Diosh Mes Mey Ku Yom Yamwamu!

“Ndioshap mes mam ku yom yamwamu, chakwel mwom wam wikala wa kwendil mwi njil yey.”—KUS. 119:37.

1. Ov, chipan cha mes chikwet usey wa mutapu ik?

MES metu mawapining nakash! Kusutil ku mes tukutwish kuman kapamp kamwing yom yitunyingumukina—yidia kulemp ni ulombu wau. Mes metu matukwashin kuyiman arund netu akatish ni ubaj wakad kuchingejin. Kusutil ku mes tukutwish kuman ufun, kusanger yitang yishimokishina, ni kuman uman wa kwikalaku kwa Nzamb ni uyaj wend. (Kus. 8:3, 4; 19:1, 2; 104:24; Rom 1:20) Mudi jinjil ja usey nakash ja kwisamb nich manangu, mes makwet mudimu ukash mu kutambul ronganyin ra Yehova ni kukasikesh ritiy mudiay ndiy.—Yos. 1:8; Kus. 1:2, 3.

2. Mutapu ik tufanyidin kushinshikin nawamp yitutadila, ni yik tukutwisha kwilej kusutil ku malembil makusambish ma nfund-a-Kuseng?

² Pakwez, yitutadina yikutwish kutusal nayimp. Urund udia pakach pa mes ni manangu metu udi ukash nakash chawiy lel yitumena yikutwish kutakel ap kukasikesh yitutongina ni yitusotina mu muchim wetu. Mulong tudi mu mangand mijondila ni makwisangarish matakedilau kudi Satan Djabul, utulejin yom ni jinsangu jikutwisha kutudiosh mwinjil yiwamp—ap anch tuyitadil kwetu kapamp kamwing. (1 Yoh. 5:19) Chidiap cha kushimok, pakuman mutapu nfund a kuseng wamulembilay Nzamb anch: “Ndioshap mes mam ku yom yamwamu, chakwel mwom wam wikala wa kwendil mwi njil yey.”—Kus. 119:37.

Mutapu Ukutwisha Kutudimb Mes Metu

3-5. Ov, jinsangu ik ja Bibil jilejena ubaj wa kulikidil mes metu matudimba?

³ Tal ya mushikena mband wa kusambish, Ev. Satan wamuleja anch mes mend “makuburik” anch wadia ku “mutond wading wa ronganyin ra kuwap ni kuyip.” Chimeken anch Ev amudimba nich chitongijok chakwel anch mes mend “makuburik” Kupwa kusanger kwend kwa kudia dibuj dilikishinau kudia kwikala kukash “pamanay . . . anch mutond wadi uwamp wa kudia, wadi kand uwamp pa kuutal ku mes.” Patalay kumutond winou nich ris, chawiy chamubachika ku kubwambuk ku chijil cha Nzamb. Mfumwend, Adam, ni ndiy wabwambuka, nich yibudikin yiyimp nakash kudi antu awonsu.—Dis. 2:17; 3:2-6; Rom 5:12; Jak. 1:14, 15.

⁴ Pa chirung cha Noa, angel amwing ayibachika kudi mes mau. Pisambidinau piur pau, Disambishil 6:2 urumburil anch: “An amakundj a Nzamb ayimana an amband au antu anch, akwet yifu ya ufun. Chad an amakundj a Nzamb ayatola an amband au antu akatau.” Kuyital an amband a antu nich upwepu wa masandj kwalangwisha upwepu umwing wa piur nakash kudi angel ambwambol mulong wa masandj, ni angel inay avala an a chisum. Uyimp wa muntu pa chisu chinicha washikija mangand mawonsu ku kusheshik, Noa ni dijuku diend apanda.—Dis. 6:4-7, 11, 12.

⁵ Pasutin kal mivu chitot, mes ma Akan mwin Isarel umwing mamubachika chakwel iya yom yimwing yasendau mu ul wa Yeriko. Nzamb waleta mbil anch yom yawonsu ya mu ul afanyina kuyishesh kudioshaku yom yikwau yafanyidinau kutwal “mu chipau cha [Yehova]”. In Isarel ayiyula anch: “Ilamany ayinen ku yom yifanyidina kusheshik” kangal wanonany yom yidia mu ul. Pasalay Akan chitil, antu in Isarel akanganya kukwat ul wa Ai, ni avud pakach pau afa. Akan kalejanap chitil chend djat ni pamukwatau. Akan walonda anch: “Pinamana . . . nayovila yom yiney ris, chad nayinona.” Ris ra mes mend ramutwala ku kusheshik, pamwing ni “yom yawonsu yakwetingay.” (Jos. 6:18, 19; 7:1-26, MN) Akan wayovila yom yamulikishau ris mu muchim wend.

Tuswiridin Kwikand

6, 7. Yisu “yom yitenchikinay” Satan yikatay kusadil chakwel atudimba, ni mutapu ik ukatau kusadil ku mapubliciter ma winsak?

⁶ Nlel unou, antu ayidimbin chilik chimwing mudi mwamudimbau Eve, angel ambwambwol, ni Akan. Pakach pa “yom yitenchikinay” Satan mulong wa kuyidimb antu, “maku ma mes” makweting usu nakash. (2 Kor. 2:11; 1 Yoh. 2:16) In kupalangesh piur pa mulong wa kwisak wa katat ijing nawamp anch antu akatining nakash yom yiwapina ku mes. Mwin kuyitakel in kwijik nawamp winsak wa mwimputu ulondin anch: “Mes yidi yovil yidimbininga nakash kupandakanamu yovil yawonsu, yisu yivud mayikangeshining yovil yikwau, ni makweting usu wa kutubachik ku uyimp.”

⁷ Chishimokishinap pa kuyiman in kusal ma publiciter atulejin yipich yatenchikau nawamp mulong wa kusangaresh mes ni kulangwish maku chakwel ayilanda yom yau! Mwin kukimbijol umwing wa mu États Unis wilejina mutapu mapubliciter makata kuyibachik antu walonda anch: “Kayitenchikinap mulong wa kupan jinsangu kusu, pakwez chidi mulong wa kupwitinaku yovil ni kuyisal antu ayimena.” Pakach pa yikatau kusadil nakash padi yipich yikasikeshina masandj. Komb chidi cha usey, kusop yitutadila, ni yitwandjikina mu manangu ni mu muchim wetu!

8. Mutapu ik ukasikeshinay Bibil pa kuswir kwa kulam mes metu?

⁸ In Kristu akin niyawiy akutwish kuwil mu maku ma mes ni ma mujimbu. Chawiy lel, Dizu dia Nzamb ditukasikeshin tusadila kwikand kwa muntu ipend kwambatan nich yitutadina ni yitusotina. (1 Kor. 9:25, 27; tang 1 Yohan 2:15-17.) Job muntu utentamina witiyija urund ukash udinga pakach pa kutal ni kusot. Ndiy walonda anch: “Nichipa machip ni mes mam, kinikutalap kand mes kudi amband.” (Job 31:1) Job kalikap kumukwat mband kusu nich chitongijok cha masandj pakwez walika kand kulam yitongijok ya masandj mu manangu mend. Yesu walejana anch manangu mafanyidin kwikal zwang makad yitongijok ya masandj palonday anch: “Wawonsu ukutala padiay mband ni kumwovil upwepu, ndiy wasotan kal mu muchim wend kwapwa kal.”—Mat. 5:28.

Yom Yamwamu Yitufanyidina Kwipuk

9. (a) Mulong wak tufanyidin kubabal nakash pitusadidila Internet? (b) Ov, chom ik chikutwisha kushiken ku kutal ap pakad kulab yipich ap mafilm ma antu asadila masandj?

⁹ Mu mangand ma nlel unou, antu avud ‘adandamedin kutal’ mafilm ma masandj ku Internet. Tufanyidinap kutal ma program ma mutapu winiwa—anch tulikin kumakimb! Mulong wak? Chipich chimwing cha masandj chikutwish kumekan kapamp kamwing pa ordinater wa muntu. Ap kupwa kwa kufungul program umwing, chipich cha masandj chikutwish chamekan kapamp kamwing ni kukasikan kuchidiosh swa. Ap anch muntu waman pakad kulab, chipich chandamen kal mu manangu mend. Kutal mafilm ap yipich ya antu asadila masandj kukutwish kwikal nich yishiken yiyimp. Kukutwish kuyipish kom ka muntu ni njit jikash chakwel adiosha yipich ya antu asadila masandj mu manangu mend. Chiyipina nakash, chidi anch muntu ‘wadandamena kutal’ kwa kwisotin, umekeshin anch kandikal ajipa ni katat maku mend mayimp mu muchim wend.—Tang Efes 5:3, 4, 12; Kol. 3:5, 6.

10. Ov,mulong wak yipich ap mafilm ma antu asadila masandj yikat kuyipish an, ni yik yikutwisha kuyishiken anch ayitadin?

¹⁰ An akutwish kusambish kutal yipich ap mafilm ma antu asadila masandj mulong wa kusot kwijik. Anch asal mwamu, yikutwish kwikwal nich yibudikin yiyimp pa mutapu umenau kulalijan kwa ikundj ni mband. Rapor umwing ulejen anch yibudikin yiney yikutwish yayipish yitongijok yiwamp piur pa kulalijan kwa ikundj ni mband ni kulet “yikokujol ya kulam ukash wa kumujimbu, urund wa rukat, kuyiman amband mu mutapu uyimp, mafilm ma masandj makutwish pamwingap kuyikangesh kushikol, kuyipish urund wa mu dijuku.” Yibudikin yiney yikutwish ap kushesh urund mu uruw mu machuku ma kurutu.

11. Let chilakej chakwel ulejana ubaj wa kutal yipich ap mafilm ma antu asadila masandj.

¹¹ Mukadivar umwing mwin Kristu wafunda anch: “Pakach pa yaku yinadinga nich kurutu nikala Kaman, mafilm ma masandj mawiy mading mankasikedina kulik kutal, nadandamedin kuman yipich yishimokishina mu manangu mam, yalangwisha maku makash, mizik, ni yom yimwing yinamana ap nashadisha mu manangu. Jading njit ja dichuku ni dichuku pakad kujing.” Padingay mwanikanch mukadivar mukwau watala mu gazet wa tatukwend wadinga ni yipich ya antu asadila masandj, padiokalau anvajend ku chikumbu. Ndiy wafunda anch: “Yipich yiney yadinga nich yibudikin yiyimp nakash mudi ik mu manangu mam ma winsand! Ap katat, pasutin kal mivu 25, pakwez yipich yiniya yidandamedin kushirikin mu manangu mam. Ap anch chikasiken kurishish, yipich yiniya yidiaku. Nikat kwifish nich, ap anch nilikin kuyitongijokin.” Chidi cha manangu mudi ik kwipuk yovil yiney yiyimp kusutil ku kulik kutal yom yamwamu! Mutapu ik ukutwishay muntu kwipuk kutal yom yamwamu? Ndiy ufanyidin kurish ni kutek “yitongijok yawonsu ku uswik wa kumuziyil Kristu.”—2 Kor. 10:5.

12, 13. Ov, yisu yom yamwamu yifanyidinay mwin Kristu kwipuk kutal, ni mulong wak?

¹² “Chom [chikwau] chiyimp” ap chamwamu, chitufanyidina kwipuk chidi kwipuwangesh kukasikeshina kukimbijol yom ya kumujimbu ap yisal ya ayilembil ap mafilm ma chisum, kujipan, ni rufu. (Tang Kuseng 101:3.) Anvaj in Kristu akwet chisend kurutu kwa Yehova cha kutond yifanyidinau kutal kuchikumbu. Chakin kamu, kwikil mwin Kristu ukutwisha kwiyandjik amwinend kwa kwisotil mu yisal ya ayilembil. Chawiy lel, anvaj afanyidin kubabal mulong wa mafilm, yikunku yimekeshinau ku television, masengan ma ku video, jinsangu ja kusipishan ni mabuku ma an makasikeshina yisal yishimokishina.—Jinsw. 22:5.

¹³ Ap anch tudi ansand ap amakurump, mes metu mafanyidinap kusanger masengan ma video mamekeshina chisum ni kujipan. (Tang Kuseng 11:5.) Tufanyidin kulik kushinshikin manangu metu pa mijikit yawonsu yifishinay Yehova. Vurik anch Satan ukimbin kudimb manangu metu. (2 Kor. 11:3) Ap kusutish chisu chilemp mu kutal masengan mawamp, tukutwish kushesh chisu cha kwifukwil kwa dijuku, kutang kwa Bibil dichuku ni dichuku, ni kwirijek kwetu mulong wa yikumangen.—Fil. 1:9, 10.

Londul Chilakej Cha Yesu

14, 15. Ov, Chom ik chamekana patok piur pa Satan pamupakay Yesu kapamp ka kasatu, ni mutapu ik watwishay Yesu kuyipandakan?

¹⁴ Cha ushon, tukutwishap kwipuk kutal yom yimwing yamwamu mu mangand minam mayimp. Ap Yesu watana chibachikin chinech. Mu choziu cha kasatu cha Satan cha kupakish kumukangesh Yesu kusal rusot ra Nzamb, “Satan wamutwala kand pa mukandu ulengalela kamu nakash, wamuleja mant mawonsu ma mangand ni uyaj wau.” (Mat. 4:8) Ov, mulong wak Satan wasala mwamu? Chimeken patok anch, ndiy wasota kusadil chibachikin chikash cha mes. Kuman uyaj wa mant ma mangand kwela kumubachik Yesu ipana mu maku ma kwikal nich katumb mu mangand. Ov, yik yasalay Yesu?

¹⁵ Yesu kitiyap chipan chinech. Ndiy kalikidilap muchim wend ulama maku mayimp. Ni kashinshikinap bil chipan cha Djabul chakwel achilika bwat. Yesu wachilika kapamp kamwing. Wamuleja anch: “Diokal kwa Satan!” (Mat. 4:10) Yesu wateka manangu mend pa urund wend ni Yehova ni wasala kukwatijan nich rutong rend mu mwom—ra kusal rusot ra Nzamb. (Heb. 10:7) Mudi chibudikin, Yesu watwisha kupandakan mipit yikash ya Satan.

16. Ov, malejan ik tukutwisha kwilejin piur pa chilakej cha Yesu cha kurish nich yoziu ya Satan?

¹⁶ Tukutwish kwilej yom yivud piur pa chilakej cha Yesu. Chakusambish, kwikil muntu ukutwisha kwiyep ku mipit ya Satan. (Mat. 24:24) Chakaad, yitumena ni mes yikutwish kukasikesh maku ma muchim wetu, mulong wa yom yiwamp ap yiyimp. Chakasatu, Satan ukez kasadil “maku ma mes” mu mutapu usotinay chakwel atwoza ni kutudimb. (1 Pita 5:8) Chakanying, niyetu tukutwish kumulik Satan, anch twasal mwamu pakad kulab.—Jak. 4:7; 1 Pita 2:21.

Lam Dis Diey “Zwang”

17. Ov, mulong wak chifanyidinap kuchingel anch chom chamwamu chitushikena kurutu kwa kukwat chiyul payitufanyidina kusal?

¹⁷ Mu kwipan kwetu kudi Yehova mudi kushilamu kwa patok kwa kulik yom yamwamu. Pitwipanina mulong wa kusal rusot ra Nzamb, twinungin pamwing ni nfund a kuseng mu kulond nend anch: “Nalamin mend mam ku jinjil jawonsu jiyimp chakwel nisadil dizu diey.” (Kus. 119:101) Chiwapidilap kuchingel ching chom chamwamu chitushikena ku mes chakwel tukwata chiyul pa yitufanyidina kusal. Atulejin kal patok yom yilikishinau Mukand wa Nzamb. Twij nawamp mipit ya Satan. Pamupakay Yesu anch akarumun mayal yikala mabot? Kupwa kwa kujil yakudia machuku 40 ni uchuku ndiy “wov nzal.” (Mat. 4:1-4) Satan ukutwish kujingunin pituziyila ni yisu tukutwisha kuwa mu yoziu. Chawiy lel, katat chawiy chisu cha kutongin nawamp pa milong yiney. Kangal walik kusal mwamu! Anch twalam kwipan kwetu kudi Yehova dichuku ni dichuku mu manangu, tukez kakwat chiyul cha kudjibwil kulemp yom yamwamu.—Jinsw. 1:5; 19:20.

18, 19. (a) Let kushalijan pakach pa mes madia “zwang” ni mes ‘mayimp.’ (b) Mulong wak chiwapidil kutongin pa yom ya usey, ni chiyul ik chitwinkishinau mu Filip 4:8 pa chinech?

¹⁸ Dichuku ni dichuku, turishining nich masengan mapwitininga mes metu, ni mayil ni kuvulijan. Tufanyidin kusanger chiyul cha Yesu cha kulam mes metu “zwang.” (Mat. 6:22, 23) Mes madia “zwang” madi mes mashinshikidina mawonsu pa rutong rumwing—ra kusal rusot ra Nzamb. Pakwez, mes ‘mayimp’ madi ma kudimban, ma ris, ni kusejin ku yom yamwamu.

¹⁹ Vurik anch, yitutongina kusutil ku mes, yikweting yibudikin mu muchim wetu. Pakwez chiwapidil kutongin pa yom ya usey. (Tang Filip 4:8.) Chikwau kand, dandamenany amboku kusadil malembil ma nfund a kuseng anch: “Ndioshap mes mam ku yom yamwamu.” Chawiy lel, twikasikeshin kusal yom kukwatijan nich malembil minam, tukutwish kwikal nich ruchingej anch Yehova ukez kalam “mwom [wetu] wikala wa kwendil mwi njil [jend].”—Kus. 119:37; Heb. 10:36.

Yom ik Tufanyidina Kuvurik Piur Pa . . .

• Kukwatijan pakach pa mes metu, manangu, ni muchim?

• Ubaj wa kutal yipich ya antu asadila masandj?

• Usey wa kulam mes metu “zwang”?

[Yipich yidia pa paj wa 26]

Ov, yisu yom yamwamu yifanyidinau in Kristu kwipuk?