Ilejina Ku Dizu Dia Nzamb

Ov, Kudi Ruchingej Mulong wa Afu?

Mutu wa mulong winou ulangwishin yipul ukutwisha kwiyipul ni ulejen ndond ukutwisha kutang chakul mu Bibil wey. Atuman a Yehova akez kusanger kwisamb ney piur pa yakul yiney.

1. Ov, ruchingej ik ridiaku mulong wa afu

Pashikay Yesu ku Betaniy piswimp ni Yerusalem murund nend Lazar wading wafil kal pasutin kal machuku manying. Yesu wasota kuya kwin nzay pamwing ni Mart ni Mariy anambaz a ikundj wafa. Kupwa, chisak cha antu chakumangana. Ov, ukutwish kutongin musangar wovau Mart ni Mariy pamuvumbulau Lazar kudi Yesu?​—Tang Yohan 11:20-24, 38-44.

Mart witiya kapamp kamwing anch afu akez kuvumbuk. Atushalapol ashinshamena a Yehova ijik kal anch mu machuku ma kurutu, Nzamb ukez kuvumbul afu chakwel ashakama kand pa divu.​—Tang Job 14:14, 15.

2. Afu adi mu mwikadil ik?

Ap anch usu wa mwom utazukinau anch “spiritu,” uyilamin antu ni anam, tudiap aspiritu ashicha kusu mu mujimbu wa mbij bwat. (Mulej 3:19; Disambishil 7:21, 22) Tudi yitang yimekena ni mes yatangau nich rufunfut. (Disambishil 2:7; 3:19) Anch wong wetu wafa, yitongijok yetu yikat kusheshik. Chawiy lel, pavumbukay, Lazar kalondap chom ap chimwing padingay mufu mulong afu kijap chom ap chimwing.​—Tang Kuseng 146:4; Mulej 9:5, 10.

Chimeken patok anch, afu ka kumanangap mar. Chawiy lel, kulejan anch Nzamb ukat kuyimesh antu mar kupwa kwa rufu mu karung ka kasu madi makasu. Chidi kumusal Nzamb. Chitongijok cha kuyimesh antu mar mu karung ka kasu chikatap kumusangaresh. ​—Tang Jeremiy 7:31.

3. Ov, tukutwish kwambamb ni afu?

Afu kakutwishap kulond. (Kuseng 115:17) Pakwez pakatau kulond angel ayimp kudi antu, awiy akutwish kudimban ni kumekesh anch udi spiritu wa muntu wafila kal. (2 Pita 2:4) Yehova ulikishining kupak kwambamb ni afu.​—Tang Kuvurik Yiyil 18:10, 11.

4. Ov, anany akeza kuvumbuk?

Mwin ngand yisu yezina, ma mamiliyon ma antu adia mwi nzay akez kavumbuk. Ap antu amwing asala yom yiyimp mulong kamwijikap Yehova akez kuvumbuk.​—Tang Luka 23:43; Midimu 24:15.

Antu akezau kuvumbul akez kwilej uyakin piur pa Nzamb ni kumekesh ritiy rau mudiay Yesu kusutil ku kumuziyil ndiy. (Kujingunik 20:11-13) Antu inay akuchirika ku mwom ni kusal yom yiwamp akez kusanger mwom wa chikupu pa divu. Pakwez, antu amwing akuvumbuka akez kudandamen kusal yom yiyimp. Awiy akez kavumbuk mulong wa “disanguk dia kufa nich.”​—Tang Yohan 5:28, 29, TMK.

5. Ov, divumbuk ditulejin ik piur pa Yehova?

Divumbuk ditwishikin mulong Nzamb wamutuma Mwanend chakwel apana mwom wend mulong wetwetu. Chawiy lel, chidi chijingidij cha ranaken ra Yehova.​—Tang Yohan 3:16; Rom 6:23.

Mulong wa kutan jinsangu jivud, tal shapitre wa 6 ni 7 wa buku winou, wapalangeshau kudi Atuman a Yehova. Chom ik chakin kamu chifundishinay bibil?

[Chipich chidia pa paj wa 22]

Adam amutanga nich rufunfut