Sadilany Nich Ukaliweny “Mpak ya Musamun ya Spiritu”
“Tambulany . . . mpak ya musamun ya spiritu, diawiy, dizu dia Nzamb.”—EFES 6:17.
1, 2. Ov mutapu ik tukwakula ku maswir ma in kulejan Want avud?
PAMANAY maswir ma muspiritu ma yisak ya antu, Yesu wayileja in kwilej end anch: “Chakin, yir yivudil, pakwez in kwangul akepil. Chawiy, ulembilany Mwant wa yir chakwel atuma in kwangul mu yir.” Yesu kalikap yom yishala mwamu. Kupwa kwa kulond mazu minam, “ndiy wayitazuka in kwilej end dikum ni aad” ni wayituma akalejana, ap akadima mu “yir”. (Mat. 9:35-38; 10:1, 5) Kupwa, Yesu “wayitonda akwau makum sambwad, wayituma aad aad” chakwel akasala mudimu winou.—Luka 10:1, 2.
2 Ni nlel unou, kuswir kwa in kulejan Want kudi kujim nakash. Antu akumangana ku Chivurikish mu mangand mawonsu mu muvu wa mudimu wa 2009 adinga 18 168 323. Apandakanamu uvud wa Atuman a Yehova nich tutikit 10. Yir yashikedil kal pa kuyangul. (Yoh. 4:34, 35) Pakwez, tufanyindin kulembil ni kwit chakwel antu a mudimu ikala avud. Pakwez mutapu ik tukusala kukwatijan nich malembil minam? Tukutwish kusal mwamu anch tudi in kulejan akash, pitusadila nich mushiku mudimu wa kulejan Want ni wa kuyikadish in kwilej.—Mat. 28:19, 20; Mar. 13:10.
3. Ov mutapu ik usadilay spiritu wa Nzamb mudimu ik wa usey chakwel kutukwash twikal in kulejan awamp?
3 Mutu wa mulong wasutina wisambinang anch kwikal atakedilau kud spiritu wa Nzamb kwawiy kutukwashina mu ‘kulejan dizu dia Nzamb pakad wom.’ (Mid. 4:31) Spiritu winou ukutwish kand kutukwash twikala in kulejan nich ukaliweny. Mutapu umwing wa kuwapish mudimu wetu mu chingand, udi kusadil nawamp chom chiwamp cha mudimu chaletay Yehova Nzamb—Dizu diend diafundau, Bibil. Amufunda nich spirutu utumbila. (2 Tim. 3:16) Rusangu rend arupepidil kudi Nzamb. Chawiy lel, kulejan uyakin wa Bibil nich ukaliweny mu mudimu wa kulejan kurumburikin anch tudi atakedilau kud spiritu utumbila. Kurutu kwa kushinshikin mutapu tukutwisha kusal mwamu, tutonginany bil, pa usu wa dizu dined.
‘Dizu dia Nzamb Dikwet Usu’
4. Ov, rusangu ra Nzamb ridia mu Bibil rimukarumwin nchik muntu?
4 Ov, usu mud ik ukweta dizu ap rusangu ra Nzamb! (Heb. 4:12) Mu chifanikesh, rusangu ra Bibil ridi rambukina kupandakanamu mpak yin yawonsu yisadinau kud antu, mulong mu chifanikesh randamin ni kubaril manungun ni usongisong. Uyakin wa Bibil umwandamin nakash muntu ni umushikin kamu mu manangu ni mu yovil yend, umekeshin chidiay chakin kamu mu muchim wend. Uyakin ukutwish kusadil usu wau wa kukarumun ni kusal anch muntu akarumuka chakin kamu. (Tang Kolosai 3:10.) Mwaning, dizu dia Nzamb dikutwish kukarumun mwom!
5. Ov mu mitapu ik mukutwishay Bibil kututakel, ni yibudikin ik?
5 Chikwau kand, Bibil udi mukand wa manangu mapandikena. Ukwet jinsangu jikutwisha kuyilej antu mutapu wa kushakam mu mangand minam makash. Dizu dia Nzamb ditokishinap ching mend metu pakwez ditokishin kand mwi njil. (Kus. 119:105) Ditukwashin nakash piturishina nich milong ap pitukwatina yiyul piur pa kuyitond arund, kwipuwangesh, kukimb mudimu, yidjal, ni yom yikwau. (Kus. 37:25; Jinsw. 13:20; Yoh. 15:14; 1 Tim. 2:9) Kusadil yany yidia mu Dizu dia Nzamb kutukwashin kushakam nawamp ni antu akwau. (Mat. 7:12; Filip. 2:3, 4) Nich jinjil jitokina nawamp mu chifanikesh, tukutwish kushinshikin pa yibudikin ya kurutu ya yiyul yetu. (1 Tim. 6:9) Bibil wasambela kulejan kand rutong ra Nzamb piur pa machuku ma kurutu, ni kutukwash tulondula mulad wa mwom ukwatijadina nich rutong riner. (Mat. 6:33; 1 Yoh. 2:17, 18) Udi mwom wa usey mud ik ukutwishay muntu kusanger anch witiy yany ya Nzamb yimutakela mu mwom wend!
6. Ov, mutapu ik udiay Bibil ut ukash mwi njit jetu ja muspiritu?
6 Chikwau kand, Tong bil, Bibil udi ut ukash mwi njit jetu ja muspiritu. Paul watazuka runsangu rend anch “mpak ya musamun ya spiritu” (Tang Efes 6:12, 17.) Anch arilejan nawamp, rusangu riner rikutwish kudiosh antu mu uswik wa muspiritu wa Satan. Yidi mpak ya musamun yiyipandishina antu pa ndond pa kuyijip. Ov tufanyidinap kusal usu wa kumusadil nich ukaliweny?
Lejan mu Kutentam
7. Ov mulong wak chidi cha usey kwilej kusadil nawamp “mpak ya musamun ya spiritu”?
7 Isalay ukutwish kusadil nawamp ut wend mwin njit ching anch wiyijidisha ni wileja kuusadil nawamp. Chidi chilik chimwing nich kusadil “mpak ya musamun ya spiritu” mwi njit jetu ja muspiritu. Paul wafunda anch “Ikal ni mushiku wa kwez kurutu kwa Nzamb mudi mwin mudimu watambulau, wakad mulong wa kwov usany, wend ulejan mazu ma uyakin mu kutentam.”—2 Tim. 2:15.
8, 9. Yik yikutukwasha kutesh kurumburik kwa yom yilondinay Bibil? Let chilakej.
8 Yik yikeza kutukwash ‘tulejana mazu ma uyakin mu kutentam’ mu mudimu wetu wa kulejan? Kurutu kwa kuyilej antu akwau patok yilondinay Bibil, tufanyidin kutesh bil ayinetu kurumburik. Chitwitin kushinshik pa mwikadil wa verse. Kukwatijan nich dinguril umwing, “mwikadil wa dizu, mufund, ap mifund yikwatijadin nich mazu, ap mifund yidia kurutu ap yilondwilaku ni yikwashin kwovikesh nawamp kurumburik.”
9 Kutesh nawamp verse wa Bibil kwitin kushinshikin mwikadil wa yom yifundinau. Mazu ma Paul madia mu Galatia 5:13 malejen kuswir kwinoku. Ndiy wafunda anch: “Mulong en, anamakwam, anitazukina kunikol; ching kangal usheshany kwikol kwen mulong wa kwiyipish ku mujimbu, pakwez ikalany kashalapol umwing ni mukwau mu rukat.” Ov kukolik kwa mutapu ik kwisambidinay Paul pinap? Ov wisambidin pa kukolik ku chitil ni ku rufu, ku uswik wa yitiyij ya makasu, ap ku chom chikwau? Mwikadil ulejen anch Paul wadinga ni kwisambin piur pa ‘kukolik ku mashing ma Chijil.’ (Gal. 3:13, 19-24; 4:1-5) Wading wisambidin pa kukolik kwa in Kristu. Antu asangera kukolik kwinoku ikala atushalapol umwing ni mukwau mu rukat. Awiy kipanap mu kunyinyit ap kupwitijan.—Gal. 5:15.
10. Chakwel anch tutesha nawamp kurumburik kwa Bibil, ov jinsangu ik tufanyidina kushinshikin, ni mutapu ik tukutwisha kujitan?
10 Dizu “mwikadil” dikwet kurumburik kwindjing. Mu “mwikadil” mudi “mutapu yom yasadika, mutapu yom yadinga, . . . ndond.” Chakwel kutesh Bibil nawamp, chifanyidin kushinshikin piur pa mutapu wasadika yom, nany wafunda mukand wa Bibil, chisu chaufunday, ni mu mikadil ik. Chidi cha ukwash kand kwijik mulong wak wafundau mukand ni anch chitwishikin kwijik yisal ya antu, yaku, ni yisal ya chirelijon mu machuku minima.a
11. Ov, chom ik tufanyidina kusal piturumburila Bibil?
11 “Kulejan mazu ma uyakin mu kutentam” kwitin yivud kupandakanamu kurumburil kusu zwang uyakin wa Bibil. Tufanyidin kushinshikin nawamp chakwel twipuka kusadil Bibil mulong wa kuyovish antu wom. Ap anch tukutwish kusadil Bibil mulong wa kukasikeshin uyakin, mudi mwasalay Yesu pa mwozau kudi Djabul, pakwez Bibil kadap nfimbu ja kuyibachik nich antu atuteshina. (Kuv. 6:16; 8:3; 10:20; Mat. 4:4, 7, 10) Tufanyidin kulondul chiyul chinech cha Pita anch: “Mulimishany Kristu mu michim yen mudi Mwant. Irijekangany machuku mawonsu ku kwakul kudi muntu mwawonsu ukukwipulany ya ruchingej ridia mu en, pakwez nich kwitudish ni kalimish.”—1 Pita 3:15.
12, 13. Jisu “mpwembu yikash” yikutwishau kumwang kudi uyakin wa Dizu dia Nzamb? Let chilakej.
12 Anch aulejan nawamp, ov, uyakin wa Dizu dia Nzamb ukutwish kusal yom ik? (Tang 2 Korint 10:4, 5.) Uyakin wa Bibil ukutwish kukangesh “mpwembu jikash,” jidia yitiyij ya makasu, yisal yiyimp, ni ma filosofi mamekeshina manangu ma antu akad kuwanyin. Tukutwish kusadil Bibil mulong wa kudjibwil kulemp yitongijok yawonsu “yipompatijadina ni ronganyin ra Nzamb.” Chitwishikin kusadin malejan ma Bibil chakwel kuyikwash antu akwau akwatisha yitongijok yau nich uyakin.
13 Tal chilakej cha mband wa mivu 93 udia mu Inde. Kudiosh ku wanikanch amufundisha chitiyij cha kuvadikin mu mujimbu ukwau kwinyim kwa rufu. Pasambishay kwilej Bibil kusutil ku mikand ni mwanend wadinga kulemp, witiyija swa yilejay piur pa Yehova ni kushilamu kwend. Pakwez, malejan ma kuvadikin mu mujimbu ukwau kwinyim kwa rufu mading ma mwandamin kal nakash mu manangu chawiy chasala atadika pamufundinay mwanend piur pa mwikadil wa afu. Ndiy walonda ach: “Nikutwishap kutesh kurumburik kwa uyakin wa Mikand yey. Ma relijon mawonsu mafundishin anch kudi chom chidia mukach mwetu chakad kufang. Nikat kwitiyijang kwam anch mujimbu winou ufil ni kudi chikunku chakad kumekan chikat kwandam mu mijimbu yikwau tupamp ni tupamp yisu yimwing tupanp 8 400 000. Ov, mutapu ik lel yikutwisha yiney kulik kwikal yakin? Ov, komb marelijon mavud madimben kwau?” Ov, “mpak ya musamun ya muspiritu” yikutwish kukangesh yitiyij yiney yijamina nakash? Kupwa kwa kwinsambin yivud piur pa mutu wa mulong, ndiy wafunda kwinyim kwa jimbing kanang anch: “Katat nasambish kal kutesh kurumburik kwa uyakin wakin piur pa rufu. Changovish kal musangar nakash pa kwijik anch pa chisu chikushikena divumbuk, tukez kutwish kusankanijan nau akatish netu afila kal. Nichingejin anch Want winou wa Nzamb wezin katat kamu ak.”
Usadila nich Kwitiyish
14. Ov, kuyitiyish antu atuteshina kurumburikin ik?
14 Kusadil Bibil nawamp mu mudimu wa kulejan kwitinap ching kutang ma verse. Paul walonda nich ‘kwitiyish,’ niyetu tufanyidin kwikal mwamu. (Tang Midimu 19:8, 9; 28:23.) ‘Kwitiyish’ kurumburikin “kuwin.” Muntu witiyishinau udi muntu “ulejinau chakwel itiyija ni kutek ruchingej mu chom chimwing.” Anch twamwitiyish muntu chakwel itiyija malejan ma Bibil, twamuwin kal chakwel ateka ritiy mu malejan minam. Chakwel tusala mwamu, tufanyidin kuyitiyijish antu atuteshina piur pa uyakin wa yom tulondina. Tukutwish kusal mwamu mu mutapu ulondwila ou.
15. Ov, mutapu ik tukupwitina manangu pa Bibil chakwel antu amulimisha?
15 Pwitin yitongijok pa Dizu dia Nzamb chakwel adilimisha. Piutangina verse, pwitin manangu pa usey wa kwijik yitongijok ya Nzamb piur pa mutu wa mulong. Kupwa kwa kumwipul ni kutambul chakul cha mwin chikumbu, ukutwish kulond chom mudi ech anch, ‘Talany bil mutapu tukutwish kujingunin chitongijok cha Nzamb piur pa mulong winou’. Ap ukutwish kwipul anch, ‘Nzamb ulondin nchik piur pa mwikadil winou?’ Kutang verse mu mutapu winou kukasikeshin anch Bibil udiokil kudi Nzamb ni kuyikwashin antu atuteshina kumulimish nakash. Kusal mwamu kudi kwa usey pakampwil pitupanina uman kudi muntu umwitiyijina Nzamb pakwez kijap yifundishinay Bibil.—Kus. 19:7-10.
16. Yik yikeza kukukwash kurumburil nawamp Bibil?
16 Kangal wimen ching kusu pa kutan; yirumburila. Paul wadinga nich chaku cha ‘kurumburil ni kuyishinshikin mu mukand wa Nzamb’ yom yadingay ni kufundish. (Mid. 17:3) Verse wa Bible ukweting manans mavud, ni ufanyidin kudiosh dinans dijim dikwatijadina nich yom yiwisambidina. Ukutwish kusal mwamu mu kuchirikin mu mutapu windjing mazu makwatijadina nich dinans dined ap mu kumwipul mwin chikumbu yipul yikutwisha kumukwash ajingunina manans minam. Kupwa, rumburil kurumburik kwa chikunku chinech cha verse. Kwinyim kwa chinech, mukwasha muntu ukuteshina amana mutapu ukumukwashay verse winou pakampwil.
17. Mutapu ik ukutwisha kwisambin pa Bibil chakwel kwitiyijisha?
17 Tongijokin pa Bibil mwi njil ya kwitiyish. Nich kalimish ni kashinsh, Paul ‘walonda nau yom ya mukand wa Nzamb’ nich kwitiyish. (Mid. 17:2, 4) Mudi ndiy, ikasikesha kuyishik antu akuteshina ku muchim. ‘Puit’ yidiamu kusutil yipul yiwamp yimekeshin kumubangin muntu ni muntu. (Jinsw. 20:5) Kangal waburen kalimish. Lejan yitongijok mu mutapu udia zwang ni wovikena. Ukutwish kuyikasikesh nich uman ukwitiyau. Mazu mey mafanyidin kwimen nakash pa Dizu dia Nzamb. Chiwapidil kumusadil verse umwing ni kurumburil nawamp dinans pandond pa kutang ma verse maad ap masatu swaa umwing ni mukwau. Kusadil uman ukwatijadina kukutwish kand ‘kuwejaku mutapu wa kwitiyish ku kan key.’ (Jinsw. 16:23) Kupwa, chidi cha usey kukimbijol ni kutan jinsangu jikwau. Mband wa mivu 93 utwisambidina kwinsambishil wasota kwijik mulong wak malejan ma mupim wakad kufa (ap spiritu) mapalangen kwawonsu. Pateshay kwisu kwasambisha chitiyij chinech ni mutapu chandama mu ma relijon mavud mu mangand yamukwasha chakwel itiyija yifundishinay Bibil pa mutu wa mulong winou.b
Dandamen Kumusadil Nich Ukaliweny
18, 19. Ov mutapu ik tufanyidina kudandamen kusadil nawamp “mpak ya musamun ya spiritu”?
18 Bibil ulondin anch “yom ya mangand minam yikat kusut.” Antu ayimp adandamedin kusal uyimp nakash. (1 Kor. 7:31; 2 Tim. 3:13) Chawiy lel chidi cha usey tudandamen kubumon “mpwembu jikash” nich “mpak ya musamun ya spiritu, diawiy, dizu dia Nzamb.”
19 Chidi cha musangar nakash mud ik pa kwikal nich Dizu dia Nzamb, Bibil, ni kusadil rusangu rend rikash mulong wa kukangesh malejan ma makasu ni kuyishik antu awamp ku michim! Kwikil chom chikash chikweta usu kupandakenamu rusangu riner. Chawiy lel, tusalany amboku usu ukash chakwel tusadilany nich ukaliweny “mpak ya musamun ya spiritu” mu mudimu wetu wa kulejan Want watwinkishau kudi Nzamb.
[Mazu madia kwishin kwa paj]]
a Ukwash uwamp nakash wa kutan mutapu jinsangu jasadika piur pa mikand ya Bibil udi mu mabuku mudi “Toute Écriture est inspirée de Dieu et utile,” Étude perspicace des Écritures, ni mitu ya milong mudi “Dizu dia Yehova didi Diom,” mu Chinong cha Kalam.
b Tal broshir Yik Yikata Kutushiken Pitukufanga? pa paj wa 5-16.
Ukwakul Nchik?
• Dizu dia Nzamb dikwet usu wa mutapu ik?
• Mutapu ik tukutwisha ‘kulejan mazu ma uyakin mu kutentam’?
• Ov, yik yikutwisha kusal rusangu ra Bibil piur pa “mpwembu jikash”?
• Mutapu ik ukutwisha kuwapish mutapu wey wa kwitiyish mu mudimu wa kulejan?
[Kamushet/Chipich chidia pa paj 21]
Mutapu wa Kusadil Dizu dia Nzamb Nich Kwitiyish
▪ Let kalimish piur pa Bibil
▪ Rumburil ma verse
▪ Tongijokinany nich kwitiyish mulong wa kushik ku muchim
[Chipich chidia pa paj 20]
Ufanyidin kwilej kusadin nawamp “mpak ya musamun ya spiritu”