Difundish dia 8

Ov akankuny a Nzamb adi anany?

Satan Djabul ndiy mukankuny wa kusambish wa Nzamb. Udi chitang cha muspiritu chamubwambwila Yehova. Satan udandamedin kurish ni Nzamb ni kulet ruvundu rujim kud antu. Satan udi muyimp. Udi mwin makasu ni njipan.—Yohan 8:44.

Yitang yikwau ya muspiritu yinunga ni Satan mu wimbwambol wend pantaliken ni Nzamb. Baibel uyitazukin anch ayilembil. Mud Satan, ayilembil adi akankuny a antu. Asotiling kuyimesh antu mar. (Mateu 9:32, 33; 12:22) Yehova ukujiyish Satan nau ayilembil end chikupu. Kwayishadil kal kachisu kakemp chakwel kuyimesh antu mar.—Kujingunik 12:12.

Anch usotil kwikal murund nend Nzamb, ufanyidinap kusal yisotilay Satan anch usal. Satan nau ayilembil end amukisin Yehova. Adi akankuny a Nzamb, ni asotil kukwikalish niyey mukankuny wa Nzamb. Ufanyidin kutond nany usotila kusangarish—Satan ap Yehova. Anch usotil mwom wa chikupu, ufanyidin kutond kusal rusot ra Nzamb. Satan ukwet mafef mavud ni milad yivud ya kuyidimb nich antu. Ukat kuyizezalesh antu avud.—Kujingunik 12:9.