“Spiritu Ukat Kupak . . . Yom ya Nzamb Yikurukina”

“Spiritu ukat kupak yom yawonsu, mwawiy ni yom ya Nzamb yikurukina.”​—1 KOR. 2:10.

1. Ov, mudimu ik wa spiritu utumbila walejanau kudi Paul mu 1 Korint 2:10, ni yipul ik yidiaku?

TUKUTWISH kujikitish mudi ik mulong wa mudimu usadilay spiritu utumbila wa Yehova! Bibil ulondin anch spiritu udi nkwash, chipan, mwin kupan uman ni mwin kutulondil. (Yoh. 14:16; Mid. 2:38; Rom 8:16, 26, 27) Kambuy Paul wakasikeshina piur pa mudimu ukwau wa usey wa spiritu utumbila anch: “Spirit ukat kupak yom yawonsu, mwawiy ni yom ya Nzamb yikurukina.” (1 Kor. 2:10) Chikwau kand, Yehova ukat kumusadil spiritu wend utumbila mulong wa kulejan yom yikurukina ya uyakin wa muspiritu. Ov, pakad ukwash wa spiritu winou ov, twela kwov mutapu ik rutong ra Yehova? (Tang 1 Korint 2:9-12.) Pakwez, kudi yipul yivud mudi yiney: Ov, mutapu ik ukatay spiritu kupak “yom yikurukina ya Nzamb”? Ov, Yehova walejana yom yiney mu mivu chitot ya kusambish C.C. kusutil kudi nany? Ov, mutapu ik ni kusutil kudi nany spiritu wapaka yom yiney yikurukina mu chirung chetu?

2. Ov, mu mitapu ik yaad mukatay kusadil spiritu?

² Yesu walejana mitapu yaad mukezay spiritu winou kusadil. Machuku makemp kurutu kwa rufu rend, ndiy wayileja atwimbuy end anch: “Pakwez mongoj ndiy kamu spiritu utumbila, ukez katuminay Tatuku mu dijin diam, ndiy ukez kakulejany yom yawonsu, ni kukuvurishany yom yawonsu yinalonda kudi en.” (Yoh. 14:26) Chawiy lel spiritu utumbila wela kusadil mudi mulej ni mwin kuvurish yom. Mudi mulej, ndiy wela kuyikwash in Kristu chakwel atesha nawamp yom yakad kutesh kwinsambishil. Mudi mwin kuvurish, ndiy wela kuyikwash chakwel avurika ni kusadil nawamp yom yayirumburilau.

Mu Mivu Chitot ya Kusambish

3. Ov, mazu ik ma Yesu mamekesha anch “yom yikurukina ya Nzamb” akez kayirumburil pakemp pakemp?

³ Yesu wayifundisha amwinend in kwilej end uyakin uvud wa yom yading yisu kud awiy. Pakwez, awiy adinga kand ni yom yivud ya kwilej. kYesu wayileja atwimbuy end anch: “Nichikwet yom yivud ya kulond kudi en, pakwez kiukutwishanyap kuyitambul katat. Pakwez nlel, anch spiritu wa uyakin wez, ndiy ukez kanilaminany ku yakin yawonsu.” (Yoh. 16:12, 13) Chawiy lel, Yesu walejana anch kusutil ku piritu utumbila, yom yikurukina ya Nzamb akez kayilejan pakemp pakemp.

4. Pa dichuku dia Pentekot mu muvu wa 33 C.C., mutapu ik wasadilay spiritu utumbila mudi mulej ni mwin kuvurish?

⁴ Pa dichuku dia Pentekot mu muvu wa 33 C.C., “spiritu wa uyakin” washika, wayandama in Kristu 120 ading akumangena pamwing mu Yerusalem. Chinech chovikana ni chamekana patok. (Mid. 1:4, 5, 15; 2:1-4) In kwilej alonda mu jindim kushalijan piur pa “midimu yikash ya Nzamb.” (Mid. 2:5-11) Katat chading chisu cha kulejan yom kanang yisu. Muprofet Jowel watakela kulejan piur pa kuyizizil kwinoku kwa spiritu utumbila. (Jow. 2:28-32) Atuman apana uman mu mulad wakwel anch kwikil umwing wau wadinga uchingejina mwamu, ni kambuy Pita wasambisha kuyirumburil yom mutapu muyadinga yisadikina. (Tang Midimu 2:14-18.) Wawiy mutapu wasadilay spiritu utumbila mudi mulej mu kumutokishin Pita anch yom yiyishikedina in kwilej yawanyisha uprofet wa pasak. Spiritu wasala mudimu wa kuyivurish, mulong Pita kajimbulap ching Jowel pakwez ndiy wajimbula kand kuseng kwaad kwa David. (Kus. 16:8-11; 110:1; Mid. 2:25-28, 34, 35) Yom yawonsu yamanau ni yateshau antu awonsu eza, yading chakin kamu yom yikurukina ya Nzamb.

5, 6. (a) Kupwa kwa Pentekot mu muvu wa 33 C.C., ov, yipul ik ya usey yafanyidinau kwakul piur pa manswik masu? (b) Ov, yipul yiney yalanka kusutil kudi nany, ni mutapu ik wakwatau yiyul?

⁵ Chading chiswiridin kand kuyirumburil in Kristu a mu mivu chitot ya kusambish yom yivud. Chilakej, kwading yipul piur pa manswik masu mela kusambish kwikal nich usu pa dichuku dia Pentekot. Ov, manswik masu mading ching kusu ma in Yuda ni ma antu akarumuka ikal in Yuda? Ov, Akamichid niyawiy ayitiya kand mu manswik minam ni kuyizizil nich spiritu utumbila? (Mid. 10:45) Ov, Akamichid amakundj adinga aswiridin chakusambish kuyitwal ku mukand ni kuziyil ku Chijil cha Moses? (Mid. 15:1, 5) Yipul yiney yading ya usey nakash. Adinga aswiridina kwikal nich spiritu wa Yehova mulong wa kukimb mu yom yiney yikurukina. Pakwez, spiritu winou wela kusal kusutil kudi nany?

⁶ Milong yawonsu adinga ni kuyitwal kudi akadivar akweta yisend ya kutakel. Pita, Paul, nenday Barnaba ading ku chikumangan cha chisak chitakedila ni alejana mutapu ukarumukidinay Yehova kudi Akamichid akad kutwal ku mukand. (Mid. 15:7-12) Kupwa kwa kushinshikin uman winou kusutil ku chitokish cha mazu ma mikand ya Hebereu ni kusutil ku ukwash wa spiritu utumbila, chisak chitakedila chakwata chiyul. Kupwa ayileja yikumangen kusutil ku kuyifundin piur pa chiyul chinech.​—Tang Midimu 15:25-30; 16:4, 5; Efes 3:5, 6.

7. Ov, uyakin ukurukina aumekesha mutapu ik?

⁷ Yom yikwau yivud ayitokisha kusutil ku mazu makwau mapepidilau nich spiritu mudi mikand yafunday Yohan, Pita, Jakob, nenday Paul. Pakwez, pa chisu chapwishau kufund Mikand ya in Kristu yawonsu, yipan ya uprofet ni ronganyin ramekeshau mu chilay arimikina pinipa. (1 Kor. 13:8) Ov, spiritu udandamedin kusal mudi mulej ni mwin kuvurish? Ov, ukez kudandamen kuyikwash in Kristu kukimbijol mu yom yikurukina ya Nzamb? Uprofet walejana anch ukudandamen.

Mu Machuku ma Kwisudiel

8, 9. Ov, anany akeza “kuzut” nich manangu ma muspiritu mu machuku ma kwisudiel?

⁸ Pisambinay piur pa machuku ma kwisudiel, mwangel umwing watakela kulond anch: “In kutakel akwet manangu, akez kazut mudi chitokish cha diur. Niyau ayikarumuna antu avud kwikal atentamina akez kazut chikupu mudi atutumbu. . . . Ni ronganyin rakin rikez kupandakan.” (Dan. 12:3, 4) Ov, anany akeza kwikal ni manangu, ni anany akez kuzut? Yesu waleta chijingidij mu chishimu chend cha tidiku ni yinfananfan. Pisambinay piur pa “disudiel dia mangand,” ndiy walonda anch: “Antu atentamina akez kuzut mudi muten mu want wa Tatukwau.” (Mat. 13:39, 43) Mu mazu mend, Yesu walejana anch “antu atentamina” awiy “antu a mu want wa Nzamb” in Kristu azizidilau many.​—Mat. 13:38.

⁹ Ov, in Kristu awonsu azizidilau many akez “kuzut”? Mwawiy, ku mutambu umwing, mulong in Kristu awonsu akez kusal mudimu wa kulejan, kwikadish in kwilej, ni kukasikeshijan umwing ni mukwau ku yikumangan. Azizidilau many afanyidin kusha chilakej chiwamp. (Zak. 8:23) Chikwau kand, yom yikurukina afanyina kuyimekesh mu machuku ma kwisudiel. Uprofet wa Daniel wafundau ‘aujindjika’ djat ni kwisudiel. (Dan. 12:9) Ov, mutapu ik ni kusutil kudi anany kwapakay spiritu yom yiney yikurukina?

10. (a) Ov, spiritu wamekesha uyakin ukurukina mu machuku ma kwisudiel kusutil kudi anany? (b) Lejan mutapu warumburilau patok uyakin piur pa tempel mujim wa muspiritu.

¹⁰ Nlel unou, anch chisu chawanyin cha kutokish yom ya muspiritu, spiritu utumbila uyikwashining antu asadidinau kudi “kashalapol ushinshamena ni kubabal” ku biro mujim wa mangand mawonsu mulong wa kutesh nawamp uyakin ukurukina wa yom yakanganyau kutesh pa kusambish. (Mat. 24:45; 1 Kor. 2:13) Yidi ya Chisak Chitakedila yikat kushakam pamwing mulong wa kutenchik yom yifanyidinau kurumburil nawamp. (Mid. 15:6) Yilejinau, akat kuyifund mu mikand chakwel antu awonsu ataninamu. (Mat. 10:27) Mu kusut kwa machuku, kukutwish kwikal kuswir kwa yitokish yikwau, niyawiy akat kuyirumburil nich kashinsh.​—Tal mushet “Mutapu Walejanay Spiritu Kurumburik Kwa Tempel wa Muspiritu.”

Taninamu mu Mudimu wa Spiritu Nlel Unou

11. Ov, mutapu ik ukatau kutaninamu in Kristu awonsu mu mudimu wa spiritu utumbila mu kulejanang yom yikurukina ya Nzamb?

¹¹ In Kristu ashinshamena awonsu atanidinamu mu yiyukish ya mudimu wa spiritu utumbila mu kulejang yom yikurukina ya Nzamb. Mudi mwasalay ni in Kristu a mu chitot cha mivu cha kusambish, nlel unou tukat kwilej, tuvurikin, ni kusadil jinsangu jitukwashinau kutesh kudi spiritu utumbila. (Luka 12:11, 12) Tuswiridinap kwilej shikol ya piur chakwel tutesha nawamp yom yikurukina ya uyakin yapalangeshau. (Mid. 4:13) Chawiy lel, mutapu ik tufanyidina kusal chakwel tutesha nawamp yom yikurukina ya Nzamb? Shinshikin yiyul yiney yikemp.

12. Ov, chisu ik chitufanyidina kwit spiritu utumbila mu malembil?

¹² Itany spiritu utumbila mu malembil. Kurutu kwa kwilej Bibil, tufanyidin kwit mu malembil spiritu utumbila chakwel atutakela. Chinech chidi chakin pitudia ayinetu ap pitukweta kachisu kakemp. Malembil minam ma kwikepish makez kamusangaresh Tatukwetu wa mwiur. Mudi mwalonday Yesu, Yehova ukez kalet spiritu utumbila pakad choy anch twamulembil nich muchim umwing.​—Luka 11:13.

13, 14. Ov, kurijek yikumangan kukwashining nchik mu kutesh nawamp yom yikurukina ya Nzamb?

¹³ Irijekany mulong wa yikumangan. Tutambwiling “yakudia pa chisu chiwanyidina” kusutil kudi chisak cha kashalapol. “Kashalapol” usadil mudimu wend pakatay kutufundin mikand yimedina pa Bibil ni kusutil ku kutenchik maprogram ma dilejan ni yikumangan. Utongining nawamp piur pa maswir ma ‘anamakwetu in Kristu’ pakatay kushinshikin piur pa jinsangu jimwing. (1 Pita 2:17; Kol. 4:16; Jud 3) Tukez kusal pamwing nich spiritu utumbila anch twasal yawonsu yitufanyidina kusal chakwel tulondula yiyul yiletinau.​—Kuj. 2:29.

¹⁴ Pitwirijekina mulong wa yikumangen ya in Kristu, chiwapidil kutang maverse ma Bibil majimbwilau ni kupakish kutongijokin pa mutapu makwatijadina ni mutu wa mulong tushinshikidina. Kusal mwamu, kukez katukwash kutesh nawamp yilondinay Bibil. (Mid. 17:11, 12) Pitutangina ma verse, tutekin mu manangu yitongijok yikeza spiritu utumbila kutukwash kuvurik. Chikwau kand, anch twatang verse mu Bibil, tulamin mu manangu pandond padiay chakwel tukutwish kumutan verse winou swaa pitukwikala nend kuswir.

15. Ov, mulong wak tufanyidin kutang mukand ni mukand wawonsu upalangeshinau, ni mutapu ik tukutwisha kusal mwamu?

¹⁵ Tangany mukand ni mukand wawonsu upalangeshinau. Mikand yimwing yikatau kupalangesh kitukatap kuyisadilang ku yikumangan yetu, pakwez ayifundin mulong wa kuwanyish maswir metu. Ap mikand yikatau kufund mulong wa antu awonsu, in kufund atongining kand mulong wetwetu. Mu mangand minam makwatikena nich midimu, tukutwish kutan chisu chitufanyidina kuchingel chom ap muntu umwing pa ndond kanang. Anch twasendin mukand utwakad kal kutang ap twatangin ching kusu ka chikunku, tufanyidin kusal usu wa kusadin chisu chinech mulong wa kutang ap kachikunku. Amwing akat kutang mukand ni mukand wawonsu upalangeshinau kusutil ku kutesh ma band kaset ma mikand yetu pendilau ra pansh ap mu motak. Kukimbijol kuwamp ni kufund mulong wa yisakin ya in kutang, yiney yawonsu yikasikeshin kusanger kwetu kwa yom ya muspiritu.​—Aba. 2:2.

16. Ov, chiyukish ik tukutaninamu anch twafund ni twatongijokin nakash pa yipul yitushikediina ku muchim?

¹⁶ Tongijokinany pa yitutangina. Tonginany nakash piutanginanya Bibil ap mikand yengamedina pa Bibil, ni tambulany chisu chakutongijokin pa yom yiney. Piulondwila nawamp mutapu ulondulijadina yitongijok, ukutwish wasambish kwiyipul yom yimwing. Ukutwish kufund yipul yiney ni kuyishinshikin chisu chikwau. Yisu yivud anch twadandamen kukimbijol pa yom yitukwatina ku muchim, tukushiken ku kuyijik nakash. Yom yituteshina yikutwish kwikal chikunku cha dipit dietu dikeza kuwanyish maswir metu.​—Mat. 13:52.

17. Ov, program ik wa dilejan dia dijuku ap dia amwiney ulondwila?

1⁷ Itekina program wa difukwil dia dijuku. Chisak Chitakedila chatukasikesha etwawonsu kwitekin urel umwing ap chisu chikwau rubing ni rumbing mulong wa dilejan dia muntu ipend ap dilejan dia dijuku. Kutenchik kwa program wa chikumangan chetu kutukwashin tusadila chiyul chinech. Ov, yom ik ukutwisha kwilej pa chisu cha Difukwil dia Dijuku dia urel? Antu amwing atangining Bibil, ni kukimbijol ma verse malangwishina yipul mu manangu mau ni kufund mazu mamwing ma kurumburil mu Bibil wau. Majuku mavud mirijekining pamwing mulong wa yikumangan, itekidining chisu cha kusadil malejan milejinau mu dijuku diau. Mitu yimwing ya majuku yitondining malejan ma usey ni mawanyishina maswir ma dijuku ap makwatijadina nich milong ap yipul yifanyidinau kwilej mu dijuku. Mu kusut kwa machuku, ukutwish pamwing ap kushinshikin pa mitu ya milong yikwau.a

18. Ov, mulong wak tufanyidinap kwimik kwilej uyakin ukurukina wa Dizu dia Nzamb?

¹⁸ Yesu walonda anch spiritu ukez kusal mudi nkwash. Chawiy lel tufanyidinap kwimik kwilej uyakin ukurukina wa Dizu dia Nzamb. Uyakin winou udi chikunku cha “ronganyin ra Nzamb” ra usey, ni tukwitin chakwel ukimbijola mu Dizu dined. (Tang Jinswir 2:1-5.) Utulejin yivud piur pa yom “yawiy kamu yarijekinay Nzamb kudi awiy amukatina.” Pitusadina usu wa kwilej yom yivud piur pa Dizu dia Yehova, spiritu utumbila ukez katukwash, mulong “spiritu ukat kupak yom yawonsu, mwawiy ni yom ya Nzamb yikurukina.”​—1 Kor. 2:9, 10.

[Dizu didia kwishin kwa paj]

Ov, Mutapu ik Ukutwisha Kwakul?

• Ov, mu mitapu ik yaad mutukwashinay spiritu kupak “yom yikurukina ya Nzamb”?

• Ov, spiritu utumbila walejana kusutil anany yom yikurukina ya uyakin mu mivu chitot ya kusambish?

• Ov, mutapu ik usadinay spiritu utumbila mudimu mulong wa kutokish yom mu chirung chetu?

• Ov, chom ik ukutwisha kusal mulong wa kutaninamu chiyukish mu mudimu wa spiritu?

[Kamushet kadia pa paj wa 30]

Mutapu Walejanay Spiritu Kurumburik Kwa Tempel wa Muspiritu

Pakach pa “yom yikurukina ya Nzamb” yalejanau mu mivu chitot ya kusambish kwading dizang ni kupwa tempel wafanikesha uyakin ujim wa muspiritu. Paul wautazuka uyakin winou anch “dizang diakin diatungau kudi Yehova, kaditungap kudi antu.” (Heb. 8:2) Winou wading tempel mujim wa muspiritu, ditenchik diayikwasha kumushejin Nzamb anch chitwishikin kusutil ku yakupesh ni win kupesh wa Yesu Kristu.

“Dizang diakin” diasambisha kwikalaku mu muvu wa 29 C.C. pamubatishau Yesu ni Yehova wamwitiya mudi muntu ukeza kwikal chakupesh chiwanyidina. (Heb. 10:5-10) Kupwa kwa rufu rend ni kuvumbuk, Yesu wandama mwin Ndond Yitumbila Nakash ya tempel wa muspiritu ni walejana usey wa yakupesh yend “kurutu kwa Nzamb.”​—Heb. 9:11, 12, 24.

Mwin ndond yikwau mu Bibil, kambuy Paul wayifanikesha in Kristu azizidilau many nich chikumbu ‘chijimbishinau kwikal chikumbu cha Nzamb chitumbila mwi Nsalejetu.’ (Efes 2:20-22) Ov, tempel winou wading wa chilik chimwing ni “Dizang diakin” dialejanay kwinyim mu mukand wayifundinau in Hebereu? Mu makum ma mivu, Atuman a Yehova ading atongin mwamu. Ading atongin anch in Kristu azizidilau many ayirijeka pa divu chakwel ikala “mayal” mu tempel wa mwiur wa Yehova.​—1 Pita 2:5.

Pakwez, mu muvu wa 1971, yid ya chisak cha kashalapol yikweta chisend yasambisha kujingunin anch tempel wisambinay Paul mu mukand wa Efes kelap kwikal tempel mujim wa muspiritu wa Yehova. Anch “Dizang diakin” diading in Kristu azizidilau many avumbuka, dizang dined diela kwikalaku kupwa kwa kuvumbuk kwau kwasambisha pa chisu cha “kwez kwa Nsalejetu.” (1 Tes. 4:15-17) Pakwez, piur pa dizang, Paul wafunda anch: “Dizang dined chidi chijingidij cha chirung cha katat.”​—Heb. 9:9.

Kusutil ku kwilikej nawamp maverse minam ni makwau, chimeken patok anch tempel wa muspiritu kadingap adandamedina kumutung ni in Kristu azizidilau many kadingap “mayal” madingau ni kurijek pa divu mulong wa kumawejaku. Pakwez, in Kristu azizidilau many akat kumusadin mu chipang cha pol ni mwin Ndond Yitumbila ya tempel wa muspiritu, apanin dichuku ni dichuku “yakupesh ya kushiman kudi Nzamb.”​—Heb. 13:15.

[Chipich chidia pa paj wa 31]

Ov, mutapu ik tukutwisha kutesh nawamp “yom yikurukina ya Nzamb”?