Ikalany Piswimp Ni Nzamb

Dikasikesh Kudi Antu Akweta Michim Yinenganena

MBAND umwing mwin Kristu wading urishina nich runeng rikash mu mwom wend walonda anch: ‘Natonga anch Yehova kankatilap ap kangitiyijinap.’ Ndiy witiyija amwinend anch Yehova wafanyina kwikal kulemp ni ndiy. Ov, chakin kamu Yehova udi kulemp ni in kwifukwil end akutwisha kukwachik nich kunenganan? Chakul chongojina chidi mu mazu mapepidilau kudi spiritu utumbila ma nfund a kuseng David, mafundinau mu Kuseng wa 34:18.

David wading wij anch ushon ukash wela kwikal nau in kwifukwil ashinshamena a Yehova. Padingay uchid nsand, David wading ni kuchin mulong Saul, mwant muyimp wasota kumujip. David wachinina mwin ndond mwamanay anch Saul kakezap kumutan​—akankuny a musumb wa Gat wa mu teritwar wa in Filistin. Pakwez kupwa kwa kumujingunin, David wapanda kusutil ku kwimekesh mudi chizarik. David wapan uyaj kudi Nzamb mulong wamupandisha, kulondulija ni yom yiney yamushikena, ndiy wafunda Kuseng wa 34.

Ov, David witiyija anch Nzamb uding kulemp ni antu akata kurish ni mar mulong wa runeng ap iyovila anch kafanyidinap mudi mwamanay? David ufundin anch: “[Yehova] udi piswimp nau awiy akweta michim yinenganena, ukat kuyipandish akweta michim yitudishila.” (Verse 18) Tushinshikinany amboku, mutapu maletina mazu minam dikasikesh ni ruchingej.

“[Yehova] udi piswimp.” Buku umwing ulondin anch dizu dined didi “mutapu wa kusanger kulond anch Mwant ukata kutesh nawamp ni kutal, ni uding tayad kuyikwash ni kuyikol antwend.” Chikasikeshin pa kwijik anch Yehova uyimening antwend. Ndiy ukata kuman milong yikata kuyishiken mu “machuku ma kwinsudiel,” ni wij yovil yidia mu michim yau.​—2 Timote 3:1; Midimu 17:27.

“Antu akweta michim yinenganena.” Mu yishankur yimwing, “michim yinenganena” yisambidin kuburen kwa rukat. Pakwez mwin kwilej Bibil umwing ulondin anch mazu ma kuseng malondidil piur pa “mar makash ni runeng.” Mwaning ap in kwifukwil ashinshamena a Nzamb akutwish yisu yimwing kurish nich michim yinenganena.

“Antu akweta michim yakad ruchingej.” Antu aziyina akutwish kwiyov mudi kafanyidinap ku mes kwau ayinau akutwish kushadish yisu yimwing ruchingej rau rawonsu. In kukarumun Bibil amwing alondin anch dizu dined akutwish kudikamurum anch “antu inay kakwetap chom chiwamp piur pa yom ya kurutu.”

Ov, Yehova wiyoviling nchik pantaliken ni “antu akweta michim yinenganena” ni “antu akweta michim yakad ruchingej”? Ov, ndiy uding kulemp nau, ni kwiyov anch kafanyidinap rukat rend ni kubangin kwend? Chinyim ni chinech! Mudi nvaj mwin rukat uyilamin ni kuyikasikesh anend adia mu mar, Yehova udi piswimp ni in kumwifukwil end adidila mulong wa kuyikwash. Ndiy usotining kuyikasikesh ni kuyitudish antu akweta michim yinenganena ni akweta michim yakad ruchingej. Ndiy ukutwish kuyinkish manangu ni usu uswiridinau mulong wa kurish nich yoziu.​—2 Korint 4:7; Jakob 1:5.

Ov, mulong wak usotinap kukimb mutapu ukutwisha kumushejin Yehova? Nzamb mwin riy winou ukanin anch: “Nishich kand . . . pamwing nau antu itudishina, akweta michim yinenganena.”​—Isay 57:15.