Yesu Kristu Ey ni Rusangu Rend

“Am neza chakwel ikala ni kupand, kupand kupandakena.” —YOHAN 10:10.

YESU KRISTU weza pa divu chakusambish mulong wa kupan, kezap mulong wa kutambul bwat. Kusutil ku mudimu wend wa kulejan, ndiy wapana chipan cha usey nakash kudi antu—rusangu ralejana uyakin piur pa Nzamb ni rusot rend. Antu itiyijina rusangu riner akutwish kusanger mwom uwamp katat, mudi mukutwishau kumekesh mamiliyon ma in Kristu akin.a Pakwez chitongijok chijim cha rusangu ralejanay Yesu chidi chipan cha usey upandakena—mwom uwanyidina wapanay mulong wetwetu. Mwom wetu wa chikupu wimedin pa kwitiyij kwetu chitongijok chinech cha usey mu rusangu rend.

Chapanay Nzamb ni Kristu Yesu wijika anch ukez kafa rufu risansena mu makas mwa akankuny nend. (Mateu 20:17-19) Chikwau kand, mu mazu mend mijikena nawamp madia mu Yohan 3:16, ndiy walonda anch: “Nzamb wakata ngand, ndiy wapana Mwanend wa kuval kwend umwing, chakwel mwawonsu ukwitiya kudi ndiy kakujiyip, pakwez ukwet kal mwom wa chikupu.” Yesu walonda kand anch ndiy weza ‘kupan kand mwom wend mulong wa kuyikwol antu avud.’ (Mateu 20:28) Mulong wak ndiy walonda anch mwom wend akez kaupan pa ndond pa ku usend?

Rukat ripandikena nakash ramubachika Nzamb chakwel ayinkisha antu mutapu wa kukwolik ku chitil cha chivadikin ni yibudikin mudi—kuburen kuwanyin ni rufu. Nzamb wasala mwamu pamutumay Mwanend wa kuval kwend umwing pa divu chakwel afa rufu ra kupan yakupesh ya mwom wend. Pitiyijay Yesu cha kwikatil, ndiy wapana mwom wend uwanyidina wa ukauntu mulong wetwetu. Ditenchik dinech, aditazukin anch difut, didi chipan chipandakena kujimb chapanay kudi antu.b Chidi chipan chikutwisha kutwal ku mwom wa chikupu.

Chiufanyidina Kusal Ov, difut didi chipan chikwinkishinau pakampwil? Chidi chakin kamu kudi ey. Chilakej: Tongin bil anch muntu wa kwinkish chipan chitekinau mu mushet. Chikwikalap chakin kamu chipan chey ching piukeza kachisend ni kuchitiy. Chilik chimwing, Yehova ukwinkishin ey difut, pakwez difut dined didiap dieyey pakampwil ching piukeza kadisend ni kuditiy. Ov, ukez kadisend ni kuditiy mutapu ik?

Yesu walonda anch antu ‘atekina ritiy’ mudi ndiy akez kutambul mwom wa chikupu. Ritiy rimedin pa mashakamin mu mwom wey. (Jakob 2:26) Kutek ritiy mudiay Yesu kurumburikin kushakam mu mwom wambatena nich yom yalonday ni yasalay. Chakwel usala mwamu, ufanyidin kumwijik nawamp Yesu ni Tatukwend. Yesu walonda anch:“Kupand kwin kwa chikupu kwawiy oku, chakwel akwijika ey Nzamb wakin, ni watumay, ndiy kand kamu Yesu Kristu.”—Yohan 17:3.

Pasutin kal mivu 2000, kudiosh palejanay Yesu Kristu rusangu rakarumuna mwom wa mamiliyon ma antu mu mangand. Ov, usotin kwijik yom yivud piur pa rusangu riner ni mutapu ukutwisha ey ni akatish ney kutaninamu yiyukish, katat kusu bwat, pakwez chikupu? Atuman a Yehova akez kusanger kukukwash.

Mitu ya milong yambakedinap yikez kakwijikish yom yikwau piur pa Yesu Kristu, muntu walejana rusangu rukutwisha kuswimp mwom wey chikupu.

[Mazu madia kwishin kwa paj]