Kuchidij Mutapu Wa Kuyikel Wa Yehova!
“Nzamb Upandakena Piur pa yawonsu ukwet usu piur pa mant ma antu.”—DAN. 4:17.
1, 2. Mayingishin ik mamwing malejena kukangan kwa winyikel wa muntu?
WINYIKEL wa muntu ukangen! Kwikil kwidjidjek ap pakemp. Diyingish dijim dia kukangany kwinoku didi anch mulong antu aburedin manangu ma kuyikel nich nawamp. Kukangan kwa winyikel wa muntu kumeken nlel patok mulong anyikel avud imekeshin kal ayinau kwikal ‘in kwikat ayinay, in kukat nfalang, in kwibaz, in kufuny ulab, in kubwambul, akwikal in chisum, in dizaz, akad kwikand, in kukis kuwap; in kutungilijan, in kwitutul.’—2 Tim. 3:2-4.
2 Pasutil kal mivu, anvaj etu alika kwau winyikel wa Nzamb. Pasalau mwamu, pamwingap atonga anch ading atondil want ipau. Komb chakin kamu, adinga iyandjikin mu winyiekel wa Satan. Mivu tunan musamban ya winyikel uyimp wa muntu—usu ubachikinau kudiay “mwant wa mangand minam,” Satan—watushikijin kal pa chilik cha pansh mu rusangu ra muntu. (Yoh. 12:31) Parumburilay piur pa winyikel wa antu nlel, The Oxford History of the Twentieth Century ulondil anch “kukimbang mangand mawanyidina” chidi kwau kushesh usu chamwamu. Urumburil kand anch: “Chidiap kusu anch chitwishikinap kumatan, pakwez kupakish kusu kumasot kuletin chak, winyikel ujimbwilau anch totalitarizem, jinjit ni yibudikin yay yiyimp.” Kulond kwakin mudi ik kulejena anch winyikel wa muntu ukangen!
3. Ik tukutwisha kulond piur pa mutapu welay Nzamb kuyikel anch Adam ni Eve kasalap chitil?
3 Chiyipin mudi ik, anch mulong anvaj etu a kusambish adjibwila kwang winyikel umwing kusu uwamp—winyikel wa Nzamb! Chakin, twijap nawamp mutapu welay Yehova kutenchik mutapu wend wa kuyikel divu anch Adam ni Eve ashala ashinshamena kudi ndiy. Pakwez, tukutwish twikal nich kashinsh anch winyikel wa Nzamb witiyijinau antu awonsu wela kwikal wa rukat ni wakad kasolikany. (Mid. 10:34; 1 Yoh. 4:8) Pa kuman manangu mapandakena ma Nzamb, tukutwish kand twikal nich kashinsh anch, ang antu ashala ashinshamena ku winyikel wa Yehova, ing anyikel a chiuntu adinga ausotina ela kwipuk kurumbok kwawonsu kwasalau. Winyikel wa Nzamb, uteokras, wela kupandakan nakash mu “kuwanyish rusot ra chom chawonsu chikweta mwom.” (Kus. 145:16) Mu kulond mu miswimp, wela kwikal winyikel uwanyidina. (Kuv. 32:4) Chidi cha ushon anch antu aulika kwau!
4. Satan amulikidin mbil ya kuyikel djat mu chilik ik?
4 Chikalap nchik mwamu, chiwapidil tuvurik anch ap anch Yehova wayilika antu iyikela ayinau, kakezap ap dichuku dimwing kudjibwil kwa mbil yend ya kuyikel piur pa yitang yawonsu. Ap mwant mwin usu wa in Babilon washikena ku kwijik anch chakin kamu, “Nzamb Upandakena Piur pa yawonsu ukwet usu piur pa mant ma antu.” (Dan. 4:17) Want wa Nzamb ukez kusal mu kusut kwa mivu ni minang chakwel rusot rend risadik. (Mat. 6:10) Chakin, Yehova wamulikina Satan mu kachisu kakemp kusu, ikala ndiy “nzamb a mangand minam” chakwel aleta chakul chakad muntu kutwish kutadik ku milong yalangwishay mukankuny. (2 Kor. 4:4; 1 Yoh. 5:19) Chikalap nchik mwamu, Satan kandikal atwishap kupandakan pa yom yimulikidinay Yehova kusal. (2 Jins. 20:6; isikej ni Yob 1:11, 12; 2:3-6.) Ni kuding ching antu amwing atondininga ayinau kumuziyil Nzamb, ap anch ashich mwi ngand yiyikedilau kudiay Mukankuny mujim wa Nzamb.
Winyikel wa Nzamb Padiay Isarel
5. Machip ik machipay Isarel kudi Nzamb?
5 Kusambish pa chirung cha Abel djat pa chirung cha ashankur a majuku, uvud kanang wa antu ashinshamena amwifukwila Yehova ni aziyila kwi mbil yend. (Heb. 11:4-22) Pa dichuku dia Moses, Yehova wasuka manswik ni an a nshakur Yakob, ni an inay ikala muchid wa Isarel. Mu muvu wa 1513 K.C.C., in Isarel achipa ayinau pamwing ni anau ni amwitiyija Yehova mudi Nyikel, ni alonda anch: “Yawonsu yalonday [Yehova, NW], tukez kuyisadil.”—Kub. 19:8.
6, 7. Winyikel wa Nzamb wadinga nich ngikadil ik?
6 Yehova wadinga ni rutong payitonday in Isarel chakwel ikala antwend. (Tang Kuvurik Yijil 7:7, 8.) Mu kutond kwinoku mwadinga yom yivud kupandakanamu kwau kusu ukash wa mujimbu wa in Isarel. Dijin ni ukaleng wa Nzamb niyau yadinga yikwatikenaku, ni yadinga yirumburikin mu mutapu ujim nakash. Isarel wadinga ufanyidin kusal mudi kaman wa kulejan anch Yehova ndiy Nzamb umwing kusu wakin. (Isay 43:10; 44:6-8) Chawiy, Yehova wauleja muchid winou anch: “En udiany antu atumbila kudi [Yehova, NW] Nzamb wen. Chinawej wakutondanya kal en kwikal antwend pa kampwil pakach pa antu awonsu adia pansh.”—Kuv. 14:2.
7 Nzamb wayiyikela nich chitong anch in Isarel adinga antu akad kuwanyin. Pakwez, yijil yend yadinga yiwanyidina ni yamekesha ngikadil ya Muntu wayileta. Yijidik yamwinkishau Moses kudiay Yehova yadinga yikasikeshidin patok winsant wa Nzamb, kukat kwend kutentam, muchim wend wa kulishin ni kushimpish kwend. Kurutu, mu machuku menday Yoshua ni chizaz chend, muchid waziyil ku yijidik ya Yehova ni chawiy wikala mu chisambu ni watambula yiyukish ya muspiritu. (Yos. 24:21, 22, 31) Chirung chinech cha rusangu ra Isarel chamekesha kupandakan kwa mutapu wa kuyikel wa Yehova.
Winyikel wa Muntu ni Yikokujol Yau
8, 9. Chom ik cha usup chitay Isarel, ni chikala nich yibudikin ik?
8 Pakwez, mu kusut kwa chisu, in Isarel adinga chisu ni chisu ni kukarumuk aya kulemp ni winyikel wa Nzamb ni chawiy aburena diking diend. Kwinsudiel, kusutil kudiay muprofet Samwel, Isarel wita mwant wa chiuntu, ukutwishau kuman ni mes. Yehova wamuleja Samwel itiyija yadingau ni kumwit. Pakwez, Yehova wawejinaku kand anch: “Kadiap ey ulikinau, pakwez yam ulikinau mulong kasotilap nikala mwant wau.” (1 Sam. 8:7, NW) Ap anch Yehova wamwitiyija Isarel ikala ni mwant umekena ku mes, wasambela kuyijik anch winyikel winou wa mwant wa chiuntu ukez kwikal nich yibudikin yau.—Tang 1 Samwel 8:9-18, NW.
9 Rusangu ra muntu rilejen uyakin wa chiyul chinech cha Yehova. Isarel wikala mu mar makash pamwiyikelau kudi mwant wa chiuntu, pakampwil anch mwant winou wikal wakad kushinshaman. Nich chilakej chinech cha Isarel mu manangu, tukashimukinap pa kuman anch mu yirung yawonsu maguvernema ma antu akad kumwijik Yehova makangen kulet yibudikin yiwamp ya chikupu. Chakin kamu, in politik amwing alondiling anch Nzamb uyukishin usu wau usadilau mulong wa kulet chisambu ni kushakam zoong, ov, mutapu ik lel ukutwishay Nzamb kuyiyukish antu alikina kuziyil ku winyikel wend?—Kus. 2:10-12.
Muchid Usu mu Winyikel wa Nzamb
10. Mulong wak Nzamb wauswinkesha muchid wa Isarel watonday ni muchid ukwau?
10 Muchid wa Isarel wamekesha patok anch usotilap kwau kumusadil Yehova ni kushinshaman. Chawiy, chiweza ku kumulik Mesia watonday Nzamb, ni Yehova niyend waulika ni watenchika auswinkesha nich chisak cha antu asala muchid usu. Mudi chibudikin, kushik mu muvu wa 33 C.C., chikumangen cha Ukristu cha in kumwifukwil Yehova azizidilau many, chavadika. Chakin kamu, chikumangen chadinga muchid usu mwishin wa ulabu wa winyikel wa Yehova. Paul uujimbwil anch: “Isarel a Nzamb.”—Gal. 6:16.
11, 12. Pa mulong wa ukafung, kufanakan ik kudiap pakach pa Isarel ni “Isarel a Nzamb”?
11 Kudi yom yishalijadina ni yifanikena pakach pa muchid wa kusambish wa Isarel ni “Isarel a Nzamb” musu. Pakad kwikal mudi Isarel wa pasak, chikumangen cha Ukristu chikwetap mwant wa chiuntu ni chiswiridinap kulambul milambu ya annam mulong wa yitil. Chom chimwing chifanikena pakach pa mudich wa Isarel ni chikumangen cha Ukristu chidi ditenchik dia kwikal ni amakurump. (Kub. 19:3-8) Amakurump inay in Kristu kakatap kuyiyikel amikoku. Pakwez, achilamin chikumangen ni ading a kusambish mu mijikit ya Ukristu. Akat kumusadil muntu ni muntu udia mu chikumangen nich rukat, ni kuyilimish antu awonsu.—2 Kor. 1:24; 1 Pita 5:2, 3.
12 Kusutil ku kutongijokin pa mutapu wadingay Nzamb ni kumusadil Isarel, yid ya “Isarel a Nzamb” ni arund nau “amikoku akwau” akat kumusanger nakash Yehova ni mutapu wend wa kuyikel. (Yoh. 10:16) Chilakej, rusangu ra muntu rilejen anch ant a chiuntu adinga mu Isarel adinga ni usu ujim padi antu au, chikala mu kuwap ap mu kuyip. Uyakin winou uyikwatin nakash antu ayitakedila in Kristu anch, ap anch kayikedilap mudi ant inay a pasak, afanyidin ching kwikal chilakej chiwamp cha ritiy.—Heb. 13:7.
Mutapu Uyikedilay Yehova Nlel
13. Chinship ik chijim chasadika mu muvu wa 1914?
13 Nlel in Kristu alejen mu mangand mawonsu anch winyikel wa muntu piur pa akwau udi piswimp ni kupwa. Mu muvu wa 1914, Yehova wimika Want wend mwiur kusutil kudiay Mwant wend watonday, Yesu Kristu. Pa chisu chinicha, wamwinkishay Yesu ulabu chakwel aya “kurish ni kuyipandikan akwau usu.” (Kubur. 6:2) Mwant musu wadishau want amwela kand anch yang “ukayikel mukach mwa akankuny ney.” (Kus. 110:2) Cha ushon, michid yilikin kwau ni muchim umwing kuziyil ku winyikel wa Yehova. Adandamedin kusal yom mudi kulond anch: “Kwikil Nzamb!”—Kus. 14:1.
14, 15. (a) Winyikel wa Nzamb utuyikedil mutapu ik nlel, ni pa chinech, yipul ik tufanyidina kwiyipul ayinetu? (b) Kwisu kupandakan kuwap kwa winyikel wa Nzamb kumekena nlel?
14 Kwashadil kal yid yikemp ya azizididilau ya “Isarel a Nzamb,” ni chidiau anamakwend a Yesu, adandamedin kusal mudi “antimesh a Kristu.” (2 Kor. 5:20, MM) Ayitonda kwikal chisak cha kashalapol ushishamena ni kubabal chakwel alama ni kuyinkish yakudia antu azizidilau ni chisak chijim cha in Kristu ikadila kal katat mamiliyon akweta rutong ra kushakam pa divu chikupu. (Mat. 24:45-47; Kubur. 7:9-15) Chiyukish cha Yehova chimekedin kusutil ku kuya kurutu muspiritu kusangaredina ditenchik dined dia in kwifukwil akin nlel.
15 Muntu umwing ni umwing udia pakach petu ukusal nawamp anch wiyipul anch: ‘Novil kurumburik kwa yisend yinikutwisha kwikal mu chikumangen cha Ukristu? Nikasikeshidin muchifanyidina mutapu wa kuyikel wa Yehova? Niyovil makij mulong wa kwikal kwamu umwing wa antu akwikala mu winyikel wa Want wa Yehova? Nikwatin mupak wa kuyilej antu akwau ya Want wa Nzamb mu chilik chinikutwisha?’ Mudi chisak, tuding tayad kuziyil ayinetu ku umutakel wa Chisak Chitakedina ni kusal mu kwovijan ni amakurump atondau kal adia mu chikumangen. Ang twasal mwamu, tukumekesh anch twiiyijin mutapu wa kuyikel wa Nzamb. (Tang Hebereu 13:17.) Kuziyil kwa kwikatin kwawiy kuletina uumwing wa mu mangand mawonsu udia wa pakampwil mu mangand manam maurokina. Kuletin kand chisambu ni kutentam ni kumutumbishin Yehova, ni kumekeshin kand mutapu wend wa kuyikel upandakenamu kulemp kuwap.
Winyikel wa Yehova Upandaken
16. Mupak ik ufanyidinay muntu ni muntu kukwat nlel?
16 Chisu chishejidin piswimp nakash chikezau kukatul milong yalanka mu Eden. Chawiy lel, katat chawiy chisu chifanyidinau antu kukwat mupak. Muntu ni muntu ufanyidin kukwat mupak wend anch ukwitiyijin mutapu wa kuyikel wa Yehova ap anch ukushal ulamatina dang ku winyikel wa muntu. Twitapidil dilau dia kuyikwash antu ikepishina chakwel akwata mupak uwamp. Piswimpap kamu, pa Armagedon, mutapu wa kuyikel wa Yehova ukez kuswinkan chikupu maguvernema mawonsu ma muntu madia mwishin mwa usu wa Satan. (Dan. 2:44; Kubur. 16:16) Winyikel wa muntu ukez kupwa, ni want wa Nzamb ukez kuyikel pa divu diawonsu. Mu kulond mudi murumburikina dizu dined kamu, mutapu wa kuyikel wa Yehova akez kuuchidij.—Tang Kuburik 21:3-5.
17. Yom ik yiyishikijina antu ikempishina ku kukwat mupak uwamp pa mulong wa winyikel?
17 Antu akad kal kukwat mupak wa kwikal ku mutambu wa Yehova afanyidin kulembil chakwel ashinshikina yiyukish yikezau antu kutambul kusutil ku mutapu wa kuyikel wa Nzamb. Winyikel wa muntu ukangen kupwish mulong wa chisum, pamwing ni kukwatishan wom. Want wa Nzamb ukez kudiosh yom yawonsu yiyimp pa divu. (Kus. 37:1, 2, 9) Winyikel wa muntu uletining njit jakad kupwang, pakwez winyikel wa Nzamb ukez “kukatwish njit ni kwisudiel ya mangand.” (Kus. 46:9) Want wa Nzamb, ukez kuchirish chisambu pakach pa antu ni annam! (Isay 11:6-9) Mu winyikel wa muntu muding uzwendj ni nzal, pakwez winyikel wa Nzamb ukez kuyipwish. (Isay 65:21) Ap anyikel a chiuntu akwet yitongijok yiwamp akangen kupwish mayej ni rufu, pakwez mu winyikel wa Nzamb, amapal ni ayej akez kusanger kuchirik ku usu wa winsand wau. (Yob 33:25; Isay 35:5, 6) Chakin kamu, divu dikez kwikal paradis mukezau kuyivumbwil afu.—Luka 23:43; Mid. 24:15.
18. Mutapu ik tukutwisha kumekesh anch twitiyijin anch mutapu wa kuyikel wa Nzamb upandaken kuwap?
18 Mwaning, winyikel wa Nzamb ukez kupwish uyimp wawonsu waletay Satan pa chisu chayirumbulay anvaj etu a kusambish chakwel akarumuka kudiokal kudiay Sakatang. Ni talany bil, Satan waleta kal uyimp mu mivu ey yawonsu 6000, pakwez Nzamb, kusutil kudiay Kristu, ukez kupwish uyimp winou wawonsu mu mivu 1000 kusu! Uman ukash mudi ik wa kupandakan kuwap kwa mutapu wa kuyikel wa Nzamb! Chitudia Atuman a Nzamb wetu, tumwitiyijin mudi Nyikel wetu. Chawiy lel, el tumekeshany pichuku pichuku, pa saa ni saa kamu, mu mwom wetu anch tudi in kumwifukwil Yehova, antu akuyikelay mu Want wend, ni twiyova makij mulong wa kwikal Atuman end. Ni el tusadilany chisu chin chawonsu chitukweta chakwel tumuleja muntu ni muntu ukutesha anch mutapu wa kuyikel wa Yehova wawiy upandakenamu kuwap.
[Chipich chidia pa paj wa 29]
Yehova uding mwant chikupu
[Chipich chidia pa paj wa 31]
Kuziyil cha kwikatin ku mutapu wa kuyikel wa Yehova kuletin uumwing mu mangand
[Chipich chidia pa paj wa 32]
Chom ik Twileja kal Piur pa Mutapu wa Kuyikel wa Nzamb mu . . .
• Kuvurik Yijil 7:7, 8?
• 1 Samwel 8:9-18, NW?
• Hebereu 13:17?
• Kuburik 21:3-5?