Ov, Kwijik Kudi kwa Usey?

“Nading ni mivu dikum pinasambisha kwend ni ansand. Kwinsambishil, twading ni kukwatijan ku makas ni kususujan. Kupwa twasambisha kukwatijan ku ukundj ni wimband ni yisal kushalijan ya kumanijan. Pinawanyisha mivu 15, nasambisha kusal mudimu, kupwa amakundj a ku mudimu asambisha kwinlondul ni asota kumanijan nam. Nasota kwikal nich mushiku ni kuyilondul ambay nam a ku mudimu mu yom yawonsu yasalau. Nading nisotin kwitiyik kudi arund nam, ni chinech chashikena tupamp tuvud ku yisal ya kumanijan kwa ikundj ni mband.”—SARAH,a AUSTRALIE.

OV, CHINECH chikutwish kukukashimwish anch watesh anch Sarah amulila mu dijuku dipanina mu milong ya relijon? Anvaj end apakisha kumulil kusutil ku yany ya Bibil. Pakwez Sarah watonda mwikadil windjing.

Antu amwing akutwish kwikal ku mutambu wa chiyul chakwatay Sarah. Awiy amana anch chitongijok cha Bibil chidi chakad usey pa chirung chau. Antu akwau amening kwikil kupwitijan pakach pa kulond anch nidi mwin kwipan ku relijon ni kulondul mulad wa mwom ulikidila yisal ya masandj.

Ov, chidi cha usey kwijik anch nlel unou ushich kwambatan nich chifundishinay Bibil piur pa kumanijan kwa ikundj ni mband? Bibil ulejen anch ‘wadiokala ku Spiritu wa Nzamb, ukutwish kuyilej antu.’ (2 Timote 3:16) Anch witiyij anch Nzamb wayitanga antu, ni Bibil udi Dizu diokala ku spiritu wa Nzamb, chinech chimekeshin anch yom yilejenay pa mulong winou yidi ya usey kwijik.

Cha ushon, mulong antu avud kijap kwau chifundishinay Bibil piur pa kumanijan kwa ikundj ni mband. Antakel a chirelijon alondina anch akat kulimish Bibil, akat kulet yitongijok yakad kwambatan ni yifundishinau mu Bibil. Chawiy lel, mulong winou waurila maegliz mavud.

Pa ndond pa kuchingejin pa yilondinau antu akwau, mulong wak ukutwishap kusadil minit yikemp mulong wa kukimbijol amwiney pa mulong winou? Mutu wa mulong ulondwilaku ukat kushinshikin yipul yitan yipwilau yisu yivud piur pa yilondinay Bibil mulong wa kumanijan kwa ikundj ni mband. Mu mutu wa mulong winou ukez kutan yakul yakin yimedina pa yom yifundishinay chakin kamu Bibil. Mutu wa mulong wa nsudiel ulondwilaku ukez kulejan mulong wak mipak tukutwisha kukwat yidi ya usey.

[Dizu didia Kwishin kwa paj]