Ukutwish Kurish Nend Satan ni Kumuwin!

1. (a) Ov, mulong wak njit turishina nend Satan jidi ja usey nakash mu machuku minam? (b) Ov, mutapu ik twija anch chitwishikin kuwin njit turishina nend Satan?

SATAN urishin njit ni azizidilau many achidia kal ni mwom pa divu ni “amikoku akwau.” (Yoh. 10:16) Rutong ra Sakudimban ridi ra kuyidia atushalapol avud a Yehova mudi mukatinay mu chisu chinech chikemp chamushadina kal. (Tang Kujingunik 12:9, 12.) Ov, tukutwish kumuwin Satan mwi njit jinej? Mwaning! Mulong Bibil ulondin anch: “Rishany nend Sakudimban, chad ndiy ukukuchinany kulemp.”​—Jak. 4:7.

2, 3. (a) Ov, mulong wak Satan usotin anch antu alika kwijik anch udingaku? (b) Ov, mutapu ik wija anch Satan udiaku chakin?

² Antu avud apipejining kwau chitongijok cha kulond anch Satan udingaku. Atongining anch, Satan ni ayilembil jidi kwau jinsangu ja kutongin, ma filim mayimp nakash makwatishena wom, ni masengan ma video. Antu mudi inay atongining anch muntu ukweta manangu kakutwishap kwitiy anch kuding a spiritu ayimp. Katat, ov chidi kumwovish Satan ujim ang watong anch ndiy ni ayilembil end kadingakwap? Bwat kwau! Chidi chakin anch, chimuswapedining Satan kuyibwik pa mes antu akata kutadik piur pa kwikalaku kwend. (2 Kor. 4:4) Kupalangesh chitongijok cha kulik kwikalaku kwa a spiritu ayimp udi mutapu umwing ukatay Satan kusadin mulong wa kuyidimb antu.

³ Etu atushalapol a Yehova, tudiap pakach pa antu akatay Satan kudimb. Twijing anch Satan udiaku chakin, mulong ndiy walonda nend Ev pasadinay nnak. (Dis. 3:1-5) Satan wamusarumuna Yehova piur pa Job. (Job 1:9-12) Ndiy kand wapaka kumwoz Yesu. (Mat. 4:1-10) Kupwa kwa kuvadik kwa Want wa Nzamb mu muvu wa 1914, Satan ndiy wabutula “njit” nau azizidilau many achidia kal ni mwom pa divu. (Kuj. 12:17) Njit jinej jichidandamedin mulong Satan usadin usu wa kujiyish ritiy ra azizidilau many achidia kal ni mwom pa divu ni amikoku akwau. Mulong wa kuwin njit, tufanyidin kurish nend Satan ni kwiman dang mu ritiy. Mutu wa mulong winou ukwisambin pa mitapu yisatu ya kusal mwamu.

LIK KWIBAZ

4. Ov, mutapu ik wamekeshay Satan anch udi kamu mwin kwibaz?

⁴ Satan uding mwin kwibaz. Mwangel winou muyimp, warishikisha pakad wom ukaleng wa Yehova ni wabachika yitang yikwau yimwifukwila ndiy pa ndond pa kumwifukwil Yehova, ni washa chilakej chiyimp cha kwibaz ni chibud. Chawiy lel, mutapu umwing kusu tukutwisha kurish nend Satan, udi wa kulik kwibaz ni kusal usu wa kwikal in kwikepish. (Tang 1 Pita 5:5.) Pakwez, kwibaz chom ik? Ov, kuding chisu chawonsu kuyimp?

5, 6. (a) Ov, kwibaz kuding chisu chawonsu kuyimp? Rumburil. (b) Ov, kwibaz kwa mutapu ik ku dia kuyimp, ni yilakej ik ya mu Bibil yimekeshina chom chinech?

⁵ Ndinguril umwing urumburil kwibaz mudi “mwikadil wa kwitongin anch ukwet katumb ni kalimish nakash” ap “kwikwat nich usey upandikena mulong ey ap arund ney wasalanya yom yimwing ya usey ap mulong ukwetany yom yimwing yiwamp.” Chiyipinap kutong mwamu. Mulong kambuy Paul wayileja in Tesalonik anch: “Tukat kwibaz mulong wenen mu Yikumbu ya Nzamb, mulong udandamedinany kwiman dang. Tukat kwibaz kand mulong wa ritiy riukwetanya mu kuzengol kwen ni mu mar miukata kumanany.” (2 Tes. 1:4) Chawiy lel, kutongin nawamp piur pa mudimu wa antu akwau ni kwibaz piur pa mudimu tusadina kukutwish kwikal kuwamp. Tufanyidinap kwov usany piur pa dijuku dietu, mashakamin metu, ap piur pa ndond twapamina.​—Mid. 21:39.

⁶ Pakwez, kudi mutapu ukwau wa kwibaz ukutwisha kuyipish urund wetu, pakampwil urund wetu ni Yehova. Kwibaz kwinoku kukutwish kutubachik kulik kwitiy yiyul yikatau kwitiy in kwikepish. (Kus. 141:5) Kwibaz mudi kwinoku akurumburil mudi “kwitongin nakash” ap “mwikadil wa chibud umekeshiningau antu ameninga anch akwet usey kuyipandakanamu antu akwau.” Yehova ukisining kwibaz kwa chibud. (Ezek. 33:28; Amos 6:8) Pakwez Satan woviling musangar anch antu alondul mwikadil wend wa kwibaz. Tong bil mutapu wovay Satan musangar chisu chamekeshay Nimrod, Farao, ni Absalom kwibaz kwa chibud! (Dis. 10:8, 9; Kub. 5:1, 2; 2 Sam. 15:4-6) Kwibaz kwawiy kand kwajipa urund wading pakach pa Kain ni Nzamb. Yehova wamuyula Kain, pakwez walika kwitiy mulong wa chibud chend. Wamekesha chibud pa kulik kutesh chiyul cha Yehova ni wamurumbukina nakash.​—Dis. 4:6-8.

7, 8. (a) Ov, rukat ra ulombu wa chikit chom ik, ni mutapu ik ukutwisha kumekan anch kudi kwibaz? (b) Rumburil mutapu ukutwisha kwibaz kuyipish chisambu mu chikumangen.

⁷ Nlel, antu akat kumekesh kwibaz mu mitapu yiyimp kushalijan. Kwibaz kwendining pamwing ni rukat ra ulombu wa chikit. Ndinguril umwing urumburil piur pa rukat ra ulombu wa chikit mudi “katond ap rukis rikwetau antu piur pa antu a ulombu wa chikit chikwau” ap “chitongijok chidia anch, antu a ulombu wa yikit kushalijan akwetinga mikadil ni manangu, mashalijadina ni ma antu amena anch ulombu wa yikit kanang upandakenamu yikwau.” Kwibaz piur pa ulombu wa chikit kukat kulangwish matend, njit, kupwitijan ni kujipijan.

⁸ Chawiy lel, yom yiney yifanyidinap kushiken mu chikumangen cha win Kristu. Pakwez, anch matend malank pakach pa akaritiy netu, yisu yimwing makat kusambishang nich kwibaz, ni makutwish kudandamen. Cha kashinsh kamu, mulong Jakobu wayifundina in Kristu a mu mivu chitot ya kusambish payipulay anch: “Kwisu kukata kudiokal njit, ni kwisu kukata kudiokal matend pakach pen?” (Jak. 4:1) Mwaning, anch twaman anch atukisin mulong antu akwau amen anch awapin kutusutamu etu, tukutwish kulond ap kusal chom chikutwisha kuyovish kuyip. (Jinsw. 12:18) Chakin kamu, kwibaz kukutwish kuyipish chisambu mu chikumangen.

9. Ov, mutapu ik utukwashinay Bibil kurish nich rukat ra ulombu wa chikit ni mitapu yikwau ya kwibaz yidia yiyimp? (Tal chipich cha kwinsambishil.)

⁹ Anch twasambish kuman anch tuwapin kuyisutamu antu akwau, tufanyidin kuvurik anch ‘Yehova ukisining muntu ukweta muchim wa kwibaz.’ (Jinsw. 16:5) Tufanyidin kand kushinshikin mutapu tumena ulombu wa chikit cha antu akwau, ngand, ni yaku yau. Anch tukat kwibazang piur pa ulomb wa chikit, wanangand, twavuramedin kal anch Nzamb “watanga muntu umwing, chad ku muntu umwing kwawiy kwadiokala michid yawonsu.” (Mid. 17:26) Komb mwamu tukutwish kulond anch, kuding kwau muchid umwing mulong etu awonsu twadiokala kudi Adam. Chidi usup mudi ik kutong anch ulombu wa chikit kampand udi piur ap anch uwapin kusutamu wa antu akwau. Anch tukat kutong mutapu winou, tukat kumushil Satan ndond chakwel ayipisha rukat ra win Kristu ni uumwing wetu. (Yoh. 13:35) Mulong wa kurish nend Satan ni kumuwin, tufanyidin kulik mitapu yin yawonsu ya kwibaz yidia yiyimp.​—Jinsw. 16:18.

IPUK RIS RA YOM YA KUMUJIMBU NI RUKAT RA MANGAND

10, 11. (a) Ov, mulong wak chikutwish kwikal chiswapela kukudish rukat ra mangand? (b) Mutapu ik wamekeshay Demas rukat ra mangand?

¹⁰ Satan ndiy “mwin kutakel wa mangand minam,” ni umatakedin ku usu wend. (Yoh. 12:31; 1 Yoh. 5:19) Pakwez, yom yivud yidia mu mangand minam yikwatijadinap ni yilondinay Bibil. Chakin kamu, yidiap yom yawonsu yidia mu mangand minam yidia yiyimp. Chad, tufanyidin kwijik anch Satan usadidin mangand minam mulong wa kusadin maswir metu, mulong wa kutuwishin mu yitil chakwel tukudisha rukat ra mangand minam ni tudiwula kumwifukwil Yehova.​—Tang 1 Yohan 2:15, 16.

¹¹ Chakin, rukat ra mangand rayikwata in Kristu amwing a mu mivu chitot ya kusambish. Chilakej, Paul wafunda anch: ‘Demas wanlika mulong wakata mangand.’ (2 Tim. 4:10) Bibil kalondinap patok mangand ma mutapu ik makatay Demas, chakwel amulika. Chimeken anch Demas wasambisha kwikal ni ris ra yom ya kumujimbu nakash kusutamu rukat ra yom ya muspiritu. Anch chading mwamu, Demas washadisha chisend cha muspiritu cha usey nakash​—mulong wa chom chamwamu. Ov, mangand makimba kumwinkish Demas chom cha usey chikutwisha kusutamu yafanyinay kutambul kudi Paul?​—Jinsw. 10:22.

12. Ov, mutapu ik ukutwishay Satan kupandakan maswir metu pa kusadil ‘rukat ra mapit ma makasu’?

¹² Chom mudi chinech chikutwish kutushiken. Ap anch tudi in Kristu, chidi cha usey kwikal ni yom ya kumujimbu yikutukwasha etu ni dijuku dietu. (1 Tim. 5:8) Twijing anch Yehova ukatining anch twikala ni mwom wa musangar, mulong wamwinkisha Adam ni Ev paradis muwamp nakash chakwel ashakamamu. (Dis. 2:9) Pakwez Satan ukutwish kupandakan maswir metu pa kusadin ‘rukat ra mapit ma makasu.’ (Mat. 13:22) Antu avud akat kutong anch nfalang ni yom ya kumujimbu yikutwish yayiletin musangar. Yitongijok mudi yiney yidi ya makasu, ni yikutwish kutushikij ku kushadish usey wa chom tukweta​—urund wetu nend Yehova. Yesu wayibabesha in kwilej end anch: “Kwikil muntu ukutwisha kuyisadil ansalejend aad nawamp. Ukumukis umwing, chad wamukat mukwau, ap ukumulimish umwing, chad wamudiul mukwau. Kiukutwishanyap kusadil kapamp kamwing Nzamb ni mapit ma pa mangand.” (Mat. 6:24) Anch twikal aswik a mapit, tukukangany kumusadin Yehova, ni winou wawiy mutapu ukatinay Satan anch tusala! Kangal twakwatany amboku nich usey nakash nfalang ap yom ya kumujimbu kusutamu urund wetu ni Yehova. Chakwel turisha nend Satan, tufanyidin kwikal nich yitongijok yiwamp piur pa yom ya kumujimbu.​—Tang 1 Timote 6:6-10.

IPUK MILONG YA MASANDJ

13. Mutapu ik ukasikeshina mangand minam chitongijok chiyimp piur pa uruw ni masandj?

¹³ Mupit ukwau akatay kusadin Satan yidi milong ya masandj. Nlel unou, antu akat kutong anch kwikal ushinshamena kudiay mbay nend wa uruw kudiap kwau kwa usey, mulong uruw uding kwau urund, ukutwish kwau wafa. Chilakej, mband umwing mwin kusal mafilim walonda anch: “Chikasiken kwikal ni mbay wa uruw umwing. Nijap kwam muntu ap umwing ushinshamena mu milong ya uruw ap usotila kusal mwamu.” Mukwau walonda niyend anch: “Nikwetap kwam kashinsh anch chidi chakin mu mashakamin antu kushakam ni muntu umwing mu uruw machuku mawonsu.” Satan ukat kwovang musangar nakash chisu chikatau antu ayimp inay kuyipish uruw udia chipan cha Nzamb. Djabul kakatiningap ditenchik dia uruw ni kakatiningap didandamena. Chad, chakwel turisha nend ni tumuwina, tufanyidin kuman uruw mudi muumenay Nzamb.

14, 15. Ov, chom ik ufanyidina kusal anch akwozin mulong wa kusal masandj?

¹⁴ Ap anch tudi angatan ap ajich, tufanyidin kwipuk mitapu yin yawonsu ya masandj. Njit jinej jiswapel? Bwat kwau! Chilakej, anch udi nsand, ukutwish kutesh arund ney a ku shikol ukat kulond piur pa kumanijan kwa ukundj ni mband, kutumijadin ma mesaj malondina piur pa masandj ni yipich yiyimp mu ma telefon mau. Bibil ulondin anch: “Muntu [usadina masandj, NWT] ukat kuyipish mujimbu wend wawonsu.” (1 Kor. 6:18) Mayej mapalangen mulong wa milong ya masandj ni makat kuletish mar ni rufu. Ansand nau ayangadim avud asala masandj kurutu kwa kwatan ap kwachik alonda anch tukwet ushon nakash mulong wak twasala mwamu. Misangar ya mangand yikimbin twitiyija anch kwikil kwau mulong anch twajip yijil ya Nzamb. Yitongijok mudi yiney yikat kuyiwishin antu mu ‘rukat ra mapit ma makasu ma chitil.’​—Heb. 3:13.

¹⁵ Anch arishin ni choziu cha kusal masandj, ov, chom ik ufanyidina kusal? Kangal wavuramen anch tudi akayitil aziyina. (Rom 7:22, 23) Mulembila Nzamb chakwel akwinkisha usu. (Fil. 4:6, 7, 13) Ipuk yom yikutwisha kukushikij ku kusal masandj. (Jinsw. 22:3) Anch yoziu yakushiken, sal usu wa kuyipuk pakad kulab.​—Dis. 39:12.

16. Ov, mutapu ik wakulay Yesu chisu chamupakau kudi Satan, ni chom ik tukutwisha kwilejin ku chilakej chinech?

¹⁶ Yesu watushila chilakej chiwamp piur pa kurish ni yoziu. Satan kamurumbangeshap nich kushilamu kwend, katonginap ap pakemp pa yom yamulejau kudi Satan. Pakwez, wamwakula kapamp kamwing anch: “Mukand wa Nzamb ulondil anch.” (Tang Mateu 4:4-10.) Yesu wading wij Dizu dia Nzamb, chawiy chamukwashanga kujimbul mifund swa chisu chamupakau kudi Satan. Mulong wa kurish nend Satan ni kumuwin, tufanyidinap kwitek ayinetu mu ubaj wa kusal masandj.​—1 Kor. 6:9, 10.

WIN NJIT KUSUTIL KU KUJIJAMAN

17, 18. (a) Ov, mipit ik yikwau yikatay Satan kusadin, ni mulong wak chinech chifanyidinap kutwovish wom? (b) Chom ik chikumushikena Satan, ni mutapu ik ukukasikeshina mulong winou chakwel ujijamana?

¹⁷ Kwibaz, ris ra yom ya kumujimbu, ni masandj yawiy yom yisatu yisadidinay Satan nakash. Pakwez kudi kand yikwau yivud. Chilakej, in Kristu amwing ayipompatin kudi anamakwau mu majuku, ayiswingishin kudi arund nau ku shikol, ni akat kand kuyikangesh kusal mudimu wau wa kulejan mu jingand jimwing. Mar minam mafanyidinap kutwovish wom, mulong Yesu wayibabesha in kwilejend anch: “Antu awonsu akez kukukisany mulong wa [dijin diam]. Pakwez muntu mwawonsu ukeza kujijaman djat ni ku rufu rend, Nzamb ukez kumupandish.”​—Mat. 10:22.

¹⁸ Ov, mutapu ik tukutwisha kurish nend Satan ni kumuwin? Yesu wayileja in kwilej end anch: “Imanany dang, chad ukez kwipandishany ayinen.” (Luka 21:19) Kwikil chom chikusalay mwan a muntu chikutwisha kudandamen kutumesh mar. Kwikil muntu ap umwing ukutwisha kuyipish urund wetu ni Nzamb ching anch etu ayinetu twalik anch chisadika mwamu. (Rom 8:38, 39) Ap anch atushalapol a Yehova afa, chirumburikinap anch Satan wawin kal, mulong Yehova ukez kuyivumbul! (Yoh. 5:28, 29) Pakwez, Satan kakwetap ruchingej mulong wa machuku ma kurutu. Kupwa kwa kujiyish mangand minam mayimp, akez kumudjibul Satan mu dibuku diakad musul mu mivu 1 000. (Kuj. 20:1-3) Kwinyim kwa mivu Kanan ya Kuyikel kwa Yesu, “akez kumulikishaku Sakudimban mu rukan” mulong wa chisu chikemp chakwel ayipaka antu awanyidina. Kupwa kwa chinech, akez chad kumujiyish Satan shitit. (Kuj. 20:7-10) Anch Satan kakwetap ruchingej ra machuku ma kurutu, pakwez ey urukwet! Dandamen kurish nend Satan, imanany dang mu ritiy. Ukutwish kurish nend Satan ni kumuwin!