Ov, Ukat Kuchidij Dizu dia Nzamb?
1 In Kristu akin akat kuchidij Dizu dia Nzamb nich mushiku, mu mangand mulikinau yisu yivud kwitiyij Bibil. Kwitiyij anch: “Mazu mawonsu ma Mukand wa Nzamb madiokila ku [s]piritu wa Nzamb,” tumwitiyijin Yesu Kristu, walonda mu malembil mend kudi Yehova anch: “Dizu diey diawiy uyakin.” (2 Tim. 3:16; Yohan 17:17) Ov, mutapu ik uwamp tukutwisha kuchidij Dizu dia Nzamb?
2 Ileja Bibil: Pakad kwidjidjek Yesu wileja nich mushiku Dizu dia Nzamb. Chawiy chinech chamukwasha kufundish yom yidiokila mu Bibil mu mujikit wend wawonsu. (Luka 4:16-21; 24:44-46) Ov, mutapu ik tukutwisha kulam mu manangu metu maverse mavud? Tukez kuyilam kusutil ku kutang Bibil pichuku-pichuku ni kutongin pa verse utumena anch ukasikeshin pakampwil ni wa ukwash mu mudimu wa kulejan. Piturijekina yikumangan, tufanyidin kukimb ni kutang mu Bibil maverse majimbwilau ni pamwing kurijek mutapu wa kumarumburil. Pitukumangena ku yikumangan, tufanyidin kumulondwil mwin kufundish mu Bibil wetu patanginay maverse. Kwilej mifund ya Bibil ku kututenchik kulejan “mazu ma uyakin mu kutentam.”—2 Tim. 2:15.
3 Lik Bibil Alonda: Pitusadila mudimu wa kulejan, tufanyidin kumulik Bibil alonda. Chilakej, anch mikadil yitwishishin, tupakishany kumutangin mwin chikumbu verse ap umwing kusu. Anch wipul chipul ap anch watadik, chiwapin kusadil Bibil mulong wa kumwakul. Anch mwin chikumbu ukwatiken, tukutwish kand kukasikesh chitongijok chimwing cha Bibil ni kulond anch: “Kurutu niya, chingel nikutangina verse ou umwing.” Anch chitwishikin, mutanga mu Bibil, sal anch ni mwin kutesh alondula mu Bibil verse utangina.
4 Pamulejau mwin chikumbu umwing maverse malikina dilejan dia Usatu, ndiy walonda anch: “Nikat kukumangan ku mis mu mwom wam wawonsu, pakwez, chakin kamu nadi kand kal nijika anch mwamu mulondinay Bibil!” Witiyija kapamp kamwing kwilej Bibil. Yesu walonda anch amikoku end akez kutesh dizu diend. (Yohan 10:16, 27) Njil yiwamp yikatau antu akashinsh kujingunin uyakin yidi kuuman ayinau mu Bibil. El twikalany amboku in kuchidij akash a Dizu dia Nzamb dia uyakin!