Dilejan dia 4
Djabul Udi Nnany?
Satan Djabul—wadiokala kwisu? (1,2)
Ov ukat kushadishang antu mutapu ik? (3-7)
Mulong wak tufanyidina kumurishish? (7)
1. Dizu “djabul” dirumburikin mwin kulond makasu mayimp piur pa muntu mukwau. “Satan” dirumburikin mukankuny ap mukarupompat. Mawiy majin mamupidilau mukankuny mujim wa Nzamb. Pasak, wadinga mwangel uwanyidina wa Nzamb mwiur. Chad, weza kwitongin amwinend nakash kusut ni wasota kwifukwil kumufanyindina ching Nzamb kusu.—Mateu 4:8-10.
2. Mwangel winou Satan walonda kud Ev kusutin nnak. Kwa kumulejang ndiy makasu, wamushikija kumubwambukin Nzamb. Satan mwamu wasarumuna chitazukinau anch “win-mangand” wa Nzamb, ap ndond yend mud Uzambukina Nakash. Satan watadikina ang Nzamb ukat kuyikel mwi njil yifanyidina ni mu yom yisutina kuwap ya antwend. Satan watadikisha kand ang akaantu elanga kwikal in kushinshaman kud Nzamb. Mwi njil yiney Satan wikarumuna amwinend mukakuny wa Nzamb. Wawiy mutapu wezau kumupil Satan Djabul.—Disambishil 3:1-5; Yob 1:8-11, NW; Kuburik 12:9.
3. Satan ukat kupim kuyidimb dimb antu mu kumwifukwil ndiy. (2 Korint 11:3, 14) Njil yimwing yikatay kushadishin antu udi relijon wa makasu. Ang relijon ukat kufundish makasu piur pa Nzamb, winou ukat kusadin chakinchakin rutong ra Satan. (Yohan 8:44) Antu adinga yid ya marelijon akutwish kwitiyij ni muchim utok anch akat kumwifukwilang Nzamb wakin. Pakwez awiy akat kumusadilang chakinchakin Satan. Ndiy udi ‘Nzamb wa mangand minam.’—2 Korint 4:4.
4. Ritiyin aspiritu yidi njil yikwau ya Satan kulet antu mwishin mwa usu wend. Akat kutazuk aspiritu ayilamaku, ayisala akwau nayimp, alejana yom ya kurutu, ap kusal yilay. Satan ndiy usu uyimp udinga kwinyim kwa yisalijok yiney. Chakwel tumusangaresha Nzamb, tufanyidin kudjibwil kulemp ritiyin aspiritu.—Kuvurik Yijil 18:10-12, NW; Midimu 19:18, 19.
5. Satan ukat kand kushadish antu kusutin dibazin ulomb wa chikit kupandikena chilik ni kwifukwil kwa yirijek ya politik. Antu akwau akat kuman anch ngand yau ap ulomb wa chikit wau udi uwamp nakash kusut wa akwau. Pakwez kichidap chakin. (Midimu 10:34, 35) Akwau akat kutal kudiau yirijek ya politik mulong wa kutenchik matat ma antu. Mukusalang chinech, akat kudjibwilang kulemp Want wa Nzamb. Udi ching kwau wawiy dipwishil dia matat metu.—Daniel 2:44, NW.
6. Njil yikwau yikatay Satan kushadishin antu yidi kuyozang nich nswir ja chitil. Yehova ukat kutulej etu tulika yisalijok ya chitil mulong wij anch yikutusal etu nayimp. (Galatia 6:7, 8) Antu akwau akusot ey wambatana nau mu yisalijok mud yiney. Chad, vurik, Satan ndiy ukusotina ey kusal yom yiney.—1 Korint 6:9, 10; 15:33.
7. Satan ukutwish kusadin kuzengol ap rupompat kukudiosh kudiay Yehova. Amwing pakach pa akatish ney akutwish kujiman nakash mulong ukat kwilejang Baibel. Akwau akutwish kukusadin misil. Pakwez ey usotin kumusangaresh nnany? Ov udioshin mwom wey kud nnany? Satan usotin kukwovish ey wom chilik cha kukukangesh kwilej piur pa Yehova. Pikil umulikin akuwina! (Mateu 10:34-39; 1 Pita 5:8, 9) Kwa kumurishishang Djabul, ukutwish kumusangaresh Yehova ni kumukesh anch ukat kukasikesh win-mangand Wend.—Jinswir 27:11.
[Captions on page 9]
Relijon wa makasu, ritiyin aspiritu, ni kwibazin ngand (wanangand) yikat kushadish antu
Murishisha Satan mu kudandamenang kwilej piur pa Yehova