanyidin kudiosh yom yawonsu yiyipishina mwikadil wetu wa muspiritu mu mwom wetu. Chakin, mupak tukukwisha kwikwatin ukutwish kusansan nakash. Pakwez ukez kutukoj ku yitongijok ni mikadil yikutwisha kutushikij ku kupandikesh kuna maar ma kuleushan. Chawiy lel, anch antu akwau akulej anch upendikeshin kuna maar ma kuleushan, ishinshikina pachinech.a Anch chimekeshin patok anch ukutwishap kutakel mutapu wey wa kuna maar, Lik kwey kuna maar mu mwom wey. Ap anch chikutwish kusansan, pakwez chikwikalap chom chisansena nakash kupandakanamu kushadish mwom.

Ap anch udiap kanway, ov, woviling ja kupandikesh kuna maar? Anch chidi mwamu, ov, yik ukutwisha kusal chakwel uteka maar ma kuleushan pa ndond pau?

Kudiokila Ukwash

1. Tek ritiy mu usu wa malembil makad kujing ni makashinsh. Bibil uletin chiyul kudi antu awonsu asotina kumusangaresh Yehova Nzamb anch: “Kangal wiyakamishany mulong wa chom. Pakwez mu yisu yawonsu mu kulembil kwen, ap pa kuyilembidil antu akwau nich kujikitish, mwijikishany Nzamb yom yawonsu umwitilanya. Chad chisambu cha Nzamb chisutila ronganyin ra antu chikulam michim yen ni yitongijok yen mu Kristu Yesu.” (Filipoi 4:6, 7 MN) Ov, yik ukutwisha kulembil piur pa kwikal nich chisambu chinech cha manangu?

Itiyij nich kashinsh anch unining maar nakash, mulong winou udi chisend chey amwiney. Anch wamulej Nzamb yiusotina kusal, ndiy ukez kayukish usu wey usadila chakwel upwisha mulong winou ni wipuka milong yikash. “Muntu mwin kujindjik kurumburik kwend kakuzangijalap nawamp, pakwez mwin kwitiyil kurumbuk ni kukulik, akez kamwovil riy.” (Jinswir 28:13) Yesu walonda kand anch tukutwish kulembil anch: “Kangal watutwal ku yoziu, pakwez tukamunina ku kuyip.” (Mateu 6:13, MN) Mutapu ik ukutwisha kusal mu kukwatijan nich malembil minam, ni kwisu ukutwisha kutan yakul ku malembil mey?

2. Tambul usu udiokila ku Dizu dia Nzamb. “Dizu dia Nzamb dikwet mwom, dikwet kand ukash. . . . Dikat kujingunin yitongijok ni rusot ra mu muchim wa muntu.” (Hebereu 4:12, MN) Ayinamaar avud a pasak atana ukwash kusutil ku kutang ni kutongijokin pa ma verse ma Bibil dichuku ni dichuku. Mfund a kuseng umwovila Nzamb wom wafunda anch: “Wayuk muntu wakad kulondul mpung ya antu ayimp, ap kwibomb nau akayitil, . . . Chawiy ukat kusangar pakulondul Yijil ya [Yehova], ni ukat kuyilej muten ni uchuku. . . . Yawonsu yikusalay yikez karumburik.”—Kuseng 1:1-3, MN.

Allen, watana usu pa kulik kunawol maar kusutil dilejan dia Bibil pamwing nau Atuman a Yehova, ulondin anch, “Nikala nich kashinsh anch, anch chadingap ukwash wa Bibil ni wa yany ya Bibil chakwel nilika kunawol maar, ing nafil kal.”

3. Kudish kwilam. Bibil ulejen anch ayinamaar a pasak mu chikumangen cha win Kristu ayowisha ikal zwang “mu spiritu wa Nzamb wetu.” (1 Korint 6:9-11) Mutapu ik? Mulong wa chom chimwing, ayikwasha kulik kunawol maar ni kukwachik kusutil ku kukudish kwilam, mwikadil ukudishinau nich ukwash wa spiritu utumbila wa Nzamb. “Kangal wakwachikany nich maruvu, mulong matend madi mwamu, pakwez izulany sens nich [S]spiritu.” (Efes 5:18; Galatia 5:21-23) Yesu Kristu washilamu anch: “Tatukwen wa mwiur kakupandikeshimup kupan [S]spiritu [U]utumbila kudi awiy akata kumwit?” Chawiy lel, “itany akez kaninkishany.”—Luka 11:9, 13, MN.

Antu asotina kumwifukwil Yehova mu mutapu witiyijinay akutwish kukudish kwipan kusutil ku kutang ni kwilej Bibil ni kusutil ku kulembil pakad kujing nich muchim umwing. Pandond pa kushadish ruchingej, itiyij kushilamu kwinoku kudiokila mu Dizu dia Nzamb anch: “Ndiy ukata kukunyin ku spiritu, ukez kapodil ku spiritu mwom wa chikupu. Kangal tuziyany mu kusal nawamp; mulong mu chirungu cha kupol tukez kapol anch kitukangenyip.”—Galatia 6:8, 9.

4. Tond arund awamp. “Muntu ukata kwend nau in manangu, niyend ukwikal mwin manangu, pakwez ukata kwend nau ayisup ukuman mar.” (Jinswir 13:20, MN) Yileja arund ney chiyul chey cha kwipuk kukwachik maar ma kuleushan. Pakwez Dizu dia Nzamb diatakela kulejan anch piukulika “kupandakesh kukwachik ku maar, kwibomb mu yisak ya kuna maar,” arund amwing a pasak akutwish “kukusaal masaal.” (1 Pita 4:3, 4, Les Saintes Écritures — Traduction du monde nouveau) Ufanyidik kulik urund wa antu akangeshina mupak wey wa kulik kupandikesh kuna.

5. Itekina mipak yijikena. “Kangal wifanakeshany ayinen nich yaku ya antu a mangand minam. Pakwez itiyany Nzamb akukarumunany mu yom yawonsu ni kukwinkishany manangu masu ni muchim usu, Mwamu ukutwishany kujingunin rusot ra Nzamb. Ndiy usotil yom yiwamp, yitentamina kamu, yikata kumusangarish.” (Rome 12:2, NW) Anch walikidil yany ya Dizu dia Nzamb yikukwasha kukwat mipak yey pandond pa kulikidil arund ney ap “antu a mangand minam” asala mwamu, ukez kusanger mwikadil wa mwom witiyijinay Nzamb. Ov, mutapu ik ukutwisha kwijik mupak ukufanyidina?

Uvud wawonsu wa maar ma kuleushan ukukangeshia kujingunin kuwap ni kuyip ni ukepishina usu wey wa kutong upandiken kud ey. Chawiy lel, anch watond kuna, chidiap cha manangu kwitekin mupak wakad kwijikan nawamp pakach pa kuna kuwanyidina ni kukwachik maar. Kangal walikidil kwidjidjek kukepisha mutapu wey wa kutong piur pa maar. Itekina mupak wijikena, mupak uwamp wakad ubaj kudi kutond chipim chisikena—chikeza kukukwash wipuka kupandikesh kuna.

6. Ileja mutapu wa kulik. “Londany kusu anch: ‘Mwawiy, nikusal,’ ap ‘Bwat kinikusalap.’” (Mateu 5:37, NW) Ileja kulik nich kalimish maar madandamedinau kukwinkish kudi mwin chikumbu muwamp pakad kwijik. “Chifanyidin mazu men mikala ma kalimish yisu yawonsu, ambambany nawamp nau antu akwau, ijikany mutapu wa kuyakul antu awonsu nawamp.”—Kolosay 4:6, NW.

7. Kimb ukwash wa pakampwil. It ukwash kudi arund awamp akutwisha kukasikesh chiyul chey cha kwitekin kuyikel kuna kwey ni akutwish kukukwash mu spiritu. “Antu aad asadila mudimu pamwing amupandakenamu muntu umwing, difut dia mudimu wau didi diwamp. Mulong anch umwing wawa, mukwau ukumulangwish.” (Mulej 4:9, 10; Yakobu 5:14, 16, NW) Chapu cha Ngand Chitadina Milong ya Maar ma Kuleushan mu États-Unis chilejen anch: “Kulik kukwachik maar kukutwish kwakasikan pa yisu yimwing. It dijuku diey ni arund ney chakwel akukwasha kuwanyish rutong rey.”

8. Lamat ku chiyul chey. “Ikalany in kusadil dizu dia Nzamb. Kangal wikalany in kuditesh kusu, mulong mwamu ukat kwidimbany ayinen. Pakwez muntu mwawonsu ukata kwonganyin yijil yiwanyidina yikata kupan want ipau. Chad anch wadandamen kusal mwamu, wakad kuvuramen yom yateshay, pakwez ukat kuyisadil, muntu mwinou Nzamb ukez kamuyukish ku yom yawonsu yikez kasalay.”—Yakobu 1:22, 25, NW.

Kudiokal Mu Uswik wa Maar

Kadiap muntu mwawonsu unininga nakash ukata kwikal chinamaar. Pakwez antu amwing akusambish kuna nakash—ap pakad kujing—kupwa ikal ayinamaar ma kuleushan. Mulong uchinamaar ma kuleushan udi uswik wa mujimbu ni wa manangu piur pa yom yikash, antu mud inay aswiridin ukwash ukash kupandakenamu kwiyikasikesh ni ukwash wa muspiritu mulong wa kudiokal mu uswik wa maar ma kuleushan. Allen urumburikin anch: “Pinalika maar ma kuleushan, kusansan kwa mujimbu kwa kushal pa amwinam kwading kukash. Chawiy lel namana anch nading niswiridina kuwejinaku mwon wa chimwingang ku ukwash wa muspiritu unatambula.”

Ayinamaar avud aswiridin mwon wa chimwingang chakwel akasikesha njit jau ja muspiritu ja kudiokal mu uswik wa maar ni kushakam kulemp nich kupandakesh kuna maar ma kuleushan.b Amwing aswiridin kuyandjik mu rupital chakwel apwisha mayej kuburen urund ap kuna mwon ukepishina kupandikesh kuna maar ma kuleushan ni kuyikwash kulik kuna. Mwan a Nzamb wasala chilay walonda anch: “Antu akash kaswiridinap mwingang, ching kusu ayedila, awiy akata kumuswir mwingang.”—Marko 2:17, NW.

Yiyukish Yidiokila ku Kutesh Malejan ma Nzamb

Chiyul cha Bibil chishikina ku muchim piur pa maar ma kuleushan chidiokil kudi Nzamb wakin, mulong wa uwamp wetu—chidap ching mulong wa kusanger kwetu kwa katat pakwez chidi mulong wa chiyukish chetu cha chikupu. Kupwa kwa mivu makum matan kudiosh palikay maar ma kuleush, Allen uvurikin anch: “Chading chom chishimokishina pakwijik anch nikala muntu windjing, pa kwilej anch Yehova wading uswiridin kwinkwash chakwel nikasikesha kulik yom yadinga yiyimp mu mwom wam, chawiy lel . . .” Allen waninet kupwa wadila mulong wavurika yom yivud. Kupwa wadandamen anch: “Ah . . . pakwijik anch Yehova uteshin, ulamin ni upanin ukwash ufanyidina—wading wakaad kuchingejin.”

Pakwez, anch uchidi chinamaar, kangal waziy ap watong anch kwikil ruchingej. Allen ni antu akwau avud nakash ading mudi ey pakwez atwisha kukepish uvud wa maar ap kulik kumana. Kwovap ushon; niyey kiukezap kwov ushon.

Ap anch amwiney watond kuna maar ma kuleushan mu chipim chiwanyidina ap walik kuna, tesh kutazuk kwa rukat kwa Nzamb anch: “Anch en wadiany in kutesh malejan mam, ing yiyukish yam yelang kwikal kudi en mudi wit wakad kuumang mem! Kupandakan kwelang kwikal kudi en mudi mambek makata kwezang ku chikumu cha karung.”—Isay 48:18, MN.

[Mazu madia kwishin kwa paj]

[Kamushet/Chipich chidia pa paj wa 8]

Ov, Maar ma Kuleushan Makuyikedil? Ufanyidin kwiyipul amwiney anch:

• Ov, ninin maar ma kuleushan kupandakanamu munikata kunang?

• Ov, ninining nakash chisu ni chisu kupandakanamu mu nikata kunang?

• Ov, kuna kwam kwapandakenamu kal nakash?

• Ov, ninining maar ma kuleushan mulong wa kupwish yakamish ap kuchin milong?

• Ov, kudi murund ap chid cha dijuku wakamina piur pa kuna kwam?

• Ov, kuna kwanletidil milong ku chikumbu, ap ku mudimu ap mu weny?

• Ov, chikasiken kusutish rubing pakad kuna maar ma kuleushan?

• Ov, nikat kwiyovang nayimp anch akwetu alik maar ma kuleushan?

• Ov, niyijindjikining akwetu uvud wa maar ma kuleushan nikata kunang?

Anch wakul anch mwaning ku chimwing ap yivud pa yipul yiney, ufanyidin kusal chom kanang chakwel uwina kuna kwey.

[Kamushet/Chipich chidia pa paj wa 9]

Kwat Mupak wa Manangu Piur pa Maar Ma Kuleushan

Kurutu kwa kuna maar ma kuleushan, shinshikin anch:

• Ov, Chidi cha manangu kudi am kuna maar ma kuleushan, ap nifanyidin kulik?

Chiyul: Muntu wakad kutwish kwimik kuna kwend ufanyidin kulik kuna.

• Ov, uvud ik wa mar nifanyidina kuna?

Chiyul: Ijik mupak wey kurutu kwa maar ma kuleushan mayipishina yitongijok yey.

• Nikuna chisu ik?

Yiyul: kangal kuna kurutu kwa kwendish motak ap kurutu kwa kusal mijikit yitin kubabal; kangal kurutu kwa kusal mijikit ya difukwil; kangal pa chirungu cha madikaj, kangal pa chisu tunina mon kanang.

• Nikunin kwisu?

Yiyul: Mwin ndond yiwamp; kangal mwin ndond yijingamena mulong wa kujindjik yiunina; kangal kurutu kwa antu akisina maar ma kuleush.

• Nany nikuna nend pamwing?

Yiyul: pamwing ni arund ni yid ya dijuku yikweta yibachikin yiwamp; kangal kuna pamwing ni ayinamaar in kubund milong.

[Kamushet/Chipich chidia pa paj 10]

Dizu dia Nzamb Diamukwasha Muntu Wadinga Kanway

Supot, mu Thaïlande, wadinga kanway mukash. Pakusambish, wading ni kunang kusu urel. Pakemp pakemp, wasambisha kuna pamanch ni pa chisu kand cha midi. Wasotanga chisu ni chisu kuna maar. Pakwez wasambisha kwilej Bibil pamwing ni Atuman a Yehova. Pilejay anch Yehova ukandikin kuna maar pakad kupep pa chopu, Supot walika kuna maar. Kupwa kwa chinech, walika yaku yend yikur ya kuna maar. Dijuku diend diadinga diasheshikin kal.

Pakwez, Supot wadandamena kumukat Yehova ni wasota kumwifukwil nawamp. Arund nend a Supot adandamena kumukwash ni kumukasikesh mukajend ni anend chakwel asambisha kusutish chisu chivud pamwing nend ni kangal alik kumukwash. Pachisu chinicha, mazu makin madia mu 1 Korint 6:10 malondina anch ‘in kukwachi maar kakutwishap kuswan mu Want wa Nzamb’ mamukwasha Supot kuman nakash kuyip kwa mwikadil wend. Wamana chakin anch uswiridin kujijaman kusal usu chakwel kupwish mulong wend wa maar.

Pinipa kamu, Supot wajijaman kulik rawonsu kunang maar ma kuleushan. Kupwa, nich ukash wa mwiku utumbila wa Nzamb, umutakel wa dizu dia Nzamb, ni ukwash wa dijuku diend ni chikumangen, Supot watambula ukash wa muspiritu ni wawina maswir mend ma maar ma kuleushan. Dijuku diend diasangara nakash chisu chatambulay dibatish mud chijingidij cha kwipan kwend kud Nzamb.

Katat Supot ukwet urund wa piswimp nend Nzamb wadingay ni kusot chisu chawosu, ni usadidil chisu chend mulong wa kuyikwash antu akwau mu spiritu.