Ov, Ukez Kutesh Kubabesh Kwovikena Patok Kwa Yehova?

“Njil ya kuya yawiy ey. Yangany mwinimwa.”​—ISAY 30:21.

1, 2. Ov, chom ik chisadinay Satan, ni mutapu ik Dizu dia Nzamb ditukwashin etu?

CHIJINGIDIJ cha balibal chimekeshina njil yiyimp chikatap kudimban kusu; pakwez chidi kand cha ubaj. Tongin bil anch murund ney wakubabesha anch muntu muyimp waswimpa kwa kwisotil chijingidij chinech mulong wa kuyisal nayimp antu ayila mu weny pakad kushinshikin nawamp. Ov, ukutwishap kutesh kubabesh kwinoku?

² Chakin kamu, Satan udi mukankuny mukash usadina usu wa kutudimb. (Kuj. 12:9) Yibachikin yawonsu yiyimp yisambinau mu mutu wa mulong wasutina yidiokil kudi ndiy ni yisadin usu wa kutudiosh mwi njil yitwadina ku mwom wa chikupu. (Mat. 7:13, 14) Pakwez, Nzamb wetu muwamp utubabeshin etu chakwel tulika kulondul ‘yijingidij ya njil’ ya makasu ya Satan. Shinshikinany amboku katat yibachikin yiyimp yisatu ya Satan. Pitwisambidina mutapu Dizu dia Nzamb ditukwashin kwipuk kutudimb, tukutwish kutong anch Yehova wendin kwinyim kwetu ni utulejin jinjil jiwamp, palondinay anch: “Njil ya kuya yawiy ey. Yangany mwinimwa.” (Isay 30:21) Kutongijokin pa kubabesh kwovikena patok kwa Yehova kukez kutukasikesh kusal usu wa kuyitesh.

Kangal Wayilondul “Alej a Makasu”

3, 4. (a) Ov, mutapu ik udiau alej amakasu mudi dijiy diumina? (b) Ov, kwisu kudiokilau alej amakasu, ni chom ik chisotinau?

³ Tongin bil anch udi mu weny mwingand mwakad mem. Anch wapund dijiy dilemp kupwa wasambish kutal mwinimwa, ni kuchingel anch mem makez kubudik mulong wa kupwish impu yey. Pakwez, piwachirika kal kwinikwa waman kal anch dijiy diumin. Ov, ukez kuziy mud ik! Alej amakasu adi mudi diyij diumina. Antu awonsu ezina kudi awiy mulong wa kukimb mem ma uyakin akwez kuziy nakash. Yehova kusutil kudi atwimbuy end Paul ni Pita utubabeshin piur pa alej amakasu. (Tang Midimu 20:29, 30; 2 Pita 2:1-3,TMK.) Ov, alej inay amakasu adi anany? Mazu mapepilau nich spiritu utumbila ma atwimbuy inay aad matukwashin kujingunin kwisu kudiokila alej amakasu ni mutapu ik ukatau kudimban.

⁴ Paul wayileja amakurump a mu chikumangen cha Efes anch: “Mukach mwa chisak chen mukez kikal antu amwing akez kalond yom ya makasu.” Payilejay ambay in Kristu Pita wafunda anch: “Pakach pen kand pakez kwikal alej amakasu.” Chawiy lel, kwisu kwelau kudiokal alej inay amakasu? Awiy ela kudiokal mukash mwa chikumangen. Antu inay adi in kupumbwok.a Ov, chom ik chisotiningau? Awiy kasangerap kubudik mu ditenchik diakatishau pamwing ap pakusambish. Paul warumburila anch rutong rau ridi ra “kuyirumbul ni kwitiyij chakwel ayikakil ku mutambu wau.” Tal chijikish​—“in kwilej.” Pa ndond pa kuya ni kuyikadish in kwilej au, in kupumbwok akimbining kuyisend in Kwilej a Kristu chakwel ayilondula. Mudi “atwingol isumina,” alej amakasu asotining kuyipish ruchingej ra yid ya chikumangen, kushesh ritiy rau, ni kuyitwal kulemp ni uyakin.​—Mat. 7:15; 2 Tim. 2:18.

5. Ov, alej a makasu akat kusadilang milad ik?

⁵ Ov, mutapu ik ukatau alej a makasu kudimban? Milad yau yimekeshin spiritu wa kudimban. In kupumbwok “akez kusambish mu ujindj” kulet yitongijok yiyimp. Mudi in kwisak, awiy asadining mudimu wau mu ujindj, ni kwandjik mu ujindj yitongijok ya kupumbwok. Mudi mukatay muntu wa manangu kupakish kwandjik mikand ya makasu, in kupumbwok niyawiy akat kusadil “mazu ma kudimban,” ap mazu ma makasu, mulong wa kulejan anch yitongijok yau yitenchikinau yidi yakin. Awiy apalangeshin “kudimban,” ni “akat kuyipish . . . Mikand ya Nzamb” mulong wa kuyambatanish nich yitongijok yau. (2 Pita 2:1, 3, 13; 3:16) Chimeken patok anch, in kupumbwok kakatap kubangin yisakin yetu mu michim yau. Anch twayilondul tukez kushadik mwinjil jitwadila ku mwom wa chikupu.

6. Ov, Bibil utwinkishin chiyul ik chovikena piur pa alej a makasu?

⁶ Ov, mutapu ik tukutwisha kwilam ayinetu pantaliken ni alej a makasu? Chiyul cha Bibil piur pa mutapu tukutwisha kuyipuk choviken patok. (Tang Rom 16:17; 2 Yohan 9-11.) Dizu dia Nzamb dilondin anch: “Aurikany nau.” Mu yikarumun yikwau ya Bibil akarumwin dizu dined anch “karumukany,” “chinany kulemp ni awiy,” ni “ikalany kulemp nau!” Kwikiling kwidjidjek piur pa chiyul chafundau nich spiritu utumbila. Tongin bil anch mwingang wakulej anch ufanyidin kwipuk kushakam pamwing ni muntu ukweta mayej masamburikina, ap makata kujipan. Ov, ukez kwijik chilondilay mwingang, ni ukez kutesh nawamp kubabesh kwend. Mwaning, in kupumbwok adi in “matend nakash” ni akat kuyidimb antu akwau nich malejan mau ma makasu. (1 Tim. 6:3, 4) Yehova Mwingang Mujim, utulejin kulik kwibomb pamwing nau. Twij chilondinay, pakwez ov, tusadining usu wa kutesh kubabesh kwend mu mitapu yawonsu?

7, 8. (a) Ov, chom ik chirumburikina kwipuk alej a makasu? (b) Ov, mulong wak ukwatin mupak wa kwilam pantaliken ni alej a makasu?

⁷ Ov, chom ik chirumburikina kwipuk alej amakasu? Tufanyidinap kuyak ku yikumbu yetu ap kuyilangwish. Tufanyidinap kand kutang mikand yau, kutal maprogram mau matekinau ku Televizion, kukimb ma Site mau ku Internet, ap kwisambidin piur pa ma jurnal mau. Ov, mulong wak tufanyidin kwilam mutapu winou? Mulong wa rukat. Tumukatin “Nzamb wakin,” chawiy lel, tufanyidinap kusanger malejan mau ma makasu matadikijadina nich Dizu diend dia uyakin. (Kus. 31:5, TMK; Yoh. 17:17) Tukatin kand dirijek dia Yehova, kututambwidila malejan mamushena ma uyakin​—dijin dia Yehova ni kurumburik kwa dijin dined, rutong ra Nzamb piur pa divu, mwikadil wa afu, ni ruchingej ra disanguk. Ov, ukutwish kuvurik mutapu wiyova kapamp ka kusambish piwileja uyakin winou ni uyakin ukwau wa usey? Chad, mulong wak ukutwish kulikidil amwiney muntu kanang akovisha kuyip mulong ukat kulond nayimp piur pa dirijek diakuleja uyakin winou?​—Yoh. 6:66-69.

⁸ Chikalap nchik yilondinau kudi alej a makasu, tukezap kuyilondul! Tufanyidinap kuya ku dijiy diumina mudi dined chakwel atudimba ni kutuziyish. Pakwez, kwatany amboku mupak wa kushinshaman kudi Yehova ni ku ditenchik dined dipwishina impu yetu nich mem mawamp matudishina ma uyakin madiokila mu Dizu dia Nzamb diapepilau nich spiritu utumbila.​—Isay 55:1-3; Mat. 24:45-47.

Kangal Walondulany “Jinsangu Jamwamu”

9, 10. Ov, kubabesh ik kwapanay Paul kudi Timote piur pa “jinsangu jamwamu,” ni chom ik chading chitonginay Paul? (Tal not.)

⁹ Yisu yimwing, chikutwish kuswapal kujingunin anch chijingidij cha balibal achikarumwin ni chimekeshin njil yiyimp. Yisu yikwau, chikutwish kukasikan kujingunin anch chikat kutudimb. Chilik chimwing kand ni yibachikin yiyimp ya Satan, yimwing yimekening patok pakwez yikwau bwat. Kambuy Paul utubabeshin piur pa mipit yiyimp ya Satan​—“jinsangu jamwamu.” (Tang 1 Timote 1:3, 4, TMK.) Kangal twashadishany njil yitwadina ku mwom, tufanyidin kwijik, jisu jinsangu ja makasu, ni mutapu ik tukutwisha kwipuk kujitesh?

¹⁰ Kubabesh kwa Paul piur pa jinsangu ja makasu chidi chikunku cha mukand wend wa kusambish wamufundinay Timote, kalam mwin Kristu wadinga nich chisend cha kulam kwishitul kwa chikumangen ni kuyikwash ambay akaritiy chakwel ashinshamana. (1 Tim. 1:18, 19) Paul wasadila dizu dia Grek dikutwisha kulondin piur pa ringany, ap makasu. Kwambatan nich buku wa The International Standard Bible Encyclopaedia, dizu dined disambidin piur pa “jinsangu (ja chirelijon) jakad kwambatan nich uyakin.” Paul wading utongin pamwing ap piur pa makasu ma chirelijon makasikeshinau kudi yovil yamushena ap jingany ja kutongin.b Jinsangu jinej jikat “kuletish ntad”​—jikat kulangwish yipul ya chamwamu yitwadina ku kukimbijol kwakad kupwang. Jinsangu jamwamu jidi mupit wa mwin kudimban mujim, Satan, ukata kusadil makasu ma chirelijon ni anzamb a jingany chakwel ayishadisha akayitil. Chiyul cha Paul choviken patok: Kangal wateshany jinsangu ja makasu!

11. Ov, mutapu ik usadidilay Satan nich manangu relijon wa makasu mulong wa kuyidimb antu, ni chidi kusutil ku kutesh kubabesh ik kukeza kutukwash kwipuk kutudimb?

¹¹ Ov, jinsangu ik jimwing ja makasu jikutwisha kumushadish muntu wakad manangu? Chakusambish, dizu “jinsangu jamwamu” akutwish kudisadil ku makasu mawonsu ma marelijon ap jingany jikutwisha kutudiosh ku “yom yakin.” (2 Tim. 4:3, 4) Satan, wamekana kwikal “mwangel wa kutok,” wasadina nich manangu relijon wa makasu mulong wa kuyidimb antu. (2 Kor. 11:14, TMK) Mu dijin dia win Kristu, Kristendom ukat kulejan malejan ma​—Usatu, karung ka misiny, ni kuburen kufa kwa mupim​—mizwil nich jingany ni makasu. Kristendom ukasikeshidin kand misambu ya machuku matumbila mudi Nowel ni Pasak, yimekena mudi yakad mulong pakwez yikwet mij yau mu jingany ap yisal ya upagan. Kusutil ku kutesh kubabesh kwa Nzamb kwa kwiyauril ni kwipuk “[kukwat] ku chom chijondila” kakezap kutudimb nich jinsangu ja makasu.​—2 Kor. 6:14-17.

12, 13. (a) Ov, makasu ik makasikeshau kudi Satan, ni uyakin ik ukangeshina makasu minam? (b) Ov, mutapu ik tukutwisha kwipuk kutudimb nich jinsangu ja makasu ja Satan?

¹² Satan wakasikeshina kand makasu makwau makutwisha kutushadish anch tubabelap. Shinshikin yilakej yimwing. Chom chikutwish kwikal​—chitentamina ap chiyimp. Chimedin pa mutapu wiyovila amwiney. Chitongijok chinech akat kuchikasikeshin mu jinsangu ni mu kwipuwangesh. Chitongijok mudi chinech chiyimp piur pa yijil ya Nzamb chikat kutubachik chakwel tukanganya kuziyil ku yijil yawonsu yitentamina. Uyakin udi anch tuswiridin yany ya kututakel yidiokila ching kusu kudi Nzamb. (Jer. 10:23) Nzamb kakezap kwandamin mu milong ya pa divu. Kwikal nich chitongijok cha kusal yom mulong wa nlel-nlel kusu chikutwish kusal anch twikala “in usweral ap akad kusong mabuj.” (2 Pita 1:8) Uyakin udi anch dichuku dia Yehova dishejin swaa piswimp, ni tufanyidin kudandamen kudichingel. (Mat. 24:44) Nzamb kakezap kumubangin muntu ni muntu. Kwitiyij mu makasu minam ma Satan kukutwish kusal anch tulika kumusadil, ni kuman anch tukezap kutaninamu mu rukat ra Nzamb. Uyakin udi anch Yehova uyikatin in kumwifukwil end ni uyimen nich usey muntu ni muntu.​—Mat. 10:29-31.

¹³ Tufanyidin kwilam, mulong yitongijok ni yaku ya mangand ma Satan yikutwish kumekan piur-piur mudi yiwamp. Pakwez vurik anch Satan udi mwant sakudimban. Ching kusu kusutil ku kutesh chiyul ni yivurikish ya Dizu dia Nzamb kwawiy tukutwishina kwipuk kutudimb nich “jinsangu jamwamu.”​—2 Pita 1:16, TMK.

Kangal “Wamulondul Satan”

14. Ov, kubabesh ik kwapanay Paul kudi adia-afu amwing adinga ayangadim, ni mulong wak muntu ni muntu pakach petu ufanyidin kutesh mazu minam?

¹⁴ Tongin bil anch chijingidij chimwing cha balibal chilejen anch “Yawiy Njil ya Kumulondul Satan.” Ov, nany pakach petu ukutwisha kutesh ku chijingidij chinech? Chikwau kand, Paul utubabeshin mitapu yivud mu kutwishau in Kristu ipanina kudi Nzamb “kumulondul Satan.” (Tang 1 Timote 5:11-15, TMK.) Paul wayileja “adia-afu [amwing adinga] achidia ayangadim,” pakwez, chany chiletinay chikat kutubabesh etwawonsu. Amband inay in Kristu a mu mivu chitot ya kusambish katongap anch ading akat kumulondul Satan, pakwez yisal yau yamekesha mwamu. Ov, mutapu ik tukutwisha kwipuk kumulondul Satan ap pakad kuchingejin? Shinshikinany amboku kubabesh kwa Paul piur pa kulond kuyimp.

15. Ov, rutong ra Satan ridi risu, ni mutapu ik ujinguninay Paul mipit ya Satan?

¹⁵ Rutong ra Satan ridi ra kuninetish dizu dia ritiy retu​—mulong wa kutukangesh kulejan rusangu ruwamp. (Kuj. 12:17) Pa chinech, ndiy upakishin kutubachik tusala mijikit yikata kutushadishin chisu ap kulet katond pakach petu. Tal mutapu ujinguninay Paul kudimban kwinoku kwa Satan. “In usweral, ni kutambitamb.” Mu chirung chinech muyila winchij kurutu, chiswapel kushadish chisu chetu ku yom yikwau mudi chilakej, kusutil ku kutumol jinsangu jakad usey ap ja makasu. “In mboj.” Kulond kuyimp kukutwish kukutwal ku kutwamb makasu, kukata kusarumun kupwitijan yisu yivud. (Jinsw. 26:20) Ap anch ij ap bwat, in kutwamb makasu akat kumwimburij Satan Djabul.c “[Kwandamin mu] milong yayen.” Tukwetap mbil ya kuyipul antu akwau mutapu usadinau kwisak kwau. Mijikit yawonsu ya usweral ap yakamishina yikutwish kudiosh manangu metu ku mudimu wa kulejan Want watwinkishau kudi Nzamb. Anch twalik kusal mudimu wa Yehova, chirumburikin anch twasambish kal kumulondul Satan. Kwikil kwikal pakach pa mudimu wa Nzamb ni wa Satan.​—Mat. 12:30.

16. Ov, kutesh ku chiyul ik kukutwisha kutukwash kwipuk “kumulondul Satan”?

¹⁶ Kutesh chiyul cha Bibil kukutwish kutukwash kwipuk “kumulondul Satan.” Shinshikin chiyul chimwing cha manangu chapanay Paul. “Salany nich mushiku mudimu wa Nsalejetu.” (1 Kor. 15:58) Kwikal nich mushiku mu mijikit ya Want kukez kutulam ku ubaj wa usweral ni wa kushadish chisu. (Mat. 6:33) Kulond mazu “mawamp makutwisha kukasikesh.” (Efes 4:29) Kwat mupak wa kulik kutesh mazu mayimp ni kumapalangesh.d Dandamen kuyichingejin ni kuyilimish ambay akaritiy. Chawiy lel tukez kwikal nich mazu matungina pa ndond pa kwikal nich mazu maziyishina. “Chakwel wijikany kushakam zong . . . ni kwisadil mijikit yen ayinen.” (1 Tes. 4:11, TMK) Mekeshany kusanger kwa pakampwil kudi antu akwau, pakwez salany mwamu mu mutapu wa kuyilimish ni kulik kuyovish usany. Vurikany kand anch, tufanyidinap kukasikesh ching kusu yitongijok yetu kudi antu akwau pa milong yifanyidinau ayinau kukwat mipak.​—Gal. 6:5.

17. (a) Ov, mulong wak Yehova utubabeshin piur pa chom tufanyidinap kulondul? (b) Ov, mupak ik ukweta piur pa jinjil jisotinay Yehova anch tulondula?

¹⁷ Tujikitishin mudi ik anch Yehova utulejin patok yitufanyidinap kulondul! Kangal wavuramenany, anch kubabesh kwa Yehova kutwisambidina mu mutu wa mulong winou ni wasutina akubachikin kudi rukat rend kud etu. Ndiy usotin kutudiosh mu mar ni kusansan kudiokila ku kulondul ‘yijingidij ya njil’ ya makasu ya Satan. Jinjil jisotinay Yehova anch tulondula jikutwish kwikal jiwongina, pakwez jitwadil kwindond yiwamp nakash​—ku mwom wa chikupu. (Mat. 7:14) Kangal twidjidjek dichuku ap dimwing mu mupak wetu wa kudandamen kutesh kubabesh kwa Yehova: “Njil ya kuya yawiy ey. Yangany mwinimwa.”​—Isay 30:21.

[Mazu madia kwishin kwa paj]

Ov, Ukwakul Nchik?

Ov, mutapu ik ukutwisha kusadil amwiney kubabesh kudia mu maverse malondwilaku am?

• 2 Pita 2:1-3

• 1 Timote 1:3, 4

• 1 Timote 5:11-15

[Kamushet/​Yipich chidia pa paj wa 19]

Kupalangesh Mavuj mu Rinkind

Jinsangu jimwing ja pasak ja in Yud jilejen yibudikin ya kupalangesh mazu mayimp. Palondinay mu mitapu kushalijan, chitongijok cha rusangu riner chawiy ech.

Muntu umwing wayil mulong wa kutwambil makasu mu musumb wa muntu umwing mwin manangu. Kupwa, mazu mend mayimp mamekesha uyimp wend ni waya kwit dilikishin kudi mwin manangu, ni kumulej anch ukez kamufut chom chawonsu chikutwishay kwit. Mwin manangu wamwita chom chimwing: mwin kutwambil makasu amuleja anch aya ni akasenda kusin ukweta mavuj mukach kupwa akatula ni kupalangesh mavuj mawonsu mu rinkind. Mulong amwita kusal mwamu, mwin kutwambil makasu wasala chamulejau kupwa wachirika kudi mwin manangu.

Kupwa wamwipul: “Ov, wanlikishin kal?”

Mwin manangu wamwakula anch: “Yang bil ukumangeja mavuj mawonsu.”

“Nikutwishap kwam? Rinkind wamapalangeshin kal.”

“Chikasiken komb kupwish uyimp ukash wasadika kusutil ku mazu mey mudi kukumangej kand mavuj.”

Dilejan didi zwang. Kupwa kwa kulond, chikasiken kuchirish dizu dined, ni chikutwish kukasikan kand kupwish uyimp udikusala. Kurutu kwa kupalangesh mazu mayimp, tufanyidin kwikal nich manangu ma kuvurik anch tukat kupalangesh mavuj mu rinkind.

[Chipich chidia pa paj wa 16]

Ov, mutapu ik ukutwishau antu amwing kuyitazuk in kupumbwok mu yikumbu yau?