Kimbany Mu “Yom Ya Nzamb Yikurikina”

“Mulong [s]piritu ukat kupak yom yawonsu, mwawiy ni yom ya Nzamb yikurikina.”—1 KORINT 2:10.

1. Uyakin ik umwing wa Bibil ukutwisha kuyisangaresh in kwilej Bibil?

ANTU avud pakach petu adia mu chikumangen cha Ukristu akutwish kuvurik musangar utwova pitwileja uyakin kapamp ka kusambish. Twajingunina kurumburik kwa dijin dia Yehova, mulong wak ulikidinay mar, mulong wak uyilingau antu amwing mwiur ni yom yichingejinau antu awonsu ashinshamena mu machuku ma kurutu. Kurutu kwa kwijik yom yiney twadinga ni kushinshikin Bibil, pakwez yom yiney yading yijingamen kudi etu, mudi muchidia kudi antu avud. Twadinga mudi muntu utadila mwinshin mwa mem annam akweta ulombu. Pakad cha kutal nich, waman nich kujalirik yom ya ufun yidia mwishin mwa mem. Pakwez ni cha kutal nich ap nich chintadil chidia pansh pa waat, wasangar pa kuman annam inay akweta ulombu kushalijan, ansh, yisalamb ya mu mem ni yitang yikwau yisangareshina. Chawiy chimwing, anch muntu kanang wasambish kutukwash kutesh Bibil, pawiy tukata kuman kapamp ka kusambish “yom ya Nzamb yikurikina.”—1 Korint 2:8-10.

2. Ov, mulong wak musangar wa kwilej Dizu dia Nzamb kiufanyidinap kupwa?

² Ov, tufanyidin kwimanyin kwetu kusu pa ronganyin ra piur-piur ra uyakin wa Bibil? Mu dizu “yom ya Nzamb yikurikina” mudi chovu cha manangu ma Nzamb mayijinguninau in Kristu kudi mwiku utumbila pakwez majingamena kudi antu akwau. (1 Korint 2:7) Manangu ma Yehova kimakwetap mupak ni tukutwish kutan musangar ujim mu kulondul jinjil jend! Kitukezap kutwish kwijik kachom ni kachom piur pa jinjil ja manangu ma Nzamb. Musangar utwova pa chisu twileja kapamp ka kusambish malejan ma Bibil tukutwish kuushal nich chikupu anch twadandamen pakad kulik kukimbijol mu “yom ya Nzamb yikurikina.”

3. Ov, mulong wak tufanyidin kwov kurumburik kwa mayingishin ma yitiyij yetu?

³ Ov, mulong wak tuswiridina kutesh kurumburik kwa “yom . . . yikurikina” yiney? Kutesh kurumburik kangal ching kusu yom yitwitiyijina pakwez kand mulong wak utuyitiyijina—mayingishin ma yitiyij yetu— kukat kukasikesh ritiy retu ni ruchingej retu. Bibil utulejin anch tusadil ‘spiritu’ wetu chakwel twijika “yiwapila ni yirijekina ni yiwanyidina ku rusot ra Nzamb.” (Rom 12:1, 2) Kutesh mulong wak utwitinay Yehova anch tushakam mu mutapu kanang kukasikeshin mupak wetu wa kumuziyil. Chawiy lel, kwijik “yom . . . yikurikina” kukutwish kutwinkish usu wa kujijaman ku choziu cha kusot kusal yisal yiyimp ni kukutwish kutubachik twikal “atakamena ku midimu yiwamp.”—Titus 2:14.

4. Kwilej Bibil kwitin kand ik?

⁴ Kwov kurumburik kwa yom yikurikina kwitin kwilej. Pakwez, kwilej kudiap chilik chimwing nich kutang kwau chom piur-piur. Kwitin kushinshikin nawamp rusangu chakwel kuman mutapu rambatena nich yitwija kal. (2 Timote 1:13) Kwitin kushinshikin mayingishin ma yilondilau. Kwilej Bibil kwitin kand kutongijokin pa mutapu tukutwisha kusadil yitwilejina pa chisu cha kukwat mipak mu chisu cha kuyikwash antu akwau. Chikwau, mulong “mazu mawonsu ma mukand wa Nzamb madi makin ni ma ukwash,” chawiy mu kwilej kwetu mufanyidin kwikal “dizu diawonsu dikubudika mu kan mwa Nzamb.” (2 Timote 3:16, 17; Mateu 4:4) Kwilej Bibil kwitining usu nakash! Pakwez kukat kusangaresh kand, ni kwov kurumburik kwa “yom ya Nzamb yikurikina” kudingap kukash nakash.

Yehova Uyikwashin in Kwikepish

Ova Kurumburik

5. Ov, nany ukutwisha kwov kurumbuk kwa “yom ya Nzamb yikurikina”?

⁵ Ap anch kiwadingap ni manangu ku shikol ni ap anch kiwijididinap kwilej, kiufanyidinap kutong anch ukutwishap kwov kurumburik kwa “yom ya Nzamb yikurikina.” Padingay Yesu nikusal mudimu wend pansh, Yehova wajingunina chovu cha rutong Rend, kichadingap kudi in manangu ni ambabej, pakwez chadinga kudi antu akad kwilej ni a pansh adinga in kwikepish mu chilik chakwel anch ikal atushalapol afundishinau a Nzamb. Adinga mudi anikanch payilakejau ni antu ileja ku mashikol. (Mateu 11:25; Midimu 4:13) Piur pa yom “yarijekay Nzamb kudi awiy amukatila,” kambuy Paul wayifundina ambay nend akaritiy anch: “Yawiy kamu Nzamb wayimekeshila kudi etu mu [s]piritu. Mulong [s]piritu ukat kupak yom yawonsu, mwawiy ni yom ya Nzamb yikurikina.”—1 Korint 2:9, 10.

6. 1 Korint 2:10 urumburikin ik?

⁶ Ov, mutapu ik ukatay spiritu wa Nzamb kupak “yom yawonsu, mwawiy ni yom ya Nzamb yikurikina?” Pandond pa kumwinkish mwin Kristu umwing ni umwing kuburik kwa pakampwil kwa uyakin, Yehova usadidil spiritu wend mulong wa kutakel dirijek diend, uyinkishina antu a Nzamb adia mu uumwing nich chovu cha Bibil. (Midimu 20:28; Efes 4:3-6) Mu mangand mawonsu, yikumangen yawonsu yikwet program ndiy umwing kusu wa kwilej Bibil. Mu kusut kwa mivu, apwisha kal kwilej malejan kushalijan ma Bibil. Spiritu utumbila usadidil kusutil ku chikumangen chakwel kuyikwash antu ikala nich ngikadil yiswiridikina mulong wa kutesh “yom ya Nzamb yikurikina.”—Midimu 5:32.

Yidia mu “Yom ya Nzamb Yikurikina”

7. Ov, mulong wak antu avud kateshinap kurumburik kwa “yom ya Nzamb yikurikina”?

⁷ Tufanyidinap kutongin anch “yom . . . yikurikina” yidi ching kusu yom yikash-yikash. Rongayin ra “yom ya Nzamb yikurikina” rijingamen kudi antu avud, chidiap anch mulong manangu ma Nzamb madi makash nakash kumatambul, pakwez chidi mulong Satan uyidimbin antu chakwel alika ukwash uyinkishinay Yehova kusutil ku dirijek Diend.—2 Korint 4:3, 4.

8. Yom ik yikurikina yisambidinay Paul mu shapitre wa kasatu wa mukand wend wayifundinay in Efes?

⁸ Shapitre wa kasatu wa mukand wa Paul wayifundinay in Efes ulejen anch mu “yom ya Nzamb yikurikina” mudi uyakin uvud uteshinau kurumburik nawamp antu a Yehova, chilakej kwijik udia Mbut yashilaumu, kutondiu kwa antu amwing akweta ruchingej ra kuya mwiur mukach mwa antu, ni Want wa Umesia. Paul wafunda anch: “Kiyijikishap yiney kudiau an a antu a majuku makwau mudi chamekeshau katat kudi apostol ni aprofet atumbila mu [s]piritu; chakwel in mangand adi answan netu, yid ya mujimbu umwing, ni in kushilimu netu mu Kristu.” Paul walonda anch amwinkisha “kuyimekeshil antu awonsu mudi mwatutekilay ujindj watujindjikinau kudiok kwisambishil kwa mangand mwi Nzamb.”—Efes 3:5-9.

9. Ov, mulong wak didi dilau dia kutesh kurumburik kwa “yom ya Nzamb yikurikina”?

⁹ Paul wadandamena kurumburil rusot ra Nzamb anch: “mu chirung chinech ku usu wa Chikumbu cha Nzamb . . . adia mwiur akwijik manangu mapandakena kujimb ma Nzamb.” (Efes 3:10, MM) Angel atanidinamu mu kushinshikin ni kutesh kurumburik kwa manangu ma yisal ya Yehova yisadidilay chikumangen cha Ukristu. Twitapidil dilau mudi ik dia kutesh kurumburik kwa yom yisangaredinau ap kand angel! (1 Pita 1:10-12) Cha kaad, Paul ulondil anch tufanyidin kusal usu wa “kwijik ni kwonganyin nau in Kristu awonsu mudi muchidia pa kujimb ni pa kulep ni pa kukurik” kwa ritiy ra Ukristu. (Efes 3:11, 18) Tushinshikinany katat yilakej yimwing ya yom yikurikina yikutwisha kuwejin ronganyin retu.

Yilakej ya Yom Yikurikina

10, 11. Kwambatan nich Bibil, chisu ik chikalay Yesu chikunku cha kusambish cha “mbut” ya “mband” wa mwiur wa Nzamb?

¹⁰ Twij anch Yesu ndiy chikunku cha kusambish cha “mbut” ya “mband” wa mwiur wa Nzamb, wisambidinau mu Disambishil 3:15. Chakwel tujimbisha chovu chetu, tufanyidin twiyipul anch: ‘Chisu ik chikalay Yesu Mbut ya kushilamu? Ov, chadinga kurutu avadika mudi muntu, pavadikay wikal muntu, pamubabatishau, ap pa chisu chamuvumbulau?’

¹¹ Nzamb washilamu anch chikunku cha mwiur cha dirijek diend, chisambidinau mu uprofet winou mudi “mband” wend, ukez kuval mbut yikeza kumuchany nnam ku mutu. Pakwez mivu tunan yasuta, ni mukajend a Nzamb kavalap mbut yikweta usu wa kutwish kumuchany Satan ni midimu yend. Chawiy lel, uprofet wa Isay umutazukin anch “mband wakad kuval” ni “wovila runeng nakash mu muchim.” (Isay 54:1, 5, 6) Inge, Yesu wavadikina mu Betelehem. Pakwez ching kusu kupwa kwa kubabatishiu kwend, pamuzizilau many nich spiritu utumbila ni pachinech wikala nich uruud wa pakampwil nend Nzamb, pawiy palonday Yehova anch: “Mwinou ndiy Mwanam.” (Mateu 3:17; Yohan 3:3) Chikunku cha kusambish cha “mbut” ya mband chimekesha achinay patok. Kwinyim, atwimbuy a Yesu niyawiy ayizizina many ni ayivala ku spiritu utumbila. “Mband” wa Yehova, wadinga mu mivu yivud mudi “mband wakad kuval,” watwisha katat “kubarok nich musangar.”—Isay 54:1; Galatia 3:29.

12, 13. Maverse ik malejena anch in Kristu awonsu azizidilau many adia pansh asadil awonsu “kashalapol ushishamena ni kubabal”?

¹² Chilakej cha kaad cha yom yikurikina yatujinguninau chidi cha rutong ra Nzamb ra kuyitond antu 144000 pakach pa antu. (Kuburik 14:1, 4) Twitiyijin malejan malondila anch antu awonsu azizidinau many ashicha pa divu mu chirung chin chawonsu adi “kashalapol ushishamena ni kubabal” walonday Yesu anch ndiy ukeza kuleta “yakudia” ya pa chisu chau kudi a mu chikumbu. (Mateu 24:45) Ov, maverse ik ma Bibil malejena anch chovu chinech chidi chakin? Ov, Yesu wadinga wisambidin mu uvud piur pa mwin Kristu mwawonsu ukuyikasikesha anamakwend nich yakudia ya mu spiritu?

¹³ Nzamb wauleja muchid wa Isarel anch: “Udiany atuman am. Nakutondanya kwikal atushalapol am.” (Isay 43:10) Pakwez, pa Nisan 11 mu muvu wa 33 mu Chirung Chetu, Yesu wayileja antakel a Isarel anch Nzamb waulikin kal muchid wau, ukwikalap kand kashalapol Wend. Yesu walonda anch: “Want wa Nzamb akez kaudiosh kudi en, akez kaupan kudi muchid ukata kusong mabuj mau.” Yesu wayileja antu anch: “Talany bil, chikumbu chen chikushal chamwamu.” (Mateu 21:43; 23:38) Mudi kashalapol wa Yehova, chikumbu cha Isarel chadinga chakad kushinshamana ni chakad manangu. (Isay 29:13, 14) Kwinyim pa dichuku diawiy dimwing, palonday Yesu anch: “Kashalapol ushishamena ni kubabal, . . . ndiy nany?” chakin kamu wadinga wipwil anch, ‘Muchid ik wa manangu ukeza kuuswinkan wa Isarel chakwel wikala kashalapol ushinshamena wa Nzamb?’ Kambuy Pita wakula palejay chikumangen cha in Kristu azizidilau many anch: “En udiany . . . muchid utumbila, antu a Nzamb amwinend atondilau.” (1 Pita 1:4; 2:9) Muchid winou wa mu spiritu, “Isarel wa Nzamb,” wikala kashalapol musu wa Yehova. (Galatia 6:16) Mudi yid yawonsu ya Isarel wa pasak yadinga “kashalapol” umwing, chawiy chimwing kand in Kristu awonsu azizidilau many adia pansh pa chisu chin chawonsu asadil “kashalapol ushishamena ni kubabal” umwing. Twitapidil dilau mudi ik dia kutambul “yakudia” kusutil kudi kashalapol wa Nzamb!

Dilejan dia Bibil dia Muntu Ipend Ditwish Kwikal Disangareshina

14. Ov, mulong wak kwilej Bibil kuletining musangar, kupandakanamu kwau kumutang kusu?

¹⁴ Anch atwinkish chovu chisu cha kutesh Bibil, ov, twovilingap musangar mulong wa mutapu ukasikeshinau ritiy retu? Chawiy lel kwilej Bibil, kupandakenamu kwau kutang kwa chamwamu, kukutwish kulet musangar mudi winou. Chawiy lel, pa chisu utangina mikand ya Ukristu, iyipula amwiney anch: ‘Chovu chinech chishalijadin nchik nich yinija kal pa mulong winou? Maverse ik makwau ap yirumburil ik yikwau Nikutwisha kutongin yikutwisha kukasikeshin yitongijok yiletinau mu rusangu riner?’ Anch kwitin kukimbijol kand, fund chipul chey chiusotila kutan chakul, ni chisala chikala rusangu rikwau ra kwilej.

15. Ntong ik ja kwilej ukutwisha kusanger, ni mutapu ik jikutwisha kwikal nich ukwash wa chikupu?

¹⁵ Ntong ik ja kwilej jikutwisha kukuletin musangar wa kujingunin yom yisu? Ntong jinej mudi kushinshikin nakash kwa manswik kushalijan maswikay Nzamb kwayiletina kal antu ukwash wa chitokish. Ukutwish kukasikesh ritiy rey ku kwilej uprofet wisambidina Yesu Kristu ap kushinshikin verse ni verse mu buku umwing wa mabuku ma Bibil misambidina uprofet. Kushinshikin kand rusangu ra katat ra Atuman a Yehova kukasikeshin ritiy, kusadil buku Les Témoins de Jéhovah : Proclamateurs du Royaume de Dieu, anch ukwet mukand winou mu rudim ren.a Ni kuchirikin “Yipul ya in Kutang” yikur yidia mu Chinong cha Kalam yikutwish chakin kamu kukwovishany patok kurumburik kwa maverse kanang. Fund mans majim mutapu utonginau nich Maverse masadidilau mulong wa kushik ku dipwishil. Chom chinech chikez kukukwash kufumb “manangu” mey ni kukudish njingunin. (Hebreu 5:14) Piwilejina, fund manans mu Bibil wey ap pa dipaper chakwel anch kwilej kwey kwikal nich ukwash wa chikupu kudi ey pamwing ni antu ukutwisha kukwash.

Yikwasha Ansand Asangera Kwilej Bibil

16. Mutapu ik ukutwisha kuyikwash ansand chakwel asanger kwilej Bibil?

¹⁶ Anvaj akutwish kusal yivud mulong wa kulangwish impu ya an au. Kangal wapipeshany ukaliweny wa an wa kutesh yom yikurikina. Anch wanyinkishany an mutu wa mulong ufanyidinau kukimbijol jinsangu jau mu kwirijek ku dilejan dia Bibil dia dijuku, ukutwishany kuyipulany piur pa yom yilejinau. Mu dilejan dia dijuku mu kutwish kand kwikal yikunku ya kwiyijidish mulong wa kuyikwash ansand ileja mutapu wa kuchidij ritiy rau ni kumekesh anch yom yayilejau yidi yakin. Chikwau, ukutwishany kusadil broshir ‘ Voyez le bon pays ’ b mulong wa kuyilej jindond jisambidinau mu Bibil ni kwovikesh nawamp yiutangina mu kutang kwey Bibil kwa rubing.

17. Ov, mulong wak tufanyidin kwikal isikena mwi ntong jetu ja kwilej kwa muntu ipend Bibil?

¹⁷ Ntong ja kwilej kwa muntu ipend kwa Bibil jikutwish kwikal jisangareshina ni jikasikeshina ritiy, pakwez babal kangal jikukangesha kurijekang yikumangan ya chikumangen. Yikumangan yidi njil yikwau yisadidilay Yehova mulong wa kutulej kusutil kudiay “kashalapol ushishamena ni kubabal.” Pakwez, kukimbijol kukwau kukutwish kuwejin ku kusal yirumburil yey yikal ya manangu ku yikumangen—chilakej, ku Dilejan dia Buku dia Chikumangen ap pa chisu cha kwisambin milong yijim ya kutang Bibil kwa rubing mulong wa Shikol ya Mudimu wa Uteokras.

18. Ov, mulong wak usu tusadila mulong wa kwilej “yom ya Nzamb yikurikina” udi wa usey?

¹⁸ Dilejan dikurikina dia muntu ipend dia Dizu dia Nzamb dikutwish kukukwash umushejina Yehova piswimp. Chakwel kumekesh usey wa dilejan mudi dined, Bibil ulondil anch: “Manangu makat kukukwash mudi nfalang. Manangu makutwish kand kukuchidij, kwawiy kuwap kwa ronganyin.” (Mulej 7:12) Chawiy lel, usu usadila chakwel ujimbisha chovu chey cha yom ya mu spiritu udi wa usey. Bibil uyishidilamu antu adandamedina kukimbijol anch: “[ukez] kutan ronganyin ra Nzamb.”—Jinswir 2:4, 5.

[Mazu madia kwishin kwa paj]

Ov, Ukutwish Kurumburil?

• “Yom ya Nzamb yikurikina” yom ik?

• Ov, mulong wak kwilej kwetu yom yikurikina kukez kapwap?

• Ov, mulong wak kwov kurumburik kwa “yom ya Nzamb yikurikina” akwazuridin kudi in Kristu awonsu?

• Ov, mutapu ik ukutwisha kutaninamu nakash mu “yom ya Nzamb yikurikina”?

[Chipich chidia pa paj wa 28]

Chisu ik chikalay Yesu, Mbut yashilaumu?

[Chipich chidia pa paj wa 31]

Anvaj akutwish kuyinkish anau mitu ya milong chakwel kukimbijol jinsangu mu kwirijek mulong wa dilejan dia dijuku