Mudimu Wa Spiritu Utumbila Mu Kuwanyish Rutong Ra Yehova

“Mwamu mukeza kikal kand mazu mam . . . makez kasal yom yawonsu mudi munalonda.”—ISAY 55:11.

1. Let chilakej chimekeshina kushalijan pakach pa kutenchik yom ni rutong.

TONGIN bil anch pakach pa antu aad muntu ni muntu wirijekin mulong wa kuya mu weny ni motak. Umwing wasambish kutenchik pakampwil kachom ni kachom mulong wa kwindond kuyilay. Mukwau wij nawamp kuyilay, ni wij kand mitapu kushalijan ya jinjil jikulondulay. Wirijekin mutapu wakuya nawamp chikalap nchik yom yikeza kumushiken. Chawiy lel, mitapu kushalijan yisadidinau antu inay aad yilejen kushalijan kudia pakach pa kutenchik yom ni rutong. Kutenchik yom kudi mudi kurijek kachom pa kachom kurutu kwa kusal, pakwez rutong ridi kwijik nawamp chakusal, pakad kwimen pa mutapu umwing kusu wapakampwil.

2, 3. (a) Ov, yom ik yidia mu rutong ra Yehova, ni mutapu ik wasalay mulong wa kupwish mulong walanka pasalau Adam ni Ev chitil? (b) Mulong wak tufanyidin kushinshikin nakash pa rutong rikata kuwanyin ra Yehova?

² Pasambishinay kuwanyish rusot rend, Yehova katenchikiningap mutapu wa kusal yom, pakwez ukweting rutong rukatay kuwanyin pa chisu chisotinay. (Efes 3:11) Mu rutong riner mudi yasotay kwinsambishil mulong wa antu ni divu—pa chinech padi kukarumun divu dikala paradis, pakezau kwikal antu awanyidina mu chisambu ni musangar wa chikupu. (Dis. 1:28) Adam ni Ev pasalau chitil, Yehova wasala usu chakwel apwisha mulong ni kutenchik yom chakwel awanyisha rutong rend. (Tang Disambishil 3:15.) Yehova walejana anch mukajend wa chifanikesh ukez kuval “mbut” ap Mwan, ukez kamujip Satan, ni kudiosh mar mawonsu maletay.—Heb. 2:14; 1 Yoh. 3:8.

³ Kwikil usu ap umwing mwiur ap pa divu ukutwisha kukangesh kuwanyin kwa rutong ra Nzamb. (Isay 46:9-11) Ov, mutapu ik tukutwisha kulond mwamu? Mulong spiritu utumbila wa Yehova usadil. Usu winou ukash nakash utwinkishin kashinsh anch rutong ra Nzamb ‘rikez kasal yom yawonsu mudi mwalonday’ (Isay 55:10, 11) Tufanyidin kushinshikin nakash ni kusal kwambatan nich rutong ra Nzamb. Ruchingej ra mwom wetu wa kurutu rimedin pa kuwanyin kwa rutong rend. Chikwau kand, chom chikasikeshina ritiy pa kuman mutapu usadidilay Yehova spiritu utumbila. Shinshikinany amboku mudimu wa spiritu—pasak, katat, ni mu machuku ma kurutu—mu kuwanyish rutong ra Yehova.

Mudimu wa Spiritu Utumbila Pasak

4. Ov, mutapu ik walejanay Yehova pakemp-pakemp rutong rend?

⁴ Pa chisu chamufundau Bibil, Yehova walejana pakemp-pakemp rutong rend. Pakusambilsh, Mbut yatakelau kushilamu yading “ujindj.” (1 Kor. 2:7) Kwasuta mivu 2.000 chakwel Yehova isambina kand piur pa mbut. (Tang Disambishil 12:7; 22:15-18.) Yehova wamwinkisha Aburaham kushilamu kwela kuwanyin mu mutapu ujim. Dizu dialonday anch ‘kusutil kwimbut jey’ diamekesha patok anch Mbut yiney yela kwikal muntu, mwan wa Aburaham. Chimeken anch Satan wading ushinshikidin nawamp pa mutapu wadingau ni kulejan patok kachom ni kachom pa mulong winou. Mukankuny winou wasala usu chakwel ashesha ni kuyipish an a Aburaham mulong wa kukangesh kuwanyin kwa rusot ra Nzamb. Pakwez chinech chelap kusadik, mulong spiritu wa Nzamb wakad kumekan wading usadila mudimu. Mutapu ik?

5, 6. Mutapu ik wasadilay Yehova spiritu wend mulong wa kuyilam antu avadikina mu dijuku diela kushikij kwi Mbut?

⁵ Yehova wasadila spiritu wend mulong wa kuyilam antu avadikina mu dijuku diadinga ditwadila kwi Mbut. Yehova wamuleja Aburaham anch: “Am yam rukibu rey.” (Dis. 15:1) Kimadingap mazu machamwamu. Chilakej shinshikin, yashikena mu muvu wa 1919 K.C.C. Payau Aburaham nenday Sarah kushakam kachisu kakemp ku Gerar. Pakad kwijik anch Sara wading mukajend a Aburaham, Abimelek, mwant wa Gerar, wamusenda Sara chakwel ikala mukajend. Ov, Satan ndiy watenchika yom, ni kupakish kumukangesh Sara kumuletin Aburaham mbut? Bibil kalondinap chom. Chitulejinay chidi anch Yehova wamukangesha. Ndiy wamubabesha Abimelek mu chilat anch, kafanyidinap kumupukun Sara.—Dis. 20:1-18.

⁶ Yehova kayilamap pa chisu chimwing kusu bwat, ndiy wayilama Aburaham ni anend yisu yivud. (Dis. 12:14-20; 14:13-20; 26:26-29) Piur pa Aburaham ni anend, nfund a kuseng watwisha kulond anch: “Ndiy [Yehovah] kitiyilip antu a mangand kuyizengol, pakwez wayikarikin ant mulong wa awiy anch: ‘Kangal kutekip makas padi azizidilau many, kangal kusal nayimp kudi aprofet am.’”—Kus. 105:14, 15.

7. Ov, mutapu ik Yehova wadingay ni kulam muchid wa in Isarel?

⁷ Kusutil ku spiritu wend, Yehova waulama muchidi wa pasak wa in Isarel, mwela kuvadikin Mbut yashilaumu. Kusutil ku spiritu wend, Yehova wayinkisha in Isarel Chijil chend, chalama difukwil diakin ni chayilama in Yuda ku kwijond kwa muspiritu, kwa mashakamin, ni kwa mujimbu. (Kub. 31:18; 2 Kor. 3:3) Pa chirung cha Ankalansambu, spiritu wa Yehova wayinkisha antu amwing usu wa kuyikol in Isarel mu makas mwa akankuny nau. (Ank. 3:9, 10) Mu mivu chitot yashikija ku kuvadik kwa Yesu, chikunku cha kusambish cha mbut ya Aburaham, spirutu utumbila amusadina mulong wa kulam Yerusalem, Bethlehem, ni tempel—yiney yawonsu yafanyidina kwikal ni mudimu ukash mu kuwanyin kwa uprofet piur pa Yesu.

8. Yik yimekeshina anch spiritu utumbila wading ni usu mu mwom ni mu mudimu wa Mwan a Nzamb?

⁸ Spiritu utumbila wasala kand mu mwom ni mu mudimu wa kulejan wa Yesu. Mu divumu dia Mariy mujik, spiritu wasala yom yakad kutwish kusadik ni kandikal yisadikap. Wasala anch mband wakad kuwanyin imisha ni avala Mwan uwanyidina, wakad kufa nich kwa rufu. (Luka 1:26-31, 34, 35) Kupwa spiritu wamulama Yesu padingay uchidi mwanikanch chakwel kangal amujipa. (Mat. 2:7, 8, 12, 13) Pawanyishay Yesu mivu 30, Nzamb wamuzizila spiritu utumbila, ni kumutek ikala nswan wa ditand dia want dia David ni wamwinkisha mudimu wa kulejan. (Luka 1:32, 33; 4:16-21) Spiritu utumbila wamwinkisha Yesu usu wa kusal yilay, kuyok ayej, kudish runtu, ni kuyisangul afu. Yisal yiney ya usu yatakela kulejan yiyukish tukutwisha kuchingejin mwishin mwa wintakel wa Yesu.

9, 10. (a) Ov, mutapu ik wadingay spiritu utumbila nich usu pa in kwilej a Yesu a mu mivu chitot ya kusambish? (b) Ov, chom ik chamekana patok piur pa kuwanyin kwa rutong ra Yehova mu mivu chitot ya kusambish mu chirung chetu?

⁹ Kudiosh pa Pentekot wa muvu wa 33 C.C., Yehova wasadila spiritu wend mulong wa kuchizizil chikunku chikwau cha mbut ya Aburaham, avud pakach pau kadingap an a Aburaham. (Rom 8:15-17; Gal. 3:29) Spiritu utumbila wading chakin kamu piur pa in kwilej a Yesu a mu mivu chitot ya kusambish, wayikwasha kulejan nich mushiku ni wayinkisha usu wa kusal yilay. (Mid. 1:8; 2:1-4; 1 Kor. 12:7-11) Kusutil ku yipan yiney ya yilay, spiritu utumbila wamekesha kuya kurutu kwa kuwanyin kwa rutong ra Yehova. Yehova kadandamenap kwit kand anch amwifukwila ching mu tempel ku Yerusalem mudi mwadingau ni kusal pasak. Ndiy wasambisha kuchiyukish chikumangen chisu cha in Kristu. Kudiosh pinipa, Yehova wasambisha kuchisadil chikumangen cha azizidilau many mulong wa kuwanyish rutong rend.

¹⁰ Kulam, kupan usu, ni kuzizil—yiney yawiy mitapu yikemp yasadilay Yehova spiritu utumbila pa chirung chafundau Bibil mulong wa kudandamen kuwanyish rutong rend. Chidi nchik nlel unou? Ov, mutapu ik usadidinay Yehova spiritu wend mulong wa kuwanyish rutong rend? Tuswiridin kwijik mulong tusotil kusal kukwatijan nich spiritu. El amboku tushinshikinany mitapu yinying yisadidinay Yehova spiritu wend nlel unou.

Mudimu wa Spiritu Nlel Unou

11. Yik yimekeshina anch spiritu utumbila udi usu uyikwashina antu a Nzamb kwitokish, ni mutapu ik ukutwisha kumekesh anch usadil pamwing nich spiritu?

¹¹ Chakusambish, spiritu udi usu uyikwashina antu a Nzamb kwitokish. Antu asadina mudimu mu kuwanyish rutong ra Yehova afanyidin kwishitul mu ngikadil. (Tang 1 Korint 6:9-11.) Antu amwing ikala in Kristu akin ipana mu yisal yijondila mudi kusotijan, masandj, ni ya usund wa amakundj ni amakundj. Rusot ra kusal yitil rikutwish kwandam nakash mu muchim. (Jak. 1:14, 15) Chikwau kand, antu inay ‘ayitokishin,’ chimekeshin anch akarumwin mwom wau mulong wa kumusangaresh Nzamb. Ov, chom ik chiyikwashina antu amukatishina Nzamb chakwel atwisha kwipuk ku yibachikin ya kusal uyimp? Mukand wa 1 Korint 6:11 ulondin anch udi “Spiritu wa Nzamb wetu”. Kusutil ku kwishitul mu ngikadil, umekeshin anch umulikidil spiritu winou chakwel ikala usu utakedila mwom wey.

12. (a) Kwambatan nich chishimu cha Ezekiel, mutapu ik utakedilay Yehova dirijek diend? (b) Ov, mutapu ik ukutwisha kumekesh anch usadil kwambatan nich spiritu?

¹² Chakaad, Yehova usadidil spiritu wend mulong wa kutakel dirijek diend mwinjil yisotinay amwinend. Mu chishimu cha Ezekiel, chikunku cha mwiur cha dirijek dia Yehova achifanikeshin nich yitang ya mwiur yibachikinau mulong wa kuwanyish rusot ra Yehova. Ov, yik yibachikina yitang chakwel yiya mwinjil kanang? Spiritu utumbila. (Ezek. 1:20, 21) Vurikany amboku anch dirijek dia Yehova dikwet yikunku yaad, chimwing cha mwiur ni chikwau cha pansh. Anch cha mwiur achitakedil kudi spiritu utumbila, chidi chilik chimwing ni chikunku chidia pansh. Anch uziyidil ni ulondwil kamu jinjil jilejena chikunku cha dirijek dia Nzamb chidia pansh, umekeshin anch uyil pamwing nich yitang ya mwiur ya Yehova ni usadil kukwatijan nich spiritu wend utumbila.—Heb. 13:17.

13, 14. (a) Ov, anany adia mu “Dijuku dined” disambidinay Yesu? (b) Let chilakej chimekeshina anch spiritu utumbila usadil mulong wa kutukwash tutesha uyakin ufundinau mu Bibil. (Tal mushet “Ov, Udandamedin mu Chitokish Chiyila ni Kujimb?”)

¹³ Chakasatu, spiritu utumbila utukwashin kutesh nawamp yifundinau mu Bibil. (Jinsw. 4:18) Gazet winou amusadila kudi “kashalapol ushinshamena ni kubabal” mudi mutapu wa kusambish wa kupalangeshin uyakin wa Bibil. (Mat. 24:45) Chilakej, shinshikin bil pa chovu chetu piur pa antu adia mu “Dijuku dined” dialejanay Yesu. (Tang Mateu 24:32-34.) Ov, dijuku ik disambinay Yesu? Mutu wa mulong “La présence de Christ: que signifie-t-elle pour vous?” warumburila anch Yesu kisambinap piur pa antu ayimp bwat, pakwez wisambina piur pa in kwilej end, elay kuzizil spiritu mu machuku makemp.a In kumulondul Yesu azizidilau many a mu mivu chitot ya kusambish ni a katat, kakumanap ching kusu chijingidij pakwez akez kand kujingunin kurumburik kwa chijingidij chinech, anch Yesu “udi piswimp, ku chis kwin kamu.”

¹⁴ Ov, malejan minam marumburikin ik kud etu? Ap anch tukutwishap kwijik uvud wakin wa “Dijuku dined,” tukutwish kuvurik yom yivud piur pa dizu “Dijuku,”: yisu yivud dijimbwiling antu a yirung kushalijan akweta mwom usutinaku pa chisu chimwing cha pakampwil; chidiap chilemp bwat, pakwez chikweta nsudiel. (Kub. 1:6) Katat, mutapu ik tukutwisha kutesh mazu ma Yesu piur pa “Dijuku dined”? Chirumburikin chakin kamu anch mwom wa azizidilau many adingaku pa chisu chasambisha kumekan patok mu 1914 akez kutanijan nich mwom ni azizidilau many akwau akeza kuman kusambish kwa mar mapandakena kujimb. Dijuku dined dikwet nsambishin, ni dikwikal chakin kamu ni nsudien. Kuwanyin kwa yom kushalijan ya chijingidij kumekeshin patok anch mar mapandakena kujimb madi piswimp. Anch walam muchim wa kuswakej ni wadandamen kuchish ku mes, umekeshin anch uziyidil chakin kamu ku uyakin ufundishinau mu Bibil ni ulondwil umutakel wa spiritu utumbila.—Mar. 13:37.

15. Ov, chom ik chimekeshina anch spiritu utumbila utwinkishin usu wa kulejan rusangu ruwamp?

¹⁵ Chakanying, spiritu utumbila utwinkishin usu wa kulejan rusangu ruwamp. (Mid. 1:8) Chom ik chikwau chikutwisha kurumburil mutapu ulejenau rusangu ruwamp mu mangand mawonsu? Tongin bil pa chinech. Ukutwish kwikal pakach pa antu, pamwingap mulong wa kuburen kuzangurok ap wom, walond anch, ‘Nikutwishap kuya kulejan ku chikumbu ni chikumbu!’ Pakwez, katat wipanin nich mushiku mu mudimu wa kulejan.b Atuman ashinshamena a Yehova avud adandamena kulejan chikalap nchik kuyipompat ap kuyizengol. Ching kusu spiritu utumbila wa Nzamb ndiy wayinkisha usu wa kupandakan yikokujol yikash ni kusal yom yakad awiy kusal ku usu wau ayinau. (Mike 3:8; Mat. 17:20) Mu kwipan nakash mu mudimu wa kulejan, umekeshin anch usadil pamwing nich spiritu winou.

Mudimu wa Spiritu Utumbila mu Machuku ma Kurutu

16. Mulong wak tukutwish kwikal nich ruchingej anch Yehova ukez kayilam antwend mu chirung cha mar mapandakena kujimb?

¹⁶ Mu machuku ma kurutu, Yehova ukez kusadil spiritu wend utumbila mu mutapu wa pakampwil mulong wa kuwanyish rutong rend. Shinshikin bil piur pa kulam. Mudi mutwamena, Yehova wasadila pasak spiritu wend mulong wa kuyilam antu ni muchid wa in Isarel wawonsu. Chawiy lel, tukwet diyingish dia kwitiyij anch ukez kasadil kand usu winou mulong wa kuyilam antwend mu chirung cha mar mapandikena kujimb mashejina piswimp. Tuswiridinap kupakish kulondol piur pa mutapu ukezay Yehova kutulam pa chisu chinicha. Pakwez, tukutwish kuchingejin machuku ma kurutu nich ruchingej, ni kwijik anch amukatishina Yehova akezap kuyijindjik kumes mend ap kulemp nich spiritu wend utumbila.—2 Jins. 16:9; Kus. 139:7-12.

17. Ov, mutap ik ukezay Yehova kusadil spiritu wend utumbila mu mangand masu?

¹⁷ Ov, mutapu ik ukezay Yehova kusadil spiritu wend utumbila mu mangand masu makweza? Spiritu winou ukwikal usu ukezau kusadil pa kuburil mukand usu ukwezau kuburil pa chisu chinicha. (Kubur. 20:12) Yik yikezau kufund mu mukand winou? Mukwikal yom yitinay Yehova kachom ni kachom yitukeza kulondul mu mivu kanan. Ov, uchingejin kutang mikand yiney? Tuchingejin nakash mangand minam masu, mashika ap nlel. Chikwikal chisu chipandakena kuwap cha chiyukish cha Yehova, pakezay kusadil spiritu wend utumbila mulong wa kuwanyish rutong rend mulong wa divu ni antu.

18. Ov, wikasikeshin kusal ik?

¹⁸ Tufanyidinap amboku kuvuramen anch rutong ra Yehova rikez kuwanyin chakin kamu, mulong usadidil spiritu wend utumbila—usu upandakena kujimb mu mangand mawonsu—mulong wa kuwanyish rutong riner. Niyey udi mu rutong riner. Chawiy lel, ikasikesha mu kumwit Yehova spiritu wend ni sal kukwatijan nich umutakel wend. (Luka 11:13) Chawiy lel ukutwish kwikal nich ruchingej ra kushakam mudi mwasotay Yehova antu kushakam—chikupu mu Paradis pa divu.

[Mazu madia kwishin kwa Paj]

Ov, Uvurikin?

• Mutapu ik wasadilay Yehova spiritu wend utumbila pa chirungu chafundau Bibil mulong wa kuwanyish rutong rend?

• Mutapu ik usadidilay Yehova spiritu wend nlel unou?

• Mutapu ik ukezay kusadil Yehova spiritu wend mu machuku ma kurutu mulong wa kuwanyish rutong rend?

[Kamushet kadi pa paj wa 22]

Ov, Udandamedin mu Chitokish Chiyila ni Kujimb?

Yehova udandamedin kuyitokishin antu end. Yisu yitenchik kanang yapalangeshau mu Chinong cha Kalam?

▪ Chishimu cha Yesu cha chivish chisambidin pa chidia dilejan diwamp piur pa kupam kwa mu spiritu (Mat. 13:33)—Kafunfut 15, 2008, paj wa 19-20.

▪ Kuyitazuk in Kristu mulong wa ruchingej ra mwiur kwapwa chisu ik?—Ndol-Mem 1, 2007, paj wa 30-31.

▪ Chirumburikin ik kumwifukwil Yehova “mu [S]spiritu”? (Yoh. 4:24)—Kafunfut 15, 2002-F, paj wa 15.

▪ Ov, chisak chipandakena kujimb chisadidil mu dibur ik? (Kuj. 7:15)—Ndol-Mem 1, 2002-F, paj wa 30-31.

▪ Chisu ik chikusambishau kuyauril amikoku ni ampemb? (Mat. 25:31-33)—Mwinkind 15, 1995-F, paj wa 18-28.