YIPUL YIKATAU ANSAND KWIYIPUL

Ov, Kulalijan ku Kan Kud Kamu Kulalijan?

Kukwatijan ni rapor wa biro ukata kusop ni kuchidij milong ya majej wa mu États-Unis, antu avud ipulau akweta mivu pakach pa 15 kushik ku mivu 19 alalijadinap kal ku kan. Sharlene Azam, mwin kufund buku ulondina anch Kulalijan ku Kan ud Mutapu Usu wa Kuladikijan Uchuku (mu Inglish) urumburil anch: “Anch wambamb nau asand [piur pa kulalijan ku kan], akukulej anch chidiap kwau chom chiyimp. Kud awiy, kakumanangap kwau anch kud kulalijan.”

Ey utongin nchik?

Akul anch mwaning ap bwat ku yipul yilondwilaku ey.

Ov, changadim ukutwish kwimish anch amulangal ku kan?
1. Mwaning
2. Bwat
Ov, kulalijan ku kan kukwet ubaj?
1. Mwaning
2. Bwat
Ov, kulalijan ku kan kud kamu kulalijan?
1. Mwaning
2. Bwat

Uman ik udiaku?

Fanakesh yakul yey ni yilondwilaku ey.

Ov, changadim ukutwish kwimish anch amulangal ku kan?

Chakul: Bwat. Dined diawiy diyingishin dikata kuyibachik antu avud kutong nayimp anch kulalijan ku kan kuyipinap kwau.
Ov, kulalijan ku kan kukwet ubaj?

Chakul: Mwaning. Muntu ukata kulalau ku kan ukutwish kuyel mayej ma michim matazukinau anch hépatite (A ap B), kasil, mbes, SIDA, ni kasend.
Ov, kulalijan ku kan kud kamu kulalijan?

Chakul: Mwaning. Chisal chin chawonsu chitina kusadin yid ya ruvaj ya muntu mukwau—mud kulalijan kwa ikundj ni mband, kulalijan ku kan, kulalijan kwi mpany, ni kukwatol ku yid ya ruvaj ya muntu mukwau—yawonsu yiney kud kamu kulalijan.

Mulong wak ud mulong ujim?

Shinshikin ma verse am ma Bibil makwatijadina ni mulong utadina kulalijan ku kan.

Bibil ulondin anch: ‘Mulong riner rawiy rusot ra Nzamb . . . Anch wipukany yisal ya masandj.’—1 Tesalonik 4:3.

Mazu ma Grek makarumwinau anch “yisal ya masandj” mamekeshin mitapu yawonsu ya kulalijan pol pa uruw, kuwejaku ni kulalijan kwa ikundj ni mband, kulalijan ku kan, kulalijan kwi mpany, ni kukwatol ku yid ya ruvaj ya muntu mukwau. Muntu ukata kusal yisal ya masandj ukutwish kwikal ni yibudikin yiyimp, ni chibudikin chipandakena kuyip nakash kud kuyipish urund wend ni Nzamb.—1 Pita 3:12.

Bibil ulondin anch: “Muntu mwin [kusal yisal ya masandj] ukat kuyipish mujimbu wend wawonsu.”—1 Korint 6:18.

Kulalijan ku kan kukat kulet yibudikin yiyimp ku mujimbu ni mu spiritu. Kukutwish kuyipish kand manangu ma muntu. Buku Mutapu wa Kwisambin Yom ya Kulalijan ni Aney (mu Inglish) ulondin anch: “Kwiyov anch akusadin kal, kunenganan ni kwiyov anch ukwetap mwin kukuchidij yidiap kwau yovil yikatay muntu kwikal nich ching anch amulal mu kusadin yid ya ruvaj. Yovil yawosu yiyimp yikutwishay muntu kwikal nich kupwa kwa kumulal mu mutapu uyimp, ukutwish kand kuyikal nich yovil yiney anch amulal mu mutapu win wawonsu uyimp. Kulalijan kud kamu kulalijan.”

Bibil ulondin anch: “Yam [Yehova] Nzamb wen, nikata kukukwashany.”—Isay 48:17.

Ov, witiyijin anch yijil ya Nzamb piur pa kulalijan yikutwish kukukwash? Ap utongin anch yikukangeshin kusal yom ukatina? Mulong wa kukukwash kwakul ku yipul yiney, tong bil piur pa njil mukata kwendin motak yivud, mudia yijidik ni yijingidij nakash. Ov, umen yijingidij ni yijidik yiney mud yom yikutekidina mimbu anch mud yom yikuchidijina? Yom ik yikushikena anch ey ni in kwendish akwau walikany kuyilimish?

Mwin kwendish motak wadiul kal yijingidij ya mwi njil ni wapumbukin kal mwi njil yiyimp — Yijil ni mbil yidia mwi njil yikutekidin mimbu, pakwez yikuchidijin. Chilik chimwing, yijil ya Nzamb yikutekidin mimbu kanang, pakwez yikukingin

Chid chilik chimwing ni mbil ja Nzamb. Anch walik kujilimish, ukwangul kamu yom ukukuna. (Galatia 6:7) Buku Kulalijan kwa Manangu (mu Inglish) ulondin anch: “Anch wadiul yitiyij yey ni mbil jey ni wasambisha kusal yom yiwakad kuman anch yiwapin, ukwikalap ni kalimish mulong wa amwiney”. Pakwez, anch washakam kukwatijan ni mbil ja Nzamb, ukumekesh anch ukwet mikadil yiwamp. Ni cha usey nakash, ukwikal ni kom kishitwila.—1 Pita 3:16.