Ov, Aburaham Wadinga Nany?

KUDI antu akemp adinga nich chibachikin chikash pa marelijon madia mu mangand. In Yuda, a Musulman ni in Kristu, amening anch Aburahama amumekesha mudi “muntu mujim mu Bibil” ni mudi “chilakej chikash cha ritiy.” Bibil umutazukin ndiy anch “ngakiril wa in kwitiyij awonsu.”—Rom 4:11.

Ov, mulong wak antu amulimishin nakash Aburaham? Mulong wa chom chimwing, Aburaham ushalijadin ni antu akwau mulong udi muntu umwing kusu wisambidinau mu Bibil anch murund nend a Nzamb—amutazukin mwamu tupamp tusatu!—2 Jinsangu 20:7; Isay 41:8; Jakobu 2:23.

Pakwez, ku mutambu ukwau, Aburaham wading muntu mudi etu. Ndiy warisha nich yikokujol ya chilik chimwing ni yetwetu—kupwa watwisha kurish nich. Ov, usotin kwijik mutapu ik wasalay mwamu? Tal yilejenay Bibil piur pa muntu winou wijikena.

Kwapaminay

Pavadikay mu muvu wa 2018 K.C.C., Aburaham wapamina mwingand ya Ur. (Disambishil 11:27-31) Ur wadinga musumb ujim ni ukweta mapit mavud. Ni kwading antu avud in kwifukwil akish. Tera tatukwend a Aburaham wading pamwing ap ukat kuyisadil akish kushalijan. (Joshua 24:2) Chikwau kand, Aburaham watonda kumwifukwil ching kusu Yehovab pa ndond pa kuyifukwil akish a anzamb akwau akad mwom.

Ov, chom ik chamubachika Aburaham chakwel akwata mupak winou? Mulong, Aburaham wavadika pasuta mivu 150 kurutu kwa rufu ra Sem mwanend a Nowa. Anch washakama pamwing ni ipal winou, ov, chom ik chelay kwilej? Aburaham wela kwilej kusutil kudi Sem amwinend piur pa mutapu wapanday ku Mabeb. Watwisha kand kwilej usey wa kumwifukwil Yehova, Nzamb wamulama Sem ni dijuku diend ku Mabeb.

Ap anch wileja kusutil kudi Sem ap kusutil kudi antu akwau, Aburaham witiya yom yilejay piur pa Nzamb. Yehova “ukat[a] kupak michim” pamutalay Aburaham, ndiy wamana chom chimwing chiwamp mu muchim wa muntu winou—ni wamukwasha Aburaham chakwel ikala muntu muwamp.—Jinswir 17:3; 2 Jinsangu 16:9.

Mwom Wend

Aburaham wasala yom yivud ni yisangareshina mu mwom wend, yimwing yading yikash pakwez kiyadingap yakad usey. Talany bil yom yikemp yasalay.

▪ Padingay Aburaham mwingand ya Ur, Nzamb wamuleja anch adiokala mwingand mwavadikinay chakwel aya mwingand mukezay kumulej. Ap anch Aburaham nenday Sara kadingap ija yom yawonsu kachom pa kachom—piur pa ndond yikuyau ap mulong wak Nzamb wading ni kuyilej adiokala aya—awiy aziyila. Kupwa Aburaham nenday Sara eza kushakam mwi ntent mwingand ya Kanan, ashakam mudi angez mu mwom wau wawonsu.—Midimu 7:2, 3; Hebereu 11:8, 9, 13.

▪ Padingay Aburaham nenday Sara akad an, Yehova washilamu anch ukez kwikadish muchid ujim kusutil kudi Aburaham. Yehova walonda kand anch majuku mawonsu madia pa divu ukez kumayukish kusutil kudiay Aburaham. (Disambishil 11:30; 12:1-3) Yehova walejana kand anch kushilamu kwinoku kwading kwakin. Ndiy wamuleja Aburaham anch anend akez kwikal avud nakash mudi atutumbu adia mwiur.—Disambishil 15:5, 6.

▪ Padingay Aburaham nich mivu 99 ni Sara mivu 90, Yehova wayileja anch akez kuval mwan. Chinech chamekana ku mes kwa antu anch chikezap kusalik, pakwez Aburaham nenday Sara ileja anch kwikil ‘chimukasikena Yehova kusal.’ (Disambishil 18:14) Pasuta muvu umwing, pawanyishay mivu 100, Aburaham wavala mwan ikundj, wamupila dijin anch Isak. (Disambishil 17:21; 21:1-5) Chawiy lel Nzamb wapana kushilamu anch kusutil kudi Isak, antu akez kuyiyukish.

▪ Pasuta mivu yivud, Yehova wamwita Aburaham chom chimwing chikash: Wamuleja Aburaham anch amupana mwanend mukatish, Isak, ap anch nsand winou wading mujich ni wakad an. Ap anch ndiy wova kuyip nakash mulong wa kumushadish mwanend, Aburaham wirijeka chakwel kusal chamulejay Nzamb chakwel kumupan Isak mudi mulambu. Aburaham wading nich ruchingej anch Nzamb ukwet usu wa kumusangul Isak, anch chitwishikin mulong wa kusal anch Kushilamu kwend kwikala kwakin. (Hebereu 11:19) Pa chisu chinech chikash pasambishay Aburaham kumupan mwanend, Nzamb wamulikisha, wamulam Isak mwom. Ndiy wamujikitisha Aburaham mulong wa kuziyil kwend kwamushena. Kupwa Yehova wachirikina kand piur pa kushilamu kwend kwapanay kudi Aburaham.—Disambishil 22:1-18.

▪ Kupwa kusal mivu 175 ya mwom wend, Aburaham wafa. Bibil ulejen anch, ndiy “wafil mu upal uwamp,” ni kuwejaku kand anch ndiy “wading wananap kal nakash.” (Disambishil 25:7, 8) Chawiy lel, Aburaham wamana kuwanyin kukwau kwa kushilamu kwapanay kudi Nzamb—chimeken patok anch ndiy wasala mivu yivud kurutu afa mu chisambu.—Disambishil 15:15.

Yasalay

Aburaham upandikenamu nakash antu awonsu adingaku mu relijon ap mu rusangu ra antu kudiosh pasak. Ni nlel unou, rusangu ra mwom wend, riletin chilakej cha usey nakash chitufanyidina etwawonsu kwimburij. (Hebereu 11:8-10, 17-19) Shinshikinany amboku yinying ya ku mikadil yiwamp yamekeshay Aburaham. Tukez kusambish ni yitazukinau pamwing ap anch mwikadil wend wijikena nawamp—ritiy.

[Mazu madia kwishin kwa paj]

[Kamushet kadia pa paj wa 4]

Chom cha Usey Nakash mu Rusangu ra Bibil

Mu mashapitre mend matan ma kusambish, mukand wa Bibil wa Disambishil ulejen rusangu ra mwom wa antu avud ashinshamena, kuwejaku ni Abel, Enok, nenday Nowa. Chikwau kand, ukwet mashapitre makwau masutina pa uvud wa 15 misambidina piur pa mwom wa muntu umwing—Aburaham.

Chikwau kand, Bibil wisambidin chakusambish yom yimwing ya usey nakash piur pa Aburaham. Chilakej, mu rusangu ra mwom wa Aburaham mudi . . .

▪ referans wa kusambish umutazukin Nzamb anch Rikibu, ap mwin Kuyiking atushalapol end.—Disambishil 15:1; tal Kuvurik Yijil 33:29; Kuseng 115:9; Jinswir 30:5.

▪ isambidin kapamp ka kusambish piur pa kutek ritiy mudiay Nzamb.—Disambishil 15:6.

▪ kudi pa ndond ya kusambish kumekan kwa dizu muprofet.—Disambishil 20:7.

▪ mudi referans wa kusambish wisambidin piur pa rukat ra nvaj.—Disambishil 22:2.