Winyikel Wa Satan Ukangen
“Kiyikwikalap yiwamp kudi mukayitil.”—MUL. 8:13.
1. Mulong wak dirumburish diezina dia antu ayimp didi rusangu ritwongojina?
CHIKALAP katat ap machuku ma kurutu muntu muyimp akez kumurumburish. Akez kumurumburish mulong wa yom yasalay. (Jinsw. 5:22; Mul. 8:12, 13) Rusangu riner ritwongojin, pakampwil antu akatina kutentam ni ameshau mar kudi antu ayimmp. Satan Djabul, tatuku wa tuyimp ndiy muntu muyimp nakash ukezau kurumburish pakach pa antu ayimp.—Yoh. 8:44.
2. Mulong wak kwaswirikedina chisu chakwel kuupwish mulong walanka mu Eden?
2 Pasak Satan, wadinga mwin kwitongin nakash, chawiy chayishikijay antu ku kulik umutakel wa Yehova mu Eden. Mudi chibudikin, anvaj etu akusambish inunga ni Satan mulong wa kupwitijan nich ulabu utentamina wa Yehova ni ikala in yitil ku mes Kwend. (Rome 5:12-14) Chakin, Yehova wijika yom yikuyishikena mulong wa kuburen kwau kalimish ni mulong wa wintombuj wau. Pakwez, yitang yawonsu yikweta manangu yadinga yifanyidin kuman patok yibudikin yiney. Chawiy lel, kwadinga kwitin chisu chakwel kuupwish mulong winou ni kumekesh patok anch antombuj inay arumbuka.
3. Mutapu ik tumeninga maguvernema ma antu?
3 Kudiosh palikinau antu umutakel wa Yehova, atenchika milad yau ya ma guvernema. Kambuy Paul, wayifundina ambay nend akaritiy in Rome, wamajimbula maguvernema minam ma antu anch in ‘kuyikel piur.’ Mu machuku ma Paul, in kuyikel piur adinga cha kusambish guvernema wa in Rome watakelay Mwant Nero, muntu wayikela kudiosh mu muvu wa 54-68 C.C. Paul walonda anch in kuyikel piur inay “ayiteka kudi Nzamb.” (Tang Rome 13:1, 2, MM.) Ov, mazu minam marumburikin anch Paul wadinga ulondin anch winyikel wa muntu udi piur pa winyikel wa Nzamb? Chakapuk chaya mwang. Pakwez, ndiy wadinga ulondin kwend kusu anch mu chisu chin chawonsu chikulikay Yehova anch winyikel wa muntu wikalaku, antu afanyidin kulimish “yom yatenchikay Nzamb” ni kuyitiyij angikel inay.
Njil Yiyila ku Kusheshik
4. Lejan mulong wak winyikel wa muntu udi kwau ukangena.
4 Chakin, winyikel wa muntu utakedilau kudiay Satan chakin kamu udi ukangen. Mulong wak? Cha kusambish, chidi mulong kiwimanyidinap pa manangu ma Nzamb. Ching Yehova kusu ndiy ukwetinga manangu mawanyidina. Chawiy lel, ching ndiy kusu udia ntakel wa kuchingejin piur pa chidia winyikel uwanyidina. (Yer. 8:9; Rome 16:27) Pakad kwikal mudi antu, akata chisu chivud kwilejin yom kusutil ku yoziu ni ku kurumbuk, Yehova wijing chisu chawonsu njil yipandakena kuwap ya kusal yom. Ditenchik din diawonsu dia guvernema diakad kulondul umutakel wend udi kwau ukangena. Mulong wa diyingish dined kusu—pakad kwisambin piur pa yitongijok yiyimp—mutapu wa kuyikel wa Satan kusutil ku winyikel wa antu wadinga kwau ukangena kudiosh kamu kwisambishil.
5, 6. Chom ik chimwing chamushikija Satan ku kumubwambwil Yehova?
5 Muntu mwawonsu mwin manangu mawamp ulikining kwend kwiyandjik mu chom chimenay anch chikangen kwau. Pakwez anch wishindil kuya kamu kurutu mu chom chinech, ukushiken ku kujingunin kurumbuk kwend. Rusangu ra muntu rilejen tupamp tuvud anch chidiap cha manangu kumutaliken Sakatang mwin dikand diawonsu. (Tang Jinswir 21:30.) Pakwez, yitongijok yiyimp ya kwiyov ni ya chibud yamupuputisha Satan manangu, ni wakarumuka wadiokal kudiay Yehova. Chawiy, Djabul wiyandjika cha kwisotin mwinjil yiyila ching kusu ku kusheshik.
6 Kurutu nyikel mwin Babilon niyend wikala nich ngikadil ya kwitutul ya Satan, ni amulejen mudi mwin kwibaz mu mazu manam: “Ey watonga kutek ditand diey piur pa atutumbu a Nzamb. Watonga kushakam mudi mwant pa mukandu wakukumangen akish udia mutambu wa kwiyand. Ey watonga kand kukandam piur pa madj mulong wa kufanakan nend Mwin Dikand.” (Isay 14:13-15) Nyikel winou wakad manangu wakangana, ni dijuku dia in Babilon diashikena ku kusheshik kumwing kuyimp. Chawiy chimwing, Satan ni mangand mend makushiken kamu mawonsu katat ak.
Mulong wak Witiyijay?
7, 8. Ik tutanidinamu ku kulik kwa Yehova uyimp mu ka chisu kakemp?
7 Antu amwing akutwish atongin anch mulong wak Yehova kayilikishap antu chakwel alika kuya ku mutambu wa Satan ni chakwel alika kulondul ditenchik dia guvernema wadinga ufanyidina kamu kukangan. Chidia Nzamb Mwin Dikand Diawonsu, wela kutwish kusal yom yiney yawonsu. (Kub. 6:3) Pakwez, kasalap mwamu. Manangu mend mamuleja anch kuyilikin antu mu ka chisu kakemp mu wintombuj kukez kwikal kwa usey chikupu. Chakin kamu, Yehova akez kumuchidij mudi Mwant mwin rukat ni utentamina, ni antu ashinshamena akez kutaninamu mu mupak winou wa Nzamb.
8 Muchid wa muntu wela kudiokal ku mar ing anch walika yisarumon ya Satan ni kulik kand kusot wan ipau ku kudiokal ku winyikel wa nzamb! Ap mwamu, mupak wa Yehova wa kuyilikin antu iyikela ayinau mu ka chisu kakemp udi wa ukwash nakash. Wikadil kal ni usu ukash padiau antu akweta michim yitentamina pa mulong wa kwikal nich manangu ma kumutesh Nzamb ni ma kumuchingejin. Mu kusut kwa yitot ya mivu, antu ashikedin kal mu kupak milad kushalijan ya ma guvernema, pakwez kwikil ap umwing umekena kwikal uwamp nakash. Uman winou wawiy uyikasikeshina in kumwifukwil Nzamb chakwel itiyija kamu anch mutapu wa kuyikel wa Yehova wawiy upandakena kuwap. Chakin, kulikin kwa Yehova winyikel uyimp wa Satan kwawiy kuyiletidina antu mar makash, pamwing ni antu amwifukwidila Nzamb nich kushinshaman. Pakwez, kulik kwa ka chisu kakemp kwa uyimp kuyikwashin kand in kwifukwil inay ashinshamena.
Wintombuj Wasala Anch Amutumbisha Yehova
9, 10. Lejan mutapu ushikedina winyikel wa mu kumutumbish Yehova.
9 Kuyilikin antu ikala mwishin mwa usu wa Satan ni chakwel iyikela ayinau kwashikedin kal ku kupipesh mutapu wa kuyikel wa Yehova. Pakwez, kichidiap mwamu! Rusangu ra muntu rilejen anch mazu malonday Yeremiy, mazu malonday pamupepilau, piur pa kuburen kwa antu ukaliweny wa kwitekel ayinau mu mutapu uwamp. (Tang Yeremiy 10:23.) Chikwau, wintombuj wa Satan wamwinkishin kal Yehova mutapu wa kumekesh ngikadil Yend yiwamp mu mutapu umwing ujim nakash. Mutapu ik chidia mwamu?
10 Mudi mutumena yibudikin yiyimp ya winyikel uyimp wa Satan, pawiy pamekena patok ngikadil yiwanyidina ya Yehova kupandakanamu mudi muchela kwikal mu mutapu windjing. Mwinjil yiney mwawiy mumutumbishinau ku mes kwa antu amukatina. Inge, chom chinech chimeken mudi anch chipwitijadin, mutapu wa kuyikel wa Satan chakin kamu wakwasha mulong wa kumutumbish Nzamb. Washikedin mu kukasikeshin usey upandakena wa mutapu wa Yehova wa kusal pantaliken nich kuusarumun ukaleng wend. Chakwel anch tutesha uyakin winou, tushinshikinany mu wiswimp ngikadil ya Yehova chakwel tumana mutapu winyikel uyimp wa Satan wamushikija Yehova ku kumekesh ngikadil yiney mu jinjil jikwau.
11. Mutapu ik washikena rukat ra Yehova ku kumekan?
11 Rukat. Mifund yitulejin anch “Nzamb udi rukat.” (1 Yoh. 4:8) Cha kusambish, rukat rawiy ramubachika Nzamb chakwel amutanga muntu. Chikwau, mutapu wamushena ni ukwatishena wom watutangany yilejen uman wa rukat ra Nzamb. Yehova watenchikina kand antu ndond yiwamp ya kushakam mudia yom yawonsu yiswiridinau mulong wa musangar wau. (Dis. 1:29-31; 2:8, 9; Kus. 139:14-16) Pakwez kudi uyimp umwing wandama mu dijuku dia muntu, chawiy kand Yehova wamekesha rukat mwinjil yikwau yisu. Mutapu ik? Kambuy Yohan wafunda mazu malonday Yesu anch: “Nzamb wakata ngand, ndiy wapana Mwanend wa kuval kwend umwing chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” (Yoh. 3:16) Ov, kudi njil yipandakenamu kudi Nzamb ya kuyimekeshin antu rukat rend kusut kumutum Mwanend kapokal panap pansh mulong wa kuyiland in yitil? (Yoh. 15:13) Chijingidin chinech cha rukat rijim chakwasha kand mudi chilakej kudiau antu, chayinkisha mutapu wa kumekesh rukat ra kwipan kudiay Nzamb mu mwom wau wa pichuku ni pichuku, mudi kamu mwasalay Yesu.—Yoh. 17:25, 26.
12. Mwinjil ik mumekediina usu wa Yehova?
12 Usu. Ching kusu “Nzamb wa dikand diawonsu,” ukweta usu wa kutang mwom. (Kubur. 11:17; Kus. 36:9) Pavadikiningay muntu, uding kwend wamwamu, mudi dipaper pakad kufund ap dinans. Pakufay, ukwikal wafunda kal yom yivud pa dipaper dined kusutil ku mipak yend, yisal yend, ni yom yikwau yikusalay mu mwom wend yikumekesha untu wend. Yehova ukutwish watek jinsangu jinej jawonsu mwi ndond kanang mu manangu mend. Pa chisu chatekay kal, Yehova ukutwish wamuchirish kand muntu winou ku mwom, ni untu wend win wawonsu. (Yoh. 5:28, 29) Chawiy lel, ap anch kiradingap mu rutong ra kusambish ra Nzamb mulong wa muntu, rufu ramwinkishin kal Yehova mutapu wa kumekesh anch ukwet usu wa kuyichirish kand afu ku mwom. Chakin kamu, Yehova udi “Nzamb wa dikand diawonsu.”
13. Mulambu wa Yesu wadinga chijingidij cha kutentam kuwanyidina kwa Yehova mu mutapu ik?
13 Kutentam. Yehova kakatap kudimban; ni kakusalangap yom yakad kutentam. (Kuv. 32:4; Titus 1:2) Ulondwiling ching yijidik ya piur ya uyakin ni kutentam, ap anch kusal mwamu kukutwish kwikal nich yibudikin yiyimp ku mutambu wend. (Rome 8:32) Chadinga chisansena mudi ik ku mutambu wa Yehova pa kumuman Mwanend mukatish wafil pa mutond wa mar mudi anch Yesu wadinga mwin kusalan! Pakwez, mulong wa rukat rijim pantaliken nau antu akad kuwanyin, Yehova wadinga tayad kulikin chishiken chinech chisansena chisadika mulong wa kukasikeshin kuwanyin kwa yijidik yend yitentamina. (Tang Rome 5:18-21.) Mangand makad kutentam mamwinkisha Yehova mutapu wa kwimekesh amwinend anch udi wa kusambish mu kutentam.
14, 15. Mu jinjil ik chikwau mukedina manangu mapandakena ma Yehova ni kushimpish kwend?
14 Manangu. Pinipa kamu pasalay Adam ni Eve chitil, Yehova wisambisha patok piur pa mutapu ukezay kurijek kand yom yawonsu yiyipina mulong wa wintombuj. (Dis. 3:15) Chisal chinech cha kapamp kamwing, pamwing ni kuyilej atushapolend pakemp pakemp mukwikadila yom, wasala anch manangu ma Yehova mamekana patok. (Rome 11:33) Kwikil chom chikutwisha kumukangesh Nzamb kupwish milong mu mutapu uwamp. Mu mangand mizwila too masandj, jinjit, kuburen kwisikan, kubwambwil, kuburen kujikitish, kasolikany ni rubabek, Yehova wikadil kal ni mitapu yivud ya kuyimekeshin yitang yend mudi mudia manangu makin. Mwin kwilej Yakob walonda anch: “Chiyul chidiokila mwiur, pakusambish chidi zwang, chad ni chisambu ni kwitudish, chinzuril ku kujingunin, chizwil sens ni riy ni mabuj mawamp, kichikwetip ntad ap kubabek.”—Yak. 3:17.
15 Kushimpish ni Kwitudish. Chakin kamu, ngikadil ya Yehova ya kushimpish ni kwitudish yela kwikal pa ndond ya kusambish mu mutapu wend wa kuyisadil antu akad kuwanyin, akayitil ni in kurumbok. Kusot kwa Yehova kusal mwamu mu kusut kwa tunan twa mivu kumekeshin anch ndiy ukwet ngikadil yiney yikwamushena mu chilik chimwing chiwanyidina nakash, ni chawiy tufanyidina kwikal in kujikitish. Kambuy Pita walonda kamu nawamp anch tufanyidin kuchind “kushimpish muchim kwa Mwant wetu kwawiy dipandish.”—2 Pita 3:9, 15.
16. Mulong wak muchim wa kulikishin wa Yehova udi musul wa musangar ujim?
16 Muchim wa Kulikishin. Etu awonsu tudi akayitil, ni etwawonsu tukat kurumbok chisu ni chisu. (Yak. 3:2; 1 Yoh. 1:8, 9) Tufanyidin kwikal in kujikitish nakash mudi ik mulong Yehova ukwet muchim wa ‘kulikishin swa’! (Isay 55:7) Tushinshikinany kand uyakin unou: Chitwavadika antu akayitil akad kuwanyin, tudi mu mashakamin mamwing ma kumekesh musangar wetu ujim nakash pakatay Nzamb kutulikishin kurumbok kwetu. (Kus. 51:5, 9, 17) Anch muntu ni wimen amwinend ngikadil yiney yisangareshina ya Yehova yikasikeshining rukat retu mulong wendendiy ni kutukasikesh chakwel tulondula chilakej chend mu mutapu wa kuyisadil antu akwau.—Tang Kolosay 3:13.
Mangand Madjit Kazang
17, 18. Mu jinjil ik ukangena mutapu wa kuyikel wa Satan?
17 Ditenchik diawonsu dia Satan—chibudikin cha mutapu wend wa kuyikel—ukangan chisu ni chisu ni mu kusut kwa yitot yivud ya mivu. Mu muvu wa 1991, jurnal The European wafunda anch: “Mangand madjit kazang? Inge, chakin kamu, pakwez . . . chidiap chisal cha Nzamb— antu ayinau awiy ayedisha mangand.” Chakin kamu! Chikalau mu usu wa Satan, anvajetu a kusambish atonda winyikel wa antu pa ndond ya winyikel wa Yehova. Chawiy chatenchikau mulad wa guvernema wadinga ufanyidina ching kukangan. Kusansan ni mar mamenau antu mu mangand mawonsu yidi yijingidij yimekeshina anch winyikel wa muntu wadjadil kal kazang.
18 Mutapu wa kuyikel wa Satan udi ching ni choy kusu. Pakwez, choy chikezap kupandakan rukat dichuku ap dimwing, rukat rawiy mufulandal wa winyikel wa Yehova. Mutapu wa kuyikel wa Satan wakangen kal kulet mashakamin mawamp, chisambu ap diking. Mutapu wa kuyikel wa Yehova ching akuuchidij! Ov, kudi uman utukweta wa katat ulejena uyakin winou? Inge, tukuuman mu mutu wa mulong ulondwilaku ou.
[Chipich chidia pa paj wa 25]
Antu katanyidinamwap mu winyikel wa Satan
[Chipich chidia pa paj wa 25]
U.S. Army photo
[Chipich chidia pa paj wa 25]
WHO photo by P. Almasy
[Chipich chidia pa paj wa 26]
Yehova ukwet usu wa kuyichirish kand afu ku mwom
[Chipich chidia pa paj wa 27]
Rukat ni kutentam kwa Yehova yamekena mu mulambu wa Mwanend
[Chipich chidia pa paj wa 27]
Yom ik Twileja kal Piur pa Winyikel mu Maverse Manam . . .
• Rome 13:1, 2?
• Jinswir 21:30?
• Yeremiy 10:23?
• Kolosay 3:13?