BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • w15 1/5 map. 9 ​-​ 13
  • Babalany—Satan Usotin Kukudiany!

Kwikil video ukimbina

Video winou umukimbinap amboku nawamp.

  • Babalany—Satan Usotin Kukudiany!
  • Chinong cha Kalam Chilejen Want wa Yehova—2015
  • Tumitu twa milong
  • Yom Yifanakena
  • SATAN UDI NI USU
  • SATAN UDI MWIN CHISUM
  • SATAN UDI MUKAMAKASU
  • Mwijika Mukankuny Ney
    Chinong cha Kalam Chilejen Want wa Yehova—2018
  • Djabul Udi Nnany?
    Nzamb Witin Etu Tusal Ik?
  • Ov akankuny a Nzamb adi anany?
    Ukutwish Kwikal Murund wa Nzamb!
  • Ukutwish Kurish Nend Satan—ni Kumuwin!
    Chinong cha Kalam Chilejen Want wa Yehova—2015
Chinong cha Kalam Chilejen Want wa Yehova—2015
w15 1/5 map. 9 ​-​ 13

Babalany​—Satan Usotin Kukudiany!

“Babalany! Mukankuny nen, Sakudimban ukat kuzomb mudi ntambu wonyina ukata kukimb nany ukudiay.”​—1 PITA 5:8.

OV, MUTAPU IK UKATAY SATAN KUMEKESH ANCH UDI . . .

  • ni usu?

  • mwin chisum?

  • mukamakasu?

1. Rumburil mutapu washikenay mwangel kwikal Satan.

CHISU chimwing, Satan wading wovijadin nawamp ni Nzamb. Pakwez, chitang chinech cha muspiritu ap mwangel mwinou wakimba anch antu asambisha kumwifukwil. Pa ndond pa kulik swaa chitongijok chinech chiyimp, ndiy walika chakwel chikula djat ni ku chitil. (Jak. 1:14, 15) Twijingap dijin diend dia kwinsambishil, pakwez tumutazukining anch Satan, mulong “uyakin kiudiap mwi ndiy.” Wamubwambwila Yehova ni wikala “tatuku wa makasu.”​—Yoh. 8:44.

2, 3. Majin “Satan,” “Djabul,” “nnak,” ni “iyazangomb,” ov, mamekeshin ik piur pa mukankuny mujim wa Nzamb?

2 Kudiosh kamu pabwambwilay, Satan wamekesha anch udi mukankuny mujim wa Yehova, ni kadingap murund wa antu. Dijin dikwetay Satan dimekeshin kujimb kwa kuyip kwend. Dijin Satan dirumburikin anch “mwin kubwambwil,” chimeken anch chitang chinech cha mu spiritu chikutwishap kukwash ukaleng wa Nzamb; chinyim ni chinech, Satan ukwet rukis ni urishikishin ukaleng winou nakash. Chom chijim chisotinay Satan chidi kukangesh umutakel wa Yehova.

3 Mu Kujingunik 12:9, Satan amutazukin anch Djabul, dijin dirumburikina anch “mwin kudimban makasu.” Chinech chitulejin anch Satan wamupipeja Yehova pa kumutazuk anch mwin makasu. Dijin “nnak mukur,” dituvurishin mutapu wasadilay nnak mulong wa kumudimb Ev mu chir cha Eden. Dijin “Iyanzangomb mujim” diwapin piur pa Satan, mulong udi mwin chisum, muyimp mudi iyazangomb ni ukwet kuswir kwa kukangesh rutong ra Yehova chakwel kangal risadika ni usotil kujiyish antu a Nzamb shitit.

4. Ov, chom ik tukwambambina mu mutu wa mulong winou?

4 Chakin kamu, Satan urishikishin nakash kushinshaman kwetu. Chawiy chitubabeshinay Bibil anch: “Ilamany ayinen, babalany! Mukankuny nen, Sakudimban ukat kuzomb mudi ntambu wonyina ukata kukimb nany ukudiay.” (1 Pita 5:8) Mu kovijan ni kubabesh dined, mutu wa mulong winou, ukushinshikin mikadil yisatu ya Satan, yimekeshina mulong wak tufanyidin kwilam ayinetu kudiay mukankuny mwinou muyimp wa Yehova ni wa antwend.

SATAN UDI NI USU

5, 6. (a) Pan yilakej yimekeshina anch yitang ya muspiritu yikweting “usu nakash.” (b) Ov, mutapu ik udiay Satan muntu “ukweta ukash wa kulet rufu”?

5 Angel akweting “usu nakash.” (Kus. 103:20) Ayipandikenamu an a antu ni akweting usu nakash ni manangu. Pakwez, angel ashinshamena akat kusadil usu wau mu mutapu uwamp. Chilakej, chisu chimwing, mwangel wa Yehova wajipa akankuny 185 000 adinga amasalay a in Asiria​—kwikil muntu wafanyina kutwish kusal mwamu ni chading chikash ap kudi chisak cha amasalay. (2 Ant 19:35) Chisu chikwau, mwangel wasadila usu wend ni manangu mulong wa kuyibudish atwimbuy a Yesu mu rukan. Ap anch atulam a rukan ading iminy ku chis mulong wa kulam, kijikap chisu chazurilau ku chis ni chayibudishau atwimbuy ni chisu chapatau ku chis!​—Mid. 5:18-23.

6 Angel ashinshamena akat kusadil usu mu mutapu uwamp, pakwez Satan ndiy ukat kusadil usu wend mulong wa uyimp. Usu ni yibachikin mud ik yikwetingay! Bibil umutazukin anch “mwin kutakel wa mangand minam” ni “[nzamb, NWT] uyikedila mangand minam.” (Yoh. 12:31; 2 Kor. 4:4) Satan Djabul ndiy “ukweta ukash wa kulet rufu.” (Heb. 2:14) Chinech chirumburikinap anch Satan ukat kuyijip antu awonsu mu mutapu umekena. Pakwez, ngand yiney yizwil nich yitongijok yiyimp ni mikadil ya chisum ya mwin kujipan winou Satan. Chikwau kand, mulong Ev witiya makasu ma Satan, Adam wamubwambwila Nzamb, chitil ni rufu yashika kudi antu awonsu. (Rom 5:12) Mu mutapu winou, Djabul udi muntu “ukweta ukash wa kulet rufu.” Chawiy chamutazukau kudi Yesu anch: “mwin kujipan.” (Yoh. 8:44) Satan udi chakin kamu mukankuny wa usu.

7. Ov, mutapu ik umekeshinau ayilembil anch akwet usu nakash?

7 Anch twarish nend Satan, tukutwish kand kurish nau antu awonsu adia ku mutambu wend ni abwambwidila ku umutakel wa Nzamb. Pakach pa antu inay padi kand angel ambwambwol ap ayilembil. (Kuj. 12:3, 4) Yisu yivud, akat kumekesh anch ayisutinamu antu usu, ni ayimeshining antu mar nakash. (Mat. 8:28-32; Mar. 5:1-5) Tufanyidinap kuvuramen usu ukwetau angel inay ayimp ap wa “mukurump wa ayilembil.” (Mat. 9:34) Pakad ukwash wa Yehova, tukutwishap kuwin njit jidia pakach petu ni Satan.

SATAN UDI MWIN CHISUM

8. (a) Ov, rutong ik rikwetay Satan? (Tal chipich cha kwinsambishil.) (b) Mudi muumena, ov, mutapu ik umekeshina mangand minam mwikadil wa chisum wa Satan?

8 Kambuy Pita walonda anch Satan udi mudi “ntambu wonyina.” Buku umwing urumburil anch dizu dia Grek dikarumwinau anch “wonyina” dirumburikin “kudil kwa nnam ukweta usu nakash.” Chidi chiwamp mud ik kwijik chisum ni mwikadil uyimp wa Satan! Ap anch ndiy utakedina mangand mawonsu, ukwet ujim nakash kudi antu avud. (1 Yoh. 5:19) Satan umen mangand mudi ‘yakudia.’ Pakwez, usadin usu wa kudia ‘yakudia yikatinay nakash’​—in Kristu azizidilau many, ni arund nau ayikwashina, “amikoku akwau.” (Yoh. 10:16; Kuj. 12:17) Rutong ra Satan ridi ra kujiyish antu a Yehova. Kuzengol kukash kwasadinay piur pa in Kristu a mu mivu chitot ya kusambish kushik ni nlel kumekeshin mwikadil wa chisum wa Satan.

9, 10. (a) Ov, mutapu ik warishikishay Satan muchidi wa Isarel? (Pan yilakej.) (b) Ov, mulong wak Satan wading ni diyingish dia pakampwil dia kuyipompat in Isarel? (c) Ov, mutapu ik utongina piur pa mutapu ukatay Satan kwiyov anch kashalapol wa Yehova wasal chitil chijim?

9 Mulong wa kuwanyish rutong rend, Satan wimekeshin amwinend mudiay mwin chisum mu mutapu ukwau. Ntambu kakwovangap riy mulong wa nnam usotilay kudia. Kakumwanakenangap nnam kurutu kwa kumujip ap kupwa kwa kumujip. Chilik chimwing, Satan kakwetingap riy mulong wa antu asotinay kudia. Chilakej, tong mutapu wovay Satan Djabul chisu chawilau in Isarel mu chitil cha masandj ni cha ris. Piutangina ni kushinshikin piur pa yibudikin yiyimp yamekana mulong wa chisal cha masandj chasalay Zimiri ni ris ra Gehazi, ov, ukutwish ‘kuman’ mutapu wovay Satan musangar mulong wa kuwin kwend?​—Kuch. 25:6-8,14, 15; 2 Ant 5:20-27.

10 Satan wading ukwet mayingish majim ma kuyipompat in Isarel a pasak. Vurikany anch Mesia wafanyina kubudikin mu muchidi winou​—muntu wafanyina kumujiyish Satan ni kumekesh anch Yehova ndiy uwanyidina kutakel. (Dis. 3:15) Satan kakatap anch in Isarel itapila dilau dia Yehova, ni wading kusal usu wend wawonsu chakwel awiy asala yitil. Kangal watong anch Satan wamwovila David riy chisu chasalay masandj, ap Moses chisu chakanganyay kwandam mwi Ngand ya Kushilamu. Satan ukat kwovang musangar nakash anch kashalapol wa Yehova wasal chitil chijim. Mu win yakin, Satan ukat kusadil kuwin kwinoku mulong wa kumusarumun Yehova.​—Jinsw. 27:11.

11. Ov, mulong wak Satan wading kumupompat Sara?

11 Satan wapompata kand nakash dijuku diafanyinay kuvadikin Mesia. Chilakej, shinshikin chashikena chisu chamulejau Aburaham kudi Yehova anch ukwikal “muchid ujim.” (Dis. 12:1-3) Chisu chashikay Aburaham ni Sara mu Idjibit, Farao wamusenda Sara ku chikumbu chend​—chakwel ikala mukajend. Pakwez, Yehova wamukinga Sara ni wamukwasha kudokal mu mashakamin mayimp minam. (Tang Disambishil 12:14-20.) Kurutu kwa kumuval Isak, chom chinech chamusadikina kand ku Gerar. (Dis. 20:1-7) Ov, Satan ndiy wasadisha yom yiney? Vurik anch Sara washa musumb wa Ur wading ukweta mapit mavud nakash mulong wa kwez kushakam mu antent, ov, wafanyina kwitiy amudimba ni yikumbu yiwamp ya Farao ni ya Abimelek? Ov, Satan watonga anch Sara wafanyina kumurumbukin nfumwend​—ni Yehova kand—​chakwel achika kudi ant inay mu masandj? Bibil kalondinap yom yiney, pakwez tukwet mayingishin mawamp mulong wa kwitiyij anch Djabul ndiy watenchika yom yiney chakwel akangesha anch mbut kangal yabudikin kudiay Sara. Satan kelap kunenganan anch uruw wa mband winou wafa, ni anch mwikadil uwamp ni urund wend ni Yehova wayipa. Chisum mud ik cha Satan!

12, 13. (a) Ov, mutapu ik wamekeshay Satan chisum chend chisu chavadikay Yesu? (b) Ov, chitongijok cha Satan chidi nchik piur pa ansand amukatila Yehova ni asadina usu wa kumusadil nlel?

12 Yesu wavadika kwasuta kal mivu yivud kwinyim kwa Aburaham. Satan kafanyinap kumuman mwan mwinou mudi mwan muwamp bwat. Pakwez wading wij anch mwan winou, wafanyina kukul ni kwez kwikal Mesia washilaumu. Chakin kamu, Yesu wading chikunku cha mbut ya Aburaham, ni muntu wafanyina “kushesh midimu ya Sakudimban.” (1 Yoh. 3:8) Ov, Satan wafanyina kuman anch kumujip mwan winou chading chom chiyimp? Satan kadingap kutongin piur pa uwamp ap uyimp. Ni wasala usu wa kumujip Yesu pachadingay mwanikanch. Ov, mutapu ik?

13 Pamulejau mwant Herod kudi in manangu anch kwavadikang kal “mwan ukeza kwikal mwant wa in Yuda,” wova ujim nakash ni wakwata mupak wa kumujip. (Mat. 2:1-3, 13) Chakwel ikala nich kashinsh anch mwan winou amujip kal, wapana mbil ya kujip an awonsu akweta mivu yaad ni mwishin a mu Betlehem ni mu makunku ma piswimp. (Tang Mateu 2:13-18.) Yesu kafap mudi mwatenchikau kudiay Herod, pakwez, ov, chom chinech chitulejin ik piur pa mukankuny wetu Satan? Chimeken anch Djabul kakatap kusend mwom wa antu nich usey. Kakatap kand kusend mwom wa an akemp nich usey. Satan ukat chakin kamu ‘kwon mudi ntambu.’ Tufanyidinap kuvuramen anch Satan udi mwin chisum.

SATAN UDI MUKAMAKASU

14, 15. Ov, mutapu ik ‘uyibwikinay Satan antu akad kwitiyij’?

14 Mutapu umwing ukatay Satan kusadin chakwel antu alika kumukat Yehova Nzamb udi makasu. (1 Yoh. 4:8) Satan ukat kusadin makasu mulong wa kuyikangesh antu kwijik anch akwet ‘kuswir kwa yom ya Nzamb mu michim yau.’ (Mat. 5:3) Satan ‘wabwikin kal mes ma antu akad kwitiyij, chakwel akanganya kuman chimunyik cha rusangu ruwamp ra uyaj wa Kristu, ndiy kamu ufanikena ni Nzamb.’​—2 Kor. 4:4.

15 Mutapu umwing ujim ukatay Satan kusadil mulong wa kuyidimb antu udi relijon wa makasu. Musangar mud ik ukatay kov payimeningay antu ayifukwil lel angakau, yitang, ap annam​—kumwifukwil muntu ap chom chikwau pa ndond pa kumwifukwil Yehova, udia “Nzamb wa mukau”! (Kub. 20:5) Cha ushon, ap antu atongininga anch akat kumwifukwil Nzamb mudi muchidia, adandamedin kusadil difukwil dia makasu ni yom yakad usey. Adi mu mashakamin mamwing ni in Isarel, Yehova wayileja anch: “Ov, mulong wak usheshinanya nfalang jen ku yom yakad kwikutishan? Ov, mulong wak usheshinanya difut dien, chad udiany kand nich nzal? Ziyilany, usalany mudi mudia dizu diam. Mwamu ukusangarany nich yakudia yipandakena kuwap.”​—Isay 55:2.

16, 17. (a) Ov, mulong wak Yesu wamwela Pita anch: “Sut kwinyim kwam, Satan”? (b) Ov, mutapu ik ukutwishay Satan kutudimb chakwel tulika kushal ababela?

16 Satan ukutwish kuyidimb ap atushalapol a Yehova akweta mushiku. Chilakej, shinshikin chashikena chisu chalonday Yesu anch rufu rend rashej kal piswimp. Nich yitongijok yiwamp, Pita wamutazuka waya nend kuns ni wamuleja anch: “Nsalejam, chakapul chaya mwa! Yom yiney kangal yashik kudi en, mwan!” Yesu wamwakula Pita anch: “Sut kwinyim kwam, Satan, (NWT)!” (Mat. 16:22, 23) Ov, mulong wak Yesu wamwela Pita anch “Satan”? Mulong Yesu wading wij chom chading chifanyidina kumushiken. Chisu chading chashej kal mulong wendendiy kufa mudi mulambu wa difut ni kumekesh anch Satan udi mukamakasu. Chisu chinech chading chiyimp mu rusangu ra muntu, chadingap chisu cha Yesu ‘kwitongin’ amwinend. Satan wafanyina kusangar nakash anch Yesu kababalap.

17 Mulong nsudiel ya ditenchik dia yom dined yashik kal piswimp, ni yetu tudi mu chisu chiyimp nakash. Satan usotil anch tulika kwikal ababela, ni ‘tutongang’ ching piur pa mashakamin metu mulong wa kwikal ni mashakamin mawamp nakash mu mangand minam. Kangal chom chinech chikushikena! Pakwez, “babalany.” (Mat. 24:42) Kangal witiyany makasu mapalangeshinay Satan anch disudiel dikushikap katat​—ap anch dikwezap kwau.

18, 19. (a) Ov, Mutapu ik ukutwishay Satan kupakish kutudimb chakwel twitiya anch Yehova katukatinap? (b) Ov, mutapu ik utukwashinay Yehova chakwel twilama ayinetu ni tushala ababela?

18 Satan ukutwish kutudimb mu mutapu ukwau. Ukutwish kutubachik chakwel twitiyija anch Nzamb katukatinap ni anch kakezap kutulikishin yitil yetu. Mawiy makasu mapalangeshinay Satan. Mu win yakin, ov, nany wakadiay Yehova kukat chakin kamu? Udi ching Satan. Nany ukutwishau kulik kulikishin chakin kamu kudiay Yehova? Udi ching Satan. Pakwez Bibil utushinshikidin anch: “Nzamb utentamin, ndiy kakutwishap kuvuramen yisalijok yen ap rukat ruumekeshinanya [mulong wa] dijin diend.” (Heb. 6:10) Yehova ukat kusanger usu tusadina mulong wa kumusangaresh, ni mudimu wetu tumusadidina udiap wa chamwamu. (Tang 1 Korint 15:58.) Chawiy lel, kangal twitiyany makasu mapalangeshinay Satan.

19 Mudi mutwileja kal, Satan ukwet usu, udi mwin chisum, ni udi mukamakasu. Ov, mutapu ik tukutwisha kuwin njit turishina ni mukankuny winou? Yehova ukutukwash mwi njit jinej. Dizu diend ditulejin piur pa milad yikatay Satan kusadin, ni “twij kal nawamp yom yitenchikinay.” (2 Kor. 2:11) Anch twajingunin mitapu ya mipit kushalijan yikatay Satan kusadil, tukutwish chad kwilam ayinetu ni kushal ababela. Pakwez, tufanyidinap kwimen ching pa kwijik mipit yend, chad tufanyidin kwijik kand yom yikwau. Bibil ulondin anch: “Rishany nend Sakudimban, chad ndiy ukukuchinany kulemp.” (Jak. 4:7) Mutu wa mulong ulondwilaku ou ukwisambin yom yisatu yikutwisha kutukwash kurish nend Satan ni kumuwin.

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan