Yipul Ya In Kutang . . .

Ov, in Kristu awonsu ashinshamena ayiling mwiur?

▪ Antu avud atangin kal mazu ma Yesu mongojina anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kikal nich mwom wa chikupu.” (Yohan 3:16) Ov, Yesu walonda anch in kwifukwil awonsu ashinshamena a Tatukwend, Yehova Nzamb, akez kuya mwiur mulong wa kusanger mwom wa chikupu mu musangar wakin?

Tal chitongijok chivuvurishina cha Yesu anch: “Kwikil muntu ap umwing wayap kal mwiur, ching kusu Mwan a muntu wadiokal mwiur.” (Yohan 3:13) Chom chinech chirumburikin anch in kwifukwil ashinshamena a pasak, mudi Nowa, Aburaham, Moses, ni David kayap mwiur. (Midimu 2:34) Chawiy lel, kwisu kwayau? Mu kulond mu wiswimp: Atushalapol ashinshamena a Nzamb a pasak adi mwi nzay, alel mu tul twa rufu, kijap kwau chom ap chimwing, achingejin kusanguk.​—Mulej 9:5, 6; Midimu 24:15.

Yesu ndiy muntu wa kusambish walonda anch antu amwing akez kushakam mwiur kupwa ku rufu rau. Ndiy wayileja in kwilej end anch ndiy ukez kuyirijekin ndond mwiur. (Yohan 14:2, 3) Chom chinech chading chisu kudi antu a Nzamb. Kupwa kambuy Paul warumburila anch kupwa kwa rufu ra Yesu ni kuvumbuk mulong wa kuya mwiur, Yesu ‘wayibuzina in kwilejend njil yisu, yikwet mwom’​—njil yimwing yadinga kandikal muntu ap umwing ayamu kurutu.​—Hebreu 10:19, 20.

Ov, chinech chirumburikin anch kudiokal pinap antu awonsu ashinshamena akez kuya mwiur? Bwat, kuvumbuk mulong wa kuya mwiur didi ditenchik diayinkishau antu amwing kusu. Pa uchuku wend wa nsudiel, Yesu wayileja atwimbuy end anch akez “kushakam mu jinkwas ni kurumburish” mu Want wa mwiur. Chawiy lel, mudimu wau ukez kikal wa kuyikel pamwing ni Yesu mwiur.​—Luka 22:28-30, TMK.

Mudi atwimbuy, antu akwau akez kuyinkish niyawiy chisend chinech chamushena. Kambuy Yohan, wamana mu chishimushimu Yesu pamwing ni chisak antu avumbuka mulong wa kuya mwiur akeza kwikal ‘want wa in kupesh chad awiy akez kayikel pa mangand.’ (Kujingunik 3:21; 5:10) Ov, adi inchi pakach pau? Mudi mu winyikel wawonsu, ching kusu uvud wa antu akemp awiy akata kuyikel. Chilik chimwing kand, piur pa Want wa mwiur winou. Yesu, Mwan a Mukoku wa Nzamb, uyikedil pamwing ni ambay nend 144000 “ayikwola antu inay mukach mwa antu akwau.”​—Kujingunik 14:1, 4, 5.

Chakin kamu, antu 144000 kadi kachisak kakemp kwisikesh ni uvud wa antu awonsu ashinshamena, a pasak ni a katat. Pakwez chinech choviken mulong antu 144000 ayisangula mulong wa kuya mwiur ni kusal mudimu utumbila wa pakampwil. Anch wading utungin chikumbu, ov wela kuyitazuk in kutung awonsu ija mudimu nawamp mwi ndond yey? Bwat. Ukukimb ching kusu uvud wa antu kulondulijan nich mudimu. Chilik chimwing kand, kadiap antu awonsu ashinshamena atondinau kudi Nzamb mulong wa chisend cha pakampwil cha kuyikel pamwing ni Kristu mwiur.

Winyikel wa mwiur winou ukez kuwanyish rutong ra Nzamb ra kusambish mulong wa antu. Yesu ni in kwiyikel nend 144000 akez kutakel mudimu wa kukarumun kwa divu chakwel dikala paradis, mwi ndond yikezau antu avud ashinshamena kushakam chikupu mu musangar. (Isay 45:18; Kujingunik 21:3, 4) Chinech chikez kuwejinaku antu adia mu chivurish cha Nzamb, akezau kusangul ni antu atekina ritiy rau mudia Yesu.​—Yohan 5:28, 29.

In kwifukwil ashinshamena awonsu a Yehova​—a pasak ni a katat​—akutwish kutambul chipan chipandakena kuwap cha mwom wa chikupu. (Rom 6:23) Antu akemp akez kutambul mwom wa mwiur mulong wa mudimu wa pakampwil, ni antu avud akez kutambul mwom wa pa divu mu paradis.